24/04/2026
MAHALAGANG PAUNAWA PATUNGKOL SA GAGANAPING KARAKOL AT FLUVIAL PROCESSION PARA SA NALALAPIT NA KAPISTAHAN 2026
Sa darating na Mayo 10, 2026 ay isasagawa na nating muli ang Karakol at Fluvial Procession, kaugnay nito ay nagkaroon ng Coordination meeting na dinaluhan ng mga sumusunod na siya ring kumakatawan sa ating Karakol at Fluvial Procession Committee:
- Kura Paroko
- PPC Representatives
- Punongbarangay ng Wawa kasama ang ilang kinatawan ng Sangguniang Barangay
- PNP Nasugbu
- Philippine Coast Guard Nasugbu
- MDRRMO Nasugbu Batangas
- May-ari ng bangka na sasakyan ng Mahal na Birhen
Bilang tugon sa hinihinging ALITUNTUNING PANGKALIGTASAN ng Philippine Coast Guard at MDRRMO narito ang mga sumusunod
Ito po ay upang mabigyan tayo ng permit sa Karakol at Fluvial Procession.
Hinihiling po naming basahin ninyo nang mabuti ang bawat pahina.
MGA ALITUNTUNING PANGKALIGTASAN PARA SA MGA LALAHOK SA KARAKOL AT FLUVIAL PROCESSION 2026
1. Pagpapatala ng mga Bangkang Makikilahok
Lahat ng may-ari bangka ay kinakailangang magpatala sa Barangay bago ang kaganapan. Tanging ang mga rehistradong bangka lamang ang papayagang makilahok sa fluvial parade. Ang pagpapalista ay hanggang May 5, 2026 lamang.
2. Opisyal na Watawat ng Gawain
Bawat nagpatalang bangka ay bibigyan ng opisyal na watawat ng kaganapan. Ito ay dapat maayos na nakalagay sa bangka sa buong panahon ng parada para sa pagkakakilanlan.
3. Limitasyon sa Bilang ng Pasahero
Mahigpit na dapat sundin ng mga may-ari ng bangkang kalahok ang itinakdang kapasidad ng kanilang sasakyan. Mahigpit na ipinagbabawal ang sobrang pasahero upang matiyak ang kaligtasan ng lahat.
4. Limitasyon sa mga taong sasakay
Hindi po natin mapahihintulutan sumakay sa bangka ang mga sumusunod:
- Ang mga batang pitong (7) taong gulang pababa
- Ang mga PWD partikular ang mga putol ang paa o hirap maglakad at kailangang gumamit pa ng wheelchair o saklay at mga bulag (totally blind)
- Ang mga buntis ay hindi rin pinahihintulutan
- Ang mga may inom na o mga lasing
5. Pagsunod sa Kaligtasan
Hinihikayat ang lahat ng kalahok na magsuot ng life vest sa lahat ng oras. Dapat tiyakin ng mga operator ng bangka na may sapat na kagamitang pangkaligtasan sa loob ng bangka.
6. Koordinasyon at Kaayusan
Dapat sundin ng mga kalahok ang itinakdang pormasyon, ruta, at iskedyul na ibinigay ng mga tagapag-organisa. Mahigpit na ipinagbabawal ang pag-overtake sa sinasakyang bangka ng Mahal na Birhen at anumang mapanganib na pagmamaniobra.
7. Pananagutan ng mga May-ari ng Bangka
Ang mga may-ari at operator ng bangka ang may pananagutan sa kaligtasan at asal ng kanilang mga pasahero sa buong kaganapan.
8. Paggalang at Kaayusan
Inaasahan ang lahat ng kalahok na magpakita ng wastong asal, lalo na’t ito ay bahagi ng isang relihiyoso at kultural na pagdiriwang. Hindi papayagan ang anumang uri ng kaguluhan.
Anumang uri ng pangbabasa ay mahigpit na ipinagbabawal
9. Pagsunod sa mga Awtoridad
Lahat ng kalahok ay dapat sumunod sa mga tagubilin ng event marshals, safety officers, at mga lokal na awtoridad sa lahat ng oras.
10. Karapatang Tanggihan ang Pakikilahok
May karapatan ang organizing committee na tanggihan o alisin ang sinumang kalahok na hindi susunod sa mga alituntunin at patakaran.
MAAARI NA PO KAYONG MAGTUNGO SA BARANGAY PARA SA PAGPAPALISTA
Maraming Salamat po!
