29/08/2026
GABAY SA PAGSASAGAWA NG DALAW-TAHANAN NI STA TERESITA NG BATANG HESUS
I. PANIMULA
Namumuno: Sa Ngalan ng Ama, at ng Anak at ng Espiritu Santo.
Bayan: Amen
Namumuno: Mga kapatid pasalamatan natin ang Ama na nagkaloob sa atin ng isang
katuwang at huwaran sa landas ng kabanalan si Santa Teresita ng Batang si Jesus.
Ihandog natin sa Ama ang panalanging ito upang pagkalooban din tayo ng wagas na pag-ibig na inihandog ni Santa Teresita sa ating Panginoong Jesus.
Namumuno: Manalangin tayo.
Lahat: Amang mapagmahal sa iyo ang lahat ng papuri at pagsamba. Salamat sa iyo sa pagbibigay mo sa amin ang iyong Banal na si Teresita. Ipagkaloob mong magkaroon din kami ng wagas na pag-ibig sa iyo sa pamamagitan ni Jesukristu kasama ng Espiritu Santo magpasawalang hanggan. Amen.
Alleluia
Alleluia, Alleluia
Wikain mo P**n Nakikinig ako
sa iyong mga salita
Alleluia, Alleluia, Alleluia
II. ANG MABUTING BALITA NG PANGINOON
Namumuno: Pagbasa ng Mabuting Balita ayon kay San Mateo
"Nang sandaling iyo'y lumapit kay Jesus ang mga alagad at nagtanong, "Sino po ang pinakadakila sa kaharian ng langit?"Tinawag ni Jesus ang isang bata, pinatayo sa harapan nila, at sinabi, "Tandaan ninyo ito: kapag hindi kayo nagbago at tumulad sa mga bata, hinding-hindi kayo mabibilang sa mga pinaghaharian ng Diyos.
Ang sinumang nagpapakababa na gaya ng batang ito ay siyang pinakadakila sa mga pinaghaharian ng Diyos."
Ang Mabuting Balita ng Panginoon.
III. MAIKSING TALAMBUHAY NI STA. TERESITA NG BATANG JESUS
Si Santa Teresita ng Batang Hesus ay ipinanganak noong Enero 2, 1873 sa bansang Pransya. Mula sa murang edad ay namuhay siya nang may malalim na pagmamahal sa Diyos. Sa edad na 15, pumasok siya sa Monasteryo ng Karmelita sa (Lisyú) Lisieux, Pransya, kung saan inialay niya ang kanyang buhay sa panalangin at paglilingkod. Nakilala siya sa kanyang “Munting Daan” (Little Way)—ang paggawa ng maliliit na bagay nang may malaking pag-ibig at buong pagtitiwala sa Diyos. Tinawag niya ang kanyang bokasyon na “Pag-ibig sa Puso ng Simbahan.”
Pumanaw siya noong Setyembre 30, 1897, sa edad na 24, na sinambit ang mga salitang: “Diyos ko, mahal ko po kayo!” Dahil sa kanyang kabanalan at malaking impluwensiya sa buhay ng Simbahan, idineklara siyang Santa at Doktor ng Simbahan.
Sa kanyang pagsusulat, ibinahagi niya ang kanyang mga karanasan, pagninilay, at buhay-espirituwal. Aniya, "Sapagkat napakalaki at marubdob ang paghahangad kong maging isang martir, binasa ko ang mga sulat ni San Pablo sa pag-asang matatagpuan ko ang kasagutan. Sa kaniyang mga salita, napagtanto kong ang Simbahan ay binubuo ng iba’t ibang kasapi at hindi lahat ay maaaring maging apostol, propeta, o g**o. Ngunit natagpuan ko ang higit na dakilang daan: ang pag-ibig. Napagtanto ko na ang Simbahan ay may pusong nag-aalab sa pag-ibig. Ang pag-ibig ang gumaganyak sa bawat kasapi upang kumilos; kung wala ito, ang mga apostol ay hindi mangangaral at ang mga martir ay hindi maghahandog ng kanilang buhay. Nakita ko at napagtanto na ang pag-ibig ay sumasaklaw sa lahat ng panahon at lugar; sa isang salita, ang pag-ibig ay walang hanggan. Kaya’t buong galak kong ipinahayag: “O Jesus, aking mahal, sa wakas natagpuan ko ang aking bokasyon—ang bokasyon ko ay pag-ibig! O Diyos, sa puso ng Simbahan na aking Ina, ako ay magiging pag-ibig.”
Ginugunita ang kanyang kapistahan tuwing Oktubre 1.
IV. LITANIYA KAY SANTA TERESITA
Panginoon, Maawa ka sa amin.
Kristo, Maawa ka sa amin.
Panginoon, Pakinggan mo kami.
Kristo, Pakinggan mo kami.
Kristo, Pakapakinggan mo kami.
Diyos Ama sa Langit, Maawa ka sa amin.
Diyos Anak na tumubos sa Sanlibutan, Maawa ka sa amin.
Diyos Espirito Santo, Maawa ka sa amin.
Santa Maria, * *Ipanalangin mo kami.
Mahal na Birhen ng Carmelo,*
Sta. Teresita, lingkod ng Diyos at handog ng
maawaing pagmamahal ng Diyos.*
Sta. Teresita, uliran ng Kamusmusan, ganap na pagsunod at ganap na paghahandog sa Diyos*
Sta. Teresita, Maibigin sa kapayapaan, katiyagaan, kabutihan at katotohanan*
Sta. Teresita, maibigin sa kalinisan, karukhaan, pagsunod
at nag-aalab sa pagnanais sa kaluwalhatian ng Diyos*
Sta. Teresita, uliran sa pagtitiwala sa Diyos,*
Sta. Teresita, pinagkalooban ng katangi-tanging katalinuhan,*
Sta. Teresita, G**o ng munting daan,*
V. DASALIN ang Ama Namin.
Namumuno: Manalangin Tayo.
Sta. Teresita, alalahanin ang iyong pangako na gugugulin ang iyong kalangitan sa paggawa ng kabutihan sa sangkalupaan. Tulutan na ang masaganang ulan ng rosas ay pumatak sa lahat ng sa iyo'y nagpaparangal. Tulungan mo na matamo namin sa Diyos ang mga biyayang aming hinihintay, (tahimik na banggitin ang kahilingan). At kaisa ng buong simbahan, kami ay nananalangin sa Amang mapagmahal.
Lahat: Ama naming mapagmahal, Inilaan mo ang iyong paghahari sa mga nagpakababa at mga bata. Gawin mo na kami ay lakas loob na makatahak sa landas ni Sta. Teresita upang pakundangan sa kanyang pagdalangin mahayag sa amin ang kadakilaan mo kailanman,
sa pamamagitan ni Jesukristo, kasama ng Espiritu Santo magpasawalang hanggan. Amen.
VI. PANALANGIN PARA SA MAY SAKIT
O, Panginoong Jesus, aming makalangit na Manggagamot, aming idinadalangin sa iyo ang lahat ng mga may karamdaman, lalo na yaong may sakit sa baga tulad ni Sta. Teresita.
Ipadama mo sa kanila ang iyong pagmamahal at mapagpagaling na kamay.
Igawad mo sa kanila ang biyaya ng kagalingan sa dinaramdam na sakit, at ang kabatiran na kaisa mo sila sa pagliligtas sa mundo sa mga hirap na binabata.Hinihiling namin ito sa Iyo kaisa ng Ama at ng Banal na Espiritu magpasawalang hanggan. Amen.
VII. PAGHAYO
Namumuno: Sumaatin nawa ang pagpapala ng Makapangyarihang Diyos Ama, Diyos Anak, at Diyos Espiritu Santo.
Lahat: Amen
VIII. PANGWAKAS NA AWIT: Ang Mabuhay sa Pag ibig.
PAALALA:
• Ang ating pong Dalaw-Tahanan ng Imahe ni Sta. Teresita ay sisimulan sa Agosto 28, 2027. • Magkakaroon po ng tukil na kanya-kanya pong gagawin na lalagyan ng sticker na ibinigay kasama po ng 'guide' sa panalangin.
• Ang pagsasagawa po ng Dalaw-Tahanan ay batay sa ano mang oras na mapili ng magkakasama lalo’t higit po ay ang pag-anyaya sa mahalagang pakiki-isa ng mga SCALA Parents sa gawaing ito.
• Ang Imahe ni Sta. Teresita ay maaring manatili sa tahanan na dinalaw kung sakali na hindi pa tapos ang mga kalapit na tahanan upang mas madali na bumalik sa lugar.
• Ang Dalaw-Tahanan ay matatapos bago mag Setyembre 26,2026, kaya, ang lahat ng nasasakupan ay may isang buwan para mapuntahan ang lahat ng tahanan.
• Ang pagsusumite ng nalikom na tukil ay sa opisina ng St. Thérèse Mission Station sa Setyembre 27,2026, bago magsimula ang MISA TRIDUO sa Setyembre 28 sa ating Talipan Mission Station.
• Kalakip din po ng gabay na ito ang inyong Schedule ng misa na sasabayan ng pagdalaw ng “Banal na Relikya at Imahe ni Sta. Teresita” kaya po ating aanyayahan ang mga kapit-bahayan na makiisa dahil ito po ay dumadalaw lamang isang beses sa loob ng isang taon para sa paghahanda ng kanyang kapistahan.
• Ang panalangin at pagdalaw ay sisimulan 30 minuto bago ang oras ng Banal na Misa kaya inaasahan ang mas maagap na pagpunta sa inyong mga kapilya.
Maraming Salamat po!
