24/07/2026
|| HULYO 24, 2026 – Biyernes
IKANAPULO’G UNOM NGA SEMANA SA TUIG
Ang “tabunok nga yuta” nagpasabot sa mga tawo nga nagmalampuson sa pag-angkon sa tinuod nga kalinaw bisan pa sa kasaba ug kagubot sa kalibutan. Bisan daghan ang mga butang nga makatugaw sa ilang hunahuna ug pagbati, sila nagpabiling lig-on tungod kay nakakat-on sila sa pagpuyo diha sa kahilum ug pagpamalandong. Sa maong kahilum, ilang mabati ang presensya sa Espiritu Santo nga naggiya ug naghatag ug kalinaw sa ilang kasingkasing.
Ang kalibutan puno sa mga tingog, problema, ug mga kabalaka nga usahay makapahilayo sa tawo gikan sa Diyos. Apan ang mga tawo nga sama sa “tabunok nga yuta” makahimo sa pagpaminaw sa pulong sa Ginoo tungod kay ilang gitugotan ang ilang kaugalingon nga mahilum ug mamalandong. Pinaagi niini, mas nasabtan nila ang tinuod nga kahulugan sa kinabuhi ug ang mensahe sa Diyos alang kanila.
Ang tinuod nga pagpamati dili lamang kay pagpaminaw pinaagi sa dalunggan, kundili usa ka tunhay nga kaakuhan nga naglangkob sa kinatibuk-ang hunahuna, kabubut-on, ug kasingkasing. Kini nga matang sa pagpamati mahitabo lamang kon ang usa ka tawo andam nga mohawa sa kasamok sa kalibutan ug mopuyo diha sa kahilum uban sa Diyos. Sa ingon niini, ang iyang pagtuo motubo ug mamunga sama sa binhi nga natanom sa tabunok nga yuta.
KINUTLO GIKAN SA BASAHON NI PROPETA JEREMIAS (Jer. 3: 14-17)
“Balik kanako, O katawhan nga maluibon, kay Ako man ang inyong Dios. Magkuha Ako’g usa kaninyo gikan sa matag lungsod ug duha ka tawo gikan sa matag banay, ug dad-on ko kamo balik ngadto sa Bukid sa Sion. Hatagan Ko kamo’g mga pangulo nga masinugtanon kanako, ug magdumala sila kaninyo uban sa kahibalo ug kaalam. Unya inigsanay na ninyo pag-ayo, dili na hisgotan sa katawhan ang Sudlanan sa Kasabutan sa GINOO. Dili na kini nila hinumdoman, kay dili na man nila kini kinahanglanon, ni magtinguha pa sila pagbuhat og lain. Inig-abot na niadtong higayona, ang Jerusalem tawgon nga trono sa GINOO ug adto na didto magsimba Kanako ang tanang kanasuran. Dili na sila magbuhat sumala sa sugyot sa tig-a ug dautan nilang kasingkasing.”
SALMO RESPONSORYO Jer. 31: 10-11, 12, 13
T. Ang Ginoo nagbantay kanato, maingon sa usa ka magbalantay nga nagbantay sa iyang panon.
Pamati-a ang pulong sa Ginoo, O mga nasud, isangyaw kini sa lagyo nga mga yuta, ug ingna: Siya nga nagpatibulaag sa Israel, nagatigum karon kanila, nagabantay siya kanila ingon sa usa ka magbalantay sa iyang panon.
T. Ang Ginoo nagbantay…
Ang Ginoo maglukat kang Jacob, magluwas siya kaniya gikan sa kamut sa iyang kaaway. Sa pagsinggit, motungas sila sa kinatumyan sa Sion, magnayan sila ngadto sa mga panalangin sa Ginoo; ang trigo, ang bino ug ang lana, ang karnero ug ang mga baka.
T. Ang Ginoo nagbantay…
Unya ang mga dalaga mag-sadya ug mosayaw, ang mga batan-on nga mga lalaki ug usab ang mga tigu lang. Himoon ko ang ilang pagbangotan nga kasadya, lipayon ko ug hupayon ko sila human sa ilang mga kasubo.
T. Ang Ginoo nagbantay…
+KINUTLO GIKAN SA BALAANG EBANGHELYO SUMALA NI SAN MATEO (Mt. 13: 18-23)
Si Jesus miingon sa iyang mga tinun-an, “Busa pamati kamo, ug sabta ninyo ang kahulugan sa sambingay mahitungod sa magpupugas. Kadtong nakadungog sa mensahe mahitungod sa gingharian apan wala makasabut niini mao ang binhi nga nahulog didto sa agianan. Miabot ang Yawa ug gisakmit ang gipugas didto kanila. Ang binhi nga nahulog sa yutang batoon mao ang mga tawo nga malipayong midawat sa mensahe sa pagkadungog nila niini. Apan dili kini makagamot diha kanila, busa dili sila molahutay. Sa pag-abot sa mga kalisdanan ug mga paglutos tungod sa mensahe, moundang dayon sila. Ug ang binhi nga nahulog sa dapit sa mga sampinit mao ang mga tawo nga nakadungog sa mensahe, apan ang mga kabalaka bahin niining kinabuhia ug ang gugma alang sa mga bahandi molumos sa mensahe, ug dili sila makabunga. Ug ang binhi nga napugas didto sa maayong yuta mao ang mga tawo nga nakadungog ug nakasabut sa mensahe; namunga sila: may mamungag taggatos, ang uban tagkan-uman, ug ang uban tagkatloan.”
----------
----------
𝐒𝐭𝐚𝐲 𝐈𝐧𝐟𝐨𝐫𝐦𝐞𝐝! 𝐒𝐭𝐚𝐲 𝐔𝐩𝐝𝐚𝐭𝐞𝐝!
𝐿𝑖𝑘𝑒, 𝐹𝑜𝑙𝑙𝑜𝑤 & 𝑆ℎ𝑎𝑟𝑒 𝑜𝑢𝑟 𝑆𝑜𝑐𝑖𝑎𝑙 𝑀𝑒𝑑𝑖𝑎 𝐴𝑐𝑐𝑜𝑢𝑛𝑡𝑠
