https://www.facebook.com/297945553716756/

Natidasan Christian Community Church, Sitio Natidasan, Malaybalay (2026)

21/08/2026

ANG PULONG SA DIOS KASALIGAN

EFESO 2:19 “Busa dili na kamo mga dumuloong ug mga lumalangyaw, kondili mga isigka-lungsoranon uban sa mga balaan ug mga sakop sa panimalay sa Dios.”

DILI MGA DUMULOONG, APAN MIEMBRO SA PANIMALAY SA DIOS

IKINABUHI ANG PULONG SA DIOS
Ang lokal nga simbahan mao ang pamilya sa Dios diin ang mga magtutuo nahisakop, motubo, ug mag-alagad nga magkauban. Usa sa labing dakong panginahanglan sa matag tawo mao ang pagbati nga siya nahisakop. Ang matag usa gusto nga madawat, higugmaon, ug mahimong kabahin sa usa ka pamilya o komunidad. Sa wala pa kita maluwas, nahimulag kita sa Dios tungod sa sala ug mga dumuloong sa Iyang mga saad. Apan pinaagi kang Cristo, gidala kita sa Dios ngadto sa Iyang kaugalingon ug gihimo kitang kabahin sa Iyang pamilya—ang simbahan.
Sa Efeso 2:19, gigamit ni Pablo ang tulo ka hulagway aron ipakita ang atong bag-ong identidad: 1) Isigka-lungsoranon, 2) Mga balaan, 3) Mga sakop sa panimalay sa Dios. Ang Cristohanong kinabuhi dili gidisenyo nga mabuhi nga nag-inusara. Gitawag kita sa Dios aron mahimong kabahin sa usa ka lokal nga simbahan.

1. DILI NA KITA MGA DUMULOONG
“Dili na kamo mga dumuloong ug mga lumalangyaw…” Ang pulong nga “dumuloong” nagpasabot sa usa ka tawo nga wala’y katungod o lugar sa usa ka komunidad. Sa wala pa kita makaila kang Cristo, layo kita sa Dios tungod sa sala. Efeso 2:12 - Wala kita kang Cristo ug mga dumuloong sa mga saad. Isaias 59:2 - Ang sala maoy nagbulag kanato sa Dios. Roma 3:23 “Kay ang tanang mga tawo nagpakasala ug dili takos atubangan sa Dios.” Colosas 1:21-22 - Ang mga nahimulag gipasig-uli pinaagi kang Cristo.

2. KITA MGA ISIGKA-LUNGSORANON UBAN SA MGA BALAAN
“…kondili mga isigka-lungsoranon uban sa mga balaan…” Ang lungsoranon adunay identidad, katungod, responsibilidad, ug komunidad. Ang atong tinuod nga pagkalungsoranon anaa sa gingharian sa Dios. Filipos 3:20 “Apan alang kanato, ang langit mao ang atong tinuod nga pinuy-anan.” 1 Pedro 2:9 “Apan kamo mga pinili, mga pari sa Hari, ug mga katawhan sa Dios. Nahimo kamong iya aron magmantala sa iyang kahibulongan nga mga binuhatan. Siya ang nagtawag kaninyo gikan sa kangitngit ngadto sa iyang kahibulongan nga kahayag.”

3. KITA MGA SAKOP SA PANIMALAY SA DIOS
“…ug mga sakop sa panimalay sa Dios.” Kini mao ang labing mainiton nga hulagway. Dili lamang kita mga lungsoranon; mga anak ug miyembro kita sa pamilya sa Dios. Juan 1:12 - Gihimo kitang mga anak sa Dios. Galacia 3:26 “Kamong tanan mga anak na sa Dios tungod sa inyong pagtuo kang Cristo Jesus.” 1 Timoteo 3:15 “Kita nga mga tumutuo mao ang iglesia sa buhi nga Dios, ang iyang gisaligan nga magbarog ug maglaban sa kamatuoran.”

IKINABUHI ANG PAGTULON-AN
Ang lokal nga simbahan kinahanglan mahimong lugar sa: PAGDAWAT -”Nahisakop ka dinhi.” PAGDASIG -”Nag-ampo kami alang kanimo.” PAGTUL-ID -”Gihigugma ka namo ug gusto ka namong motubo.” PAG-ATIMAN -”Mag-uban ta sa imong mga pagsulay.” PAG-ALAGAD -”Kinahanglan namo ang imong gasa.” PAGDISIPULO -”Tabangan ka namo nga mahimong sama kang Cristo.”
Tan-awa ang simbahan isip pamilya, dili lang usa ka kalihokan matag Domingo. Ayaw lang pagngutana: “Unsa may mahimo sa simbahan alang kanako?” Hinunoa pangutan-a: “Unsa may akong ikatampo sa pamilya sa Dios?”

IKINABUHI ANG PAG-AMPO
Pagpasalamat sa gasa sa lokal nga simbahan. Iampo nato sa Dios nga tabangan kita nga dili lang motambong sa panagtigom, kondili tinuod nga mahigugma, mag-atiman ug mag-alagad sa among mga igsoon. 1 Pedro 4:10 “Matag usa kanato gihatagan sa Dios ug gasa. Gamiton nato kini alang sa kaayohan sa matag usa isip maayo nga sinaligan niining nagkalain-lain nga mga gasa.” #

13/08/2026

ANG PULONG SA DIOS KASALIGAN

EFESO 5:25-27 “Tungod sa iyang paghigugma kanato gihalad niya ang iyang kinabuhi aron dawaton kita sa Dios, human kita mahinloi pinaagi sa pagbautismo nga inubanan sa pulong. Gibuhat niya kini aron kita nga mga tumutuo madawat niya isip iyang pangasaw-onon nga matahom kaayo, balaan, ug walay ikasaway; sama sa pangasaw-onon nga walay depekto o kunot o unsa pa nga mga apan."

SI CRISTO NAGAPABALAAN SA IYANG IGLESIA

IKINABUHI ANG PULONG SA DIOS
Si Kristo nagpadayon sa pagpabalaan sa Iyang Iglesia pinaagi sa Iyang Pulong aron mahimo kining balaan, putli, ug mahimayaon. Ang Iglesia dili pa hingpit karon. Makita gihapon nato ang mga kahuyang, pakigbisog, kapakyasan, ug mga sala taliwala sa katawhan sa Dios. Apan wala pasagdi ni Cristo ang Iyang Iglesia. Nagpadayon Siya sa pagtrabaho diha kaniya—gilimpyohan, gibag-o, ug giandam alang sa adlaw nga ipresentar kini ngadto Kaniya nga hingpit sa pagkabalaan. Ang Efeso 5:26–27 naghatag kanato og tulo ka dagkong kamatuoran mahitungod sa pagpabalaan ni Cristo sa Iyang Iglesia.

1. SI CRISTO NAGPABALAAN SA IGLESIA PINAAGI SA PULONG
Ang pulong nga balaan o “sanctify” nagpasabot nga ibulag alang sa Dios ug himoon nga balaan. Dili lamang kita pasayloon ni Kristo; Iyang gibag-o usab ang atong kinaiya aron mas mapakita nato ang Iyang pagkasama. Ang Pulong sa Dios mao ang instrumento nga gigamit aron ipadayag ang sala, tul-idon ang sayop, bag-ohon ang atong panghunahuna, ug hulmaon ang atong kinabuhi sumala sa kabubut-on sa Dios. Juan 17:17 “Balaan sila pinaagi sa kamatuoran; ang Imong pulong mao ang kamatuoran.” 2 Timoteo 3:16-17 - Ang Kasulatan nag-andam sa magtutuo alang sa matag maayong buhat. Juan 15:3 “Kamo nahinloan na tungod sa pulong nga akong gisulti kaninyo.”

2. SI CRISTO NAG-ANDAM SA IGLESIA NGA BALAAN
Gigamit ni Pablo ang hulagway sa usa ka pangasaw-onon nga giandam alang sa iyang pamanhonon. Ang tumong ni Cristo dili lamang nga adunay daghang miyembro ang Iglesia. Ang Iyang tumong mao ang usa ka balaan nga Iglesia. Ang mga pulong nga “walay lama o kunot” naghulagway sa kaputli ug kahingpitan. Si Cristo nag-andam sa Iyang katawhan alang sa adlaw nga kita motindog sa Iyang atubangan nga hingpit na nga nabag-o. Filipos 1:6 “Nasiguro ko nga ang maayong buhat nga gisugdan sa Dios diha kaninyo padayonon gayod niya hangtod sa adlaw nga mobalik si Cristo Jesus. 1 Tesalonica 5:23-24 - Ang Dios mismo ang nagbalaan sa Iyang katawhan. Colosas 1:21-22 - Ipresentar kita ni Cristo nga balaan ug walay ikasaway sa Iyang atubangan.

3. SI CRISTO MAGPRESENTAR SA IGLESIA NGA MAHIMAYAON
Ang simbahan Iya ni Cristo. Iyang gipalit pinaagi sa Iyang dugo, Iyang ginapabalaan pinaagi sa Iyang Pulong, ug usa ka adlaw Iyang ipresentar ang Iglesia ngadto sa Iyang kaugalingon nga hingpit sa pagkabalaan. Mao kini ang dakong paglaom sa matag tumutuo. Colosas 3:4 - Sa pagpakita ni Cristo, kita usab ipakita uban Kaniya diha sa himaya. 1 Juan 3:2–3 - Sa pagpakita ni Cristo, kita mahimong sama Kaniya.

IKINABUHI ANG PAGTULON-AN
Ang pagpabalaan sa tumutuo usa ka padayon nga proseso. Ang Dios nagsugod sa Iyang buhat diha kanato ug Iyang ipadayon kini hangtod sa adlaw sa pagbalik ni Cristo. Kinahanglan tugotan nato ang Pulong sa Dios nga mosusi kanato. Kinahanglan atong tumanon ang gitudlo sa Pulong sa Dios. Ang mga programa, tradisyon, musika, panag-uban, ug mga kalihokan importante, apan ang tinuod nga gahum nga makapausab sa Iglesia naggikan sa Kamatuoran sa Dios.

IKINABUHI ANG PAG-AMPO
Atong iampo nga ang Pulong sa Dios mismo ang manglimpyo ug mag-usab sa atong mga kinaiya, prayoridad, sunultihan ug pamatasan. Hebreohanon 4:12 — Ang Pulong sa Dios buhi ug gamhanan, ug kini mosusi sa mga hunahuna ug tinguha sa kasingkasing. #

06/08/2026

ANG PULONG SA DIOS KASALIGAN

MATEO 16:18 “Ug ako magaingon kanimo nga ikaw si Pedro, ug ibabaw niining bato pagtukoron ko ang akong iglesia; ug ang mga ganghaan sa Hades dili makabuntog batok niini."

SI CRISTO UG ANG IYANG IGLESIA

IKINABUHI ANG PULONG SA DIOS
Si Jesu-Cristo mao ang Magtutukod, Tag-iya, ug Magbalantay sa Iyang Iglesia. Daghan ang naghunahuna nga ang iglesia usa lamang ka building o usa ka tigom matag Domingo. Apan sumala sa Biblia, ang Iglesia dili usa lamang ka lugar. Kini mao ang katawhan sa Dios nga gitubos pinaagi kang Cristo ug gitawag aron mosimba Kaniya, motubo sa Iyang Pulong, ug mopahibalo sa Maayong Balita ngadto sa kalibutan. Sa Mateo 16:18, gihatag ni Jesus ang usa sa labing dako Niyang mga saad: “Patukoron ko ang Akong iglesia”. Kini nga mga pulong nagatudlo kanato nga ang Iglesia iya ni Cristo, gitukod ni Cristo, ug magpabiling madaogon tungod kang Cristo. Ingon nga mga sakop sa lawas ni Cristo, gitawag kita sa matinud-anong pag-apil sa kinabuhi ug buluhaton sa Iyang iglesia.

1. SI CRISTO MAO ANG MAGTUTUKOD SA IYANG IGLESIA
Wala moingon si Jesus nga, "Patukoron ni Pedro ang iglesia," o "Ang mga tawo maoy magtukod sa iglesia." Siya mismo miingon: “Patukoron KO ang Akong iglesia.” Ang iglesia naglungtad tungod sa buhat ni Cristo. Bisan pa og adunay mga pastor, magtutudlo, ug mga magtutuo nga nagaalagad, si Cristo gihapon ang nagahatag sa espirituhanong pagtubo ug bunga. Juan 15:5 ‘Gawas kanako wala kamo'y arang mahimo." 1 Corinto 3:6-7 - Si Pablo mitanom, si Apolos mibisbis, apan ang Dios mao ang nagpatubo. Colosas 1:18 - Si Cristo mao ang Ulo sa Iglesia.

2. ANG IGLESIA IYA NI CRISTO
“Akong iglesia.” Ang Iglesia bililhon kaayo kay Cristo. Tungod kay Iya kini: >Gihigugma Niya kini. >Gitubos Niya kini pinaagi sa Iyang dugo. >Gipanalipdan Niya kini. >Siya ang nagamando niini. Ang pagpamiyembro sa iglesia dili lamang pagsulod sa usa ka organisasyon, kondili pag-apil sa pamilya sa Dios ug pagpasalig nga motubo uban sa ubang mga magtutuo. Binuhatan 20:28 - Gipalit ni Cristo ang Iglesia pinaagi sa Iyang kaugalingong dugo. Efeso 5:25-27 - Gihigugma ni Cristo ang Iglesia ug gitugyan ang Iyang kaugalingon alang niini.1Pedro 2:9-10 - Pinili nga katawhan sa Dios.

3. . SI CRISTO MAGAPANALIPOD UG MAGAPADAYON SA IYANG IGLESIA
"Ug ang mga ganghaan sa Hades dili makabuntog batok niini." Nagsaad si Jesus nga walay gahum—bisan ang kamatayon, paglutos, si Satanas, o bakak nga pagtulon-an—nga makapukan sa Iyang Iglesia. Roma 8:37–39 – Walay makapabulag kanato gikan sa gugma ni Cristo. Juan 10:27-29 - Walay bisan kinsa nga makasakmit sa mga karnero gikan sa kamot ni Cristo. Gipadayag 19:7–8 – Ang Iglesia, ang Pangasaw-onon ni Cristo, ipakita nga mahimayaon.

IKINABUHI ANG PAGTULON-AN
Sa tibuok kasaysayan, daghang mga gingharian ug mga kagamhanan ang nangahanaw, apan ang Iglesia ni Cristo nagpabilin tungod kay Siya mismo ang nagabantay niini. Ayaw kahadlok sa pagsupak tungod sa imong pagtuo. Padayon sa pagwali sa Maayong Balita uban ang kaisog. Salig sa Ginoo bisan sa mga pagsulay ug hinumdumi nga segurado ang kadaugan uban kang Cristo.

IKINABUHI ANG PAG-AMPO
Ato pag-ampo ang gimando kanato sa Pulong sa Dios dinhi sa Hebreohanon 10:24-25 “Ug paningkamotan ta nga mapukaw ang pagbati sa kada usa nga mahigugma sa iyang isigka-tawo ug maghimog maayo. Dili gayod nato undangon ang atong nabatasan nga panagtigom, sama sa gibuhat sa uban, kondili magdinasigay kita sa usag usa, ilabi na gayod karon nga makita na nato nga haduol na ang pagbalik sa Ginoo.” #

24/07/2026

ANG PULONG SA DIOS KASALIGAN

JUAN 17:20 “Dili lamang alang kanila ang Akong pag-ampo, kondili usab alang niadtong motuo Kanako pinaagi sa ilang pulong."

PAG-AMPO NI JESUS ALANG SA UMAABOT NGA MGA MAGTUTUO

IKINABUHI ANG PULONG SA DIOS
Sa wala pa si Cristo gidakop ug ilansang sa krus, nag-ampo Siya. Una, nag-ampo Siya alang sa Iyang kaugalingon (vv.1-5); sunod, alang sa Iyang mga tinun-an (vv.6-19); ug sa katapusan, alang sa tanan nga motuo Kaniya sa umaabo (vv.20-26). Makapadasig kaayo nga masayran nato nga bisan wala pa kita matawo niadtong panahona, naa na kita sa kasingkasing ug pag-ampo ni Jesus.

1. PAG-AMPO LAKIP SA TANANG UMAABOT NGA TUMUTUO
“Dili lamang alang kanila ang Akong pag-ampo...” Dili lang kutob sa 11 ka tinun-an nga kauban ni Jesus niadtong higayona apan lakip ang tanang motuo Kaniya sa tanang kaliwatan. Hebreohanon 7:25--Si Cristo nagapadayon sa pagpataliwala alang sa Iyang katawhan. Roma 8:34 “gibanhaw usab Siya ug karon atua sa tuong kamot sa Dios ug nagahangyo sa Dios alang kanato.” Isaias 53:12--Ang Mesiyas nagpataliwala alang sa mga makasasala.

2. PAGTUO MOABOT PINAAGI SA PAGWALI SA PULONG
“...alang niadtong motuo Kanako pinaagi sa ilang pulong.” Nasayod si Jesus nga ang Iyang mga apostoles mopadayon sa pagwali sa Ebanghelyo, ug pinaagi sa ilang pagpamatuod daghan ang motuo. Roma 10:17--Ang pagtuo nagagikan sa pagpamati sa Pulong ni Cristo. Binuhatan 2:41 ‘Daghan ang mituo sa iyang mensahe ug diha-diha nagpabautismo sila. Niadtong adlawa mga tulo ka libo ka mga tawo ang nadugang sa mga magtutuo.” 1 Pedro 1:23 “Kay natawo na kamo pag-usab. Ug kini nga pagkatawo dili pinaagi sa inyong ginikanan nga may kamatayon, kondili pinaagi sa pulong sa Dios nga buhi ug walay kataposan.”

3. . USA KA PAMILYA DIHA KANG CRISTO TANAN TUMUTUO
Ang pag-ampo ni Jesus milatas sa mga katuigan, mga nasod, ug mga kultura. Ang tanan nga mituo Kaniya nahimong usa ka espirituhanong pamilya. Efeso 2:19-22 “Kitang mga tumutuo sama sa balay nga bato ang patukoranan. Ug si Cristo mao ang bato nga patukoranan...Ug tungod kay kamo anaa kang Cristo, naapil usab kamo niining gibuhat nga balay nga ginapuy-an sa Dios pinaagi sa iyang Espiritu.” Galacia 3:28--Kitang tanan usa diha kang Cristo. Gipadayag 7:9-10-Ang dakong panon gikan sa tanang nasod nagsimba sa Cordero.

IKINABUHI ANG PAGTULON-AN
Ang atong kaluwasan dili aksidente o ulahi nga plano sa Dios. Sa wala pa mamatay si Jesus sa krus, gihunahuna na Niya kita ug giampo kita ngadto sa Amahan. Busa, bisan unsa ang atong giatubang karon, makasalig kita nga ang atong Manluluwas wala gayud mobiya kanato. Ang Dios naggamit sa Iyang Pulong aron dalhon ang mga tawo ngadto sa pagtuo kang Cristo. Ayaw ikaulaw ang pagsangyaw sa Maayong Balita. Suportahi ang misyon ug ebanghelismo aron daghan pa ang makadungog ug motuo kang Cristo.

IKINABUHI ANG PAG-AMPO
Pagpasalamat sa Dios nga giampo na kita ni Jesus kaniadto bisan wala pa kita matawo ug nadungog nato ang pagwali nga ang kaluwasan anaa lamang pinaagi sa pagtuo kang Cristo Jesus. Efeso 1:13 “Ug kamo usab nahimong anaa kang Cristo sa dihang nadungog ninyo ang kamatuoran, ang Maayong Balita nga si Cristo diay mao ang makaluwas kaninyo. Sa dihang mituo kamo kaniya, gihatagan kamo sa Dios sa Espiritu Santo nga iyang gisaad timailhan nga kamo iya na.” #

17/07/2026

ANG PULONG SA DIOS KASALIGAN

JUAN 17:18 “Ingon nga ako gipadala mo dinhi sa kalibotan, gipadala ko usab sila sa pagtudlo sa mga tawo dinhi sa kalibotan.”

GIPADALA NGADTO SA KALIBOTAN

IKINABUHI ANG PULONG SA DIOS
Ang usa ka nasud nagatudlo ug embahador aron magrepresentar sa iyang gobyerno ngadto sa laing nasud. Ang embahador dili mosulti sa iyang kaugalingong mensahe; iyang ipahayag ang mensahe sa nagpadala kaniya. Ang iyang awtoridad naggikan sa gobyernong iyang girepresentahan. Sa samang paagi, si Jesus miingon sa Iyang mga tinun-an nga sama sa pagpadala sa Amahan Kaniya ngadto sa kalibotan, Iya usab silang gipadala ngadto sa kalibotan. Ang mga Cristohanon mao ang mga embahador ni Cristo (2 Corinto 5:20). Ang Juan 17:18 nagpahinumdom kanato nga ang matag Cristohanon adunay misyon nga gitugyan sa Ginoo.

1. GIPADALA KITA NI CRISTO
“Ingon nga ako gipadala mo dinhi sa kalibotan, gipadala ko usab sila...” Si Jesus mismo gipadala sa Amahan aron tumanon ang plano sa Dios sa pagtubos sa tawo. Sa samang paagi, gipadala usab ni Cristo ang Iyang mga sumusunod aron ipadayon ang pagmantala sa mensahe sa kaluwasan. Juan 20:21 “"Maingon nga ang Amahan nagpadala Kanako, Ako usab nagpadala kaninyo." Mateo 28:19-20 -- Ang Dakong Sugo. Binuhatan 1:8 -- Kita mga saksi nga gihatagan ug gahum sa Espiritu Santo.

2. GIPADALA KITA NGADTO SA KALIBOTAN
“...gipadala mo dinhi sa kalibotan.” Wala mag-ampo si Jesus nga kuhaon ang mga magtutuo gikan sa kalibotan, kondili ipadala sila ngadto niini. Ang mga Kristohanon wala gitawag aron mobulag sa katilingban, kondili aron mahimong maayong impluwensya niini pinaagi sa kamatuoran ug gugma. Si Jesus nagpakig-uban sa mga makasasala apan wala gayod Siya mahugawi sa sala. Juan 17:15-16 -- Ania sa kalibotan apan dili iya sa kalibotan. Mateo 5:13-16 -- Kamo mao ang asin ug kahayag sa kalibotan. Filipos 2:15 -- Mosidlak ingon nga mga kahayag sa kalibotan.

3. . GIPADALA KITA ARON TUMANON ANG MISYON NI CRISTO
Si Jesus gipadala aron ipadayag ang Amahan ug luwason ang mga makasasala. Ang atong misyon mao ang pagpadayon sa Iyang buluhaton pinaagi sa pagmantala sa Maayong Balita ug paghimo ug mga sumusunod ni Cristo. Bisan dili kita ang makaluwas sa tawo, gigamit sa Dios ang matinumanong mga magtutuo aron tudloan ang mga tawo ngadto kang Cristo. Lucas 19:10 -- Ang Anak sa Tawo mianhi aron pagpangita ug pagluwas sa mga nawala. 2Corinto 5:18-20 -- Ang buluhaton sa pagbalita sa pagpasig-uli sa tawo ngadto sa Dios pinaagi kang Cristo.

IKINABUHI ANG PAGTULON-AN
Ang pagka-Cristohanon labaw pa kay sa pagtambong sa simbahan. Ang matag magtutuo gitawag aron mahimong representante ni Cristo bisan asa siya gibutang sa Dios. Ang atong trabahoan, eskwelahan, silingan, ug pamilya mga umahan sa misyon nga gitugyan sa Ginoo. Pangutan-a ang imong kaugalingon: Asa man ako gibutang sa Dios? Kinsa ang nagkinahanglan nga makadungog bahin kang Cristo pinaagi sa akong mga pulong ug mga buhat? Nagkinabuhi ba ako ingon nga usa ka tawo nga gipadala ni Jesus?

IKINABUHI ANG PAG-AMPO
Pag-ampo nga mapakita nato ang gugma ni Cristo ngadto sa uban; Hinumdoman nato nga wala lang kita giulwas kondili gipadala aron sa pagsugilon ngadto sa uban mahitungod sa kaluwasan nga anaa lamang kang Cristo. 1 Pedro 2:9 – Ipahibalo ang mga pagdayeg Kaniya nga nagtawag kaninyo gikan sa kangitngit ngadto sa Iyang kahibulongang kahayag.” #

03/07/2026

ANG PULONG SA DIOS KASALIGAN

JUAN 17:6 “Gipadayag ko ang Imong ngalan ngadto sa mga tawo nga Imong gihatag Kanako gikan sa kalibutan. Imo sila, ug gihatag Mo sila Kanako, ug ilang gituman ang Imong pulong.”

GIPADAYAG NI JESUS ANG AMAHAN NGADTO SA IYANG MGA KATAWHAN

IKINABUHI ANG PULONG SA DIOS
Usa sa labing dako nga panalangin nga madawat sa tawo mao ang pag-ila sa Dios sa personal. Daghan ang nakaila lamang mahitungod sa Dios pinaagi sa relihiyon o tradisyon, apan si Jesus mianhi aron ang mga tawo makaila gayud sa Amahan. Sa gabii sa wala pa Siya ilansang sa krus, nag-ampo si Jesus alang sa Iyang mga disipulo. Niining bahina sa Iyang pag-ampo, Iyang gihisgutan ang buluhaton nga Iyang nahuman kanila. Niining usa ka bersikulo, makita nato ang tulo ka dagkong kamatuoran mahitungod sa ministeryo ni Jesus ug sa kinabuhi sa usa ka tinuod nga sumusunod ni Cristo.

1. GIPAILA NI JESUS ANG AMAHAN SA IYANG KATAWHAN
Ang pulong nga “gipadayag ang Imong ngalan” (v.17:6a) nagpasabot nga gipaila ni Jesus kung kinsa gayud ang Dios. Sa Biblia, ang “ngalan” nagrepresentar sa kinaiya, pagkabalaan, gugma, kalooy, kamatuoran, ug gahum sa Dios.““Pinaagi sa Iyang kinabuhi, pagtulon-an, mga milagro, ug paghalad sa Iyang kaugalingon sa krus, hingpit nga gipadayag ni Jesus ang Amahan. Juan 1:18 “Walay bisan kinsa nga nakakita sa Dios bisan kanus-a; ang bugtong Anak nga anaa sa sabakan sa Amahan, Siya maoy nagpaila Kaniya.” Juan 14:9 “Si Jesus miingon kaniya, ‘Dugay na kaayo Ako nga uban kaninyo, ug wala pa ba diay ikaw makaila Kanako, Felipe? Ang nakakita Kanako nakakita sa Amahan.’” Ang pagkaila kang Jesus mao ang pagkaila sa Amahan.

2. ANG KATAWHAN SA DIOS IYA GAYUD
“Imo sila, ug gihatag Mo sila Kanako.” (v.17:6b) Gipahinumdoman kita ni Jesus nga ang mga tinun-an iya na sa Amahan sa dili pa sila gihatag Kaniya. Ang kaluwasan nagsugod sa grasya ug katuyoan sa Dios, dili sa paningkamot sa tawo. Kini nga kamatuoran naghatag ug dakong kasiguruhan sa matag tumotuo. Juan 6:37 “Ang tanan nga gihatag Kanako sa Amahan moanhi Kanako; ug ang moanhi Kanako dili Ko gayud isalikway.” Juan 10:27-29 “Ang Akong mga karnero nagapatalinghug sa Akong tingog... ug walay bisan kinsa nga makailog kanila gikan sa Akong kamot... walay bisan kinsa nga makailog kanila gikan sa kamot sa Amahan.”

3. . ANG TINUOD NGA TINUN-AN NAGATUMAN SA PULONG SA DIOS
“...ug ilang gituman ang Imong pulong.” Wala magpasabot si Jesus nga hingpit ang Iyang mga disipulo. Usahay sila napakyas, apan ilang gidawat ang Iyang pulong, mituo sa Iyang mensahe, ug naningkamot sa pagtuman niini. Ang pagtuman mao ang pamatuod sa tinuod nga pagtuo. Juan 14:15 “Kon kamo nahigugma Kanako, tumanon ninyo ang Akong mga sugo.” Santiago 1:22 “Apan mahimo kamo nga mga magtutuman sa pulong ug dili lamang mga tigpaminaw.”

IKINABUHI ANG PAGTULON-AN
Si Jesus maoy hingpit nga nagpaila sa Amahan. Ang mga tumutuo Iya sa Dios pinaagi sa Iyang grasya. Ang tinuod nga mga sumusunod ni Cristo nagapakita sa ilang pagtuo pinaagi sa pagtuman sa Pulong sa Dios. Basahon nato ang Biblia matag adlaw, Tumanon nato ang atong natun-an gikan sa Pulong sa Dios ug pangayoon nato ang tabang sa Balaang Espiritu aron mahimong matinumanon bisan lisod ang kahimtang. Filipos 4:13 “Mahimo ko ang pag-atubang sa bisan unsa nga kahimtang pinaagi sa tabang ni Cristo nga nagpalig-on kanako.”

IKINABUHI ANG PAG-AMPO
Pasalamatan ta nga ang Cristohanong kinabuhi dili lamang sa pag-angkon ug kahibalo bahin sa Biblia, kondili sa pag-ila sa Dios pinaagi kang Jesu-Cristo ug pagtugot nga ang Iyang Pulong maoy mag-usab sa atong kinabuhi. Salmo 119:11 “Gitipigan ko ang Imong pulong sa akong kasingkasing aron dili ako makasala batok Kanimo.” #

25/06/2026

ANG PULONG SA DIOS KASALIGAN

JUAN 17:1-2 “Human kadto isulti ni Jesus, mihangad siya sa langit ug miingon, “Amahan, miabot na ang panahon. Pasidunggi ang imong Anak aron pasidunggan ka usab sa imong Anak. Kay gihatagan mo akog katungod sa paggahom sa tanang mga tawo, aron mahatagan ko sa kinabuhi nga walay kataposan ang tanan kanila nga imong gihatag kanako.”

SI JESUS GIHIMAYA PINAAGI SA IYANG MISYON SA KALUWASAN

IKINABUHI ANG PULONG SA DIOS
Ang Juan 17 mao ang pag-ampo ni Jesus sa wala pa Siya dakpa ug ilansang sa krus. Sa bersikulo 1–2, gisugdan Niya ang Iyang pag-ampo pinaagi sa pagpunting sa himaya sa Amahan, sa Iyang misyon, ug sa gasa nga kinabuhing dayon. Kini nga mga bersikulo nagpahinumdom kanato nga ang kamatayon ni Cristo sa krus dili aksidente kondili kabahin sa walay katapusang plano sa Dios aron luwason ang mga makasasala ug dad-on ang himaya ngadto sa Dios.

1. GIPANGITA NI JESUS ANG HIMAYA SA AMAHAN (v.1)
Nasayran ni Jesus nga miabot na ang gitakdang takna alang sa Iyang pag-antos, kamatayon, pagkabanhaw, ug pagpasidungog. Wala Siya mag-ampo alang sa kaugalingong kaharuhay kondili alang sa himaya sa Amahan. Ang Anak himayaon pinaagi sa Iyang pagkamasinugtanon hangtod sa kamatayon sa krus, ug pinaagi niini ang Amahan usab himayaon. Juan 12:23–24 – “Miabot na ang takna nga ang Anak sa Tawo pagahimayaon.” Filipos 2:8–11 – Ang pagkamasinugtanon ni Cristo miresulta sa Iyang pagpasidungog. 1 Corinto 10:31 – “Buhata ninyo ang tanan alang sa himaya sa Dios.”

2. SI JESUS ADUNAY KAGAMHANAN SA TANANG TAWO (v.2a)
Gihatag sa Amahan kang Jesus ang kagamhanan ibabaw sa tanang tawo. Si Jesus dili lamang usa ka magtutudlo o propeta; Siya mao ang Labawng Ginoo nga nagmando sa tanang nasud, katawhan, ug indibidwal. Ang tanan nga tawo manubag Kaniya sa katapusan. Mateo 28:18 – “Ang tanang kagamhanan sa langit ug sa yuta gihatag Kanako.” Colosas 1:16–18 – Si Cristo labaw sa tanang binuhat. Buhat 17:31 – Gitudlo sa Dios si Cristo nga maghukom sa kalibutan.

3. . SI JESUS NAGHATAG KINABUHING DAYON SA IYANG KATAWHAN (v.2b)
Gigamit ni Jesus ang Iyang kagamhanan dili lamang sa pagmando kondili usab sa pagluwas. Ang kinabuhing dayon usa ka libre nga gasa sa Dios pinaagi kang Cristo. Dili lamang kini nagpasabot sa pagkinabuhi hangtod sa kahangturan, apan sa pag-ila ug pagpakig-uban sa Dios hangtod sa walay katapusan. Juan 3:16 – Ang motuo kang Cristo adunay kinabuhing dayon. Juan 10:27–28 – Naghatag si Jesus ug kinabuhing dayon ug nagbantay sa Iyang mga karnero. Roma 6:23 – Ang kinabuhing dayon mao ang gasa sa Dios pinaagi kang Jesu-Cristo.

IKINABUHI ANG PAGTULON-AN
Ang kinabuhing dayon makita lamang diha kang Jesu-Cristo. Ang mga magtutuo makabaton ug kasigurohan sa kaluwasan tungod kay si Cristo mismo ang naghatag niini. Kinahanglan nga magpasalamat kita matag adlaw alang sa gasa sa kaluwasan ug ato ipaambit kini nga paglaum ngadto sa uban. 1 Juan 5:11-12 “Ug mao kini ang pagpamatuod sa Dios: nga kita gihatagan niya ug kinabuhi nga walay kataposan, ug kining kinabuhia anaa sa iyang Anak. Si bisan kinsa nga anaa diha kaniya ang Anak, may kinabuhi nga walay kataposan. Apan kon wala diha kaniya ang Anak sa Dios wala siyay kinabuhi nga walay kataposan.”

IKINABUHI ANG PAG-AMPO
Pasalamatan nato ang Dios nga gipili ni Ginoong Jesus ang paghimaya sa Amahan labaw sa tanan ug andam Siya sa pag-adto sa krus alang sa atong kaluwasan. Iampo nato nga magkinabuhi kita alang sa Iyang himaya, magpasakop sa kagamhanan ni Cristo, ug magmalipayon sa gasa sa kinabuhing dayon. Pangayoon nato ang kaisog sa pagpaambit sa Maayong Balita aron ang uban usab makaila sa Manluluwas nga si Cristo Jesus lamang. #

19/06/2026

ANG PULONG SA DIOS KASALIGAN

MATEO 6:9 “Busa pag-ampo kamo ug sama niini: “Amahan namo nga anaa sa langit, hinaut nga pasidunggan ikaw sa mga tawo...”

AMAHAN NAMO NGA ANAA SA LANGIT

IKINABUHI ANG PULONG SA DIOS
Happy Father’s Day. Ang mga amahan dinhi sa yuta gitawag sa pagpakita sa kinaiya sa atong hingpit nga Langitnong Amahan. Ang Father's Day usa ka espesyal nga higayon sa pagpasidungog sa mga amahan ug mga amahanong ehemplo nga adunay dakong impluwensya sa atong kinabuhi. Ang uban nato gipanalanginan ug diosnong amahan, samtang ang uban nakasinati sa kasakit tungod sa pagkawala o kakulang sa usa ka amahan. Bisan unsa pa ang atong kasinatian sa yutan-ong amahan, gitudloan kita ni Jesus sa pagtan-aw ngadto sa hingpit nga ehemplo sa pagka-amahan sa dihang Siya miingon, “Amahan namo nga anaa sa langit.”

1. ANG ATONG LANGITNONG AMAHAN MAHIGUGMAON.
Gusto sa Dios nga adunay suod nga relasyon uban sa Iyang mga anak. Gitudloan kita ni Jesus sa pagtawag sa Dios nga “Amahan.” Kini nagpasabot sa pagkasuod, gugma, pag-atiman, ug relasyon. Ang Dios dili layo sa Iyang mga anak. Nahibalo Siya sa ilang mga panginahanglan, naminaw sa ilang mga pag-ampo, ug nag-atiman kanila uban sa dakong gugma. Juan 1:12 --Ang tanan nga midawat kang Cristo nahimong mga anak sa Dios. Roma 8:15 --Kita motawag, “Abba, Amahan.” Salmo 103:13 “Maingon nga ang amahan malooy sa iyang mga anak, mao usab ang Ginoo malooy sa mga nagakahadlok Kaniya.”

2. ANG ATONG LANGITNONG AMAHAN NAGMANDO SA IYANG PAMILYA UBAN SA KAALAM UG AWTORIDAD.
Ang awtoridad sa Dios matarong, maalamon, ug alang sa atong kaayohan. Ang titulo nga “Amahan” naglakip sa pagpangulo ug responsibilidad. Ang Dios naggiya, nagtul-id, ug nagtudlo sa Iyang mga anak uban sa gugma. Ang Iyang awtoridad dili mabangis ni hakog, apan kanunay nga maalamon ug balaan. Sa samang paagi, ang mga amahan gitawag sa pagpangulo sa ilang pamilya sa espirituhanong paagi, dili lamang pinaagi sa mga sugo kondili pinaagi usab sa maayong ehemplo. Panultihon 3:11-12 – Ang Ginoo nagabadlong niadtong Iyang gihigugma. Efeso 6:4 – Ang mga amahan kinahanglan magpadako sa ilang mga anak sa pagdisiplina ug pagtudlo sa Ginoo. Hebreo 12:7-10 – Ang pagdisiplina sa Dios nagdala ug pagkamatarong.

3. . ANG ATONG LANGITNONG AMAHAN NAGAHARI SA LANGIT
Ang atong Amahan labing gamhanan ug takus sa hingpit nga pagsalig. Wala lamang moingon si Jesus ug “Amahan namo,” apan “Amahan namo nga anaa sa langit.” Kini nagpahinumdom kanato nga ang Dios dili lamang mahigugmaon apan usab labing gamhanan ug nagahari ibabaw sa tanan. Ang mga amahan dinhi sa yuta adunay mga limitasyon. Dili nila masulbad ang tanang problema o mapanalipdan ang ilang pamilya sa tanang panahon. Apan ang atong Langitnong Amahan dili gayud mapakyas. Siya kanunay nga anaa, maalamon, ug makahimo sa tanan.

IKINABUHI ANG PAGTULON-AN
Paggahin ug makahuluganon nga panahon uban sa inyong mga anak. Ipahayag ang inyong gugma pinaagi sa mga pulong ug buhat. Tukora ang relasyon nga adunay bukas nga komunikasyon.

IKINABUHI ANG PAG-AMPO
Pasalamatan nato ang Dios nga gidawat kita Niya isip Iyang mga anak pinaagi kang Cristo. Ug tahoron nato ang atong mga amahan ug lider nga gibutang sa Dios sa atong kinabuhi. Efeso 6:2-3 “Tahora ang imong amahan ug inahan.” Mao kini ang una nga sugo nga may saad; ug mao kini ang saad, “Aron mahimong maayo ang imong umaabot ug lugwayan ang imong kinabuhi dinhi sa kalibotan.” #

12/06/2026

ANG PULONG SA DIOS KASALIGAN

JJUAN 16:33 “Gisulti ko kining mga butanga kaninyo aron may kalinaw kamo tungod sa inyong pagtuo kanako. Paantuson kamo sa mga tawo sa kalibotan, apan ayaw kamo kahadlok tungod kay gidaog ko na ang gahom sa kalibotan.”

KINABUHI SA KALIBOTAN PUNO SA KALISDANAN

IKINABUHI ANG PULONG SA DIOS
Ang kinabuhi dinhi sa kalibotan nga napukan sa sala puno gyud sa mga kalisdanan—kasakit, kaguol, paglutos, sakit sa lawas, ug kawalay kasigurohan. Wala kini gitago ni Jesus sa Iyang mga tinun-an. Sa tinuod, sa Juan 16:33, nga giingon Niya sa wala pa Siya gidakop ug gilansang sa krus, gihatagan Niya sila og pahimangno ug saad. Giapil Niya ang kamatuoran nga dili malungtaron nga walay problema ang kinabuhi, apan ang kinabuhi uban Kaniya mao ang kinabuhi nga puno sa kadaugan.

1. SEGURADO ANG KALISDANAN DINHI SA KALIBOTAN
“Sa kalibutan aduna kamoy kasakitan…” (Juan 16:33a) Wala moingon si Cristo nga “posible lang” o “tingali ra” kondili aduna gyud kamoy kasakitan--ang kalisdanan segurado sa kalibotan nga puno sa sala. Job 14:1 “Ang tawo nga natawo sa babaye mubo ra ug puno sa kalisdanan ang mga adlaw.” 2 Timoteo 3:12 – “Ang tanang buot mabuhi nga diosnon kang Cristo Jesus pagapasakiton.” Roma 8:22 – Ang tanang binuhat nag-agulo tungod sa sala.

2. ANG KALINAW MAKITA LAMANG KANG CRISTO
“Apan paglipay kamo; kay ako nakadaug na sa kalibutan.” (Juan 16:33b) Gikontra ni Jesus ang kalisdanan pinaagi sa Iyang kalinaw ug kadaugan. Ang pulong nga “paglipay kamo” nagpasabot og kaisog, pagdasig, ug paglaum. Ang atong kalinaw dili makita sa kahimtang, kondili sa usa ka Persona—si Jesu-Cristo. Filipos 4:7 – Ang kalinaw sa Dios magbantay sa kasingkasing ug hunahuna. Isaias 26:3 – Ang hingpit nga kalinaw ihatag sa mga mosalig sa Ginoo. Colosas 2:15 – Gipildi ni Cristo ang mga gahum sa kadautan.

3. . ANG KADAUGAN IYA SA NAGASALIG KANG CRISTO
“Kay ako nakadaug na sa kalibotan.” (Juan 16:33c) Nagpahayag si Jesus sa usa ka pulong nga nagpasabot nga ang kadaugan nahuman na ug permanente na. Pinaagi sa krus ug pagkabanhaw, gipildi Niya ang sala, si Satanas, ug ang sistema sa kalibutan. 1 Juan 5:4–5 ”Kay gipildi sa matag anak sa Dios ang kalibotan. Gipildi niya kini pinaagi sa pagtuo. Busa kinsa ba ang makapildi sa kalibotan? Ang tawo nga nagatuo nga si Jesus mao ang Anak sa Dios.” Roma 8:37 – “Labaw pa kita sa mga magmadaogon pinaagi Kaniya.” 1 Corinto 15:57 – Ang kadaugan pinaagi kang Jesu-Cristo.

IKINABUHI ANG PAGTULON-AN
Ang mga sumusunod ni Cristo dili angay matingala kon moabot ang mga pagsulay. Ang pagtuo kang Jesus dili garantiya nga walay problema, apan Siya mao ang atong lig-on nga salaligan sa tunga sa mga kalisdanan. Wala gyud nagsaad si Jesus og kinabuhi nga walay problema, apan nagsaad Siya og kaisog, kalinaw, ug kadaugan diha Kaniya. Ang kalibotan magdala og kasakitan, apan si Cristo nagdala og kadaugan. Busa karon, paglipay—dili tungod kay sayon ang kinabuhi, kondili tungod kay si Jesus nakadaug na sa kalibutan.

IKINABUHI ANG PAG-AMPO
Salamat sa Pulong sa Dios nga nagapalig-on kanato. Taliwala sa mga kalisdanan dinhi sa kalibotan, motutok kita sa mga saad sa Dios ug kon moabot ang kahadlok, kasakit ug walay kasigurohan, hinumdoman nato nga si Cristo nakadaug na batok sa gahom sa kalibotan. Roma 8:38 “Kay nasiguro ko gayod nga walay makapahimulag kanato gikan sa gugma sa Dios nga gipakita niya pinaagi kang Cristo Jesus nga atong Ginoo.” #

Natidasan Christian Community Church

21/08/2026

13/08/2026

06/08/2026

24/07/2026

17/07/2026

03/07/2026

25/06/2026

19/06/2026

12/06/2026

Address

Opening Hours

Website

Alerts

Shortcuts

Share

Category

Listing takedown request