01/05/2026
“Ite ad Ioseph”
Panalangin para kay San Jose Manggagawa
San Jose, aming Patron ng mga Manggagawa,
Sa Iyong tahimik ngunit dakilang halimbawa kami’y humahango ng lakas.
Sa kamay na araw-araw ay humahawak sa mga kasangkapan ng kabuhayan
Bigyang-lakas na huwag mapagod sa paggawa ng marangal,
Na ang bawat pawis ay maging handog ng pag-ibig para sa pamilya at bayan.
Sa paa na patuloy na lumalakad kahit batbat ng pagod,
Gabayan upang hindi maligaw sa landas ng katarungan at katapatan,
Upang sa bawat hakbang ay makita ang direksyon ng pag-asa.
Sa isip na lumilikha, lumulutas, at nangangarap
Pagpalain Mo ng karunungan at pag-unawa,
Upang ang gawang kamay ay maging bunga ng gawang isip.
Sa puso na humaharap sa bawat pagsubok at pasakit,
Pusong nagmamahal sa tungkulin, sa kapwa, at sa Diyos,
Ipagkaloob Mo ang kapayapaang nagmumula sa tiwala at pananampalataya.
Sa katawan na minsan ay nalulupaypay, ngunit patuloy sa pagkilos,
San Jose, pag-ingatan Mo ang kalusugan ng bawat manggagawa,
Lalo na yaong mga nasa panganib, sa init, ulan, at panganib ng trabaho.
Sa pamilya na siyang layunin ng bawat pagbangon sa umaga,
Ipagkaloob Mo ang pagkakaisa, pagmamahalan, at kapanatagan,
Na maging silungan ng manggagawang pagod at pag-asa ng kanyang bukas.
Sa institusyon na pinagtratrabahuhan,
na maging lugar ng dignidad, respeto, at pagkakaisa,
Na sa bawat gawain, maging salamin ng kabutihan ng Diyos.
At sa Iyo, Amang Lumikha ng lahat,
Ang aming mga gawa, pagod, at tagumpay ay Inyong alay.
Tanggapin Mo bilang aming pagsamba,
At palaguin sa biyaya ng Iyong pag-ibig.
San Jose Manggagawa,
Tagapagtanggol ng mga manggagawa sa iba't ibang langaran
Gabayan Mo kami sa landas ng kabanalan sa paggawa,
At akayin kami patungo sa Kabanal-banalang Anak, si Hesus.
Amen.
