21/05/2026
■ 𝐏𝐀𝐌𝐈𝐌𝐈𝐍𝐓𝐔𝐇𝐎 𝐓𝐔𝐖𝐈𝐍𝐆 𝐇𝐔𝐖𝐄𝐁𝐄𝐒 𝐊𝐀𝐘 𝐒𝐀𝐍 𝐉𝐔𝐀𝐍 𝐍𝐄𝐏𝐎𝐌𝐔𝐂𝐄𝐍𝐎
■ MGA DALIT KAY SAN JUAN NEPOMUCENO:
Pintakasing tinuturan
ng puring iniingatan
Gawin ka naming uliran,
O San Juan, sa kabanalan.
Tulad ni San Juan Bautista,
ikaw ay bungang nilalang
ng matatandang magulang,
na sa Birhen ay umaasa,
madali kang nagpakita ng
hilig sa kagalingan;
Gawin ka naming uliran,
O San Juan, sa kabanalan.
Sa panganganak sa iyo,
buong bayan ay nagtaka
sa nakikitang himala
sa bubungan ng bahay mo;
na parang maraming ilaw,
mga bituin kung titigan;
Gawin ka naming uliran,
O San Juan, sa kabanalan.
Sa Nepomu sa Bohemia,
lumabas ka sa liwanag,
ikaw ay nagpakasipag
sa pangangaral sa Praga;
at maraming nagkasala
ang naakay sa katuwiran;
Gawin ka naming uliran,
O San Juan, sa kabanalan.
Maraming lubhang biyaya
ng Poong Birheng Maria
sa iyo’y nagpakilala
na para kang anak niya;
Doktor, Martir na masigla,
at Birhen sa kalinisan;
Gawin ka naming uliran,
O San Juan, sa kabanalan.
Kay Wenceslao na nagnasa
na isulit sa kaniya
ang sikreto ng konsiyensya
ng asawa niyang reyna;
inilaban mong masigla
ang Mahal na Kalihiman;
Gawin ka naming uliran,
O San Juan, sa kabanalan.
Sa malaking pagkagalit
ni Wenceslao na malupit,
at hindi ka nga mapilit
sa hindi dapat isulit;
binalaan kang mahigpit
ng hatol na kamatayan.
Gawin ka naming uliran,
O San Juan, sa kabanalan.
Nalunod ka’t namatay
sa kalaliman ng ilog,
at doon ka inihulog
mula sa taas ng tulay;
inibig ng haring banday
siya mong maging libingan.
Gawin ka naming uliran,
O San Juan, sa kabanalan.
Bangkay mo’y lulutang-lutang
sa gabi ay nagniningning,
at nakuha’t nailibing,
minamahal at iginalang;
at walang naalang-alang
sa haring natitigilan.
Gawin ka naming uliran,
O San Juan, sa kabanalan.
Sa limang bituing masinag
na inabuloy ng langit
sa bangkay mong ililigpit,
ay nabantog at natanyag
ang nakamtan mong liwanag
sa buhay na walang hanggan;
Gawin ka naming uliran,
O San Juan, sa kabanalan.
Sa pagkabaon mo sa lupa
tatlong siglong mahigit,
nagningning at marikit
ang iyong mahal na dila;
himalang kahanga-hanga
tanda ng iyong kabaitan.
Gawin ka naming uliran,
O San Juan, sa kabanalan.
Pintakasing tinuturan
ng puring iniingatan
Gawin ka naming uliran,
O San Juan, sa kabanalan.
Antifona:
Ito ang tunay na Martir na dahil sa ngalan ni Kristo’y nagbuhos ng kaniyang dugo; hindi siya natakot sa mga babala ng hukom, ni hindi niya hinangad ang luningning ng mga karangalan sa lupa, kaya sumapit siyang maluwalhati sa kaharian ng Langit.
Ang Banal ay mananariwang parang Azucena at parating namumulaklak sa harapan ng Diyos.
*****
■ BISITAHIN, I-LIKE, at I-FOLLOW ang:
facebook.com/SimbahanNgMalibay
youtube.com/
twitter.com/TataJuanMalibay
instagram.com/TataJuanMalibay
