St. Padre Pio Chapel - Pililla

23/09/2025

Misa sa Kapistahan ni San Padre Pio ng Pietrelcina.

Banal na Misa - 7 N.U

Punong tagapagdiwang

Rev. Fr. Jeffrey B. Quintela
Shrine Rector/Parish Priest

Padre Pio Chapel Pililla RizalSeptember 23, 2025 7am Mass

22/09/2025

𝑴𝑨𝑳𝑰𝑮𝑨𝒀𝑨𝑵𝑮 𝑲𝑨𝑷𝑰𝑺𝑻𝑨𝑯𝑨𝑵
𝑺𝑨𝑵 𝑷𝑨𝑫𝑹𝑬 𝑷𝑰𝑶 𝑵𝑮 𝑷𝑰𝑬𝑻𝑹𝑬𝑳𝑪𝑰𝑵𝑨
𝑺𝒆𝒕𝒚𝒆𝒎𝒃𝒓𝒆 23

O aming Ama, biniyayaan Mo nang lubos ang Inyong lingkod na si Padre Pio ng mga kaloob ng Espiritu. Itinatak Mo po sa kanya ang limang mahal na sugat ni Kristong napako sa krus, upang magbigay saksi sa mapagligtas na pagpapakasakit at Muling Pagkabuhay ng Inyong Anak. Puspos ng biyaya, inakay ni Padre Pio sa Kumpisalan ang marami sa ikaliligtas ng kanilang kaluluwa. Puspos ng paggalang at matimyas na debosyon sa pagdiriwang ng Banal na Misa, inanyayahan niya ang maraming kalalakihan at kababaihan na mapalapit kay Hesus sa Sakramento ng Eukaristiya.

Sa pamamagitan ni Padre Pio, lakas-loob po kaming dumudulog sa inyo na ipagkaloob po Ninyo sa amin ang biyayang ito (Intension). Amen.

Papuri sa Ama, at sa Anak, at sa Espiritu Santo.
Kapara noong una, ngayon, at magpasawalang hanggan. Amen.

21/09/2025

IKA-SIYAM NA ARAW NG NOBENARYO

O Padre Pio, ikaw po na nagmamahal nang lubusan sa Inang Simbahan, ipanalangin mo po kami. Nawa ang Panginoon ay magpadala ng mga kabataang may pusong laang maglingkod sa Simbahan bilang Pari o Relihiyoso. Nawa silang mga lingkod ng Inang Simbahan ay mapuspos ng lakas, karunungan at kabanalang kinakalangan sa pangangalaga sa mga anak ng Diyos. Ipanalangin mo po sa Mahal na Ina na tulutan na ang lahat ng tao sa buong sanlibutan ay magkaisa, at akayin silang lahat sa pangangalaga ng kanyang anak na si Hesus.
Siya nawa.
Ama Namin... Aba Ginoong Maria... Luwalhati...

“Sikaping manatiling tapat sa Banal na Simbahang Katolika sapagkat siya lamang ang Esposa ni Kristong hatid ay kapayapaan. Sa kanya mo lamang masusumpungan si Hesus na Hari ng Kapayapaan sa Banal na Sakramento.”
- Padre Pio

20/09/2025

IKA-WALONG ARAW NG NOBENARYO

O Padre Pio, ipinamalas mo po ang iyong matimyas na pag-ibig at malasakit sa iyong mga itinuring na mga anak kay Kristo, nang sila’y iyong ipagbayad-puri sa pamamagitan ng pag-aalay ng iyong dugo para sa kanila. Nagsusumamo po kaming mga hindi ka na nakagisnan at nakatagpo sa buhay na ito, na kung maaari kami’y iyo na ring ampunin at ibilang na iyong mga anak. Sa pamamagitan nito, kami’y magtatamasa rin ng iyong pangangalaga, pag-gabay at lakas. Idinudulog namin sa Ama na lagi kaming pagpalain hanggang dumating ang sandaling tayo’y magkatagpo sa Kanyang piling.
Siya nawa.
Ama Namin... Aba Ginoong Maria... Luwalhati...

“Tunay na ako’y wala nang mahihiling pa; kung sakaling pagkakalooban ako ng Diyos ng isang hiling (kung mamarapatin); kung saan Kanyang wiwikain, “Pasok sa Kalangitan!” At sa sandaling iyon marapatin ng Diyos na ako’y isama Niya sa langit matapos na ang lahat ng aking mga anak at ang lahat ng umasa sa aking pagkapari ay nakapasok na rito.”
- Padre Pio

19/09/2025

IKA-PITONG ARAW NG NOBENARYO

O Padre Pio, agad mo pong ipinagkakaloob ang kaluwagan at kapayapaan, ang biyaya at tulong, ang paglaya sa kasalanan sa lahat ng mga dumudulog sa iyo. Ikaw po ay buong pusong nakikiisa sa pagdurusa ng sangkatauhan dulot na rin ng kasalanan; upang maging konsolasyon ng lahat ng mga nagdurusa. Damayan mo po kami, O Padre Pio, sa aming mga paghihirap at ipagkaloob mo po sa amin ang mga biyayang aming hinihiling, na ang lahat ng makasalanan ay magsisi at ang kanilang nanlalamig na puso ay makasumpong ng panibagong sigla sa pagsunod kay Hesukristo; gayundin po para sa mga nagsusumikap na maging tapat, na huwag silang panghinaan ng loob.
Siya nawa.
Ama Namin... Aba Ginoong Maria... Luwalhati...

“Kung mamasdan lamang ang kagandahan ng isang kaluluwang pinamamahayan ng biyaya ng Diyos, lahat ng makasalanan at hindi sumasampalataya ay agad na magbabalik-loob.”
- Padre Pio

18/09/2025

IKA-ANIM NA ARAW NG NOBENARYO

O Padre Pio, batid po namin ang labis na paghihirap na dinanas ng inyong katawan bunga ng inyong mga tiniis na sakit at karamdaman, ngunit sa kabila nito buong tiyaga pa rin ninyong tinutulungan. Inaaruga at mahimalang pinagaling ang mga maysakit na nagdurusang tulad ninyo. Pasiglahin nawa kami ng inyong diwa na buong tapang na harapin ang anumang pagsubok at dusa sa buhay. Bahaginan po ninyo kami ng inyong lakas nang sa gayo’y matularan namin kayo. Ipanalangin mo po kami lalo’t higit ang mga maysakit, na sa pamamagitan na rin ng Mahal na Ina, ay gumaling nang tuluyan, nang sa gayo’y muli silang makabalik sa pagpapasalamat, pagpupuri at paglilingkod sa Diyos magpakailanman.
Siya nawa.
Ama Namin... Aba Ginoong Maria... Luwalhati...

“Kapag nabatid kong ang isa’y may karamdaman sa pag-iisip, katawan o kaluluwa, magmamakaawa ako sa Diyos na palayain siya sa kanyang karamdaman. Nakahanda akong akuin ang kanyang karamdaman nang sa gayon siya’y maligatas at hihilingin kong mapakinabangan niyang lubos ang bunga ng aking pagpapakasakit.”
- Padre Pio

17/09/2025

IKA-LIMANG ARAW NG NOBENARYO

O Padre Pio, gayon na lamang ang iyong pag-ibig para sa ikabubuti ng lahat ng mga kaluluwa, lalo’t higit ang mga nagdurusa sa Purgatoryo, kung kaya sa tuwina’y inaako mo ang kanilang pagdurusa bilang handog na kabayaran sa kanilang kaparusahan. Ipanalangin mo po kami at hilingin mo po sa Diyos na ipagkaloob Niya sa amin ang ganoon ding malasakit, pakikiramay at pag-ibig para sa mga kahabag-habag na kaluluwa sa purgatoryo, nang sa gayon ay maibsan naman namin ang kanilang paghihirap at maging daan ng kanilang ikaluluwalhati.
Siya nawa.
Ama Namin... Aba Ginoong Maria... Luwalhati...

“Diyos ko, idinadaing ko sa inyong hayaan ninyo akong siyang magbata ng kaparusahang laan para sa makasalanan at para sa mga kaluluwa sa purgatoryo. Dagdagan N’yo pa yaring kaparusahang aking babatahin nang sa gayon agad N’yong mapatawad ang mga makasalanan at mapalaya sila mula sa Purgatoryo.”
- Padre Pio