01/05/2026
BISITA NI STO NIÑO
Mayo 01, 2026 | Biyernes
IKALABING ISANG BIYERNES NG DEBOSYON SA SEÑOR SANTO NIÑO DE QUINGUA
Sa Ngalan ng Ama, ng Anak, at ng Espiritu Santo. Amen.
PAGSISISI
Panginoon kong Hesukristo, Diyos na totoo at tao namang totoo, gumawa at sumakop sa akin, pinagsisisihan kong masakit na masakit sa tanang loob ko ang dilang pagkakasala ko sa Iyo, na Ikaw nga ang Diyos ko, Panginoon ko at Ama ko na iniibig kong lalo sa lahat. Nagtitika akong matibay na matibay na di na ako muling magkakasala sa Iyo, at nagtitika naman akong magkumpisal ng dilang pagkakasala ko. Umaasa akong patatawarin Mo rin alang alang sa Iyong Mahal na Pasyon at pagkamatay Mo sa Krus dahilan sa akin.
Siya Nawa.
PAGHAHANDOG SA ARAW ARAW
Oh, katamis tamisang Jesus!
Inihahandog ko po sa Iyo ang aking kaluluwa; sapagkat dahil sa pag-ibig mo sa sangkatauhan, ikaw ay nagkatawang tao at upang magbigay ng halimbawa ng kababaan, ikaw ay sumilang sa isang yungib na sinisilungan ng mga hayop, at Ikaw ay napalagay lamang sa isang sabsaban. Alang alang nga sa pag-ibig Mo at pagpapakasakit, ako'y lalong nagtitikang matibay na hindi na muli ng magkakasala sa Iyo. At nawa'y pagkalooban mo po ako ng Iyong Mahal na Biyaya na aking pakaiingatan, sa hangad na kung ako'y mamatay, ako'y maging marapat sa kaluwalhatian ng langit, Siya Nawa.
PANALANGIN SA ARAW ARAW
Oh, maawaing Jesus!
Nananalig po akong lubos na Ikaw ay Diyos na totoo, Bugtong na Anak ng Diyos at tunay na anak ni Maria. Sa pagkakilala ko sa Iyong mabutihan at pagkamahabagin, pinupuri po Kita at sinasamba. At sa kabanal banalan Mong Pangalan hinihiling kong ako'y pagkalooban Mo po ng Iyong biyaya na hinihingi ko sa Pagdedebosyon na ito, kung baga'y maging marapat sa Iyong kaluwalhatian at ikagagaling ng kaluluwa ko. Siya Nawa.
PANALANGIN SA SEÑOR SANTO NIÑO DE QUINGUA
Poong Señor Santo Niño ng Quingua,
aming Pintakasi at minamahal na Batang Hari, kami’y buong pagpapakumbabang lumalapit sa Iyo.
Ikaw ang aming gabay at ilaw sa aming mga landas, at ang umaakay sa amin patungo sa Ama naming nasa langit.
O Munting Santo Niño ng Nabuag, ang aming puso at buhay ay iniaalay sa Iyo.
Sa Iyo kami nananalig, sa Iyong kadakilaan kami umaasa, at sa Iyong banal na pangalan
kami ay magpupuri magpakailanman.
Salamat sa Iyong patnubay at pagkalinga sa aming mga pamilya at pamayanan. Pagpalain Mo ang aming nayon, ang aming bayan at yakapin ang bawat deboto na namimintuho at nagmamahal sayo. Panatilihin Mo kaming laging nagkakaisa sa pananampalataya at matatag sa pag-ibig.
O Poong Hesus, Señor Santo Niño ng Quingua, kami ay sa Iyo ngayon at magpakailanman.
Amen.
(Magdasal ng Tatlong Ama Namin, Aba Ginoong Maria at Luwalhati sa Ama)
PANGHULING PANALANGIN SA ARAW ARAW
Oh katamis tamisang Jesus!
Talos kong Ikaw ay bukal ng Pag-ibig at madlang awa. Ikaw ay makapangyarihan, ngunit makatarungan at mapagsaklolo. Hindi Mo pinababayaan ang humihingi sa Iyo ng anumang tulong.
Dahil diyan, ako'y dumudulog sa Iyo ngayon. Oh, Mahal na Sto Niño at isinasamo ko po sa Iyo na bigyan ng katahimikan ang aking kaluluwa, ilayo ako sa mga tukso at sa ano mang kasamaan at hulugan ako ng Iyong Mahal na Biyaya. Siya Nawa.
DALIT SA KAPURIHAN NG MAHAL NA POONG STO NIÑO
Sanggol na Hulog ng Langit
Sugong tunay ng Pag-ibig
Tulungan Mo kami, Bunying Sto Niño
Anak Ka man ni Bathala
at taong lubhang Dakila,
Nang kunan kang halimbawa
Ikaw'y sumilang na aba
Sa sabsabang walang gara't
Sa dayami napahiga.
Tulungan Mo kami, Bunying Sto Niño
Sa gitna ng kadiliman
ng yungib Mong sinilangan
Ganda Mo'y maputing ilaw,
Pamawi ng kapanglawan,
At hininga Mo'y samyo namang
Nagpapasigla sa Buhay.
Tulungan Mo kami, Bunying Sto Niño
Nang ibalita ng Anghel
Ang pagsilang Mo sa belen,
Mga pastol ay dumating
At Matapos kang malasin
Sila'y lumuhod na tambing
At sumambang mataimtim
Tulungan Mo kami, Bunying Sto Niño
Ilang araw nang lumipas
Dumalaw ang tatlong Pantas
Haring Mago yaong tawag
Isang tala ang sa landas
Sa sinilangan ng Mesiyas.
Tulungan Mo kami, Bunying Sto Niño
At Sila nga ay nag-alay
Ginto: kahuluga'y yama't
Lahat ng kapangyarihan.
Kamanyang : awang dalisay
Mira : mga kapaitan
Sa pagsakop Mo sa tanan.
Tulungan Mo kami, Bunying Sto Niño
Gayunman, ikaw'y mababa't
Mabait sa Iyong kapwa;
Kalaro Mong mga bata
Sa talino Mo'y humanga
Tao kang kahit dakila,
Katoto Mo'y mga dukha.
Tulungan Mo kami, Bunying Sto Niño
At nang ikaw at tumungo
Sa Herusalem, sa Templo
Ikaw at nakipagtalo
Sa marurunong na tao;
Lalong hinangaan dito
Ang karungang taglay Mo.
Tulungan Mo kami, Bunying Sto Niño
Lalo ka ngang napagbantog
Mga aral Mo'y nagsabog
Ng liwanag sa sansinukob
Ngunit dilim di matapos
Kaya, naghirap kang lubos
Sa pagtalima sa Diyos!
Tulungan Mo kami, Bunying Sto Niño
Sanggol na hulog ng langit
Sugong tunay ng pag-ibig
Ang pagsamo ko't aking nais
At mailigtas sa panganib
Sa mga tukso't ligalig
Sa mundong bayan ng Hapis.
Tulungan Mo kami, Bunying Sto Niño
Sumaatin nawa ng tulong ng Maykapal
Siya Nawa.
Sumapayapa nawa ang kaluluwa ng mga Yumao sa Grasya ng atign Panginoong Diyos. Siya Nawa.
Manatili nawa sa atin ang biyaya ng makapangyarihan Diyos Ama, Anak at Espiritu Santo. Amen.
Sa ngalan ng Ama, ng Anak, at ng Espiritu Santo. Amen.
