Anak ng Birhen ng Turumba-Laguna

31/12/2025

𝐌𝐚𝐫𝐚𝐦𝐢𝐧𝐠 𝐒𝐚𝐥𝐚𝐦𝐚𝐭 𝐩𝐨! 𝐒𝐚 𝐁𝐢𝐫𝐡𝐞𝐧! ❣️



Sa pagtatapos ng taong ito at ngayong huling araw ng taong 2025, kami po ay taos-pusong nagpapasalamat sa bawat pamilyang buong pagmamahal na tumanggap, nagbukas ng kanilang tahanan, at pinanhikan ng aming replikang imahen ng Mahal na Birhen ng Turumba. Ang inyong pagtanggap ay hindi lamang pagbubukas ng pintuan ng inyong mga tahanan, kundi pagbubukas din ng inyong mga puso sa presensya ng Ina ng awa at habag.

Buong pananalig naming pinaniniwalaan na sa mga sandaling Siya’y inyong nakasama, naramdaman ninyo ang Kanyang mapagkalingang yakap—ang tahimik ngunit makapangyarihang pag-ibig ng Mahal na Birhen na nagdadala ng kapayapaan, pag-asa, at biyaya sa inyong pamilya. Sa bawat panalangin, luha, at pasasalamat na inialay, nariyan ang Kanyang patnubay at pagmamahal na patuloy na umaagos.

Dalangin namin na ang mga biyayang inyong tinanggap ay magsilbing ilaw sa inyong mga tahanan—biyayang siksik, liglig, at umaapaw—mula sa Diyos Ama, sa pamamagitan ng panalangin at mapagkalingang tulong ng Mahal na Birhen ng Turumba. Nawa’y manatili Siyang gabay sa bawat hakbang ng inyong buhay at sandigan sa lahat ng panahon.

Muli, ang aming Taos Puso at di matatawarang pasasalamat mula sa aming samahan. Sa Birhen!

18/11/2025

• Ang paglahok ng Isang Dekadang replikang imahen ng Mahal na Birhen ng Turumba ng samahan sa ginanap na ika-4 na Turumba Replica Procession sa Bayan ng Pakil noong nakalipas na Setyembre.

𝐊𝐚𝐬𝐚𝐲𝐬𝐚𝐲𝐚𝐧 𝐧𝐠 𝐃𝐞𝐛𝐨𝐬𝐲𝐨𝐧

Mga minamahal naming kapatid kay Kristo, ngayong taon 2025, ipinagdiriwang ang Isang Dekada o sampung taon ng Paglalakbay ng Replikang Imahen ng Mahal na Birhen ng Turumba ng Samahan ng Anak ng Birhen ng Turumba ng Laguna.

Ang kasaysayan at debosyon ng samahan ay nagsimula noong 2012, nang mga kabataan mula sa Junior Legion of Mary at Lingkod ng Dambana ng Parokya nina San Pedro at San Pablo ay unang nakiisa sa makulay na debosyon ng Turumba sa Pakil, Laguna. Doon nila natagpuan ang inspirasyon upang itaguyod ang parehong debosyon sa kanilang sariling bayan. Mula sa maliit na pangarap, isinilang ang Anak ng Birhen ng Turumba ng Siniloan, na lumago hindi lamang sa kanilang bayan kundi maging sa iba’t ibang lugar ng Laguna.

Noong 2016, sa basbas ng noo’y Rektor ng Dambana, Rev. Fr. Mario Rivera, at ng Turumba Chairperson na si Dra. Cynthia Fornoles, naging ganap na kinilalang samahan sa Dambana ng Mahal na Birhen ng Turumba sa Pakil ang kapatiran.

Simula noon, ang replikang imahen ay naging daan ng pagdaloy ng maraming biyaya: mga karamdaman na gumaling, mga pusong nagkaisa, mga pangarap na natupad, at mga kabataang nagtagumpay.
Sa loob ng sampung taon, napatunayan na ang imahen ay hindi lamang isang larawan, kundi tanda ng buhay na pananampalataya, saksi ng mga himala, at sandigan nating mga Anak ng Birhen saanman tayo naroroon.

Ngayong Taong 2025, ipinagdiriwang ng samahan ang kanilang ika-13 Taong Anibersaryo ng samahan at Isang Dekada o sampung taong Anibersaryo ng replikang Imahen.

Ngayon, habang ipinagdiriwang natin ang sampung taon ng paglalakbay na ito ng replikang imahen, muling isinasabuhay ang paanyaya ng Mahal na Ina — na manatili tayong tapat sa pananampalataya at masiglang sumunod sa kanyang Anak na si Hesukristo. Sa Birhen!

14/11/2025

09/11/2025

𝐇𝐀𝐋𝐈𝐍𝐀 𝐀𝐓 𝐓𝐀𝐘𝐎'𝐘 𝐌𝐀𝐍𝐀𝐋𝐀𝐍𝐆𝐈𝐍

𝐏𝐚𝐧𝐚𝐥𝐚𝐧𝐠𝐢𝐧 𝐇𝐚𝐛𝐚𝐧𝐠 𝐃𝐮𝐦𝐚𝐫𝐚𝐚𝐧 𝐚𝐧𝐠 𝐁𝐚𝐠𝐲𝐨𝐧𝐠 𝐔𝐰𝐚𝐧 𝐬𝐚 𝐁𝐚𝐧𝐬𝐚

+ Sa ngalan ng ama, ng anak at ng Espiritu Santo. Amen

Aming mapagmahal at mahabaging Diyos,
sa mga sandaling ito na dumaraan ang bagyong Uwan sa aming bansa, kami ay lumuluhod sa Iyong harapan, humihingi ng awa at kaligtasan. Naririnig namin ang malakas na hangin, ang walang tigil na ulan, at ang pagdaing ng aming bayan — at sa lahat ng ito, Ikaw lamang ang aming sandigan at pag-asa.

Panginoon, patawarin Mo po kami.
Patawarin Mo kami sa aming pagkukulang sa Inyong likha — sa pagwasak namin ng kalikasan,
sa pagputol ng mga punong minsang naging tagapagtanggol namin, lalo na sa Sierra Madre na ngayon ay patuloy na nagsasakripisyo upang kami’y mailigtas.
Patawarin Mo rin kami sa mga kasalanang dulot ng kasakiman —sa katiwaliang sumira sa mga proyektong dapat ay para sa kabutihan ng mamamayan,
sa mga flood control na ginawang pagkakaperahan,
at sa aming katahimikan sa gitna ng kawalang katarungan.

Aming Diyos, ipagkaloob Mo sa amin ang Iyong proteksyon.
Iligtas Mo po ang bawat pamilya sa landslide, sa baha, at sa panganib ng rumaragasang hangin.
Pagpalain Mo ang mga nagsasagawa ng pagtulong,
ang mga rescuer, doktor, sundalo, at mga simpleng mamamayang handang mag-alay ng oras at lakas para sa kapwa. Bigyan Mo sila ng tapang at kaligtasan.

Panginoon, gisingin Mo rin ang puso ng bawat Pilipino.
Nawa’y hindi na kami manatiling tulog sa katotohanan,
bagkus ay magising kami sa panawagan ng malasakit, disiplina, at tunay na pagkakaisa.
Tulungan Mo kaming matutong umaksyon,
hindi lang tuwing may bagyo, kundi sa araw-araw na laban ng aming bansa laban sa kahirapan, katiwalian, at kawalang pakialam.

Sa gitna ng unos, Panginoon, patuloy kaming nagtitiwala sa Iyo.
Pagkatapos ng ulan, hayaang sumikat muli ang liwanag ng pag-asa at pagbabago sa aming bayan.
Sa Iyo ang aming tiwala, sa Iyo ang aming buhay,
sa Iyo ang aming pananalig, ngayon at magpakailanman.

Mahal na Birhen ng Turumba,
Ina at Patrona ng aming Lawa ng Laguna,
sa oras na ito ng panganib at pagdadalamhati, kami ay dumudulog sa Iyo.
Yakapin Mo kaming Iyong mga anak sa Iyong mapagkalingang mga bisig.
Ipanalangin Mo kami sa Iyong Anak na si Hesus,
upang kami’y iligtas sa hagupit ng bagyong ito,
at patnubayan kami tungo sa kaligtasan at kapayapaan.

Ina ng Hapis ng Turumba,
patnubayan Mo ang aming mga kababayan na nasa panganib, ang mga nawalan ng tahanan, at ang mga naliligaw sa gitna ng unos.
Pagkalooban Mo sila ng pag-asa at lakas ng loob.
Tulungan Mo kaming manampalataya, magtiwala, at magmalasakit sa isa’t isa, tulad ng pagmamahal Mong walang hanggan.

At tulad ng Iyong larawan na nahahapis—na wari’y may luha sa mga mata— paalalahanan Mo kami, Mahal na Ina, na sa kabila ng aming kalungkutan at mga paghihirap,ay naroon pa rin ang Turumba, ang sayaw ng pananampalataya at pag-asa.
Nawa’y matutunan naming maging masaya kahit sa gitna ng pagsubok, dahil alam naming ang tunay na kagalakan ay nagmumula sa pagtitiwala sa Diyos at sa pagyakap sa Kanyang kalooban.

Ipanalangin Mo ang aming Bansang Pilipinas
Ipanalangin Mo ang aming Lalawigan ng Laguna
ipanalangin Mo ang aming Bayan
at ipanalangin Mo kaming lahat na nananalig sa Iyo,
upang sa dulo ng bagyo, ang aming mga puso ay sumayaw muli sa Turumba ng pasasalamat at pag-ibig.

Amen.

+ Sa ngalan ng Ama, ng Anak at ng Espiritu Santo. Amen

06/11/2025

𝙋𝙖𝙣𝙖𝙡𝙖𝙣𝙜𝙞𝙣 𝙨𝙖 𝙋𝙖𝙣𝙖𝙝𝙤𝙣 𝙣𝙜 𝙋𝙖𝙥𝙖𝙧𝙖𝙩𝙞𝙣𝙜 𝙣𝙖 𝙎𝙪𝙥𝙚𝙧 𝙏𝙮𝙥𝙝𝙤𝙤𝙣 𝙐𝙬𝙖𝙣

Aming mahabaging Diyos,
Sa mga oras na ito ng pangamba at pag-aalala, kami ay lumalapit sa Iyo, buong kababang-loob at pusong nagsusumamo. Nararamdaman namin ang bigat ng kalikasan, ang pag-ihip ng hangin, at ang pagbuhos ng ulan na tila paalala ng aming mga pagkukulang.

Panginoon, kami ay humihingi ng tawad.
Patawarin Mo kami sa aming kapabayaan— sa patuloy na pagwasak ng kalikasan,
sa pagputol ng mga punong nagtatanggol sa amin, lalo na sa kabundukan ng Sierra Madre na matagal nang nagsisilbing sandigan ng aming lalawigan ng Laguna at ng buong bansa.

Patawarin Mo kami sa mga kasalanang nag-ugat sa kasakiman, sa katiwalian sa mga proyektong dapat ay para sa kapakanan ng sambayanan—
sa mga flood control na pinasok ng korapsyon,
sa mga proyektong napuno ng pangako ngunit kulang sa puso.

Aming Diyos, kami ay humihingi ng Iyong habag.
Ilayo Mo po kami sa matinding pinsala ng bagyong Uwan.
Iligtas Mo ang mga pamilya, lalo na yaong mga walang matibay na tahanan, ang mga nasa tabing-ilog at kabundukan, ang mga maralita na laging unang naaapektuhan.

Gabayan Mo po ang mga tagapagligtas, ang mga lider ng pamahalaan, at bawat Pilipinong may kakayahang tumulong.
Nawa’y manaig ang pagkakaisa at malasakit sa halip na sisihan at pangungutya.

Panginoon, gisingin Mo rin ang aming mga puso at isipan.
Buksan Mo ang diwa ng mga Pilipinong nananatiling tulog sa katotohanan— na ang tunay na laban ay hindi lang sa unos ng panahon, kundi sa unos ng kamangmangan, kawalang-pakialam, at kawalan ng malasakit sa kapwa.
Nawa’y magising kaming lahat upang sama-sama naming buuin muli ang isang bansang marunong magmahal, magtanggol, at magmalasakit sa kalikasan at kapwa.

Sa kabila ng unos, Panginoon,nagtitiwala kami na may liwanag pa ring sisikat.
Pagkatapos ng bagyo, pagharian Nawa kami ng pag-asa, pagbabago, at tunay na pagkakaisa bilang mga anak Mo.

Ito po ang aming taos-pusong panalangin,
sa ngalan ng Iyong Anak na si Hesukristo,
na aming sandigan sa bawat bagyo ng buhay.

Amen.

𝐌𝐚𝐡𝐚𝐥 𝐧𝐚 𝐏𝐨𝐨𝐧𝐠 𝐇𝐞𝐬𝐮𝐬 𝐍𝐚𝐳𝐚𝐫𝐞𝐧𝐨, 𝘔𝘢𝘢𝘸𝘢 𝘬𝘢 𝘴𝘢 𝘢𝘮𝘪𝘯

𝐒𝐚𝐧 𝐏𝐞𝐝𝐫𝐨 𝐂𝐚𝐥𝐮𝐧𝐠𝐬𝐨𝐝, 𝘪𝘱𝘢𝘯𝘢𝘭𝘢𝘯𝘨𝘪𝘯 𝘮𝘰 𝘬𝘢𝘮𝘪

𝐒𝐚𝐧 𝐋𝐨𝐫𝐞𝐧𝐳𝐨 𝐑𝐮𝐢𝐬, 𝘪𝘱𝘢𝘯𝘢𝘭𝘢𝘯𝘨𝘪𝘯 𝘮𝘰 𝘬𝘢𝘮𝘪

𝐒𝐚𝐧 𝐏𝐚𝐛𝐥𝐨 - 𝐮𝐧𝐚𝐧𝐠 𝐄𝐫𝐦𝐢𝐭𝐚𝐧𝐲𝐨 𝐚𝐭 𝐏𝐚𝐭𝐫𝐨𝐧 𝐧𝐠 𝐃𝐢𝐲𝐨𝐬𝐞𝐬𝐢𝐬 𝐧𝐠 𝐒𝐚𝐧 𝐏𝐚𝐛𝐥𝐨, 𝘪𝘱𝘢𝘯𝘢𝘭𝘢𝘯𝘨𝘪𝘯 𝘮𝘰 𝘬𝘢𝘮𝘪

𝐌𝐚𝐡𝐚𝐥 𝐧𝐚 𝐁𝐢𝐫𝐡𝐞𝐧 𝐧𝐠 𝐇𝐚𝐩𝐢𝐬 𝐧𝐠 𝐓𝐮𝐫𝐮𝐦𝐛𝐚- 𝗣𝗮𝘁𝗿𝗼𝗻𝗮 𝗮𝘁 𝗜𝗻𝗮 𝗻𝗴 𝗟𝗮𝘄𝗮 𝗻𝗴 𝗟𝗮𝗴𝘂𝗻𝗮, 𝘪𝘱𝘢𝘯𝘢𝘭𝘢𝘯𝘨𝘪𝘯 𝘮𝘰 𝘬𝘢𝘮𝘪