18/09/2022
SUNDAY | 18 SEPTEMBER 2022
Ikakawhaag-Lima nga Domingo Sulod sa Tuig
ANG PAGBASA GIKAN SA EBANGHELYO SUMALA NI SAN LUCAS (Lk. 16:1-13)
Si Jesus miingon sa iyang mga tinun-an, “Dihay usa ka dato nga may piniyalan, ug gisuginlan siya nga giusik-usikan lamang sa iyang piniyalan ang iyang salapi. Busa iyang gitawag ang piniyalan ug giingnan, ‘Unsa man kining akong nadungog mahitungod kanimo? Hatagi akog hingpit nga husay sa imong pagdumala sa akong katigayonan, kay sukad karon dili ka na akong piniyalan.’ Busa nagkanayon sa iyang kaugalingon ang piniyalan, ‘Papahawaon na man ako sa akong agalon, unsa na may buhaton ko? Dili ako makahimo sa pagpangalot og kanal, ug maulaw usab ako sa pagpakilimos. Ah, kini ang akong buhaton aron kon papahawaon na ako sa akong trabaho, may mga higala unya ako nga mopasaka kanako sa ilang balay.’ Busa iyang gitawag ang tanan nga utangan sa iyang agalon. Ang una iyang gipangutana, ‘Pila bay utang nimo sa akong agalon?’ ‘Usa ka gatos ka taro nga lana,’ mitubag ang tawo. ‘Ania ang imong bali. Lingkod og kalim-an lang ang isulat,’ matod sa piniyalan. Ug giingnan niya ang usa, ‘Ug ikaw, pila may imong utang?’ ‘Usa ka libo ka bakid nga trigo,’ mitubag ang tawo. ‘Ania ang imong bali; walo ka gatos lang ang isulat,’ miingon ang piniyalan. Ang agalon niining tikasan nga piniyalan midayeg kaniya tungod sa iyang inantigo nga buhat; kay ang mga tawo niining kalibutan mas maantigo modumala sa ilang buluhaton kay sa mga tawo nga iya sa kahayag.”
Ug si Jesus mipadayon sa pag-ingon, “Busa, sultihan ko kamo: Pagbaton kamog mga higala pinaagi sa mga bahandi niining kalibotana aron inig kahurot na niini, dawaton kamo didto sa walay kataposang puloy-anan. “Kinsa kadtong kasaligan sa gagmayng butang, kasaligan usab sa dagko; ug kinsa kadtong limbongan sa gagmayng mga butang, limbongan usab sa dagko. Busa kon kamo dili kasaligan sa inyong paggamit sa bahandi ning kalibutana, kinsay mopiyal kaninyo sa tinuod nga bahandi? Ug kon dili kamo kasaligan sa mga butang sa uban, kinsay mohatag kaninyo sa inyong kaugalingong mga butang?”
“Walay tawo nga mahimong ulipon sa duha ka agalon, kay mahitabo gayod nga iyang dumtan ang usa ug ang usa iyang higugmaon; o unongan niya ang usa ug ang usa iyang tamayon. Dili kamo makapaulipon sa Dios ug sa salapi.
ANG EBANGHELYO SA GINOO.
DAYGON IKAW, O CRISTO.
OR: OPTIONAL READINGS
ANG PAGBASA GIKAN SA EBANGHELYO SUMALA NI SAN LUCAS [Lk. 16:10-13 (minubo)]
Si Jesus miingon sa iyang mga tinun-an, “Kinsa kadtong kasaligan sa gagmayng butang, kasaligan usab sa dagko; ug kinsa kadtong limbongan sa gagmayng mga butang, limbongan usab sa dagko. Busa kon kamo dili kasaligan sa inyong paggamit sa bahandi ning kalibutana, kinsay mopiyal kaninyo sa tinuod nga bahandi? Ug kon dili kamo kasaligan sa mga butang sa uban, kinsay mohatag kaninyo sa inyong kaugalingong mga butang?”
“Walay tawo nga mahimong ulipon sa duha ka agalon, kay mahitabo gayod nga iyang dumtan ang usa ug ang usa iyang higugmaon; o unongan niya ang usa ug ang usa iyang tamayon. Dili kamo makapaulipon sa Dios ug sa salapi.
ANG EBANGHELYO SA GINOO
