12/07/2026
Hulyo 12| Paggunita kay Santa Veronica: Ang Babae na Nagpunas sa Mukha ni Hesus
Batay sa Salita ng Diyos at Tradisyon ng Simbahan
Sa Ebanghelyo ay mayroong kwento ng isang babae na labis ang pananalig kay Hesus. Sa loob ng labindalawang taon ay dinanas niya ang pagdurugo ng katawan, at kahit na gumastos na siya nang malaki sa mga manggagamot ay lalo lamang lumala ang kanyang kalagayan. Nang mabalitaan niya ang tungkol kay Hesus, lumapit siya sa gitna ng karamihan at sinabi sa sarili: “Kapag nahipo ko man lamang ang laylayan ng Kanyang damit, gagaling ako”. Hinipo niya ito, at agad na tumigil ang kanyang pagdurugo. Naramdaman ni Hesus na may kapangyarihang lumabas sa Kanya, kaya’t huminto Siya at nagtanong kung sino ang humipo sa Kanya. Sa takot at panginginig ay lumapit ang babae at inamin ang lahat. Sinabi ni Hesus sa kanya: “Anak, ang iyong pananampalataya ang nagpagaling sa iyo; humayo ka nang payapa at maging malaya sa iyong karamdaman” (Marcos 5:25‑34).
Ayon sa banal na tradisyon, ito rin ang babaeng kilala natin ngayon bilang Santa Veronica. Nang makita niya si Hesus na pasan ang mabigat na Krus patungo sa Kalbaryo, puno ng dugo at pawis, naantig ang kanyang puso sa awa at pagmamahal. Sa kabila ng mga sundalo at masikip na karamihan ay lumapit siya, inialok ang kanyang belo, at maingat na pinunasan ang mukha ng Panginoon. Nang ibalik ito sa kanya, doon ay nakita ang himala: ang mukha ni Hesus ay naiwan nang buo at malinaw na nakatatak sa tela—ang tinatawag nating “Tunay na Larawan” o Vera Icon.
Ang simpleng gawang ito ay naging walang‑hanggang alaala ng pagmamalasakit at pananampalataya.
Santa Veronica, ipanalangin mo kami!
