San Lorenzo Ruiz and Companion Martyrs Parish

01/04/2026

Mga Ka-Parokya,

Bukas, Abril 2, ating gugunitain ang Huwebes Santo, ang unang araw ng Triduo Paschal—ang banal na tatlong araw na nagbibigay-pugay sa pagpapakasakit, pagkamatay, at muling pagkabuhay ng ating Panginoong Hesukristo.

Inaanyayahan po ang lahat na makiisa sa mga gawain sa araw na ito, lalo na sa Misa ng Huling Hapunan, kung saan ginugunita ang pagtatatag ng Banal na Eukaristiya at ang halimbawa ng mapagkumbabang paglilingkod ni Kristo sa pamamagitan ng paghuhugas ng paa.

Nawa’y ihanda natin ang ating mga puso sa taimtim na pananalangin, pagninilay, at pakikiisa sa mga banal na gawain ng ating Simbahan. Sama-sama nating pagnilayan ang dakilang pag-ibig ng Diyos na inalay para sa ating kaligtasan.

Maraming salamat po at pagpalain tayong lahat.

30/03/2026

Pormal na binuksan ang Taunang Pabasa ng Pasyong Mahal kaninang ika-3:00 ng hapon sa pamamagitan ng pagbabasbas at pagpaparangal sa mga imaheng pangmahal na araw. Pinangunahan ito ng ating Kura Paroko, Reb. Pdr. Allan Lopez OP.

Sa mga nais bumisita, mag-alay ng panalangin, at makiisa, bukas po ang pook ng pabasa mula ngayon hanggang bukas ng ika-12 ng tanghali dito sa loob ng ating parokya.

29/03/2026

Ating Bigyang-Pansin at Alalahanin si Kristo,
sa Kanyang dakilang pagpapakasakit at maluwalhating muling pagkabuhay,
sa pamamagitan ng taimtim na pagbasa ng Banal na Pasión ng ating Panginoong Hesukristo.

Inaanyayahan po ang lahat na makiisa sa Pabasa sa Parokya, na magsisimula sa Abril 15, sa ganap na ika-3:00 ng hapon,
at magtatapos sa Abril 16, sa ganap na ika-12:00 ng tanghali.

Sama-sama po tayong magnilay, manalangin, at magbalik-loob sa Panginoon sa banal na gawaing ito.

29/03/2026

HOSANNA FILIO DAVID!

Nagsipag-awitan na ang mga kabataang magsisipaganap ngayong mga Mahal na Araw. Sila ay gumanap ngayon bilang mga batang hebreo, ang mga sumalubong na may galak at awit sa Panginoong pumapasok sa Lungsod ng Jerusalem. Sila rin ay muling aawit sa Biyernes Santo bilang mga batang dadamay sa Mahal na Birhen sa awiting Stabat, at sa Linggo ng Pagkabuhay bilang mga Anghel sa Galilea.

Ngayon ay pormal na tayong nasa Semana Santa 2026! Tayo’y makiisa sa lahat ng gawain sa kabanal-banalang linggo ng buong taon.

29/03/2026

Marso 29, 2026 | Linggo ng Palaspas

Narito ang mga kuhang larawan mula sa Banal na Misa sa Linggo ng Palaspas

Hosanna! Sa Linggo ng Palaspas, hindi lang natin inaalala ang pagpasok ni Hesus—inaanyayahan din tayong sumama sa Kanya sa mas malalim na paglalakbay ngayong Semana Santa.

27/03/2026

27/03/2026

“Osana sa Anak ni David!”

Inaanyayahan po namin kayong lahat, mga kaparokya, na makiisa sa pagdiriwang ng Linggo ng Palaspas sa darating na ika- 29 ng Marso, bilang paggunita sa matagumpay na pagpasok ng ating Panginoong Hesukristo sa Jerusalem.

Makikita po sa ibaba ang mga oras ng Banal na Misa.

Inaanyayahan din po namin na ihanda na ninyo ang inyong mga palaspas upang ito’y mabasbasan sa unang bahagi ng Banal na Misa.

Nawa’y magsilbi itong simula ng isang makahulugang Semana Santa na puno ng pananalangin, pagninilay, at pagbabalik-loob sa ating Panginoon.

19/03/2026

Ngayo’y ating ginugunita ang Dakilang Kapistahan ni San Jose, ang esposo ng Mahal na Birheng Maria.

Nawa’y tularan natin ang kanyang kababaang-loob, ganap na pagsunod sa kalooban ng Diyos, at wagas na pagmamahal sa kanyang pamilya.

Sa kanyang tahimik ngunit matatag na pananampalataya, nawa’y maging inspirasyon siya sa atin upang maglingkod nang may katapatan at puso.