08/11/2019
PAMALANDONG SA EBANGHELYO SA BYERNES: LK 16: 1-8.
1) Ang mga anak sa kahayag dili kaayo intresado sa mga butang sa kalibutan, pobre man siya dili siya magsapayan. Ang mahinungdanon kaniya dato siya atubangan sa Dios. Apan ang mga anak nga iya sa kalibutan, gusto gayod madato, mogamit sa tanang pamaagi bisan panglimbong kay gusto maharuhay sa umaabot, nga sa iyang katigulangon dili maglisod.
2) Gusto ang Ginoo maghunahuna kita sa atong ugma, apan dili lang kutob sa katigulangon o kamatayon, kon dili human sa kamatayon. Unsay mahitabo sa kalag?
Aron malipayon ang kalag, magbuhat og daghang maayo labi na pagtabang. Gamita ang imong katigayonan nga iya sa Ginoo diha sa pagpaambit.
3) Ayaw gamita ang salapi nga iya sa Dios sa kaugalingong kalipay, kon dili gamita kini para pagpangita sa imong kaluwasan. Kon imong iwaldas-waldas ang salapi sa Dios para sa uban labi na ang nanginahanglan malipay gayod siya. Likayi ang kahakug nga makapa-impierno kanimo, kaloy-an nato ang atong kalag. Di gyod nato kalimtan nga ang bisan unsa nga atong giangkon iya kana sa Dios, ug gamita kini aron siya malipay pinaagi sa pagtabang. Ug ang paghimo sa ingon usa ka pagpakita nga imong gihunahuna ang imong kalag human sa kamatayon.
