29/10/2022
29 October 2022
Ang Santos nga Ebanghelyo sumala kang San Lucas
Lucas 14:1,7-11
Lucas 14:1
Usa niana ka adlaw nga igpapahulay, sa nahisulod siya aron sa pagkaon didto sa balay sa usa ka punoan nga Fariseo, siya ilang gipaniiran.
Lucas 14:7
Ug sa pagkaalinggat niya nga ang mga dinapit nanagpili sa halangdong mga lingkoranan sa kan-anan, sila gisuginlan niya sa usa ka sambingay, nga nag-ingon kanila,
Lucas 14:8
"Sa diha nga dapiton ikaw ni bisan kinsa ngadto sa kombira sa kasal, ayaw paglingkod sa dapit nga halangdon, basi adunay iyang dinapit nga labi pang inila kay kanimo;
Lucas 14:9
ug unya ang nagadapit kaninyong duha moduol ug moingon kanimo, `Pahawa diha ug maoy palingkora kining tawhana,` ug unya mobalhin ka nga naulawan ngadto sa labing ubos nga dapit.
Lucas 14:10
Apan sa diha nga dapiton ikaw, umadto ug lumingkod ka sa labing ubos nga dapit aron inig-abut sa nagadapit kanimo, basig moingon siya kanimo, `Higala, uswag ra didto sa ibabaw`; sa ingon niana kapasidunggan ikaw sa atubangan sa tanan nga managlingkod tambong sa kan-anan uban kanimo.
Lucas 14:11
Kay ang matag-usa nga magapahitaas sa iyang kaugalingon, igapahiubos; ug ang magapaubos sa iyang kaugalingon, igapahitaas."
Pamalandong:
Maayong adlaw Brothers and Sisters, sa atong Ebanghelyo karong adlawa gitambagan kita sa atong Ginoong Hesukristo nga magpaubos kanunay. Sa sugilanon nga gigamit ni Hesukristo, nauwawan ang mga bisita nga nanglingkod didto sa halangdon nga lingkuranan. Mga Egsuon ang mensahe ni Hesukristo nga kung magpakataas kita sa atong kaugalingon naay posibilidad nga mauwawan kita, apan kung magpaubos kita igapahitaas kita sa atong Ginoo. Ang pagkahambog o pagkamahitas-on sa uban natong mga Egsuon kanunay gayud kanang makita sa mga datu o mga adunahan apan ang mga pobre mao kadto sila ang kanunay magpahiubos sa ilang kaugalingon dinha sa atong Katilingban. Inag abot sa panahon sa tinghukom kadto unyang mga datu nga nagpataas sa iyang Kaugalingon igatambog ngadto sa dili mapawng nga kayo, ug ang mga nagpahiubos nga mga pobre mao unya kadto ang ibayaw ngadto sa Langit. Mag-ampo kita mga Egsuon nga makabaton unta kita ug Kasingkasing nga andam kanunay magpaubos kay mao kana ang Kahimut-an sa atong Ginoo.
