20/09/2025
Balaan usab ang pagkasuko. Adunay kasuko nga dili makaguba apan nagtul-id. Mao kini ang kasuko nga dili magpatunghag kalagot kondili kaluoy. Mao kini ang kasuko nga nagagikan sa pagbarog atubangan sa inhustisya, gikan sa pagyatak sa dignidad sa uban, ug gikan sa pagtuis sa kamatuoran.
Bisan ang Dios nasuko sa kadautan sa tawo, apan ang Iyang kasuko dili gikan sa pagdumot o pagpanimalos. Kini usa ka kasuko nga nagagikan sa Iyang gugma ug hustisya. Mao kini ang nawong sa gugma nga dili makaagwanta sa sobra, ug hustisya nga dili gustong magpakahilom atubangan sa pagdaugdaug. Mao nga gihinginlan sa Ginoo ang mga mapahitas-on sulod sa Templo. "Kini mao ang balay sa akong Amahan". Ang tawo usa usab ka templo, busa ang iyang dignidad balaan, uban sa iyang mga katungod. Ang bisan unsang matang sa pagyatak, pagpangawat ug pag-abuso sa tawo direkta nga pagpasipala sa iyang Balaan nga Balay.
Busa, ang balaan nga kasuko usa ka panaghiusa sa mga pagbati sa Ginoo. Usa kini ka panawagan nga dili magpakahilom, dili mopatigbabaw ang daotan, kondili mobarog alang sa kamatuoran, alang sa hustisya, ug alang sa dignidad sa matag binuhat. Kini nga kasuko dili lamang usa ka emosyon, kondili usa ka tawag sa pagbuhat sumala sa gugma sa Dios ug sa paghiusa sa Iyang buhat sa pagpasig-uli sa dignidad ug kalinaw sa kalibutan.
Kung masuko ka atubangan sa inhustisya, bakak, kahakog, pangawat ug pagpatay... paglipay ug pagpasalamat sa pag-ambit sa grasya niining Balaan nga kasuko. Ayaw itugot nga ang siga sa emosyon nga nagputli sa katilingban ug sa kasaysayan niini mawala.
Usahon ta ang atong tingog sa Balaan nga Kasuko nga nagsinggit alang sa hustisya nga gihigugma sa Diyos.
