02/08/2026
2 Agosto 2026 | PRIMER DOMINGO DEVOCION sa karangalan ng ating Ina at Gabay, Mahal na Birhen ng Soledad ng Navotas
Ngayong unang Linggo ng Agosto, sama-sama tayong dumulog at mamintuho sa ating minamahal na Ina at Gabay para sa pag-iingat sa ating mga sarili at mga mahal sa buhay, mga kaibigan at ipinagdarasal.
• 𝐏𝐀𝐍𝐀𝐋𝐀𝐍𝐆𝐈𝐍 𝐒𝐀 𝐌𝐀𝐇𝐀𝐋 𝐍𝐀 𝐁𝐈𝐑𝐇𝐄𝐍 𝐍𝐆 𝐒𝐎𝐋𝐄𝐃𝐀𝐃 𝐍𝐆 𝐍𝐀𝐕𝐎𝐓𝐀𝐒
O Inang Maria, Birhen ng Soledad, aming takbuhan at kanlungan, dumudulog kami ngayon sa iyong maka-Inang pagkalinga. Ikaw ang huwaran ng pagsunod sa kalooban ng Diyos Ama; sa paghihirap ng iyong Anak, ikaw ay nanatili't nakatindig sa paanan ng Krus.
O Talang maningning na nagtuturo sa amin ng daan patungo kay Hesus upang paglingkuran siya nang buong puso, palakasin mo kami upang patuloy na magtagumpay sa kabila ng mga hinagpis at pagdurusang aming hinaharap. Gayundin, ilapit mo kami ngayon sa kanya at ibulong na ipagkaloob ang aming mga kahilingan. (manahimik sandali)
O Mahal na Birhen ng Soledad, yaman ng aming inang bayan, pinili mong manatili sa aming piling upang maging Ina at gabay, nawa'y manatili rin kami sa piling mo, upang ibigin ka at ipagdangal. Itulot mong sa wakas ng aming paglalayag sa dagat ng buhay, matamasa namin ang ganap na kaligayahan kasama mo at ni Hesus na iyong Anak magpasawalang hanggan. AMEN.
MAHAL NA BIRHEN NG SOLEDAD NG NAVOTAS, AMING INA AT GABAY,
ipanalangin mo kami!
