09/01/2025
NUESTRO PADRE JESUS NAZARENO
Pas-an ko an Kross
Diin nagtitikang an aton pagtoo?
Diin na dapit kita ungod sa pag-ampo?
Yaon ba suklanan an gawi ug kiwa?
Kunay ba inin aton relasyon sa kanya?
Damo an mga deboto ni Nuestro Padre Jesus Nazareno, piro hain an kanra kasing-kasing agud maipaabot an pangamuyo sa Ginoo?
Tengali an iba nakikisabay sa uso, tengali an iba karuyag la kumadto, o tengali mayaon la maipaindig na umatinder sira.
Piro ano gudman an ungod nga aton pag debosyon kan Jesus?
Naiimud ba naton an kanya sitwasyon sa aton kalugaringon?
Yaon ka liwat ba karga na Kross sa imo kinabuhi?
Kay an tawo bisan makuri an kamutangan natindog gihapon siya, kun an kabangra mao an sakripisyo na waray ginhuhulat na mabalik sa imo.
Kay an ungod na nagpapas-an sa kanya Kross andam masul-an, bayaan, kalimtan, bisan an mga duok sa imo kaya ka isalikway, diin kay ikaw nahigygma man diri la sa kalugaringon kundi sa imo igkasitawo kakarawton an ngatanan na kabiduan nga puno san lus-ay na kalipay.
Si Kristo nagpas-an sa Kross para sa katalwasan naton ngatanan, para higawas kita tikang sa kamot sa karat-an, ngan ipahirayo kita sa magraot na mga binuhatan.
Kay si Kristo andam ighalad kanya kinabuhi, an pakiana andam liwat ba kita ngatanan para sadton nanginginahanglan sa aton labihan an mga ginraogdaog, gin wad-an katungod, mga priso, an mga pobre ug an nawawaraan na sin paglaum ug iba pa?
Mga kabugtuan, an tawo na mapinairon diri maboyboyon, an tawo na mahinatagon diri masukoton, kay an tawo na maloloy-on mahigugmaon labaw san ngatanan mainampoon an tawo nga malaumon.
Kunta kita nga nagpas-an sa Kross maging sugad ni Nuestro Padre Jesus Nazareno na waray sukol na paghatag sa kanya kalugaringon bisan kun gin-ubos siya sin dako nga pagtalumpigos sa kanya pagkatawo bilang sayo na mesiyas sa kalibutan pakadto sa kasalbaran san ngatanan. Sanglit bisan paman damo an aton ginpapas-an na problima ada si Kristo para buligan ka sa ngatanan na imo kabaraka ngan kaguol sa imo kinabuhi.
An kinahanglan sa aton an pagiging UNGOD sa BAGAW ngan updan sin maupay na GAWI ug KIWA basi an Kross naton mao an magtutulang san kinabuhi na waray katapusan.
