23/04/2014
100% KATOLIKONG PINOY!
Tanong: "ISANG MAHALAGANG TANONG PO ..... ang Pari ba ay may kakayahang magpatawad ng kasalanan ? ,,,,,,,,, di po sa Diyos tayo dapat humingi ng pagpapatawad ... at sa taong ating pingkasalahan ?? ... yun po kase ang nakasaad sa Biliya at ginagawa ng mga naunang lingkod ng Diyos / mga Kristiano ." - MP
---------------------------
SAGOT: Ang ginagawa ng mga unang Kristiyano, ay ikinukumpisal nila ang kanilang mga kasalanan hindi lang sa Diyos, kundi ikinukumpisal din nila ito sa kanilang kapwa Kristiyano. Nasusulat:
"Marami rin naman sa mga nagsisampalataya na ang nagsidating, na ipinahahayag at isinasaysay ang kanilang mga gawain. At hindi kakaunti sa mga nagsisigamit ng mga kabihasnang magica ay nagsipagtipon ng kanilang mga aklat, at pinagsusunog sa paningin ng lahat; at kanilang binilang ang halaga niyaon, at nasumpungang may limampung libong putol na pilak." (Gawa 19:18-19)
"Kaya nga, ipagtapat ninyo sa inyong mga kapatid ang inyong mga kasalanan at ipanalangin ninyo ang isa't isa, upang kayo'y gumaling. Malaki ang nagagawa ng panalangin ng taong matuwid." (Santiago 5:16)
Ang pari, na pinatungan ng kamay ng obispo, na pinatungan ng kamay ng isa pang obispo pabalik sa mga apostoles (apostolic succession), ay binigyan ng katungkulan na magpatawad ng kasalanan. Ang katungkulang ito ay galing kay Kristo:
"Sinabi ngang muli sa kanila ni Jesus, Kapayapaan ang sumainyo: kung paanong pagkasugo sa akin ng Ama, ay gayon din naman sinusugo ko kayo. At nang masabi niya ito, sila'y hiningahan niya, at sa kanila'y sinabi, Tanggapin ninyo ang Espiritu Santo: Sinomang inyong patawarin ng mga kasalanan, ay ipinatatawad sa kanila; sinomang hindi ninyo patawarin ng mga kasalanan, ay hindi pinatatawad." (Juan 20:21-23)
Sa totoo lang, sa isang Katoliko, ang paglapit niya sa pari upang mangumpisal ay unang-una, paglapit sa Diyos dahil ang Iglesiya ang awtoridad ng Diyos sa mga bagay espiritwal:
"At sinasabi ko sa iyo, ikaw ay Pedro, at sa ibabaw ng batong ito ay itatayo ko ang aking iglesya at ang pintuan ng daigdig ng mga patay ay hindi magtatagumpay laban sa kanya. Ibibigay ko sa iyo ang mga susi ng kaharian ng langit. Ang ipagbawal mo sa lupa ay ipagbabawal sa langit, at ang ipahintulot mo sa lupa ay ipahihintulot din sa langit." (Mateo 16:18-19)
At ang nangungumpisal na Katoliko ay laging sa Diyos nagdarasal at hindi sa pari. Matatandaan na noong nagkasala si David kay Bathsheba, si Nathan ang kinasangkapan ng Diyos upang aminin ni David ang kanyang kasalanan:
"Sinabi ni David kay Natan, "Nagkasala ako kay Yahweh."
Sumagot si Natan, "Pinapatawad ka na ni Yahweh at hindi ka mamamatay." (2 Samuel 12:13)
Kaya mahalaga ang magkaroon ng taong tagapamagitan sa pagkukumpisal sa kasalanan, taong binigyan niya ng katungkulan nito. At ito ang katungkulan ng mga kaparian ng Iglesiya.
Ang pangungumpisal diretso sa Diyos na walang senyales ng pagpapatawad, ay hindi makakatututo sa tao na magbago, dahil sa madali ang pagkumpisal at madali din ng palagay na napatawad ka na.
