Our Lady of the Miraculous Medal Chapel - PWU

02/08/2026

Happy Priest’s Day, Father Dan!

Thank you for your faithful service and love for God’s people. You are a true blessing to our PWU community.

St. John Vianney, patron saint of parish priests, pray for Fr. Danichi and for all priests, that they may be strengthened in holiness and joy in their mission.

30/07/2026

HOMILY TRANSCRIPT | “Discerning Good and Evil in the Kingdom”
Fr. Daniel Voltaire Hui | University Chaplain of Philippine Women’s University, Manila
July 30, 2026 | Thursday
Thursday of the Seventeenth Week in Ordinary Time
Gospel : Matthew 13:47-53

Biblical: Muling nagpapakita ang ating mga Pagbasa ng mga imahe para maunawaan natin ng malinaw ang aral na nais ituro sa atin sa araw na ito.

Sa Unang Pagbasa, pinapunta ng Panginoon si Jeremias sa isang magpapalayok. Napansin ni Jeremias, “Nakita kong kapag ang ginagawa niyang sisidlan ay nasira, minamasa niya uli ang luwad, at hinuhugisan nang panibago.”

Reflection: Dito ipinapakita ng Panginoon kay Jeremias kung paanong nasa kamay ng magpapalayok ang putik para hulmahin at pormahin sa ano mang hugis na nais ito. Ganito din ang Panginoon sa tao. Nasa kamay ng Diyos kung paano niya huhulmahin at ipoporma ang isang tao.

Biblical: Kaya nga nasabi ng Panginoon, “Kayo’y nasa mga kamay ko, tulad ng luwad sa kamay ng magpapalayok.”

Reflection: Tunay naman talaga na nasa kamay ng Diyos ang ating buhay. Kung ano man ang kaniyang nais, siyang mangyayari. May ilusyon lang ang tao na nasa kaniyang kamay ang buhay. Akala niya kung anong gusto niyang mangyari, siyang nangyayari. Ang hindi alam ng tao, hinahayaan lang ng Diyos na gawin ng tao ang kaniyang nais dahil sa pagmamahal.

Pero sa isang pitik, kaya ng Diyos sirain o buoin ang isang tao depende sa kaniyang gusto. Kaya nga may mga nangyayari sa atin na hindi natin giusto o ginawa, pero nangyayari.

Minsan may mga pinipilit tayo na mangyari, pero hindi natin mapilit. Hindi dahil nasa kamay natin ang buhay, kundi nasa Diyos.

Biblical: Gaya na lang ng imahe na pinapakita ni Hesus tungkol sa Paghahari ng Diyos. Ginamit niya ang imahe ng LAMBAT para ipakita na bagaman tila nasa kamay ng tao ang panghuhuli. (Siya nasusunod kung saan at kailan ihahagis ang lambat) Pero wala są kaniyang kamay ang mahuhuli. Hindi niya mapipili ang isda. Wala siyang kontrol kung ano ang mahuhuli.

Pero matapos hilahin sa pampang ang lambat, may pagbubukod na mangyayari. Ihihiwalay ang mabubuti at ilalagay sa sisidlan. Samantala ang walang kuwenta at itatapon.

Reflection: Parang ang ating buhay, madalas hindi natin napipili ang ating iniisip, nararamdaman at ginagawa. Kaya nga kapag nakakagawa ng mali at kasalanan, ang palusot madalas ay “hindi ko sinasadya”, o kaya “hindi ko alam na magkakaganun.”

Mga kapatid, magandang paalala sa atin ang pagbubukod na mangyayari sa katapusan. Habang hindi pa nangyayari at dumadating ang katapusan, iisipin at pipiliin na natin ang gagawin para hindi na magkasala at magkamali.

29/07/2026

HOMILY TRANSCRIPT | “Three Friends of Jesus”
Fr. Daniel Voltaire Hui | University Chaplain of Philippine Women’s University, Manila
July 29, 2026 | Wednesday
Memorial of Saints Martha, Mary, and Lazarus
Gospel : John 11:19-27

Biblical: Ngayong araw na ito ginugunita natin ang magkakapatid na sina Sta. Marta, Sta. Maria at San Lazaro. Sila ang mga tinaguriang “malalapit na kaibigan” ni Hesus. Talagang sinasadya pa ni Hesus ang kanilang tahanan para dumalaw.

Gaya ng nangyari sa ating Ebanghelyo. Burol ni Lazaro noon at dumalaw si Hesus sa dalawang babaeng magkapatid para damayan sila at maki-ramay.

Reflection: Para sa iba puwedeng isipin na huli na ang pagdalaw ni Hesus. Kung kelan patay na; Kung kelan hindi na siya kailangan; kung kelan wala na si Lazarus. Kahit nga si Marta ganun ang inisip, kaya nga ang sabi niya; “Panginoon, kung kayo po’y narito, hindi sana namatay ang aking kapatid.”

Pero iba talaga mag-isip si Hesus. Iba ang karunungan ng Diyos. Sapagkat sinadya talaga ni Hesus na dumalaw at dumating sa burol si Lazaro. Talagang sinadya ni Hesus dumalaw kung kailan patay na si Lazaro.

Para ipakita na may “plano ang Diyos”. Para ipakita ang kadakilaan ng Diyos. Para maramdaman ng magkapatid na Marta at Maria ang Kagalingan ng Diyos.

Contemporary: Hindi ba’t kapag minsan katulad natin mag-react si Marta? May panunumbat sa Diyos; sa mga panahong nawalan o namatayan tayo; sa mga panahong bagsak tayo; o kaya sa mga panahong nasasaktan at nahihirapan tayo.

“Nasasabi nating, Panginoon kung andito ka lang sana hindi nangyari sa akin ito ngayon.”

Reflection: Pero hindi kaya katulad ng ginawa ni Hesus kina Marta at Maria, hinayaan niyang dumating siya kung kailan huli na ang lahat; hindi para manghinayang tayo. Kundi para mapakita sa atin na may iba siyang plano?

Biblical: Kaya nga ang tanong ni Hesus kay Marta, “pinaniniwalaan mo ba ito?”
Ibig sabihin, hinihingi ni Hesus ang ating pananampalataya. Sa Halip na magluksa, kailangan niya ang ating paniniwala bilang ating tugon.

Mabuti na lang si Marta alam ang isasagot at kaniyang nasabi, “Opo, Panginoon! Nananalig ako sa inyo. Kayo po ang Anak ng Diyos, ang Mesiyas na inaasahang paparito sa sanlibutan.”

Mga kapatid, ito po ang ipinapakita ng ating Pagdiriwang at ng Ebanghelyo sa araw na ito. SA mga panahong akala natin tayo ay iniwan ng Diyos; isipin natin- hindi iyan totoo. Dahil ang totoo; mayroon siyang Pinaplano. Kailangan lang maniwala at bilang tugon dapat laging may pananampalataya.

23/07/2026

HOMILY TRANSCRIPT | “Humble Hearts”
Fr. Daniel Voltaire Hui | University Chaplain of Philippine Women’s University, Manila
July 23, 2026 | Thursday
Mass for the dead: Fe Amor Ilagan Alumni of Philippine Women’s University
Gospel : 13:10-17

Biblical: Narinig natin sa ating Ebanghelyo na ang mga alagad ni Hesus ay nagtanong, Bakit po ninyo dinadaan sa talinghaga ang inyong pagsasalita sa kanila?”

Konting back story para maunawaan ang konteksto. Madalas kapag nagtuturo si Hesus, Talinhaga ang kaniyang ginagamit para bigyan ng diin ang kaniyang aral. Itong mga Talinhaga na ito ay kuwento na malapit sa mga tao at ay kinalaman sa kanilang ordinaryong buhay. Gaya na lang noong Linggo, ginamit ni Hesus ang Talinhaga ng Damo para mangaral tungkol sa presensiya ng kasamaan sa mundo.

Lahat ng Talinhagang ginamit ni Hesus ay para madaling maunawaan ng tao ang kaniyang mga pangaral, at hari nawa huwag nilang makalimutan.

Biblical: Kaya nga ang sabi ni Hesus; “Nagsasalita ako sa kanila sa pamamagitan ng talinghaga, sapagkat tumitingin sila ngunit hindi nakakikita, at nakikinig ngunit hindi nakaririnig ni nakauunawa.”

Sa madaling salita; sarado ang paningin at ang pandinig. Kaya hindi makaunawa. Iyan ang problema, sa kabila ng ginagawa ni Hesus na pangangaral kapag ang tao ay hindi bukas matuto, walang mauunawaan.

Contemporary: Hindi ba’t parang ganito din sa ating buhay? May mga pangyayari na hindi natin nauunawaan. Parang Talinhaga para sa iba.

Kung bakit tayo naghirap?
Naghiwalay o nawalay.
Bumagsak, nasaktan, at iniwan.
Nabigo at nawalan.
Nag-krisis at nagkasakit.

Sa mga panahong ito, parang ang hirap buksan ang ating mga mata at tainga sa Plano at mga Turo ng Diyos. Wala tayong makitang dahilan kundi ang ating pinagdadaanan. Wala tayong naririnig kundi sarili nating mga daing.

Story: Marami są aking buhay ang sa una ang hirap maunawaan. Kung bakit kami kailangan magtrabaho sa aming “shop”. Kung bakit nagsara ang aming negosyo. Kung bakit kami naghirap. Kung bakit ako tinawag ng Diyos at naging pari. Kung bakit ako naging kura paroko. At kung ano-ano pang mga bakit.

Kung babalikan ko ang nakaraan. Mas nauunawaan ko na ngayon kung bakit ito nangyari. Lahat iyon kahit mahirap at masakit; nakatulong para ang buhay ko ngayon ay aking marating.

Mga kapatıd, hindi lahat ng bagay at pangyayari ay mauunawaan natin. Pero hindi ibig sabihin wala itong dulot sa atin. Kailangan lang maging bukas. Ang mata, para makakita. Ang tainga, para makarinig. Dahil sa pagiging bukas; natatanggap ang Plano ng Diyos.

22/07/2026

𝑭𝑬𝑨𝑺𝑻 𝑶𝑭 𝑺𝑨𝑰𝑵𝑻 𝑴𝑨𝑹𝒀 𝑴𝑨𝑮𝑫𝑨𝑳𝑬𝑵𝑬, 𝑨𝑷𝑶𝑺𝑻𝑳𝑬 𝑻𝑶 𝑻𝑯𝑬 𝑨𝑷𝑶𝑺𝑻𝑳𝑬𝑺

Today, Holy Mother Church honors Saint Mary Magdalene, the faithful disciple of the Lord and the first witness of the Resurrection. Once delivered from sin by the mercy of Christ, she became a model of repentance, love, and unwavering devotion.

At the empty tomb, it was she who wept, she who sought the Lord, and she who first heard His voice calling her by name. Entrusted with the joyful proclamation, she went forth to announce to the Apostles: “I have seen the Lord.” For this reason, she is rightly called the Apostle to the Apostles.

May her example inspire us to seek Christ with sincere hearts, to remain faithful even in moments of darkness, and to proclaim boldly the truth of His Resurrection.

Saint Mary Magdalene, pray for us.

22/07/2026

HOMILY TRANSCRIPT | “Announcing Her Lord’s Resurrection”
Fr. Daniel Voltaire Hui | University Chaplain of Philippine Women’s University, Manila
July 22, 2026 | Wednesday
Feast of Saint Mary Magdalene
Gospel : John 20:1-2, 11-18

Biblical: Ngayong araw na ito ay ginugunit natin si Maria Magdalena. Alam natin sa kuwento sa bibliya na si Maria Magdalena ay isang babae na pinagaling ni Hesus mula sa 7 demonyong sumasapi sa kanya. Pero bukod dito, mas kilala natin siya na isang pr******te kahit na wala namang sinabi direkta at walang patunay tungkol dito. Kaya’t kung papansinin, si Maria Magdalena ay kilala ng lahat bilang isang makasalanang babae. Kilala siya dahil sa kanyang kasalanan at sinasabing “kasamaan” at hindi sa kanyang kabutihan at kagandahan.

Reflection: Grabe din naman minsan ang tao ano? Kung ano ang masama o pangit, iyon ang tumatatak sa isang tao. Kapag nagtatanong tungkol sa isang tao, madalas inilalarawan natin ito sa kung ano ang hindi maganda.

Si Aling Maring yung mataba na tindera sa kanto.
Yung adik na laging naglalakad nang naka hubad pag gabi.
Sino pa ba edi yung chismosa ng Camba.
Siya yun, yung madalas makita sa sugalan.

Ganiyan minsan kung kumilala ang tao, kung ano ang pangit at masama.

Biblical: Pero iba ang ipinapakita at pagpapakilala sa atin ng Ebanghelyo at marahil sa ganito gustong ipakilala ni Hesus si Maria Magdalena. Matapos ilibing si Hesus, si Maria Magdalena ang unang taong pinagpakitaan ni Hesus. Dahil siya ang unang dumalaw sa kanyang libingan. Siya ang unang nakaalam na wala na ang mga labi ni Hesus.

Iyak ng iyak itong si Maria Magdalena at ang hindi niya alam, kaharap na niya si Hesus. Inakala pa niyang hardinero ito. Pero nakilala niya si Hesus nang tawagin ang kanyang pangalan. Siya rin ang inutusan ni Hesus na ibalita sa kanyang mga alagad na siya ay muling nabuhay.

Contemporary: Sa buhay natin, kapag mayroon tayong isang sikreto o kaya balita na nais ipaalam o sabihin, una natin itong sinasabi hindi ba sa isang taong malapit sa atin. Pwede din naman sa taong espesyal sa atin. Ganun din sa taong pinahahalagahan natin. Baka yung iba sa matalik na kaibigan.

Ito ang hindi natin alam tungkol kay Maria Magdalena ang posibilidad na siya ay malapit kay Hesus. Siya ay matalik na kaibigan ni Hesus. O kaya siya ay espesyal kay Hesus.

Madalas kasi tinitignan natin ang kasalanan ng isang tao. Kaya ito ang tumatatak sa atin sa halip na kung ano ang mabuti at maganda. Minsan din ito ang tingin natin sa ating mga sarili; walang kwenta, walang silbi, palpak, patapon at kung ano ano pang hindi magaganda. Kaya sa halip na lumago tayo, napanghihinaan tayo.

Reflection: Hindi natin dapat tinitignan ng hindi maganda ang ating kapuwa, dahil hindi natin alam kung paano siya tignan ng Diyos.

Mga kapatid, Kung babalikan, makasalanan man si Maria Magdalena pero hindi siya tinignan ni Hesus gaya ng tingin ng mga tao. Sa halip, pinaramdam niya na siya ay espesyal at mahalaga. Lahat tayo, katulad ni Maria Magdalena, may bahid ng kasalanan pero hindi nangangahulugang hindi na puwedeng lumago at magbago. Dahil tandaan, sa mata ni Hesus espesyal tayo.

21/07/2026

HOMILY TRANSCRIPT | “The Royal Family of God”
Fr. Daniel Voltaire Hui | University Chaplain of Philippine Women’s University, Manila
July 21, 2026 | Tuesday
Tuesday of the Sixteenth Week in Ordinary Time Gospel : Matthew 12:46-50

Biblical: Isang deretsahang pahayag mula kay Hesus tungkol sa kung sino ang tinuturing niyang pamilya ang ating narinig sa Ebanghelyo, at ang sinabi niya; “Sino mang sumusunod sa kalooban ng aking Amang nasa langit ang siya kong ina at mga kapatid.”

Malinaw at wala nang paliwanag pa ang kailangan para maintindihan natin ang mga salitang ito.

Alam natin na para mapalapit sa Diyos kailangan natin magdasal. Sa pagdadasal nakikilala at nakakausap natin ang Diyos. Dahil dito nailalapit tayo ng ating mga dasal sa Diyos. Pero iba ang malapit sa tinuturing na kapamilya ng Diyos. Kahit anong dasal natin hindi tayo magiging kapamilya ng Diyos. Dahil para maging kapamilya, kailangan sumunod tayo sa kalooban ng Diyos.

Ito yung magandang itanong sa ating mga sarili. Sinusunod o nasusunod ko ba ang kalooban ng Diyos?

Dito nagsisimula ang mga mali sa ating buhay. Kapag hindi natin inaalam ang kalooban ng Diyos. Kapag banat lang tayo ng banat. Sige lang ng sige at hindi na iniisip ang ating mga ginagawa.

Kaya nga sa Unang Pagbasa, matapos iniligtas ng Panginoon ang mga Israelita sa Ehipto isang bagong buhay na sana ang nagiintay sa kanila. Susundin na lang nila ang mga Utos ng Diyos para mapanatili ang bagong buhay, ngunit dahil sa kanilang kapabayaan, sa diyos diyosan sila pumunta. Kaya sa huli, nasira ang kanilang buhay.

Kaya narinig natin si Propeta Mikas na nananalangin sa Panginoon para ilapit ang mga sumuway na Israelita at sana ay sila ay patawarin. (Ganun ang remedya sa pagsuway, ang humingi na lang ng tawad at magbago)

Contemporary: Sa buhay natin, makikita natin sa ginagawa ng tao kung sino ang kanilang sinusunod at sinusundan.

Story: Nagbless ako ng patay noong isang araw. Pinapatigil ang mga nagsusugal saglit dahil magdadasal. Pero kahit anong sabi mo, hindi tumigil. (Sa ganiyang mga gawi, sino ang sinusunod?) pero kapag napahamak dahil sa pera, ang gagawin na remedyo magdadasal. Mabuti pa nga kung magdasal kaya lang minsan hahanap pa din ng paraan at isa pa din ang susundin.

Kaya’t magandang paalala sa atin ang sinabi ni Hesus. “Sino mang sumusunod sa kalooban ng aking Amang nasa langit ang siya kong ina at mga kapatid.”

Hindi man natin mapipili ang ating mga magulang maging kung sino ang ating gustong maging kapatid. Pero sa Diyos, nasa atin ang pagpili kung magiging kapamilya tayo ng Diyos.

20/07/2026

HOMILY TRANSCRIPT | “The Sign of Jonah and the Wisdom of Solomon”
Fr. Daniel Voltaire Hui | University Chaplain of Philippine Women’s University, Manila
July 20, 2026 | Monday
Monday of the Sixteenth Week in Ordinary Time Gospel : Matthew 12:38-42

Story: Nitong mga nakalipas na araw, napanood natin ang isang paglilitis. Para mabigyan ng tamang hatol kailangan suriin mabuti ang lahat ng ebidensiya, documento at mga salaysay. Maging ang mga testigo ay kailangan maging kritikal. Kaya nga may isang senador pa ang nagtanong ng “credentials” ng testigo para masuri ang kredibilidad nito. (Sa kaniya pa talaga galing ang paghahanap ng credentials para sa kredibilidad)

Ganiyan ang isang tao kapag hirap maniwala. Ganiyan ang tao kapag maraming pagdududa. Nagiging kritikal.

Biblical: Hindi ito malayo sa karanasan ni Hesus sa mga Pariseo at Eskriba. Dahil hindi naniniwala ang mga ito na si Hesus ay Anak ng Diyos, naging kritikal sila kay Hesus sa paghahanap ng tanda mula sa langit.

Reflection: Sa totoo lang wala naman masama humanap ng ebidensiya. Hindi naman mali ang maging kritikal. Pero ang nakakapagtaka at nakakatawa, ang dami ng ginawa ni Hesus na milagro at kababalaghan pero naghahanap pa din sila ng “tanda mula sa langit”.

Kung baga, anong ebidensiya pa ang hinahanap ninyo eh nagpakita na si Hesus ng kababalaghan at milagro bago pa sila nagahanp.

Para saan pa ang pagtatanong nila at pagiging kritikal kung nauna na si Hesus nagpakita ng tanda.

Dito natin makikita na hindi naman talaga “tanda” ang hanap ng mga Pariseo at Eskriba, ipinapakita lang talaga nila na “wala silang paniniwala kay Hesus”.

Contemporary: Ganiyan ang taong wala naman talagang paniniwala. Kahit anong gawin, hindi mo kayang papaniwalain. Kahit anong ebidensiya ang ibigay mo, bias pa din.

Biblical: Kaya maganda ang sagot ni Hesus, “Lahing masama at di-tapat sa Diyos! Naghahanap kayo ng tanda ngunit walang ipakikita sa inyo maliban sa palatandaaang inilalarawan ng nangyari kay Propeta Jonas.”

Reflection: Ang sama lang dahil matapos ang lahat, hindi pa din sila naniwala.
Sa kabila ng lahat, wala pa din silang pagbabago.
Ginawa at binigay na ang lahat, naghahanap pa din sa huli.

Ganito din ang sinasabi ni Propeta Mikas sa Unang Pagbasa, matapos iligtas ang mga Israelita sa Ehipto ang paalala lang ng propeta ay matapos ang lahat ng ginawa ng Diyos para sa kanila, “maging makatarungan ka sa lahat ng bagay, patuloy mong ibigin ang iyong kapwa, at buong pagpapakumbabang sumunod sa iyong Diyos.”

Kaya magandang paalala sa atin ito na tuwing tayo ay nagdududa, balikan ang mga nagawa ng Diyos sa atin. Dahil bago pa tayo maghanap, nauna na ang Diyos na gumanap.

18/07/2026

17/07/2026

HOMILY TRANSCRIPT | “The Yoke of Sin and the Yoke of Freedom”
Fr. Daniel Voltaire Hui | University Chaplain of Philippine Women’s University, Manila
July 16, 2026 | Thursday of the Fifteenth Week in Ordinary Time Gospel : Matthew 11:28-30

Reflection: Ayon sa isang manunulat, “Ang isang masayang buhay ay hindi buhay na walang pakikibaka, kundi isang buhay na may makabuluhang pakikibaka.” A happy life is a life having no struggles, but a life with meaningful struggle.

Biblical: Mga kapatid, ito ang nais ituro ni Hesus sa mga tao nang sabihin niyang, “Lumapit kayo sa akin, kayong lahat na napapagal at nabibigatan sa inyong pasanin, at kayo’y pagpapahingahin ko.”

Kita ninyo na? Kahit si Hesus alam na ang tao ay kailangan ng pahinga. Dahil alam ni Hesus na may mga taong napapagod; mulat din si Hesus sa mga pakikibaka ng mga tao. Kaya nga ang payo ni Hesus, asanin ninyo ang aking pamatok, at mag-aral kayo sa akin… Sapagkat maginhawang dalhin ang aking pamatok, at magaan ang pasaning ibibigay ko sa inyo.”

Reflection: My dalawang bagay ang nais ituro ni Hesus sa mga pananalitang ito:

1.Struggle is real.
Lahat tayo may kaniya kaniyang pakikibaka sa buhay. Magkakaiba man pero párehas na pikikibaka na dapat harapin at pasanin. Iyang katabi mo, hindi mo alam gipit yan. Hindi alam pano pagkakasyahin ang pera. Baka ang nasa likod mo may malubhang sakit o may kapamilyang nag-aagaw buhay. Hindi mo alam, ang nasa harap mo iniwan at nasasaktan.

Dahil bawat isa sa atin may dinadala sa buhay. Kaya huwag ka nang dumagdag. Maging mabuti sa pananalita. Magdahan-dahan sa ginagawa. Maging mahinahon sa pag trato.

2.God is here.
Sa gitna ng ating pakikibaka, ang paalala; andito sa atin ang Diyos. Kaya nga ang sabi niya; “Lumapit kayo sa akin, kayong lahat na napapagal at nabibigatan sa inyong pasanin, at kayo’y pagpapahingahin ko.”

Iyan ang dahilan kung bakit ka may katabi. Bakit merong naka-upo sa likod at harap mo. Ito ang dahlian kung bakit ka andito. Kasi naniniwala tayo na kasama natin ang Diyos.

Sa dalawang aral na ito, hindi tinuturo sa atin na aalisin ng Diyos ang ating mga pasanin. Hindi niya sinabing tatangalin ang lahat ng mabibigat. Ag sinabi lang niya, “tayo ay pagpapahingahin at kaniyang pagagaanin.”

Dito pumapasok ang kabuluhan ng ating pakikibaka, hindi dahil natapos o nawala ito kundi dahil binitbit at dinala natin ito katulong ang Diyos.

Mga kapatid, tandaan Struggle is real. But God is here.