Youth Apostolate Of Fatima - OLFP, Meralco Village, Marilao, Bulacan

17/08/2026

15/08/2026

KAPISTAHAN SA SIMBAHAN | PAG-AAKYAT SA LANGIT NG MAHAL NA BIRHENG MARIA

“Si Maria ay dinala sa langit; nagagalak ang koro ng mga anghel.”

Ngayong ika-15 ng Agosto, ipinagdiriwang ng Simbahan ang Dakilang Kapistahan ng Pag-aakyat sa Langit ng Mahal na Birheng Maria—ang maringal na pag-alaala sa pagtanggap kay Maria sa kaluwalhatian ng langit, katawan at kaluluwa.

Si Maria, ay naging larawan ng isang buhay na lubos na ipinagkatiwala sa Diyos. Mula sa kaniyang mapagpakumbabang pag “oo” sa kalooban ng Panginoon hanggang sa kaniyang katapatan sa bawat pagsubok, pinili niyang mamuhay hindi para sa kaniyang sarili, kundi para sa Diyos at sa Kaniyang plano.

Sa pag-akyat ni Maria sa kaluwalhatian, ipinapakita sa atin ng Diyos ang bunga ng isang buhay na inialay sa Kaniya—isang buhay na sa huli ay humahantong sa ganap na pakikipag-isa sa Diyos.

Nawa'y maging inspirasyon sa atin si Maria na sa bawat “oo” natin sa Diyos, sa bawat sakripisyo, at sa bawat pagkakataong pinipili nating manatiling tapat, ay patuloy tayong lumakad patungo sa pangakong buhay na walang hanggan.

Mahal na Birheng Maria, Ina ng Diyos at Ina naming lahat, ipanalangin mo kami. Upang tulad mo, matuto kaming magtiwala sa Diyos hanggang sa huli at matagpuan ang tunay na kaluwalhatian sa Kaniya.

Maligayang Kapistahan ng Pag-aakyat sa Langit ng Mahal na Birheng Maria!

10/08/2026

MAGNILAY AT ISABUHAY | Ikalabing-siyam na Linggo sa Karaniwang Panahon

“Sa pamamagitan ng ating pananahimik, binubuksan natin ng puwang ang ating mga puso upang magsalita ang Diyos sa ating mga buhay. ”
- Rev. Fr. Alvin De Leon

10/08/2026

KAPISTAHAN SA SIMBAHAN | SAN LORENZO, DIYAKONO AT MARTIR

"Pinagpala ang mga inuusig nang dahil sa kanilang pagsunod sa kalooban ng Diyos, sapagkat kabilang sila sa kaharian ng langit.”
Mateo 5:10

Nang si San Lorenzo ay inutusan ng emperador ng Roma na isuko ang kayamanan ng simbahan, dali-dali niyang tinipon ang mga ulila at dukha. Matapang niyang inilahad na sila ang tunay na kayamanan ng simbahan.

Dahil sa katapangang ipinamalas niya sa harap ng nagbabadyang kamatayan, si Lorenzo ay kinoronahan ng pagiging martir, nang siya ay pinarusahan na ihawin ng buhay sa isang 𝘎𝘳𝘪𝘥𝘪𝘳𝘰𝘯. Sinasabi rin na dinaig niya ang init ng apoy at inimungkahi pa na siya ay baliktarin na dahil luto na ang isang bahagi ng kanyang katawan. Doon siya nakilala bilang patron ng mga bumbero at mga tagapag-luto.

Hindi makakaila ang katapatan ng pananampalataya ni San Lorenzo, Diyakono at Martir. Matayog niyang hinarap ang kamatayan dahil sa buong pagtitiwala na ang Panginoong Hesus ay sumasakanya. Ngayong kaniyang kapistahan, tinatawagan tayo na tibayan ang ating pananampalataya sa anumang pag uusig sa atin bilang isang mga Kristiyano. At ang pagmamahal natin sa kapwa—lalo na sa mahihirap—ang nagsasaad ng mga bunga ng ating katapatan sa Diyos.

San Lorenzo, Diyakono at Martir, ipanalangin mo kami.

09/08/2026

PANALANGIN SA PANAHON NG KALAMIDAD

Amang Makapangyarihan,

Hari ng kalangitan at kalupaan, hindi Mo kailanman ninais na kami'y mapahamak. Ngayong kami'y nahaharap sa kalamidad na dulot ng habagat, pawiin Mo ang aming takot at pangamba. Tulad ng kapanatagang ibinigay ni Hesus sa mga alagad nang sila ay humarap sa malakas na unos sa dagat sa Galilea, dinggin Mo kami Ama na humihingi ng kaginhawaan mula sa init ng pangangalaga Mo.

Ama, balutin Mo kami ng iyong mga palad, Iyong ipagkaloob ang kaligtasan ng lahat laban sa anumang napipintong panganib na hatid ng masamang panahon. Sa Iyong kapangyarihan, ibalik ang kaayusan at kapayapaan sa pamamagitan ni Hesukristo.

kasama ng Espiritu Santo magpasawalang hanggan. Amen.

N. Panginoon naming Diyos, ipakita mo na ang pag-ibig mong wagas.

B. Kami ay lingapin at sa kahirapan ay iyong iligtas.

Mahal na Birhen ng Fatima, ipanalangin mo kami.
San Miguel Arkanghel, ipanalangin mo kami.
San Roque, ipanalangin mo kami.
San Lorenzo Ruiz, ipanalangin mo kami.
San Pedro Calungsod, ipanalangin mo kami.

08/08/2026

KAPISTAHAN SA SIMBAHAN | SAN DOMINGO DE GUZMAN

Tagapagdala ng Liwanag ng Salita ng Diyos

Sa bawat salitang binibigkas nang may pananampalataya, sa bawat panalanging taimtim na iniaalay, at sa bawat pusong hinahaplos ng pag-ibig ng Diyos, patuloy na sumisinag ang halimbawa ni San Domingo de Guzman. Siya ay isang banal na lingkod na buong buhay na inilaan ang kaniyang sarili sa pangangaral ng katotohanan at pagpapalaganap ng Mabuting Balita.

Sa mapagpakumbabang puso at maalab na pag-ibig ni San Domingo kay Kristo, naging tanglaw siya ng mga naliligaw at tinig ng katotohanang umaakay tungo sa liwanag. Itinatag niya ang Orden ng mga Mangangaral, na patuloy na nagsisilbing daluyan ng karunungan, pananampalataya, at paglilingkod sa sambayanan ng Diyos.

Sa paggunita sa kaniyang banal na buhay, nawa’y matutuhan din nating maging mga saksi ng Ebanghelyo. Hindi lamang sa pamamagitan ng salita, kundi higit sa lahat, sa pamamagitan ng buhay na puno ng panalangin, kababaang-loob, at pag-ibig.

Nawa’y ang ningning ng pananampalataya ni San Domingo ay maging tanglaw sa ating paglalakbay, at ang kaniyang katapatan sa Diyos ay maging inspirasyon upang buong tapang nating isabuhay ang ating pananampalataya.

San Domingo de Guzman, ipanalangin mo kami.

.DominicdeGuzmán

08/08/2026

PAALAM AT SALAMAT, MADRE DIVINA!

Makalipas ang isang linggong pananatili ng pinipintakasing imahen ng Madre de la Divina Gracia de Marilao sa Tahanan ni Fatima, siya’y magbabalik na sa kaniyang dambana, tangan ang ating mga panalangin at pasasalamat sa biyaya ng kaniyang pagdalaw.

Sa kaniyang paglisan, nawa’y manatili sa ating puso ang kaniyang halimbawa ng buong-pusong pagtugon sa tawag ng Panginoon, upang tulad niya, tayo rin ay maging bukas-palad sa pagsunod sa kalooban ng Diyos.

Ang aming pamayanang parokyal ay buong-pusong nagpapasalamat sa St Michael the Archangel Parish Marilao, Bulacan na may buong sigasig at debosyon na nanguna at nagsakatuparan sa banal at mabiyayang pagdalaw na ito. Nawa’y patuloy na pagpalain ng Panginoon ang kanilang marubdob na paglilingkod at debosyon, at gawin silang higit pang instrumento ng Kaniyang biyaya at pagmamahal sa sambayanan ng Diyos.

Hanggang sa muli mong pagdalaw sa Tahanan ni Fatima, Mahal naming Madre Divina!

07/08/2026

PANALANGIN SA MADRE DE LA DIVINA GRACIA DE MARILAO

Ama naming makapangyarihan
ng walang hanggang karunungan,
sa lyong pagpapala
ninais Mong ang Mahal na Birheng Maria
ay maging tagapagdala
ng pinagbubuhatan ng biyaya,
at maging kabahagi Niya
sa pagdudulot ng kaligtasan
sa sangkatauhan.
Dulutan nawa niya kami ng masaganang
biyaya at dalhin niya kami
sa kanlungan ng walang hanggang kaligtasan.
Hinihiling namin ito sa pamamagitan
ng aming Panginoong Hesukristo, Iyong Anak,
na nabubuhay at naghahari
kasama Mo at ng Espiritu Santo, Diyos, magpasawalang hanggan. Amen.

MADRE DE LA DIVINA GRACIA,
IPANALANGIN MO KAMI.