20/09/2025
Sa ating lipunan ngayon, laganap ang katiwalian sa iba’t ibang sangay ng pamahalaan. Maraming namumuno ang inuuna ang pansariling kapakanan kaysa sa kapakanan ng bayan. Bilang mga mamamayan at mananampalataya, hindi tayo dapat tumahimik o manood lamang. Tayo ay tinawag upang maging ilaw at asin ng sanlibutan, mga tagapagdala ng katotohanan at katarungan.
“Huwag kayong makiayon sa takbo ng mundong ito. Sa halip, hayaan ninyong baguhin ng Diyos ang inyong pag-iisip upang maunawaan ninyo ang Kanyang kalooban, kung ano ang mabuti, kalugud-lugod, at ganap na kalooban Niya.” -Roma 12:2
Ang katiwalian ay isang kasalanang hindi lamang lumalason sa gobyerno kundi sa buong sambayanan. Sa tuwing may magnanakaw sa kaban ng bayan, ang mahihirap ang unang naaapektuhan, nagugutom, hindi makapag-aral, walang maayos na serbisyong medikal.
Subalit ang Diyos ay makatarungan. Hindi Siya nalulugod sa katiwalian, at inaanyayahan Niya tayong kumilos para sa katuwiran.
“Ang gumagawa ng matuwid ay kalugud-lugod sa Diyos, ngunit ang masama ay Kanyang kinamumuhian.” -Kawikaan 11:20
Hindi madali ang tumindig laban sa katiwalian. Maaaring tayo’y pagtawanan, pagtakpan, o pagtakot-takutin. Ngunit tandaan natin: ang pananahimik sa harap ng kasamaan ay isang uri ng pakikiisa rito. Kung hindi tayo kikilos, sino ang kikilos para sa bayan?
“Ang sinumang nakakaalam ng mabuti na dapat gawin ngunit hindi ito ginagawa, siya’y nagkakasala.” -Santiago 4:17
Sa gitna ng dilim, maging ilaw tayo. Sa gitna ng takot, maging matapang. At sa gitna ng katiwalian, tayo nawa ay maging tinig ng katotohanan at pag-asa.
“Mapalad ang mga nauuhaw sa katuwiran, sapagkat sila’y bubusugin.” -Mateo 5:6
Panalangin: Aming Diyos, Ikaw na makatarungan at banal, bigyan Mo kami ng lakas ng loob na tumindig laban sa katiwalian. Huwag Mong hayaang kami’y manahimik sa harap ng kasamaan. Gamitin Mo kami upang maging instrumento ng katotohanan, katarungan, at pagbabago. Sa Ngalan ni Hesus. Amen. 🙏
