Ina Peñafrancia Naga City Treasures and Inspirations

06/09/2022

02/09/2022

PAMIBI SA IKA-APAT NA ALDAW KAN NOVENA KI DIVINO ROSTRO

Jesus, huli kan saimong Transfiguracion, ipinahiling mo an kamurawayan kan saimong pagka-Dios. Nabanaag an saimong banal na Lawog na iyong sukat na dahilan kan paglaad nin pagkamoot kan saimong mga piniling apostoles. Ika an kapanoan asin kabilogan kan pagpahayag nin mahal na Dios sa diosnon na kamawotan. O Maboót na Maestro, tukdoan samo an dalan pasiring sa Ama, pahilingan samo an saimong kamurawayan, minamawot niamo na iwaras mo samo an samong kahagadan sa novenang ini kun iyan para sa saimong orog na kamurawayan asin para man sa karahayan nin samong kalag. Amen.

02/09/2022

PAMIBI SA IKATOLONG ALDAW KAN NOVENA KI DIVINO ROSTRO

Maheherakon na Kagurangnan, kan aldaw na ika nag-ako kan bonyag ni San Juan Bautista duman sa salog nin Jordan saimong itinukdo an kahalagahan kan pagsolsol asin pagbâgo nin buhay kan mga parakasalà. Siring man sa aldaw na idto saimong pinônan an pag-utob kan saimong mision na iyo an pagligtas kan bilog na katawohan. Tinogdas mo an Sacramento nin Pagbonyag tanganing mahugasan kami kan kasâlan na original, siring man inako niamo an mision na magin instrumento asin katabang ni Jesu Cristo sa pagligtas kan samong kapwa. O Jesus, burabod nin kaligtasan asin kusog niamo, pakusogon samo an espiritu nin mision, an pagpapahalaga bako sana kan sadiring kapakanan kundi siring man an kaligtasan nin samong kapwa. Tawan samo an balaog na samuyang minamawot asin hinahagad sa novenang ini kun magkakanigo sa saimong orog na kamurawayan asin para man sa karahayan nin samong kalag. Amen.

01/09/2022

PAMIBI SA IKADUWANG ALDAW KAN NOVENA KI DIVINO ROSTRO

Mamomoton na Jesus, kan aldaw na dinalaw ka kan mga pastores asin kan mga mago, pinahiling mo sa bilog na katawohan an gayon asin kabanalan kan saimong Lalawgon, na iyong sukat ikamidbid saimo kan gabos na katawohan. Ipinahayag mo samuya an saimong kapangyarihan asin katuyuhan kan saimong Lalawgon na iyo an burabod nin kabanalan tanganing samuyang makamtan an katotoohan. Warasan man sa samo an samong kahagadan asin kamawotan sa novenang ini kun ini ikakaorog kan saimong kamurawayan asin para man sa karahayan kan samong kalag. Amen.