Pagninilay sa Salita ng Diyos.

Pagninilay sa Salita ng Diyos. Pagninilay sa Salita ng Diyos

02/09/2026

Morning Devotion

ANG PAG-AKAY NG TAO PATUNGO KAY HESUS

Batayang Teksto: Juan 1:35–42

Panimula
Magandang araw po sa ating lahat, mga kapatid! Bilang mga tagasunod ni Hesus, hindi lamang tayo tinawag upang makilala Siya, kundi upang ipakilala rin Siya sa iba. Ang tunay na pakikipag-ugnayan kay Cristo ay nagbubunga ng pagnanais na maibahagi sa iba ang kagalakan ng pagkakaroon ng Tagapagligtas.

Nang makilala ni Andres si Hesus, hindi niya itinago ang kanyang natuklasan. Una niyang hinanap ang kanyang kapatid na si Simon at sinabi, “Natagpuan na namin ang Mesiyas.” Pagkatapos, dinala niya si Simon kay Hesus (Juan 1:41–42).

Makikita rin natin ang ganitong puso ni Andres sa iba pang pagkakataon. Nang may batang may limang tinapay at dalawang isda, inilapit niya ito kay Hesus (Juan 6:8–9). Nang may mga Griyegong nagnanais na makatagpo si Hesus, tumulong din si Andres na mailapit sila sa Panginoon (Juan 12:20–22).

Ipinapakita nito na ang isang taong tunay na nakakilala kay Hesus ay nagiging tulay upang makilala rin Siya ng iba.

Hindi kailangang maging mahusay na tagapagsalita upang maging saksi ni Cristo. Maaari nating gamitin ang ating pamilya, mga kaibigan, trabaho, tahanan, at simpleng pagkakataon upang maipakita ang pag-ibig ni Hesus.

Tayo rin ay tinawag na maging “mangingisda ng mga tao” (Mateo 4:19). Sino ang isang taong maaari nating lapitan, ipanalangin, at akayin palapit kay Hesus?

Tayo po manalangin
Panginoong Hesus, salamat dahil tinawag Mo po kami upang maging Iyong mga alagad. Tulungan Mo po kaming magkaroon ng pusong tulad ni Andres laging handang magbahagi ng Iyong pag-ibig at mag-akay ng iba patungo sa Iyo. Gamitin Mo po ang aming buhay bilang daan upang mas maraming tao ang makakilala sa Iyo. Amen

Tanong
1.Sino ang isang tao sa iyong pamilya, kaibigan, o kakilala na nais mong mas makilala si Hesus, at paano mo siya maaakay palapit sa Kanya?

2. Sa anong simpleng paraan mo maaaring maipakita ngayong araw ang pag-ibig ni Hesus sa isang taong nangangailangan ng pag-asa at pang-unawa?

3. Ano ang isang bagay na maaari mong gawin ngayong linggo upang maging tulay upang makilala ng iba si Hesus?

02/09/2026

Merry Christmas...may ber na makakarinig na tayo ng mga awiting pamasko.

01/09/2026

Morning Devotion

ANG PAKIKINIG SA TINIG NG DIYOS
Batayang Teksto: Kawikaan 2:1–5

Panimula:
Mapagpalang umaga mga kapatid!, Sa gitna ng ingay ng mundo, maraming tinig ang humihingi ng ating pansin. Ngunit higit sa lahat, kailangan nating matutong makinig sa tinig ng Diyos. Hindi lamang Siya nagsasalita; nais din Niyang tayo ay tumigil, makinig, umunawa, at sumunod.

Ang Kawikaan ay bahagi ng karunungan ng Israel at pangunahing iniuugnay kay Haring Solomon. Isinulat ito upang turuan ang mga kabataan at bayan ng tamang pamumuhay na may takot sa Diyos. Sa Kawikaan 2:1–5, hinihikayat ang masigasig na paghahanap ng karunungan, sapagkat ang tunay na kaalaman ay nagmumula sa Diyos.

Ang pakikinig sa Diyos ay mahalagang bahagi ng ating buhay pananampalataya. Ginagamit Niya ang iba’t ibang paraan upang gabayan tayo.

Una, nagsasalita ang Diyos sa pamamagitan ng Banal na Kasulatan. Sa Bibliya, ipinapahayag Niya ang Kanyang katangian, mga pangako, at kalooban. Habang binabasa at isinasabuhay natin ang Kanyang Salita, mas nakikilala natin ang Kanyang tinig.

Ikalawa, nagsasalita Siya sa pamamagitan ng panalangin. Ang panalangin ay hindi lamang pagsasalita sa Diyos. Ito rin ay panahon ng katahimikan upang marinig at maunawaan ang Kanyang nais para sa atin.

Ikatlo, gumagamit Siya ng mga tao at mga pangyayari sa ating buhay. Maaaring gamitin ng Diyos ang isang kaibigan, Pastor, tagapayo, o maging isang sitwasyon upang tayo ay turuan at gabayan.

Gayunman, dapat nating suriin ang anumang mensahe ayon sa Salita ng Diyos. Ang tunay na gabay ng Diyos ay hindi sasalungat sa Kanyang Kasulatan.

Tayo po manalangin:
Panginoon, turuan Mo po akong manahimik, makinig, at makilala ang Iyong tinig. Bigyan Mo po ako ng pusong handang sumunod sa Iyong kalooban araw-araw. Ito po ang aking panalangin sa pangalan ng aming Panginoong Jesus Amen.

Tanong:
1.Naglalaan ba ako ng panahon upang makinig sa Diyos?

2. Ano ang itinuturo Niya sa akin ngayon?

3. Handa ba akong sumunod sa Kanyang sinasabi?

31/08/2026

MAGTIWALA AT SUMUNOD
Juan 14:15–21
“Kung mahal ninyo ako, tutuparin ninyo ang aking mga utos.” Juan 14:15

PANIMULA
Mapagpalang umaga mga kapatid! Sa buhay, maraming pagkakataon na kailangan nating mamili susundin ba natin ang sarili nating kagustuhan o magtitiwala tayo sa direksiyon ng Diyos? Madalas, madaling sabihin na mahal natin ang Panginoon, ngunit ang tunay na pagsubok ay kung makikita ba ito sa ating mga ginagawa.
Ang pananampalataya ay hindi lamang tungkol sa sinasabi nating ating pinaniniwalaan. Ito ay tungkol din sa pagtitiwala at pagsunod sa Diyos, kahit hindi natin laging nauunawaan ang Kanyang plano.

Sinabi ni Jesus, “Kung mahal ninyo ako, tutuparin ninyo ang aking mga utos.” Ipinapaalala nito na ang pagmamahal kay Cristo ay nakikita sa ating pagsunod. Hindi sapat na kilala natin ang Kanyang mga salita; kailangan din nating isabuhay ang mga ito.
Minsan, mahirap sumunod dahil may sariling plano tayo. May mga pagkakataong mas gusto nating gawin ang madali kaysa sa tama. Ngunit tinatawag tayo ng Diyos na magtiwala sa Kanya kahit hindi malinaw ang ating daraanan.
Ang Kanyang mga utos ay hindi upang pahirapan tayo kundi upang gabayan tayo sa mabuting pamumuhay. Sa tulong ng Banal na Espiritu, binabago Niya ang ating puso at tinuturuan tayong magmahal, magpatawad, maging tapat, at gumawa ng tama.
Maaaring magkamali tayo, ngunit hindi tayo iniiwan ng Diyos. Araw-araw, binibigyan Niya tayo ng pagkakataong magsimulang muli magtiwala, sumunod, at mamuhay para kay Cristo.

TAYO PO MANALANGIN
Panginoong Jesus, turuan Mo kaming magtiwala sa Iyo at sumunod sa Iyong kalooban. Gabayan Mo ang aming buhay at tulungan Mo kaming isabuhay ang Iyong Salita. Nawa’y makita sa amin ang tunay na pagmamahal sa Iyo. Amen.

TANONG:
1.Ano ang isang bagay na hinihiling ng Diyos na sundin mo ngayon?
2. Ano ang pumipigil sa iyo na lubos na magtiwala sa Diyos?
3. Paano mo maipapakita ngayon ang iyong pagmamahal kay Jesus?

30/08/2026

Ang Pananampalatayang Kumikilos
Batayang Teksto: Santiago 2:14–17
Susing Talata:Santiago 2:16
[16]Kung sasabihin ninyo sa kanya, “Patnubayan ka nawa ng Diyos; magbihis ka't magpakabusog,” ngunit hindi naman ninyo siya binibigyan ng kanyang kailangan, may mabuti bang naidudulot sa kanya iyon?

Panimula:
Magandang araw sa ating lahat! Ang tunay na pananampalataya ay hindi lamang nakikita sa mga salitang sinasabi natin kundi higit sa mga bagay na ginagawa natin.

Sa Santiago 2:14–17, ipinakita ni Santiago na walang kabuluhan ang pananampalatayang puro salita lamang. Halimbawa, may isang taong gutom at nilalamig. Maaari nating sabihin, “Pagpalain ka ng Diyos,” ngunit kung mayroon naman tayong kakayahang tumulong at wala tayong ginagawa, kulang ang ating ipinapakitang pananampalataya.

Ganito rin ang ipinakita ni Jesus. Hindi lamang Siya nagsalita tungkol sa pagmamahal. Pinakain Niya ang mga nagugutom, pinagaling ang mga maysakit, inaliw ang mga nasasaktan, at binigyan ng bagong pag-asa ang mga nawawalan nito. Sa Marcos 5:1–20, binago Niya ang buhay ng isang taong matagal nang nagdurusa. Ang pag-ibig ni Jesus ay hindi nanatili sa salita ito ay kumilos.
Bilang mga tagasunod ni Cristo, tinatawag din tayo sa ganitong uri ng pananampalataya. Maaaring maliit lamang ang ating magagawa pagbabahagi ng pagkain, pagtulong sa nangangailangan, pakikinig sa isang malungkot, o simpleng pagdamay sa isang taong may pinagdaraanan. Ngunit ang maliit na pagkilos na may tunay na pag-ibig ay maaaring maging malaking pagpapala.

Tayo po manalangin
Panginoon, gawin Mo pong buhay ang aking pananampalataya. Turuan Mo po akong hindi lamang magsalita tungkol sa pag-ibig, kundi kumilos, tumulong, at maging pagpapala sa mga nangangailangan. Ito po ang aking panalangin sa pangalan ng aming Panginoong Jesus Amen.

Tanong
1.Sino ang nangangailangan ng tulong sa paligid ko ngayon?
2. Ano ang kaya kong gawin upang makatulong?
3. Paano ko maipapakita ang aking pananampalataya sa pamamagitan ng pagkilos?

Church Workers Appreciation. Maraming salamat UcCP Bucal sa buing kapatiran.
30/08/2026

Church Workers Appreciation. Maraming salamat UcCP Bucal sa buing kapatiran.

29/08/2026

ANG PATUNAY NG ATING PAGLAGO
Batayang Teksto: Santiago 4:7–8

Susing Talata: Santiago 4:8
Lumapit kayo sa Diyos at lalapit siya sa inyo. Linisin ninyo ang inyong mga kamay, kayong mga makasalanan! Linisin ninyo ang inyong puso, kayong pabagu-bago ang isip.

Panimula:
Mapagpalang umaga po mga kapatid! Habang tayo ay patuloy na lumalapit sa Diyos, unti-unti nating makikita ang mga pagbabago sa ating buhay. Ang tunay na paglago sa pananampalataya ay hindi lamang nasusukat sa dami ng ating nalalaman tungkol sa Diyos, kundi sa paraan ng ating pamumuhay araw-araw.

Makikita ang espiritwal na paglago sa paraan ng pakikitungo natin sa ibang tao. Mas natututo tayong magpatawad, umunawa, magpasensya, at umiwas sa galit. Sa halip na gumanti sa taong nakasakit sa atin, natututo tayong ipagkatiwala sa Diyos ang ating damdamin. Ganito ang ipinakita ni Jesus nang Siya ay humingi ng kapatawaran para sa mga taong nagpako sa Kanya sa krus (Lucas 23:34).

Nagbabago rin ang ating hinahanap na kasiyahan. Habang lumalalim ang ating relasyon sa Diyos, napagtatanto nating hindi sapat ang mga bagay na iniaalok ng mundo. Ang tunay na kagalakan ay nagmumula sa presensya ng Diyos at sa pagtitiwala sa Kanyang kabutihan.

Sa paglipas ng panahon, ang pagsunod sa Diyos ay hindi na lamang isang tungkulin. Nagiging kagalakan ito dahil mahal natin Siya. Sabi ng salmista, “O gaano ko naiibigan ang iyong kautusan!” (Salmo 119:97).

Tayo po manalangin:
Panginoon, baguhin Mo po ang aking puso at tulungan Mo po akong lumago sa pananampalataya. Nawa’y makita sa aking buhay ang Iyong pag-ibig, biyaya, at kabutihan. Ito po ang aking panalangin sa pangalan ng aming Panginoong Jesus Amen.

Tanongi:
1.Anong pagbabago ang nakikita ko sa aking buhay?

2. Mas madali na ba akong magpatawad at magpasensya?

3. Paano ko higit na mapapalalim ang aking relasyon sa Diyos?

28/08/2026

Ang Kautusan at ang Puso
Roma 7:7–12
Susing Talata: Mga Taga-Roma 7:7
[7]Ang ibig bang sabihin nito'y ang Kautusan ay masama? Hinding-hindi! Kaya lamang, kundi dahil sa Kautusan ay hindi ko sana nalaman kung ano ang kasalanan. Hindi ko sana nalaman kung ano ang pag-iimbot kung hindi sinabi ng Kautusan, “Huwag mong pagnanasaang maangkin ang pag-aari ng iba.”.

PANIMULA
Mapagpalang umaga mga kapatid! Minsan, iniisip natin na basta ginagawa natin ang tama, sapat na iyon upang masabing mabuti tayong tao. Ngunit ipinapaalala sa atin ng Salita ng Diyos na hindi lamang panlabas na kilos ang tinitingnan Niya tinitingnan din Niya ang kalagayan ng ating puso.

Ipinakita ni Pablo na ang kautusan ng Diyos ay hindi lamang tungkol sa mga bagay na ginagawa natin. Hinahamon din nito ang ating mga hangarin at iniisip. Madaling sabihin, “Wala naman akong ginagawang masama,” ngunit maaaring sa puso natin ay may inggit, galit, pagnanasa, o paghahambing sa iba.
Ang utos na “Huwag mong nanasain ang hindi sa iyo” ay nagpapakita na ang kasalanan ay maaaring magsimula sa puso bago ito makita sa ating mga gawa.
Ngunit hindi tayo iniwan ng Diyos sa ating kahinaan. Si Jesus ang tumupad nang ganap sa kalooban ng Diyos. Sa pamamagitan ng Kanyang kamatayan at muling pagkabuhay, tayo ay pinatawad at binigyan ng bagong buhay. Sa tulong ng Banal na Espiritu, unti-unting binabago ng Diyos ang ating puso upang matutong magmahal, makuntento, at gumawa ng mabuti.

TAYO PO MANALANGIN
Panginoong Jesus, salamat po sa Iyong biyaya at kapatawaran. Linisin Mo po ang aming puso at alisin ang inggit, kasakiman, at hindi pagkakontento. Turuan Mo po kaming magmahal, makuntento, at mamuhay ayon sa Iyong kalooban. Ito po ang aking panalangin sa pangalan ng aming Panginoong Jesus Amen.

TANONG:
1.Ano ang madalas na hinahangad ng puso mo na hindi kalooban ng Diyos?
2. May inggit o hindi pagkakontento ba sa iyong puso na kailangan mong isuko sa Panginoon?
3. Paano mo maipapakita ngayong araw ang tunay na pagmamahal sa Diyos at sa kapwa?

28/08/2026

Taichi

28/08/2026

Burn sugar burn fat.

Address

N/A
Naic
4110

Website

Alerts

Be the first to know and let us send you an email when Pagninilay sa Salita ng Diyos. posts news and promotions. Your email address will not be used for any other purpose, and you can unsubscribe at any time.

Shortcuts

Share

Category