Sto. Niño de Bancaan Parish

19/07/2026

𝗣𝗔𝗥𝗜𝗦𝗛 𝗟𝗜𝗦𝗧𝗘𝗡𝗜𝗡𝗚 𝗖𝗜𝗥𝗖𝗟𝗘

Ngayong araw ay matagumpay na isinagawa sa ating parokya ang Listening Circle, isang makabuluhang pagtitipon na nagbigay ng pagkakataon sa bawat isa na makinig at magbahagi ng kanilang pananampalataya, karanasan, at mga saloobin sa diwa ng paglalakbay bilang Simbahan. Sa pamamagitan ng bukas na pakikinig at pag-uusap, higit nating naranasan ang presensya ng Diyos na kumikilos sa bawat isa. Nawa'y maging daan ito upang lalo pang mapalalim ang ating pagkakaisa, pakikibahagi, at pagtugon sa tawag ni Kristo na maging isang Simbahang nakikinig, naglilingkod, at nagmamahal.

18/07/2026

𝗗𝗔𝗟𝗔𝗪 𝗦𝗔𝗡𝗧𝗔 𝗠𝗢𝗡𝗜𝗖𝗔 𝗦𝗔 𝗣𝗔𝗥𝗢𝗞𝗬𝗔 𝗡𝗚 𝗦𝗔𝗡𝗧𝗢 𝗡𝗜Ñ𝗢 𝗗𝗘 𝗕𝗔𝗡𝗖𝗔𝗔𝗡

Kaninang umaga, malugod nating tinanggap ang pagdalaw ng Mahal na Imahen ni Santa Monica sa ating Parokya ng Santo Niño de Bancaan. Nawa'y maging inspirasyon ang kanyang matibay na pananampalataya, walang sawang pananalangin, at pagmamahal sa pamilya upang lalo tayong mapalapit sa Panginoon. Nawa'y patuloy tayong maging matatag sa pananampalataya at magtiwala sa Diyos sa bawat yugto ng ating buhay, sa tulong ng pamamagitan ni Santa Monica.

18/07/2026

17/07/2026

𝗗𝗔𝗟𝗔𝗪 𝗦𝗔𝗡𝗧𝗔 𝗠𝗢𝗡𝗜𝗖𝗔

Inaanyayahan ang lahat na makiisa sa Dalaw Santa Monica sa mga parokya ng Bikaryato ng Birhen ng Asuncion. Dadalaw sa ating parokya ang Mahal na Imahen ni Santa Monica bilang bahagi ng pagpapalaganap ng debosyon sa kanya at bilang paghahanda sa kanilang nalalapit na Kapistahan at Dedikasyon ng Parokya.

Ang pagdalaw ay gaganapin sa Sabado, ika-18 ng Hulyo 2026. Inaasahang darating ang Mahal na Imahen ni Santa Monica sa ganap na ika-9:15 ng umaga, at mananatili sa ating parokya sa loob ng ilang minuto bago umalis sa ganap na ika-10:00 ng umaga patungo sa Parokya ng Santo Niño de Ternate.

Nawa'y makiisa tayong lahat sa natatanging pagdalaw na ito bilang pagpapahayag ng ating pananampalataya at debosyon.

28/06/2026

Maligayang Ika-13 Taong Anibersaryo ng Pagkapari sa ating minamahal na Kura Paroko, Fr. Jun! Isang natatanging biyaya ang labintatlong taong tapat na paglilingkod sa Panginoon at sa Kanyang Simbahan, na naging daan upang maihatid ang Mabuting Balita, maipagkaloob ang mga sakramento, at magabayan ang sambayanan ng Diyos sa landas ng pananampalataya.

Taos-puso naming ipinagpapasalamat ang inyong masigasig na paglilingkod at walang sawang pagmamalasakit sa kawan na ipinagkatiwala sa inyo. Nawa’y patuloy kayong pagkalooban ng Panginoon ng masaganang biyaya, mabuting kalusugan, karunungan, at lakas upang maipagpatuloy ang misyong ipinagkaloob sa inyo. Patuloy nawa kayong pagpalain ng Mahal na Poong Santo Niño at maging inspirasyon sa lahat ng mananampalataya.

Maligayang Ika-13 Taong Anibersaryo ng Pagkapari! Ad multos annos!

27/06/2026

1 Peter 2:9
"But you are a chosen people, a royal priesthood, a holy nation, God's special possession..."

Thirteen years ago on this day, you were called to be a faithful shepherd of God's flock. You humbly answered His call, and to this day, you continue to live out your vocation with unwavering faith and dedication. Through your humility, compassion, and service, you have touched countless lives and inspired many to grow closer to God. Thank you for faithfully answering His call.

May the Lord continue to fill your heart with His love and grant you many more years of fruitful ministry. May He strengthen you, bless you with wisdom, and guide your every step as you continue your sacred mission in the Church.

Happy 13th Sacerdotal Anniversary, Fr. Jun! We pray that God continues to shower you with abundant grace, good health, and countless blessings as you faithfully serve His people.

Ikaw ay pari magpakailanman!

27/06/2026

𝗣𝗔𝗚𝗗𝗜𝗥𝗜𝗪𝗔𝗡𝗚 𝗡𝗚 𝗞𝗔𝗣𝗜𝗦𝗧𝗔𝗛𝗔𝗡 𝗡𝗚 𝗠𝗔𝗛𝗔𝗟 𝗡𝗔 𝗜𝗡𝗔 𝗡𝗚 𝗟𝗔𝗚𝗜𝗡𝗚 𝗦𝗔𝗞𝗟𝗢𝗟𝗢

Sa pagtatapos ng masayang pagdiriwang ng Kapistahan ng Mahal na Ina ng Laging Saklolo, sama-samang nakiisa ang mga deboto sa taimtim at makabuluhang prusisyon bilang pagpapakita ng kanilang pananampalataya, pagmamahal, at pasasalamat sa Mahal na Birhen. Nawa'y magsilbing inspirasyon ang kanyang halimbawa ng ganap na pagtitiwala sa Diyos at patuloy tayong gabayan, ipanalangin, at akayin sa landas ng kabutihan. Maraming salamat sa lahat ng nakiisa at tumulong upang maging matagumpay ang pagdiriwang na ito.

24/06/2026

𝗞𝗔𝗣𝗜𝗦𝗧𝗔𝗛𝗔𝗡 𝗡𝗚 𝗠𝗔𝗛𝗔𝗟 𝗡𝗔 𝗜𝗡𝗔 𝗡𝗚 𝗟𝗔𝗚𝗜𝗡𝗚 𝗦𝗔𝗞𝗟𝗢𝗟𝗢

Ang lahat ay inaanyayahan na makiisa sa pagdiriwang ng Kapistahan ng Mahal na Ina ng Laging Saklolo sa darating na ika-27 ng Hunyo.

Magsisimula ang ating pagdiriwang sa ganap na ika-3 ng hapon sa pamamagitan ng taimtim na pagdarasal ng Santo Rosaryo at panalangin para sa Mahal na Ina. Susundan ito ng pagdiriwang ng Banal na Misa sa ganap na ika-4 ng hapon bilang pagpapasalamat at pagpupugay sa ating Ina. Pagkatapos ng Misa, magtatapos ang kapistahan sa isang solemneng prusisyon bilang hayagang pagpapakita ng ating pananampalataya at debosyon.

Sama-sama nating parangalan ang Mahal na Ina ng Laging Saklolo at humingi ng kanyang patuloy na paggabay at pagkalinga.

16/06/2026

𝗗𝗔𝗟𝗔𝗪 𝗔𝗦𝗨𝗡𝗖𝗜𝗢𝗡

Malugod nating tinanggap sa ating Parokya ang pagdalaw ng Mahal na Birhen ng Asuncion ngayong araw. Dumating Siya bandang alas-11 ng umaga at sinalubong ng mga deboto at mananampalataya nang may galak. Nawa’y ang Kanyang pagbisita ay maging daan upang higit pang mapalalim ang ating pagmamahal sa Diyos at mapatatag ang pagkakaisa ng ating parokya sa pananampalataya at paglilingkod.

14/06/2026

𝗗𝗔𝗟𝗔𝗪 𝗔𝗦𝗨𝗡𝗖𝗜𝗢𝗡

Sa darating na ika-16 ng Hunyo, magkakaloob ng natatanging biyaya ang pagdalaw ng Mahal na Birhen ng Asuncion sa buong Bikarya ng Birhen ng Asuncion, bilang bahagi ng paghahanda para sa nalalapit na pagdiriwang ng ika-4 na Sentenaryo ng Parokya ng Maragondon at ika-399 na Taong Pistang Bayan.

Sa kanyang paglalakbay sa mga parokyang nasasakupan ng bikarya, inaasahang darating ang Mahal na Birhen sa ating Parokya ng Santo Niño de Bancaan sa ganap na ika-10:40 ng umaga. Ito ay isang mahalagang pagkakataon upang sama-sama nating maipahayag ang ating pananampalataya, debosyon, at pagmamahal sa Mahal na Birheng Maria.

Inaanyayahan ang lahat ng mga mananampalataya na makiisa sa maringal na pagsalubong at taimtim na panalangin bilang pagpupugay sa ating Mahal na Ina. Nawa’y maging daan ang kanyang pagdalaw upang lalo pang mapalalim ang ating pananampalataya at pagkakaisa bilang sambayanan ng Diyos.