02/05/2023
Pagkaing Espirituwal Ngayong Martes
Mayo 2, 2023
Pamagat: Nananahan Sa Atin
Ipinapanalangin ko... ay palakasin Niya ang espirituwal n’yong pamumuhay sa pamamagitan ng Kanyang Espiritu para manahan si Cristo sa mga puso n’yo dahil sa inyong pananampalataya. — Efeso 3:16-17
Basahin: Efeso 3:14-21
Ang Salita ng Dios (Tagalog Contemporary Bible)
14 Tuwing naaalala ko ang plano ng Dios, lumuluhod ako sa pagsamba sa kanya.
15 Siya ang Ama ng mga nasa langit at nasa lupa na itinuturing niya na kanyang buong pamilya.
16 Ipinapanalangin ko na sa kadakilaan ng kapangyarihan niya ay palakasin niya ang espiritwal nʼyong pamumuhay sa pamamagitan ng kanyang Espiritu
17 para manahan si Cristo sa mga puso nʼyo dahil sa inyong pananampalataya. Ipinapanalangin ko rin na maging matibay kayo at matatag sa pag-ibig ng Dios,
18-19 para maunawaan nʼyo at ng iba pang mga pinabanal kung gaano kalawak, at kahaba, at kataas, at kalalim ang pag-ibig ni Cristo sa atin. Maranasan nʼyo sana ito, kahit hindi ito lubusang maunawaan, para maging ganap sa inyo ang katangian ng Dios.
20 Purihin natin ang Dios na makakagawa ng higit pa sa hinihingi o inaasahan natin sa pamamagitan ng kapangyarihan niyang kumikilos sa atin.
21 Purihin natin siya magpakailanman dahil sa mga ginawa niya para sa iglesya na nakay Cristo Jesus. Amen.
Ang Salita ng Dios (Tagalog Contemporary Bible)
Copyright © 2009, 2011, 2014, 2015 by Biblica, Inc. ®
Used by permission of Biblica, Inc.® All rights reserved worldwide.
Minsan, may mga nasasabi ang mga bata na makatutulong para mas maunawaan natin ang mga katotohanan tungkol sa Dios. Noong maliit pa ang anak ko, sinabi ko sa kanya ang isang katotohanan tungkol sa pananampalataya. Ipinaliwanag ko sa anak ko na kapag nagtiwala ang isang tao sa Panginoong Jesus, nananahan sa atin ang Dios sa pamamagitan ng Banal na Espiritu. Sinabi ko rin sa kanya na nananahan na sa aming katawan si Cristo Jesus. Tinanong naman ako ng aking anak, “Nasa tiyan ko rin ba ang Dios?" Sinabi ko sa kanya, “Hindi mo naman Siya nilunok, pero lagi mo Siyang kasama.”
Dahil sa sinabi ng anak ko, muling bumalik sa isip ko ang panahong nagtiwala ako kay Jesus bilang Tagapagligtas. Totoong nananahan na Siya sa akin. Lagi ko Siyang kasama sa lahat ng pagkakataon.
Nanalangin naman si Apostol Pablo para sa mga taong nagtitiwala sa Dios na nasa Efeso. Idinalangin ni Pablo na palakasin nawa ng Banal na Espiritu ang kanilang pananampalataya (Efeso 3:17). Dahil nananahan sa kanila si Jesus, ang dakilang pagmamahal ng Dios ay nasa kanila. At dahil naman sa pag-ibig na ito, tatatag ang kanilang pananampalataya. Matututo rin silang magmahal ng may kapakumbabaan at kahinahunan habang ipinapahayag nila ang pag-ibig ng Dios sa iba (4:2, 25).
Nananahan ang pag-ibig ng Dios sa mga taong nagtitiwala sa Kanya. Tunay na dakila ang pagmamahal ng Dios (3:19). At nais Niyang maranasan at ipahayag rin natin ito sa iba. Totoong minamahal tayo ni Jesus!
- Amy Boucher Pye
Panginoong Dios, nalalaman ko pong nananahan Ka sa akin. Maipahayag ko po nawa sa iba ang kalagakan na aking nararanasan dahil sa Iyong pagmamahal sa akin.
React, Share, and post your reflections.
Follow us on Twitter: twitter.com/odbpilipinas
and on Instagram: instagram.com/ourdailybreadpilipinas
Visit filipino-odb.org
to learn more about Our Daily Bread Ministries and our resources
Copyright © 2023 Our Daily Bread Ministries, All rights reserved.
Disclaimer: Please note that internet browsers and online platforms may have built-in translation features that may inadvertently change the meaning and overall thought of our content.
