17/12/2025
Catechesis 101
ADLAW 3 — DISYEMBRE 18
Topiko: Pagtuman Hugot sa Tagipusuon
Ebanghelyo: Mateo 1:18–24
Ang Ebanghelyo subong nga adlaw (Mateo 1:18–24) nagadala sa aton sa malinong kag balaan nga kahimtangan ni San Jose—isa ka tawo nga ang iya kabantugan wala naghalin sa madamo nga pulong kundi sa isa ka kabuhi sang pagkamatinumanon. Ang iya ngalan—Jose, nga nagakahulugan “ang Dios magadugang” ukon “ang Dios magabayaw”—nangin isa ka tagna kag giya sa iya kabuhi.
Nagahandom sia sang simple nga kabuhi: isa ka malinong nga pag-asawahay, isa ka trabaho bilang panday, kag isa ka ordinaryo nga palaabuton. Apang may lain nga plano ang Dios. Sang matukiban niya nga nagabusong si Maria, daw naguba ang tanan nga iya ginlauman. Ang iya tagipusuon napuno sang kahadlok, kagumon, kag madamo nga pamangkot nga wala pa sang sabat. Apang bisan pa sini, wala sia nagsabat nga may kaakig ukon kahuya. Ginpili niya ang kaayo. Ginpili niya ang pagpugong sa kaugalingon. Ginpili niya ang kaluoy. Ang iya paghipos indi kaluyahon—ini ang kabakod sang isa ka tawo nga nagdesisyon nga indi maghalit ukon magsakit sang isa ka kahimtangan nga wala pa niya mahangpan.
Sa sina nga kahipos, naghambal ang Dios. Indi paagi sa kilat ukon kalayo, indi paagi sa daku nga palanan-awon, kundi paagi sa isa ka damgo—isa ka malinong apang mabaskog nga pulong nga ginbutang sang Dios sa pinakamadalom nga bahin sang iya pagkatawo: “Jose, anak ni David, indi ka magkahadlok.” Ini nga mga pulong indi lamang isa ka sugo—kundi isa ka panawagan kag pagpalig-on. Gintawag si San Jose sa pagsulod sa isa ka misteryo nga labaw sa iya kahadlok. Ginpakita sini ang iya papel, indi lamang bilang manugpanilag, kundi bilang manug-amlig, manugbantay, kag amay. Kag si Jose nagsabat—indi paagi sa madamo nga tinaga ukon pamangkot, kundi paagi sa pagtindog kag pagtuman. Ang iya “huo” ginhimo sing hipos, maisugon, kag bug-os. Amo ina kon ngaa ginatamod sia sang Simbahan nga may daku nga pagtahod kag paghigugma, kag ginadumduman subong Patron sang Bug-os nga Simbahan. Ang Dios nga nagtugyan sang pag-atipan kay Jesus kag kay Maria kay Jose amo man ang Dios nga nagtugyan sa iya sang bug-os nga Simbahan.
Ang istorya ni San Jose naga-anggid sa espirituhanon nga pagpanglakaton sang aton lokal nga Simbahan. Halin sa pagsugod sini bilang isa ka misyon, tubtob sa pagtukod sini bilang isa ka diosesis paagi sa Qui ab Initio, kag sa ulihi ang pag-alsa sini sa Metropolitan Archdiocese paagi sa Quo in Philippina Republica sang 1951, ang Simbahan sang Jaro nag-agi sa madamo nga panahon sang kabudlayan, pagtilaw, kag paghulat. May mga tinuig nga limitado ang mga manggad, mabudlay ang pag-uswag, kag daw indi maathag ang direksyon nga ginapadulungan.—apang ang Simbahan nagpadayon, indi sa mabaskog nga tingog, kundi sa kabuhi sang pagkamatutom.
Kaangay ni San Jose, ang aton kasaysayan ginporma sang mga tawo nga naghalad sang ila mga sakripisyo sa likod sang mga eksena: mga pari nga nagapanglakaton sa malayo nga mga kaumhan, mga katekista nga nagatudlo gikan sa daan nga mga katekismo, mga pamilya nga nagapangamuyo sang rosaryo sa kasisidmon, kag mga lider nga nagatuytoy nga may malinong nga kaisog. Ang ila katutom nagtugot sa Dios nga magdugang — sa pagdugang sang pagtuo, sa pagpadalom sang panaksi, kag sa paghanda sa aton para sa tion nga aton karon ginakalangkagan: ang selebrasyon sang 75 ka tuig bilang isa ka Metropolitan Arkidioses.
Subong nga gab-i, si San Jose nagatindog sa aton atubang indi lamang bilang isa ka pigura sa Kasulatan, kundi bilang isa ka salamin sang aton mga kalag. Ang iya paghipos nagapamangkot: Makakasalig ka bala sa Dios bisan pa nga wala mo mahangpan ang tanan? Ang iya pagtuman nagapamangkot: Mahimo mo bala itugyan ang imo mga plano sa kabubut-on sang Dios? Ang iya kaisog nagapamangkot: Makapadayon ka bala sa paglakat sa pagtuo bisan yara ka sa kadudulman?
Ginatudluan kita ni San Jose nga ang Dios indi pirme nagahatag sang bug-os nga sabat—kon kaisa Sia nagapang-agda. Wala Niya pirme ginapahayag ang bug-os nga dalan—ginapangabay lang Niya kita nga himuon ang masunod nga tikang. Gani, upod ang bukas kag mapainubuson nga tagipusuon, magpangamuyo kita: “San Jose, hipos nga manugbantay kag matutom nga amay, tudlui kami sa pagsalig kon kami nahadlok. Buligi kami sa pagsiling "huo" sa bug-os namon nga kabuhi. Amen.
