26/08/2026
Agosto 26 | Panalangin sa Dakilang Kapistahan ng La Hermosa Virgen Balintawak
O Mariang wagas sa kalinisan, tanging pinili ng Amang makapangyarihan upang ang kaligtasan ay aming makamtan. Ikaw na nakababatid ng aming pangangailangan dito sa bayang puno ng pakikibaka. Ikaw na nagligtas sa aming mga ninuno sa matinding kapahamakan, paalalahanan mo kami at laging bigyan ng babala at pangitain upang ang panganib ay maiwasan.
O Ina ng aming Bayan, palayain mo kami sa pagkakaalipin; pagkakaalipin sa kasalanan, sa pita ng laman, sa katiwalian, sa panlalamang, sa pananamantala sa kapangyarihan, sa pagsasawalang-bahala sa aming tungkulin sa bayan, at sa lahat ng uri ng kamunduhan.
O Ina ng aming Kasaysayan na naging daan upang ang kalayaan ay aming makamtan, papanatilihin mo ang alaala ng pakikibaka para sa aming pagsasarili upang patuloy na magningas ang aming pagmamahal sa bayan.
O Ina ng Santa Iglesia, gabayan mo ang aming Simbahang Malaya upang imulat sa amin ang tunay na pananampalataya sa aming paglilingkod sa Diyos at sa Bayan.
At sa huli, sapitin nawa namin ang kaharian ng Ama, pangunahan nawa kami ng Niño Hesus na nasa iyong harapan sa pamamatnubay ng Diwang Banal. Amen.
La Hermosa Virgen sa Balintawak, Patrona Principal ng Iglesia Filipina Independiente, ipanalangin mo kami.
| Katedral ng Banal na Sanggol • Dambana ng Señor Sto. Niño de Mandaluyong |
