15/06/2026
PASTORAL NGA SULAT SA ARSOBISPO SA ARKIDIYOSESIS SA OZAMIS NAGDASIG SA PAGHINULSOL UG PAGTABANG SA MGA BIKTIMA SA LINOG
OZAMIS CITY, MISAMIS OCCIDENTALโ Nagpagawas si Most Rev. Martin S. Jumoad, Arsobispo sa Arkidiyosesis sa Ozamis, og pastoral nga sulat alang sa tanang kaparian, relihiyoso, relihiyosa ug katawhan sa Diyos agig tubag sa kusog nga linog nga miigo sa General Santos City ug Davao Occidental niadtong Hunyo 8, 2026.
Sa iyang sulat nga may ulohang โKon ang yuta mouyog, ang kasingkasing sa Ginoo uyogon usab aron malooy,โ gihatagan pagtagad sa Arsobispo nga ang matag linog usa ka pahimangno sa tawo aron mamalandong sa iyang kinabuhi, maghinulsol sa mga sala, ug mobalik ngadto sa Ginoo.
Matod pa ni Archbishop Jumoad, ang mga kasakit ug kalisod nga nasinati sa mga biktima sa linog nagdala sa daghang pangutana ug pag-ampo sama sa gipadayag ni Haring David sa Salmo 13 ug ni Hesus sa krus. Apan iyang gipasabot nga ang Diyos dili nagapili kon kinsa ang maigo sa kalamidad ug dili usab kini silot alang sa labing makasasala.
Gikutlo usab niya ang Ebanghelyo ni San Lucas 13:4-5 diin gipangutana ni Hesus ang mga tawo mahitungod sa 18 ka tawo nga namatay sa pagkahugno sa Torre sa Siloam. Matod ni Hesus, dili sila labaw nga makasasala kaysa uban, apan ang tanan gitawag sa paghinulsol ug pagbag-o sa kinabuhi.
Gihulagway sa Arsobispo ang linog isip usa ka โwake-up callโ aron ang mga tawo magpakita sa kalooy ug panaghiusa ilabi na ngadto sa mga naapektuhan sa katalagman.
Subay niini, iyang gihangyo ang tanang parokya sa Arkidiyosesis sa Ozamis nga magpahigayon og ikaduhang koleksyon atol sa mga Misa karong Hunyo 14, 2026. Ang makolektang halad ipadala ngadto sa Chancery aron itugyan alang sa pagtabang sa mga biktima sa linog.
Gidugang usab ni Archbishop Jumoad ang mga tumutuo sa pagpangamuyo alang sa mga biktima ug sa pagpakita sa Kristohanong gugma pinaagi sa paghatag ug tabang ngadto sa mga nanginahanglan.
Sa katapusan sa iyang mensahe, iyang gi-awhag ang tanang magtutuo nga maghiusa isip usa ka Simbahan nga buhi ug matinabangon, nga nagdala sa paglaum ug kalooy ngadto sa mga naapektuhan sa kalamidad.
