08/08/2026
SABADONG PAGDEDEBOSYON SA NUESTRA SEÑORA DEL SANTÍSIMO ROSARIO DE OLONGAPO.
Sa Ngalan ng (†) Ama at ng Anak at ng Espiritu Santo. AMEN.
ANG PAGSISISI:
O Diyos ko, ikinalulungkot ko nang buong puso ang pagkakasala ko sa iyo. Kinasusuklaman ko ang lahat kong kasalanan dahil sa takot sa iyong makatarungang hatol, ngunit higit sa lahat, dahil ito’y nakakasakit sa iyong kalooban, Diyos na walang hanggan ang kabutihan at nararapat na ibigin nang walang katapusan. Matibay akong nagtitika na ikukumpisal ko ang aking mga kasalanan, tutuparin ang tagubiling pagsisisi, at sa tulong ng iyong biyaya ay magbabagong-buhay. AMEN.
MEMORARE:
Alalahanin mo, lubhang mapagbigay-loob na Birheng Maria, ni kailanman ay di narinig na may dumulog sa iyong pagpapaampon, na lumuhog sa iyong tulong o humingi ng iyong pamamagitan, ay hindi mo pinabayaan.
Taglay ang pag-asang ito, ako'y sumasamo sa iyo, o Birhen ng mga birhen at aking Ina. Sa iyo ako'y lumalapit, sa harap mo ako'y titindig, isang makasalanan at puno ng dalamhati; O Ina ng Verbong nagkatawang-tao, huwag mo nawang tanggihan ang aking kahilingan, kundi sa iyong mahabaging puso, ako'y iyong dinggin at sagutin. AMEN.
PANALANGIN SA MAHAL NA BIRHENG MARIA, REYNA NG KABANAL-BANALANG ROSARYO
Mahal naming Ina, Birhen ng Kabanal-banalang Rosaryo, ipinahayag mo sa tatlong bata sa Fatima na upang di magwagi ang kasamaan ay kinakailangan naming dasalin ng walang humpay ang Banal na Rosaryo.
Nababatid mo na tanging sa pamamagitan lamang ng panalangin kami ay magtatagumpay sa aming pang araw- araw na pagharap sa mga hamon ng buhay laban sa tukso at kasalanan, na kung wala ang tulong ng lyong Anak na si Hesus, kami ay madaling masisila ng tukso.
Ang alalahanin Ka at ang Iyong pagkamasunurin sa Diyos ang nagpapasigla sa aming pasya na manatiling nagpapakumbaba, dukha at nakakiling sa panig ng Diyos, bagamat ito'y nangangahulugan nang pagiging salat sa mga bagay na maka-sanlibutan ngunit ganap sa pagsasakripisyo.
Minamahal naming Ina, ang katiyakang kapiling Ka namin sa pagninilay-nilay sa Banal na Rosaryo ay nagpapalakas ng aming loob na batahin ang lahat ng hirap sa buhay na ito ang aming mga karamdaman at kabiguan sapagkat ipinagsasanggalang Mo kami laban sa aming mga pagkabalisa at binibigyan kami ng pag-asa at liwanag. Patuloy mo kaming ipanalangin at ilapit sa lyong anak na si Hesus na aming Panginoon. AMEN.
NAMUMUNO: O Mahal na Birhen, Reyna ng Kabanal-banalang Rosaryo, kagalakan at kapayapaan ng aming mga puso.
TUGON: Ipanalangin mo kami at ang aming pamayanan.
PAGTATALAGA NG SARILI SA KALINIS-LINISANG PUSO NI MARIA, REYNA NG KABANAL-BANALANG ROSARYO:
O Mahal na Birheng Maria, Reyna ng Kabanal-banalang Rosaryo, itinatalaga namin ang aming sarili at lubos na ipinagkakatiwala sa Iyong kalinis-linisang puso upang maitalaga rin naman sa Kamahal-mahalang Puso ng Iyong Anak na si Hesus at aming Panginoon.
Kami ay patnubayan mo patungo kay Kristong Iyong Anak at Bugtong na Anak ng Ama, at sa Kanya naman at kasama Niya, sa Diyos Amang walang hanggan ang kaluwalhatian.
Puspos ng biyaya ng Banal na Espiritu, kami'y maglalakbay sa liwanag ng pananampalataya, ng pag-asa at ng pag-ibig upang ang aming sambayanan ay manalig na si Kristo ay isinugo ng Ama upang ihatid ang Paghahari ng Diyos dito sa lupa.
Samahan Mo kami sa pagpapahayag ng hiwaga ng buhay, kamatayan at muling pagkabuhay ni Kristo sa pamamagitan ng pagtuturo at pagdarasal ng Iyong Kabanal-banalang Rosaryo ng naayon sa Salita ng Diyos at aral ng Santa Iglesiya na magbubunsod sa aming magmalasakit at magmahal sa aming kapwa.
Kaya't kaming pinagbuklod ng Banal na Espiritu, na nasa ilalim ng maka-inang pag-aaruga ng Iyong Kalinis-linisang Puso, ay gawin mong isang sambayanan kay Kristo, sumasaksi sa Kanyang muling pagkabuhay.
Akayin mo kami patungo sa landas ng kaligtasan at kabanalan para sa lalong ikadarakila ng Ama at ng Anak at ng Banal na Espiritu magpasawalang hanggan. AMEN.
Nuestra Señora del Santísimo Rosario de Olongapo, Ipanalangin mo kami!
Sa Ngalan ng (†) Ama at ng Anak at ng Espiritu Santo. AMEN.
_______________________________________________Para po sa inyo mga:
*Katanungan
*Mga kuwento ng himala ng Mahal na Birhen ng Santo Rosaryo ng Olongapo
*Mag-alay ng regalo
*Dumalaw sa ating kapilya
*at iba pang katanungan:
Makipag-ugnayan lamang po rito sa ating page o tumawag sa 09473253106.
