San Antonio de Padua Chapel - Fuentes - Diocese of Tagum

12/01/2026

Help us build our home! 🙏✨

We are selling "Tickets for a Cause" to help the construction of our Church of San Antonio de Padua sub-center. Every ticket is a huge help in turning this dream into a reality for our community.

🗓️ Draw Date: February 22, 2025

If you’d like to support us or grab a ticket, please send us a message or visit us at the parish. Every bit of help counts!

Please share this to help us spread the word. God bless! ❤️🧱

26/12/2025

𝐏𝐀𝐒𝐊𝐎 𝐍𝐆 𝐏𝐀𝐑𝐎𝐊𝐘𝐀 𝟐𝟎𝟐𝟓: UMAWIT, SUMAYAW SA LIWANAG NI KRISTO🎄✨

Usa ka talagsaon ug masadyaong pagsaulog sa paghiusa ug pagpasalamat ang gipahigayon sa katilingban sa San Antonio de Padua Sub-Center. Nagtapok ang tibuok parokyano aron isaulog ang diwa sa Pasko og pag pasalamat sa atong mga apostolado. Ang inyong walay paghubas nga dedikasyon, oras, ug talento maoy nagdala og kahayag ug paglaum sa atong komunidad.

Highlights sa Selebrasyon:

💃 District Zumba: Napuno sa enerhiya ug kadasig ang matag district samtang nagkahiusa sa sayaw ug ehersisyo.

🎶 Choral Contest: Matahum nga mga awit nga nagsilbing halad ug pagdayeg, nga nagpakita sa garbo ug talento sa parokya.

Mapasalamaton Kami: Dili mamahimong ingon niini kamalampuson ang tanan kung wala ang giya ug suporta nila Rev. Fr. Ian Jade I. Balistoy ug Sr. Mary Jean Ortega. Dako usab ang among pasalamat sa tanang mga Sponsors nga manggihatagong mipaambit sa ilang grasya alang sa atong Raffle Draw nga naghatag og dugang kalipay sa matag usa.

Kini nga selebrasyon nagpahinumdom kanato nga ang tinuod nga kahulogan sa Pasko makita diha sa gugma ug kinasingkasing nga pag-alagad. Hinaut nga ang atong kasingkasing magpabiling abli sa grasya sa Dios samtang kita magpadayon sa pagpakaylap sa Iyang kahayag sa tibuok kalibutan.

Maayong Pasko ug salamat sa inyong pagpangalagad! ⛪❤️

23/12/2025

Homily || Ika-walo nga Misa de Gallo

Ang Santos nga Misa gipangulohan ni Rev. Fr. Ian Jade I. Balistoy

Mga igsoon, ang atong Ebanghelyo karon nagdala kanato sa mga panghitabo sa pagkatawo ni San Juan nga magbubunyag. Gisugilon niini ang talagsaong kahimtangan sa iyang pagkatawo ug sa paghatag kaniya og ngalan.

Sumala sa naandan sa mga Judio, walo ka adlaw human matawo ang usa ka bata ginabuhat ang seremonyas sa pagtuli, ug niini usab nga adlaw ginahatag ang ngalan sa bata. Kasagaran, kung ang bata lalaki ug kinamagulangan, ang ngalan sa amahan o sa pinakadool nga paryente maoy ipangalan kaniya. Ilabi na kang Zacarias nga usa ka pari, gilauman nga sundon nila ang tradisyon aron mapreserbar ang ilang kaliwatan sa pagkapari.

Apan sa atong Ebanghelyo, lahi ang nahitabo. Sa dihang gusto sa mga tawo nga Zacarias ang ipangalan sa bata, miinsist si Isabel nga Juan ang iyang ngalan. Katingad-an kini kay sa ilang kultura, dili ang inahan ang mohatag og ngalan, kondili ang amahan. Bisan pa man nga amang pa si Zacarias niadtong panahona, gipangutana gihapon siya, ug sa iyang pagsulat sa pulong nga “Juan ang iyang ngalan”, dayon mibalik ang iyang tingog.

Dinhi makita nga klaro kaayo nga ang Dios nag-uban kanila.

Unsa diay ang kahulugan sa ngalan nga Juan? Sa Hebreohanon, ang Yohanan nagpasabot nga “God is gracious” – ang Dios mangihatagon. Ug dinhi mosulod ang unang dakong punto sa atong Ebanghelyo: ang kinabuhi ni Juan mismo nagsangyaw sa kamanggihatagon sa Dios.

Mga igsoon, ang Dios mangihatagon sa matag usa kanato. Bisan pa sa mga pagsulay, kasakit, ug kalisdanan nga atong giatubang sa kinabuhi, wala gayud kita pasagdi sa Dios. Ang kamatuoran nga buhi pa kita karon, nakamata, ug nakasimba, usa na ka buhing pamatuod nga ang Dios nagpadayon sa pagpaambit sa iyang grasya.

Tinuod, daghan kita og mga pangayo nga wala pa matuman. Apan dili nato kalimti nga daghan usab kaayong grasya nga anaa na sa atoang kinabuhi nga wala man gani nato gipangayo. Maayo nga sa pag-atubang nato sa Kapaskuhan, mangutana kita sa atong kaugalingon: Kinsa o unsa ang grasya sa Dios sa akong kinabuhi karon?

Sama kang Zacarias ug Isabel, klaro sa ilang kinabuhi nga maayo ang Ginoo kanila, ug nakita usab kini sa ilang mga silingan. Hinaot nga ato usab kining itanom sa atong kasingkasing: maayo ang Ginoo kanato, bisan pa man sa mga pagsulay nga atong giagian.

Ikaduhang punto sa Ebanghelyo: kung ang Dios mangihatagon, kita usab nga nakadawat sa iyang grasya gitawag nga mahimong mangihatagon. Ang Dios naghatag nga walay pagpangayo og balos; busa kita usab, sa atong pagpaambit, dili unta maghulat og sukli.

Dili tanan nga naghatag mahimong tawgon nga mangihatagon. Ang paghatag nga nagpaabot og balos dili na kamanggihatagon, kundili investment. Ang kinabuhi ni San Juan nagpahinumdom kanato nga ang tinuod nga pagpaambit naggikan sa pag-ila nga gi-grasyahan kita sa Dios.

Mga igsoon, kining duha mag-uban gayud: ang Dios mangihatagon, ug kita mahimong mangihatagon usab. Ang tawo nga tinuod nga mangihatagon wala mahadlok mohatag, kay siya nasayod nga dili siya pasagdan sa Ginoo.

Pasalamatan nato ang Dios sa iyang walay sukod nga grasya. Pangayoon nato ang grasya nga kita mahimong usa ka katawhan nga mangihatagon, usa ka katawhan nga andam mopaambit, ug usa ka katawhan nga nagsalig sa kamanggihatagon sa Dios.

23/12/2025

Homily | Ika-pitong Misa de Gallo

Ang Santos nga Misa gipangulohan ni Rev. Fr. Ian Jade I. Balistoy

Mga igsoon, adunay usa ka panultihon nga nagaingon: “Tell me what you sing, and I will tell you what lies in your heart.” Kun unsa ang atong ginakanta, mao usab kun unsa ang atong ginabati. Ilabi na kita mga Pilipino nga ganahan kaayo og kanta.

Sa atong Ebanghelyo karon, nadungog nato ang gitawag nga Magnificat, nga mas nailhan isip Awit ni Maria. Kining awita nagpasundayag kung unsa gyud ang naa sa kahiladman sa kasingkasing ni Maria sa dihang iyang giduaw ang iyang ig-agaw nga si Isabel. Kung atong hunahunaon pag-ayo, makapangutana kita: Unsay naa sa kasingkasing ni Maria nganong nakaawit man siya?

Tulo ka punto ang atong pamalandungan, mga igsoon, nga naghulagway sa Awit ni Maria.

Una: Ang Awit ni Maria usa ka awit sa kalipay.

Hinaot unta niining panahon sa pagsugat sa kapaskuhan, ang atong mga awit ug ang atong mga kasingkasing magpasibaw sa tinuod nga kalipay. Sama sa atong nadungog sa Awit ni Maria, nagmalipayon siya diha sa Ginoo nga iyang Manunubos.

Niadtong panahona, anaa na si Hesus sa sabakan ni Maria, ug ang iyang pagdawat ug pagpadayon sa Ginoo sa iyang kinabuhi mao ang hinungdan sa iyang tinuod nga kalipay. Usa kini ka pahinumdom kanato, mga igsoon, nga kon buot kita magmalipayon, kinahanglan usab nato dawaton si Hesus sa atong kasingkasing.

Ang kalipay sa kapaskuhan wala diha sa Christmas bonus, sa mga regalo, o sa nindot nga sinina, kondili anaa sa pagdawat kang Hesus sa atong kinabuhi. Ang Awit ni Maria usa ka buhing testamento nga ang tinuod nga kalipay makita lamang kon anaa si Hesus sa atong kasingkasing.

Ikaduha: Ang Awit ni Maria usa ka awit sa pagpasalamat.

Daghan kaayo kita og katuyuan nganong mosimba kita ug moduol sa Ginoo. Apan hinaot unta nga ang atong pagsimba karon dili tungod lang kay adunay kita gipangayo, kondili una sa tanan, tungod kay nagpasalamat kita sa Dios.

Alang kang Maria, klaro kaayo nga ang tinubdan sa iyang kalipay mao ang Dios. Ang pagpasalamat usa ka pulong nga nagagikan sa kasingkasing nga malipayon. Ang tinuod nga malipayon, kahibalo moingon og salamat.

Sa atong pagsugat sa kapaskuhan, hinaot nga dili nato kalimtan ang pagpasalamat sa Ginoo sa tanang grasya nga atong nadawat niining tuiga. Dili usab unta nato palabyon ang tuig 2025 nga wala nato mailhi ug mapasalamatan ang mga tawo nga nahimong kabahin ug hinungdan sa atong kalampusan sa atong panaw. Sama ni Maria, hinaot nga ipaambit usab nato ang atong kalipay ug pasalamat pinaagi sa pagsangyaw sa kaayo sa Dios uban ang kasingkasing nga mapasalamaton.

Ikatulo: Ang Awit ni Maria usa ka awit sa paglaom.

Nagpabilin nga malaumon si Maria bisan pa sa kalisod sa iyang kahimtang. Ang iyang gisudlan nga kahimtanga dili lalim posibleng siya maulawan, pasagdan, o bisan mamatay. Posible usab nga dili niya matuman ang dakong tahas nga gisangon sa Dios ngadto kaniya.

Apan bisan pa niini tanan, nagpabilin siyang malipayon, mapasalamaton, ug labaw sa tanan, malaumon sa Dios. Nisalig siya nga ang Dios dili gyud siya pasagdan sa iyang pag-atubang sa dakong misyon.

Hinaot, mga igsoon, nga kita usab makat-on sa pag-awit dili lang sa atong mga ngabil, kondili sa atong kinabuhi sa awit nga puno sa kalipay, pasalamat, ug paglaom sa Dios. Pinaagi niini, kauban ang atong tagsa-tagsa ka pamilya, atong mahatagan og mas lalom ug mas tinud-anay nga kahulugan ang pagsugat sa kapaskuhan.

23/12/2025

Homily || ika-limang Adlaw sa Misa de Gallo

Ang santos nga misa gipangoluhan ni Rev. Fr. Ian Jade I. Balistoy

Mga igsoon, niining ika-limang adlaw sa atong pagtukaw ug pagpangandam sa taliabot nga Kapaskuhan, atong nadungog ang sugilanon sa Pagpamdos ni Maria. ang pagpahibalo sa anghel ngadto kang Maria sa kabubut-on sa Dios. Kining bahina sa Balaang Kasulatan gitawag nga “The Yes of Mary to the Plan of God.”

Ang pag-uyon ni Maria sa kabubut-on ug plano sa Dios nahimo siyang prototype of faith pananglitan ug sumbanan sa pagtuo sa tanang mga magtutuo kang Hesus. Siya ang unang tinon-an sa pag-abot sa atong Manunubos. Sa atong pagpadayon sa pagpangandam sa Kapaskuhan, hinaot nga ato usab kining ipatuhop sa atong kasingkasing ang mga hiyas nga gipadayag ni Maria sa iyang kinabuhi sa dihang nagpaabot siya sa pag-abot sa Manluluwas.

Tulo ka punto ang atong pamalandungan sa kinabuhi ni Maria nga hinaot ato usab nga awaton sa atong kaugalingong kinabuhi:

Una: Pagkamalipayon – “Rejoice!”
Sa dihang mipakita ang anghel Gabriel kang Maria, ang unang pulong nga iyang gisulti mao ang “Paglipay!” (Rejoice!) Kini nga pulong gipuy-an ni Maria sa tibuok niyang kinabuhi. Mao usab kini ang tema sa ikatulong simana sa Adbiyento ng pagkamalipayon.

Ang tinuod nga kalipay, mga igsoon, dili naka-base sa mga kahimtangan sa kinabuhi, kondili sa pagkasayod nga ang Ginoo nag-uban ug nagpanalangin kanato. Dili kita magmalipayon tungod lang sa kadaghan sa atong madawat niining Kapaskuhan. Kay kung ang atong kalipay naka-base lang sa mga lumalabay nga butang, kwarta, handa sa lamesa dili gyud kini tinuod ug malungtaron nga kalipay.

Si Maria malipayon dili tungod kay wala siyay problema, kondili tungod kay nasayod siya nga ang Ginoo nag-uban kaniya. Mao usab kini ang hagit sa Kapaskuhan alang kanato: magmalipayon sa kanunay, bisan unsa pa ang kahimtangan sa kinabuhi.

Ikaduha: Ayaw Kahadlok Pagkamadasigon ug Kaisog
Miingon ang anghel kang Maria, “Ayaw kahadlok.” Dili lalim ang tahas nga gidawat ni Maria isip inahan sa Manluluwas. Ang iyang “oo” nagdala kaniya og mga hagit ug peligro. Apan gidasig siya sa anghel nga magmaisugon.

Kini usab ang pahinumdom alang kanato karon. Daghan sa ato ang ginakab-otan sa kahadlok ug kabalaka ilabi na kon makita nato nga ang uban nagmalampuson na, unya kita daw nagpabilin. Apan sama sa giingon sa anghel, “Ayaw kahadlok kay gikahimot-an ka sa Dios.”

Ang kaisog ni Maria wala magpasabot nga wala siyay kahadlok; maisugon siya bisan pa man nahadlok, tungod kay nasayod siya nga gikahimot-an siya sa Dios. Sa niining Kapaskuhan, magmaisugon kita ug dili magpalamon sa atong mga kabalaka, kay nasayod kita nga ang Ginoo nag-uban kanato.

Ikatulo: Puloy-anan sa Dios Ang Espiritu Santo Nagpuyo Kanato
Miingon ang anghel kang Maria, “Mokunsad diha kanimo ang Espiritu Santo, ug ang gahom sa Dios magpabilin diha kanimo.” Tungod niini, si Maria nahimong sumbanan sa tanang magtutuo. Iyang gidala si Hesus dili lang sa iyang tiyan, kondili sa iyang tibuok kinabuhi.

Bisan human sa pagkahimugso ni Hesus, nagpabilin ang Espiritu Santo kang Maria. Siya nahimong templo sa Dios, puloy-anan sa Ginoo. Mao kini ang kahulugan sa “Theotokos”—Teo (Dios) ug Tokos (nagdalang). Si Maria ang nagdalang Dios.

Isip mga binunyagan, kita usab puloy-anan sa Espiritu Santo. Hinaot nga atong puy-an ang atong kinabuhi isip mga anak sa Dios, nga gidasig sa Espiritu Santo sa pagbuhat sa tanang butang sumala sa kabubut-on sa Ginoo.

Mga igsoon, hinaot nga sa atong pagpangandam sa Kapaskuhan, sama sa maisugon nga pag-uyon ni Maria, ablihan usab nato ang atong kasingkasing sa pagdawat kang Hesus. Hinaot nga motuhop sa atong kinabuhi ang mga hiyas sa pagkamalipayon, pagkamadasigon, ug tinuoray nga pagdawat sa Manluluwas.

Hinaot nga si Hesus nga nagpakatawo mahimong
tinuod nga welcome sa atong mga kasingkasing.

23/12/2025

Homily || Ika upat nga adlaw sa Misa de Gallo

Ang Santos nga Misa gipangulohan ni Rev. Fr. Ian Jade I. Balistoy

Mga igsoon, ania kita karon sa ika-upat nga adlaw sa atong pagpangandam alang sa Pasko. Adunay panultihon nga nag-ingon: "Kon dili kabubut-on sa Dios, dili nato ipugos; apan kon kabubut-on sa Ginoo, kini gayod mahitabo."

Ang atong Ebanghelyo nagdala kanato sa sugilanon sa kinabuhi ni Zacarias ug Isabel. Sila nagpuyo og usa ka dalaygong kinabuhi atubangan sa Dios ug nagtuman sa Iyang mga sugo. Bisan pa man sa ilang pagkamaayong tawo, duna silay kamingaw sa ilang kasingkasingwala silay anak. Sa kultura sa mga Judio kaniadto, ang bata giisip nga grasya gikan sa Dios, ug ang kakuwang niini usa ka dakong haw-ang alang sa usa ka magtiayon.

Kini nga kasinatian ni Zacarias ug Isabel maka-relate kanato tungod kay kitang tanan aduna man usab mga "haw-ang" sa atong kasingkasing. Tingali mao kini ang rason ngano nga naningkamot kita sa paghuman niining siyam ka adlaw nga kabuntagon tungod sa atong mga pag-ampo nga buot natong madunggan sa Dios.

Unsa man ang tulo ka punto nga atong makutlo gikan sa ilang kinabuhi?

1. ZACARIAS: "God Remembers Us" (Ang Dios Nahinumdom Kanato)

Ang ngalang Zacarias nagagikan sa Hebreohanon nga pulong: Zacar (to remember) ug Ias/Yah (Yahweh). Sa ato pa, ang kahulugan sa iyang ngalan mao ang "Ang Dios Nahinumdom." Usahay, bation nato nga wala madungog ang atong mga pag-ampo ug makaingon ta nga nakalimtan na kita sa Ginoo. Apan kini nga Ebanghelyo nagpahinumdom kanato: ang Dios kanunayng nahinumdom kanimo. Taliwala sa mga pagsulay, ang kamatuoran nga wala ka kalimti sa Dios magahatag kanato og kadasig sa pagpadayon sa atong panaw.

2. GIDUNGOG SA DIOS ANG IMONG PAG-AMPO

Sa pagpakita sa Anghel kang Zacarias, ang unang mensahe mao kini: "Ayaw kahadlok, Zacarias, kay gidungog sa Dios ang imong pag-ampo." Mao kini ang kasagarang mulo nato nga ang atong balik-balik nga pag-ampo daw wala panumbalinga. Apan sa saktong panahon (In His time), ihatag gayod sa Dios ang katumanan sa atong mga tinguha kon kini nahiuyon sa Iyang kabubut-on. Ayaw hulata nga mahuman ang siyam ka adlaw usa nimo ihalad ang imong pag-ampo; karon pa lang, ihalad na kini. Ang atong debosyon dili lang tungod kay "wish" kini, kondili usa kini ka pagpadayag sa atong pagtuo nga walay imposible sa Ginoo sama ni Isabel nga bisan tiguwang na, nakapanamkon gihapon.

3. ANG GINOO MITABANG KANATO

Sa dihang nagsabak na si Isabel, siya miingon: "Karon, mitabang na gayod kanako ang Ginoo." Mao kini ang ikatulo nga Maayong Balita: Dili kita nag inusara. Naa tay mga problema, apan ang Ginoo anaa kanunay andam motabang kanang Hinaot nga ang kasinatian ni Zacarias ug Isabel magdala kanato sa mas lawom nga pagtuo ug paglaom. Hinaot nga mapahinumdoman kita kanunay: Ang Dios nahinumdom kanato, ang Dios namati kanato, ug ang Dios nagatabang kanato.

19/12/2025

🎄 PASKO NG PAROKYA 2025 🌟
​Maghiusa ta sa pagpasalamat ug pagmaya, mga ka-parokya sa San Antonio de Padua! Atong saulogon ang tinuod nga diwa sa Pasko ang pagkatawo ni Hesus nga nagdala kanato og paglaom ug gugma. ❤️🙏

📅 Disyembre 20, 2025 (Ugma!)
🕗 8:00 AM
​Kitakits ninyong tanan sa atong simbahan! Malipayong Pasko!

​

18/12/2025

HOMILY | Ikatulong Adlaw sa Misa de Gallo

Ang Santos nga misa gipangulohan ni Rev. Fr. Ian Jade I. Balistoy

Mga igsoon, aduna gayud mga higayon sa atong kinabuhi nga dili mosunod sa atong mga plano ang nahitabo. Usahay makuratan ta sa Ginoo, ug sa mga plano atong masabtan nga mas nindot diay ang iyang plano kaysa sa atoang kaugalingon. Kinahanglan lang ta mosalig.

Mao kini ang atong nadungog sa Ebanghelyo karon kang San Jose ug Birheng Maria. Aduna silay plano nga magpakasal, apan nabag-o ang tanan sa dihang nasayran ni Jose nga nagmabdos na si Maria. Isip usa ka matarong nga tawo, si Jose dili lang tigbantay sa balaod, apan tigbantay sa kasingkasing nga puno sa kaluoy. Imbis silotan si Maria, iyang gipili ang pagpanalipod ug pagpasaylo.

Sa damgo, gipadayag sa Dios pinaagi sa anghel ang iyang dakong plano. Imbis ipugos ni Jose ang iyang kaugalingong plano, iyang gisunod ang kabubut-on sa Dios. Mao nga iyang gidawat si Maria ug gisalig ang tanan sa Ginoo.
Ang kasinatian ni San Jose dili layo sa atoang kasinatian. Daghan kita og damgo, laraw, ug mga pangandoy bisan sa siyam ka adlaw sa Misa de Gallo. Apan unsa man kung dili dayon matuman? Usahay masuko ta, ganahan ta makontrol ang tanan, ug mao kana ang hinungdan sa kaluya sa pagtuo.

Mga igsoon, sama kang San Jose, gi-awhag kita sa pagsalig sa plano sa Dios, kay ang iyang plano mas dako ug mas maayo kaysa sa atoang plano. Sa niining santos nga Misa, mangayo kita sa grasya sa usa ka kasingkasing nga masaligon, andam maminaw, ug andam motuman sa kabubut-on sa Ginoo.

18/12/2025

HOMILY | Ikaduhang Adlaw sa Misa de Gallo

Ang Santos nga misa gipangulohan ni Rev. Fr. Ian Jade I. Balistoy

Mga igsoon, sa Ebanghelyo karon gipakita kanato ang taas nga kaliwatan ni Hesus napulo ug upat ka kaliwatan gikan kang Abraham hangtod kang Haring David, gikan kang David hangtod sa pagkabihag sa Babilonia, ug hangtod sa pagkatawo sa Mesiyas. Kining lista sa mga ngalan dili lang kay kasaysayan, apan pahinumdom nga sa dihang ang Dios nagpakatao, iyang gisudlan ang tinuod nga kasaysayan sa katawhan.

Ang kaliwatan ni Hesus dili perpektoadunay sala, kapakyasan, ug kagubot. Apan bisan pa niana, gipili sa Dios nga magpakatao sulod niining kontekstoa, nagpasabot nga gidawat niya ang tibuok sa atong pagkatao, bisan ang atong kahuyang ug pagkamakasasala.
Kini usa ka dakong pahinumdom sa Kapaskuhan: aduna ba kitay pagdawat sa usag-usa sulod sa pamilya? Usahay ang pamilya mao pa ang lugar diin magsugod ang kasakit, tungod sa taas nga expectations, kakulang sa pagsinabtanay, ug kakulang sa pagpasaylo.

Sa pagsugat sa Kapaskuhan, ilabi na sa Noche Buena nga mag-uban kita sa pagkaon. hinaut nga atong himoon ang atong pamilya nga luna sa pagdawat, pagpaminaw, ug paghigugma. Sama kang Hesus, ato usab untang dawaton ang matag-usa, kay ang kapakyasan dili pasabot nga nahilayo na sila sa pamilya.

Mga igsoon, ang atong hagit sa pagsugat sa Kapaskuhan mao ang pagsundog kang Hesus, nga midawat sa kinatibuk-an sa iyang kaliwatan. Himoa unta nato ang atong pamilya nga luna sa panaghigugmaay usa ka tulunghaan diin ang matag-usa gipahinumdoman nga sila gidawat, sila gipaminaw, ug labaw sa tanan, sila gihigugma.

16/12/2025

HOMILY || UNANG Adlaw sa Misa de Gallo

Ang Santos nga Misa gipangulohan ni Rev. Fr. Ian Jade I. Balistoy

Ang atong unang adlaw sa pagsaulog sa Santos nga Misa de Gallo, nga gitawag usab og Misa de Aguinaldo (Misa sa Gasa), usa ka dakong pahinumdom kanato sa kahulugan sa tinuod nga pagpangandam sa Kapaskuhan. Kini nga mga kadlawon, atong giubanan si Maria sa iyang pagpanamkon ug pagdala kang Hesus sulod sa siyam ka bulan usa ka panaw nga puno sa kahago ug kalipay, nga atong gisaulog uban kaniya karon.
Ang Misa de Gallo dili lang usa ka tradisyon nga atong buhaton tungod kay naa kitay gipangayo sa Ginoo. Hinunoa, kini usa ka panahon sa pasalamat sa paghinumdum sa tanang grasya nga atong nadawat sulod sa usa ka tuig. Panagsa na lang ba ta mosulod sa simbahan aron magpasalamat? Kini ang hagit nga gihatag kanato sa Misa de Gallo: ang paghatag og panahon alang sa atong kaugalingon aron pasalamatan ang Dios sa iyang walay puas nga pagkamaanggihatagon.

Sulod niining siyam ka kadlawon, atong igahin ang atong mga kasingkasing sa pagpasalamat sa pinakadakong gasa nga gihatag sa Dios kanato si Hesus, ang iyang Bugtong Anak. Ang Kapaskuhan dili lang mahitungod sa mga regalo nga atong madawat o mahatag, apan labaw sa tanan, mahitungod sa pagpaambit sa presensya sa Dios ngadto sa atong isigkatawo.

Sa Ebanghelyo, gihisgutan si San Juan Bautista ingon usa ka suga nga nagadan-ag. Apan ang iyang kahayag wala nagpasibaw sa iyang kaugalingon kundili nagtultol sa uban ngadto sa Dios. Mao usab kini ang hagit kanato karon: nga ang atong kinabuhi mahimong suga nga maggiya sa uban ngadto kang Hesus. Pinaagi sa atong presensya, mga buhat, ug pamatasan, hinaut nga makaila ang uban kang Kristo.

Sa niining Kapaskuhan, hinaut nga dili lang kita mahimong mga manan-aw, kundili mga buhing saksi sa gugma sa Dios. Pasalamatan nato ang Ginoo sa iyang dakong gasa ug pangayoon nato ang grasya nga mahimo kitang maayong panag-ingnan, aron ang matag usa madasig sa usa ka makahuluganon ug tinuod nga pagsaulog sa Kapaskuhan.
-------------------------------------
𝐒𝐭𝐚𝐲 𝐈𝐧𝐟𝐨𝐫𝐦𝐞𝐝. 𝐒𝐭𝐚𝐲 𝐂𝐨𝐧𝐧𝐞𝐜𝐭𝐞𝐝.
𝑳𝒊𝒌𝒆 𝒂𝒏𝒅 𝑭𝒐𝒍𝒍𝒐𝒘 𝒐𝒖𝒓 𝑺𝒐𝒄𝒊𝒂𝒍 𝑴𝒆𝒅𝒊𝒂 𝑨𝒄𝒄𝒐𝒖𝒏𝒕𝒔

14/12/2025

GAUDETE SUNDAY | HOMILIYA SA ATONG PARI

“Pagmalipayon kamo kanunay diha sa Ginoo.”

Sa atong selebrasyon karon sa Gaudete Sunday, ang Simbahan nag-awhag kanato nga magmalipayon samtang nagpadayon kita sa pagpangandam alang sa umaabot nga Kapaskuhan. Kini nga kalipay dili lang tungod sa kalibutanong kalipay, kondili usa ka tinuoray ug lalom nga kalipay nga naggikan sa Dios.

Isip mga binunyagan, gipahinumdoman kita nga itanom unta sa atong kasingkasing ang kalipay bisan pa sa atong kahimtangan karon. Daghan kanato ang nag-atubang og pagsulay, kasakit, ug kalisdanan ug usahay makapangutana kita, unsaon man nato pagmalipayon sa taliwala sa mga pagsulay sa kinabuhi?

Sa iyang homiliya, gipasiugda sa atong Pari nga ang tinuoray nga kalipay naggikan sa kahibalo nga anaa ang Ginoo, ug nga ang iyang panalangin nagpadayon sa atong kinabuhi. Bisan pa sa mga pagsulay, dili kita biyaan sa Dios; siya nag-uban kanato ug naggiya kanato padulong sa paglaum.

Gipahinumdoman usab kita nga si Hesus mao ang sentro sa atong paglaum ug kalipay. Pinaagi Kaniya, atong makita ang kahayag sa kaugmaon ug ang kalampusan sa atong mga pangandoy. Busa, dili kita mawad-an og paglaum, kundili magpadayon sa pagtan-aw sa unahan uban ang pagtoo.

Sa pagtapos, gi-awhag kita sa atong Pari nga magpaabot sa pag-abot sa atong Ginoo uban ang malipayon nga kasingkasing. Ang kalipay usa ka grasya usa ka gasa nga atong pangayoon ug dawaton gikan sa Dios, nga magpabilin kanato karon ug kanunay.

Ang Santos nga Misa gipangulohan ni Rev. Fr. Ian Jade I. Balistoy

---------
🔔 𝐒𝐭𝐚𝐲 𝐈𝐧𝐟𝐨𝐫𝐦𝐞𝐝. 𝐒𝐭𝐚𝐲 𝐂𝐨𝐧𝐧𝐞𝐜𝐭𝐞𝐝.
📌 𝑳𝒊𝒌𝒆 𝒂𝒏𝒅 𝑭𝒐𝒍𝒍𝒐𝒘 𝒐𝒖𝒓 𝑺𝒐𝒄𝒊𝒂𝒍 𝑴𝒆𝒅𝒊𝒂 𝑨𝒄𝒄𝒐𝒖𝒏𝒕𝒔 💕

02/12/2025