Parish Commission on Youth-OLFP

05/10/2026

PAANYAYA | GENERAL ASSEMBLY 2026

“Magsalita po kayo, Panginoon, sapagkat nakikinig ang inyong lingkod"
— 1 Samuel 3:10

Sa darating na October 18, 2026, sama-sama tayong titipon para sa General Assembly ng Parish Commission on Youth (PCY) sa Parokya ng Mahal na Birhen ng Fatima.

Bilang mga kabataan, patuloy tayong tinatawag ng Panginoon na makilala Siya, lumalim sa pananampalataya, at maging instrumento ng Kanyang pagmamahal sa ating kapwa at sa ating parokya.

Ang General Assembly na ito ay hindi lamang isang pagtitipon, kundi isang pagkakataon upang magkaisa bilang magkakapatid sa pananampalataya, makilala ang isa’t isa, tuklasin ang ating mga kaloob, at sama-samang tumugon sa tawag ng Diyos sa paglilingkod.

Sa bawat ngiti, kwentuhan, panalangin, at paglilingkod, nawa’y mas makilala natin ang Panginoon at mas mapalapit tayo sa Kanya. Sama-sama nating buuin ang isang komunidad ng kabataang may pananampalataya, pusong naglilingkod, at buhay na nakasentro kay Kristo.

Halina’t magsama-sama.
Halina’t tumugon sa tawag ng Diyos.
Halina’t maging PCY!

📆 October 18, 2026
📍 3rd Floor Social Hall
⏰ 11:00 AM–4:00 PM

04/10/2026

YOUTH MASS | October 4, 2026

Ngayong ika-4 ng Oktubre, ginanap ang Youth Mass sa Parokya ng Mahal na Birhen ng Fatima - Lias, kung saan sama-samang nagtipon ang mga kabataan upang ilaan ang kanilang oras sa Panginoon at patatagin ang kanilang pananampalataya.

Sa ganap na ika-4:00 ng hapon, nakibahagi ang mga kabataan sa Banal na Nobena, buong pusong iniaalay ang kanilang mga panalangin at kahilingan sa tulong at pamamagitan ng Mahal na Birheng Maria. Sinundan ito ng Banal na Misa sa ganap na ika-5:00 ng hapon, kung saan buong debosyon silang nakiisa sa pag-aalay, panalangin, at pasasalamat.

Sa araw na ito, nawa’y patuloy na pag-alabin ng Panginoon ang puso ng bawat kabataan upang manatiling matatag sa pananampalataya, bukas sa paglilingkod, at maging liwanag at saksi ng pag-ibig ni Kristo sa kanilang kapwa. Sa tulong at paggabay ng Mahal na Birheng Maria, nawa’y gamitin nila ang kanilang panahon, talento, at lakas sa mga bagay na nagbibigay-luwalhati sa Diyos.

02/10/2026

01/10/2026

PAGGUNITA | SANTA TERESITA NG BATANG HESUS AT NG BANAL NA MUKHA

Ngayong ika-1 ng Oktubre, buong pananampalataya nating ginugunita si Santa Teresita ng Batang Hesus at ng Banal na Mukha, ang munting bulaklak ng Lisieux at patrona ng mga misyon. Sa pamamagitan ng kaniyang tinatawag na “Munting Daan," itinuro niyang hindi kailangang gumawa ng malalaki at pambihirang bagay upang maging banal. Ang bawat munting gawain, kapag inialay nang may wagas na pag-ibig at pagtitiwala sa Diyos, ay nagiging daan tungo sa kabanalan.

Ipinanganak si Marie-Françoise-Thérèse Martin noong Enero 2, 1873 sa Alençon, France. Sa edad na labinlima, pumasok siya sa Carmel ng Lisieux at buong buhay na inilaan sa panalangin, pagmamahal, at paglilingkod sa Simbahan. Pumanaw siya noong Setyembre 30, 1897, sa edad na 24. Dahil sa lalim ng kaniyang pananampalataya at mga aral, ipinahayag siya ni San Juan Pablo II bilang Doctor of the Church noong 1997.

Sa kaniyang simpleng buhay, ipinapaalala ni Santa Teresita na ang kabanalan ay maaaring mamulaklak sa mga pinakatahimik at pinakamaliliit na sandali ng ating buhay. Nawa’y matutuhan din nating ialay sa Diyos ang bawat munting kabutihan, panalangin, at pagmamahal, sapagkat sa Kaniyang kamay, ang maliit na pag-ibig ay nagiging dakilang alay.

Santa Teresita, ipanalangin mo kami.

30/09/2026

IKA-109 NA ANIBERSARYO NG HULING APARISYON NG MAHAL NA BIRHEN NG FATIMA

Halina’t makiisa at makibahagi sa mga gawaing pamparokya bilang paggunita sa mahalagang pagdiriwang na patuloy na nagpapaalala sa atin ng mensahe at panawagan ng ating Mahal na Ina.

PAGDEDEBOSIYON SA UNANG
SABADO NG BUWAN | Oktubre 3, 2026
5:30N.U. | Prusisyon at Rosaryo
6:30N.U. | Banal na Misa
7:30N.U. | Labinlimang Minutong Meditasyon

PAGSISIYAM SA MAHAL NA BIRHEN | Oktubre 4-12, 2026
Lunes-Sabado
6:00N.U. | Rosaryo at Nobena
6:30N.U. | Banal na Misa
Linggo
4:00N.H. | Rosaryo at Nobena
5:00N.H. | Banal na Misa

IKA-109 NA ANIBERSARYO NG PAGPAPAKITA | Oktubre 13, 2026
6:00N.U. | Rosaryo at Nobena
6:30N.U. | Banal na Misa
7:30N.U. | Prusisyon

Halina’t tugunin ang paanyaya ng ating Mahal na Ina sa pamamagitan ng pananalangin, pagtataguyod ng kapayapaan, at pamumuhay nang naaayon sa kalooban ng Diyos.

29/09/2026

MAGNILAY AT ISABUHAY | Ikadalawampu’t Anim na Linggo sa Karaniwang Panahon

“Maaaring yung ayaw mo noon, pwedeng gusto mo na ngayon. At yung gusto mo noon, pwedeng ayaw mo na ngayon. Kaya nga po, may ganoong pagkakataon, at kapag dumarating na tayo roon, paalala iyon na sariwain natin ang ating naging pag-tugon.”
- Rev. Fr. Valentino Banag Jr.

28/09/2026

PISTA SA NAYON | MALIGAYANG KAPISTAHAN,
SPPC SAN LORENZO RUIZ!

Kaisa ng buong sambayanan ng Parokya ng Mahal na Birhen ng Fatima – Lias, Marilao, Bulacan, buong galak at pusong nakikisaya sa banal na pagdiriwang kasama ang sambayanan ng Diyos sa SPPC San Lorenzo – Lambakin, Marilao, Bulacan, sa kapistahan ng kanilang pintakasing patron, San Lorenzo Ruiz.

Sa kaniyang matatag na pananampalataya, wagas na katapatan, at buong tapang na paninindigan para sa Diyos, nasisilayan natin ang halimbawa ng isang lingkod na hindi natitinag sa harap ng pagsubok. Ang kaniyang buhay ay patuloy na nagpapaalala sa atin na ang pananampalataya ay hindi lamang ipinahahayag sa salita, kundi isinasabuhay nang may tapang, pagtitiis, at buong pagtitiwala sa Panginoon.

Nawa’y patuloy tayong maging matatag sa pananampalataya at tapat sa ating paglilingkod, gaya ng ipinamalas ni San Lorenzo sa kaniyang buhay.

San Lorenzo Ruiz,
ipanalangin mo kami!