09/07/2026
WHEN THE TIME IS RIGHT, I THE LORD WILL MAKE IT HAPPEN
"Sa tamang panahon, Ako, ang Panginoon, ang magsasagawa nito."
— Isaias 60:22
Sa panahon ngayon, maraming kabataan ang nagmamadaling pumasok sa isang relasyon. Hindi dahil masama ang pag-ibig, kundi dahil gusto nilang maranasan ang pagmamahal, pagtanggap, at saya.
Ngunit bilang simbahan, hindi namin tinututulan ang pag-ibig.
Ang tinututulan namin ay ang maling panahon.
Ang Diyos ay Diyos ng kaayusan at tamang timing. Hindi Niya ipinagkakait ang pinakamabuti—inihahanda lamang Niya ito sa tamang panahon.
📖 Paalala #1 — Hindi Pa Ito ang Panahon ng Pag-aasawa
Ang isang maka-Diyos na relasyon ay hindi laro o pampalipas-oras. Ang layunin nito ay humantong sa banal na pag-aasawa.
Kung hindi ka pa handang mag-asawa, itanong mo muna sa sarili mo:
Bakit ako papasok sa isang relasyon?
"Ang lahat ng bagay ay may kani-kaniyang panahon."
— Eclesiastes 3:1
📖 Paalala #2 — Unahin Mong Lumago Kay Cristo
Bago ka maging tamang partner para sa iba, hayaan mong gawin ka munang tamang anak ng Diyos.
Palalimin mo muna ang iyong relasyon kay Jesus. Hubugin Niya ang iyong karakter bago Niya ipagkatiwala ang puso ng ibang tao sa iyo.
"Hanapin muna ninyo ang kaharian ng Diyos at ang Kanyang katuwiran."
— Mateo 6:33
📖 Paalala #3 — Huwag Mong Paglaruan ang Tukso
Habang lumalalim ang emosyon, lumalakas din ang tukso.
Hindi lahat ng laban ay kailangang harapin.
May mga laban na ang paraan ng Diyos para magtagumpay ay ang lumayo.
"Layuan ninyo ang mga pita ng kabataan at sundin ninyo ang katuwiran, pananampalataya, pag-ibig at kapayapaan."
— 2 Timoteo 2:22
📖 Paalala #4 — Ingatan Mo ang Iyong Puso
Hindi lahat ng nararamdaman ay kalooban ng Diyos.
Minsan ang damdamin ay mabilis, ngunit ang karunungan ay naghihintay.
Kapag paulit-ulit na nasasaktan ang puso, unti-unti ring nawawala ang kakayahang magtiwala.
"Higit sa lahat ng dapat ingatan, ingatan mo ang iyong puso sapagkat dito nanggagaling ang bukal ng buhay."
— Kawikaan 4:23
📖 Paalala #5 — Protektahan Mo ang Iyong Patotoo
Bilang Kristiyano, may mga taong tumitingin sa iyong buhay.
Hindi lang sila nakikinig sa iyong sinasabi—pinagmamasdan din nila ang paraan ng iyong pamumuhay.
Hayaan mong ang buhay mo ang magturo sa iba kung paano magmahal nang may kabanalan.
"Maging halimbawa ka sa mga mananampalataya sa pananalita, pamumuhay, pag-ibig, pananampalataya at kalinisan."
— 1 Timoteo 4:12
📖 Paalala #6 — Makinig sa Iyong mga Magulang at Spiritual Leaders
Ibinigay sila ng Diyos hindi upang hadlangan ang kaligayahan mo.
Ibinigay sila upang protektahan ang kinabukasan mo.
Ang karunungan ay kadalasang nagmumula sa mga taong mas nauna nang lumakad sa buhay.
"Dinggin mo ang iyong ama... at huwag mong hamakin ang iyong ina."
— Kawikaan 23:22
📖 Paalala #7 — Magtiwala sa Timing ng Diyos
Ang pagmamadali ay maaaring magdala ng sakit.
Ngunit ang paghihintay sa Diyos ay nagdadala ng kapayapaan at pagpapala.
Kung para sa iyo ang taong inilaan ng Diyos, hindi mo kailangang habulin o ipilit.
Sa tamang panahon, Siya mismo ang magdadala nito sa iyong buhay.
"Magtiwala ka sa Panginoon nang buong puso... at itutuwid Niya ang iyong mga landas."
— Kawikaan 3:5–6
📖 Paalala #8 — Maging Tapat sa Season na Kinalalagyan Mo
Kung ang panahon mo ngayon ay pag-aaral...
Mag-aral ka nang mabuti.
Kung panahon ng ministry...
Maglingkod ka nang buong puso.
Kung panahon ng paghahanda...
Magpagamit ka sa Diyos.
Ang pagiging tapat ngayon ang maghahanda sa iyo para sa mas malaking pagpapala bukas.
"Ang tapat sa maliit na bagay ay magiging tapat din sa malaki."
— Lucas 16:10
❤️ Tandaan at Unawain Mabuti!
Hindi ipinagbabawal ng simbahan ang pag-ibig.
Ang ipinaglalaban ng simbahan ay ang tamang panahon, tamang tao, at tamang layunin.
Tandaan mo ito:
Ang tamang tao sa maling panahon ay maaari pa ring magdulot ng maling bunga.
Ngunit ang tamang tao, sa tamang panahon, ayon sa kalooban ng Diyos, ay magiging pagpapalang panghabambuhay.
Kaya habang naghihintay...
Lumago ka.
Maglingkod ka.
Magpakabanal ka.
At magtiwala ka sa Panginoon.
Sapagkat ang Kanyang pangako ay hindi kailanman pumapalya.
"WHEN THE TIME IS RIGHT, I THE LORD WILL MAKE IT HAPPEN."
— Isaias 60:22
Hintayin mo ang tamang panahon ng Diyos. Hindi ka Niya nakakalimutan—inihahanda ka lamang Niya para sa pinakamagandang plano Niya sa iyong buhay.
— Ptr. Mark Bandoles
Youth For Christ Mission
Like Share Follow Our Pages mga Ka-Misyon
