https://www.facebook.com/297945553716756/

Natidasan Christian Community Church, Sitio Natidasan, Malaybalay (2026)

01/05/2026

ANG PULONG SA DIOS KASALIGAN

JUAN 15:18-20 “Kon ang kalibotan magadumot kaninyo, nasayod kamo nga kini nagdumot Kanako una pa kaninyo...”

PAGKINABUHI NGA MATINUMANON SA KALIBOTAN NGA MOSALIKWAY KANG CRISTO

IKINABUHI ANG PULONG SA DIOS
Ang pagsunod kang Jesus nagdala ug dakong kalipay, katuyoan ug kinabuhing dayon--apan nagdala usab kini ug pagsupak. Niining bahina, giandam ni Jesus ang Iyang mga sumusunod sa usa ka lisod nga kamatuoran: ang kalibotan dili kanunay modawat sa ilang pagtuo, Usahay kini mosalikway, mosupak ug bisan modumot kanila. Kini nga leksyon mopatin-aw kon ngano adunay pagsupak; unsaon pagtubag, ug unsa ang kahulogan sa pagpabiling matinumanon.

1. ANG PAGDUMOT SA KALIBOTAN NAGGIKAN SA PAGSALIKWAY KANG CRISTO
Ang “kalibotan sa Juan 15:18 nagpasabot sa sistema nga supak sa Dios. Klarong giingon ni Jesus nga ang pagsupak nga atong masinati dili personal--kini espirituhanon. Gisalikway una sa kalibotan si Cristo, mao nga dili ta angay matingala kon masinati usab nato kini. Juan 1:10-11 -miabot Siya sa iyang kaugalingon katawhan, apan wala Siya dawata. 1 Juan 3:13 “Ayaw kahibulong, kon ang kalibotan magdumot kaninyo.” Lucas 5:22 -bulahan kamo kon pagadumtan kamo tungod kang Cristo.

2. ANG MGA TUMUTUO GIPILI UG GIBULAG SA KALIBOTAN
“Kay kamo dili na iya sa kalibotan, kondili gipili ko kamo gikan sa kalibotan, busa ang kalibotan nagdumot kaninyo” Juan 15:19. Lahi ang mga Cristohanon tungod kay gipili ug giusab sila sa Dios. Kini nga kahimtng nga “gibulag” (pagkabalaan) maoy hinungdan sa tensyon tali sa tumutuo ug sa kalibotan nga lain ug pamaagi sa pagkinabuhi. 1 Pedro 2:9 “Apan kamo mga pinili, mga pari sa Hari, ug mga katawhan sa Dios. Nahimo kamong iya aron magmantala sa iyang kahibulongan nga mga binuhatan. Siya ang nagtawag kaninyo gikan sa kangitngit ngadto sa iyang kahibulongan nga kahayag.” Roma 12:2 “Ayaw kamo pagsunod sa mga gawi sa mga tawo niining kalibotan.” Filipos 3:20 “Apan alang kanato, ang langit mao ang atong tinuod nga pinuy-anan, ug didto gikan ang atong gipaabot nga Manluluwas nga si Ginoong Jesu-Cristo.”

3. . ANG ULIPON DILI LABAW SA IYANG AGALON
Gipahinumdoman ni Cristo ang Iyang mga disipulo nga ang pagsunod Kaniya nagalakip usab sa pag-ambit sa Iyang pag-antos. Apan adunay paglaum-- sama nga adunay misalikway Kaniya, adunay usab midawat-- busa ang atong pagpamatuod magapamunga usab. Mateo 10:24-25 -ang ulipon dili labaw sa iyang agalon. 2 Timoteo 3:12 “Ang tinuod, ang tanan nga gustong magkinabuhi nga diosnon isip sumusunod ni Cristo Jesus makasinati gayod sa mga paglutos.” Binuhatan 5:41 “Mihawa didto nga malipayon ang mga apostoles, tungod kay gihatagan sila sa Dios ug pribilihiyo nga mag-antos alang sa ngalan ni Jesus.”

IKINABUHI ANG PAGTULON-AN
Hinumdomi nga ang pagbarog uban kang Cristo nagpasabot nga supak ka sa sistema sa kalibotan. Ayaw pagkompromiso aron lang madawat ka sa uban. Pagkinabuhi nga lahi ug ipakita si Cristo sa imong kinabuhi. Paabota nga adunay mga pagsupak, apan ayaw kahadlok. Saligi ang Dios nga nagalihok pinaagi sa imong pagpamatuod.

IKINABUHI ANG PAG-AMPO
Pag-ampo nga makapabilin kang matinumanon taliwala sa mga pagsulay ug kalisod. Si Jesus miingon: “Gisulti ko kining mga butanga kaninyo aron may kalinaw kamo tungod sa inyong pagtuo kanako. Paantuson kamo sa mga tawo sa kalibotan, apan ayaw kamo kahadlok tungod kay gidaog ko na ang gahom sa kalibotan” Juan 16:33. #

24/04/2026

ANG PULONG SA DIOS KASALIGAN

JUAN 15:16b “…ug nga ang inyong bunga magpabilin, aron bisan unsa nga inyong pangayoon sa Amahan sa Akong ngalan, ihatag Niya kaninyo.”

BUNGA NGA NAGPABILIN UG MADAUGONG PAG-AMPO

IKINABUHI ANG PULONG SA DIOS
Gigamit ni Cristo ang hulagway sa punoan ug mga sanga aron ipakita sa Iyang mga disipulo ang kahimtang sa kinabuhi nga konektado Kaniya. Sa v.16 miingon Siya nga gipili Niya sila alang sa usa ka katuyoan--magdala ug bunga nga magpabilin, ug makasinati sa gahom sa pag-ampo. Kini nga bersikulo nagdugtong sa duha ka kamatuoran: ang mabungahong kinabuhi ug epektibong pag-ampo. Kung magkinabuhi kita sumala sa kabubut-on sa Dios, ang atong kinabuhi magahatag ug bunga nga walay katapusan ug ang atong mga pag-ampo magatugma sa Iyang kabubut-on.

1. KINABUHI NGA GIPILI ARON MAGDALAG BUNGA NGA NAGAPABILIN
Miingon si Jesus, “nga ang inyong bunga magpabilin.” Kini dili panamtang o pang-ibabaw lang nga bunga, kondili bunga nga walay katapusan. Juan 15:5 “Ang magapabilin Kanako,,,magadala ug daghang bunga,” Galacia 5:22-23 - Ang bunga sa Espiritu. Colosas 1:10 “Mamunga sa tanang maayong buhat.” Ang bunga nga nagapabilin naglakip sa kinaiya nga sama kang Cristo (gugma, kalipay, kalinaw); mga kinabuhi nga nausab pinaagi sa atong pagpamatuod, ug mga maayong buhat nga nagpasidungog sa Dios.

2. PAG-AMPO NGA NAKAGAMOT SA NGALAN NI CRISTO
“...bisan unsa ang inyong pangayoon sa Amahan sa Akong ngalan...” Ang pag-ampo sa ngalan ni Jesus dili lang pagdugang ug mga pulong sa katapusan--kini nagpasabot sa pag-ampo sumala sa Iyang kabubut-on, kinaiya ug awtoridad. Juan 14:13-14 - Pagpangayo sa ngalan ni Jesus. 1 Juan 5:14-15 - Pagpangayo sumala sa Iyang kabubut-on. Santiago 4:3 “Ug kon mangayo kamo, dili kamo hatagan kay daotan man ang inyong katuyoan. Ang mga butang nga inyong gipangayo alang lang sa inyong kaugalingon nga kalipay.”

3. . SAAD SA GITUBAG NGA PAG-AMPO ALANG SA MABUNGAHON NGA TUMUTUO
Si Jesus miingon: “...ihatag Niya kaninyo.” Kini usa ka matahom nga saad, apan konektado kini sa kinabuhi nga nagapabilin kang Cristo ug nagadala ug bunga. Juan 15:7 “Kung magpabilin kamo Kanako...mangayo kamo.” Salmo 37:4 - Ihatag sa Dios ang mga tinguha nga nahiuyon Kaniya. Mateo 6:33 - Pangitaa una ang gingharian sa Dios. Ginatubag sa Dios ang mga pag-ampo nga gikan sa kasingkasing nga nahiuyon Kaniya, nagapangita sa Iyang himaya ug nagasuporta sa Iyang katuyoan. Sa diha nga magpabilin kita kang Cristo, ang atong mga tinguha magkapareho sa Iyang kabubut-on.

IKINABUHI ANG PAGTULON-AN
Pangutan-a ang imong kaugalingon: Nagapamunga ba ang akong kinabuhi ug mga bunga nga magpabilin? Pag-invest sa imong oras sa mga butang nga adunay walay katapusang bili--mga tawo, pagdisipulo sa uban ug diosnong kinaiya. Ug magpabilin ta uban kang Jesus pinaagi sa pag-ampo, pagbasa ug pagpamalandong sa Pulong sa Dios ug sa pagtuman. Salmo 1:1-2 “Bulahan ang tawo nga wala nagakinabuhi sumala sa tambag sa mga daotang tawo, wala nagasunod sa ginabuhat sa mga makasasala, ug wala nagapakig-uban sa mga bugalbugalon. Kondili, nagakalipay siya sa pagsunod sa mga katudloanan nga gikan sa Ginoo, ug nagapamalandong siya niini adlaw ug gabii.

IKINABUHI ANG PAG-AMPO
Atong i-ampo ang kamatuoran sa Salmo 1:3 “Sama siya sa kahoy nga gitanom sa daplin sa sapa, nga mamunga sa panahon sa tingbunga, ug dili malaya ang mga dahon. Ug ang tanan niyang buhaton magmalampuson.” #

17/04/2026

ANG PULONG SA DIOS KASALIGAN

JUAN 15:16a “Dili kamo ang nagpili Kanako kondili Ako ang nagpili kaninyo ug nagtudlo kaninyo...”

GIPILI UG GITAGANA NI CRISTO

IKINABUHI ANG PULONG SA DIOS
Sa kinabuhi importante kaayo ang mapili sa usa ka team, usa ka bulohaton, o responsibilidad--naghatag kini ug pagbati sa katuyoan ug pagkasakop. Niining bersikuloha, gipahinumdoman kita ni Jesus nga ang atong relasyon Kaniya wala magsugod sa atong pagpili, kondili sa Iyang pagpili kanato. Kini nga kamatuoran nagpaubos kanato ug naghatag ug kadasig: ang atong pagkatawag naggikan sa inisyatibo ni Cristo, dili sa atong merito o kagustohan.

1. GIPILI KITA NI CRISTO (GRASYA)
Miingon si Jesus: “Dili kamo ang nagpili Kanako, kondili Ako ang nagpili kaninyo.” Ang kaluwasan ug pagkatawag nagsugod sa grasya sa Dios. Sa wala pa kita mangita Kaniya, Siya na ang nagapangita kanato. Juan 6:44 “Walay makaduol kanako kon dili tandogon sa Amahan nga nagpadala kanako ang iyang kasingkasing.” Efeso 1:4 “Bisan sa wala pa buhata ang kalibotan, gipili na kitang daan sa Dios nga mahimong balaan ug walay ikasaway sa iyang atubangan pinaagi sa atong paghiusa kang Cristo.” Roma 5:8 “apan si Cristo namatay alang kanato bisan pa ug makasasala kita. Sa ingon niini nga pamaagi gipakita sa Dios ang iyang paghigugma kanato”

2. GITAGANA KITA ALANG SA KATUYOAN (PAGTAWAG)
Wala lang kita gipili ni Jesus apan gitagana usab kita Niya. Nagpasabot kini nga gihatagan kita Niya ug partikular nga bulohaton ug misyon sa Iyang gingharian. Efeso 2:10 “Gibuhat kita sa Dios; ug sa atong pagkahiusa kang Cristo Jesus gihatagan niya kita ug bag-o nga kinabuhi, aron mahimo nato ang maayo nga mga buhat...” Mateo 28:19-20 - Gimando Niya kanato ang Great Commission. 2 Timoteo 1:9 “Gitawag niya kita ug giluwas aron mahimong iya. Wala niya kini buhata kay maayo ang atong mga binuhatan, kondili tungod sa iyang kaugalingon nga katuyoan ug grasya. Sa wala pa ang kalibotan, gihatag na niya kini nga grasya kanato pinaagi kang Cristo Jesus.”

3. . GITAWAG KITA SA RELASYON (PABILIN KANG CRISTO)
Kini nga bersikulo kabahin sa pagtulon-an ni Jesus bahin sa punoan sa ubas ug mga sanga (Juan 15). Ang atong pagkatawag nagagikan sa atong relasyon Kaniya--dili sa atong performance, kondili sa koneksyon. Juan 15:5 “Kung wala Ako, wala gayud kamo’y mahimo.” Salmo 37:4 “Pangitaa ang imong kalipay diha sa Ginoo ug ihatag niya kanimo ang imong gipangandoy.” Colosas 2:6-7 “Tungod kay giila na ninyo si Cristo Jesus ingon nga Ginoo, padayon kamo diha kaniya. Panggamot kamo kaniya ug pagtubo. Pagmalig-on kamo diha sa pagtuo nga gitudlo kaninyo, ug pagpasalamat usab kamo kanunay sa Dios.”

IKINABUHI ANG PAGTULON-AN
Magpainubsanon kita--ang kaluwasan dili nato maangkon pinaagi sa kaugalingong paningkamot. Magpasalamaton kita- personal kita nga gipili sa Dios. Magmalig-on kita sa gihatag nga identidad nato nga Iya ni Cristo. Sayri ug hibaloa ang imong espirituhanong mga gasa ug gamita kini. Pag-alagad nga matinud-anon kung asa ka gibutang sa Dios. Hinumdomi nga ang tanang tumutuo adunay misyon sa pagpanugilon sa Maayong Balita sa kaluwasan nga anaa lang kang Cristo ug paghimog Iyang mga sumusunod. Mateo 28:19 “Busa adtoi ninyo ang mga katawhan sa tanan nga dapit. Ug himoa ninyo sila nga akong mga sumusunod. Bautismohi ninyo sila sa ngalan sa Amahan, sa Anak, ug sa Espiritu Santo.”

IKINABUHI ANG PAG-AMPO
Atong pag-ampo nga mahatagan nato ug prayoridad ang atong adlaw-adlaw nga panahon uban kang Cristo Jesus diha sa Iyang Pulong ug sa pagpakig-estorya Kaniya sa pag-ampo. Dili ta mosalig sa atong kaugalingon, apan sa Dios. Panultihon 3:5-6 “Salig sa Ginoo sa tibuok mong kasingkasing, ug ayaw pagsalig sa imong kaugalingong kaalam. Hinumdomi ang Ginoo sa tanan mong ginabuhat, ug tultolan ka niya sa hustong dalan.” #

10/04/2026

ANG PULONG SA DIOS KASALIGAN

JUAN 15:14-15 “Mga higala ko kamo kon tumanon ninyo ang akong mga sugo. Dili ko kamo tawgon nga mga sulugoon, kay ang sulugoon wala masayod kon unsa ang gibuhat sa iyang agalon. Tawgon ko na kamo karon nga akong mga higala, kay kon unsa ang akong nadungog gikan sa akong Amahan mao usab ang akong gisulti kaninyo.”

GIKAN SA ULIPON NGADTO HIGALA NI JESUS

IKINABUHI ANG PULONG SA DIOS
Sa kinabuhi importante kaayo ang mga relasyon. Daghan ang nakasabot unsay kahulogan sa mahimong empleyado, tagasunod o ulipon--apan mas gamay ang nakasabot unsay kahulogan sa mahimong higala. Sa Juan 15:14-15 si Jesus misulti sa malumo sa Iyang mga disipulo sa wala pa ang krus. Iyang gipataas ang ilang relasyon gikan sa pagkaulipon ngadto sa pagkahigala. Kini nga teksto nagpakita dili lang sa privilihiyo kondili sa reponsibilidad. Ang pagkahigala kang Jesus makita sa pagtuman, pagkaduol ug pagpadayag.

1. PAGKAHIGALA GIPAKITA PINAAGI SA PAGTUMAN
Giklaro ni Jesus nga ang pagkahigala Kaniya dili lang sa pagbati kondili sa pagtuman. “Mga higala ko kamo kon tumanon ninyo ang akong mga sugo” (v.14). Ang pagtuman dili legalismo. Kini mao ang gugma nga gihimo sa buhat. Juan 14:15 ““Kon gihigugma ninyo ako, tumana ninyo ang akong mga sugo,” 1 Juan 5:3 “Kay nahigugma kita sa Dios kon nagatuman kita sa iyang mga sugo. Ug ang iyang mga sugo dili lisod tumanon.” Santiago 1:22 “Dili kay maminaw lang kamo sa iyang mga pulong kondili tumana ninyo kini.”

2. PAGKAHIGALA NGA NAGPASABOT UG PAGKADUOL
Ang ulipon motuman bisan walay kahibalo, apan ang higala gipaduol. Gikuha ni Jesus ang gilay-on ug giimbitar kita sa suod nga relasyon. “Dili ko kamo tawgon nga mga sulugoon...” (v.15a). Salmo 25:14 “Suod ka, Ginoo, sa mga nagatahod kanimo. Ginapahinumdoman mo sila sa imong kasabotan.” Roma 8:15 - Dili kita mga ulipon kondili mga anak nga motawag “Abba, Amahan.” Hebreohanon 4:16 “Busa dili kita magpanuko sa pagduol sa trono sa maluloy-on nga Dios, aron madawat nato ang kalooy ug tabang sa oras sa atong panginahanglan.”

3. PAGKAHIGALA SA PAGPADAYAG SA IYANG KASINGKASING
Gipaambit ni Jesus ang kamatuoran sa Dios ngadto sa Iyang mga higala. “...kay ang tanan nga akong nadungog gikan sa Amahan mao usab ang akong gisulti kaninyo” (v.15b). Ang higala saligan ug gahatagan ug kahibalo. Pinaagi sa Iyang Pulong ug Espiritu, gipadayag ni Jesus ang kabubut-on sa Dios kanato. Amos 3:7 - Gipadayag sa Dios ang Iyang plano sa Iyang mga alagad. 1 Corinto 2:10 - Ang Espiritu nagpadayag sa giladmon sa Dios. Efeso 1:18 “Giampo ko usab nga lamdagan niya ang inyong hunahuna aron masayran ninyo kon unsa ang atong paglaom sa iyang pagtawag kanato nga mahimong iyang mga anak, ug aron masayran usab ninyo kon unsa kadako ug kamaayo sa panulondon nga iyang gisaad alang sa iyang mga katawhan.”

IKINABUHI ANG PAGTULON-AN
Ang tinuod nga higala ni Cristo makita sa kinabuhi, dili lang sa pulong. Pag-ampo ug paggahin ug panahon uban kang Jesus dili lang tungod sa obligasyon, kondili tungod sa gugma. Palahoma ang imong kinabuhi sa pag-ampo - pakig-estorya kang Ginoong Jesus ingon nga higala. Hinumdomi nga ang Cristianismo dili lang relihiyon kondili relasyon. Basaha ug tun-i ang Biblia kanunay kay dinhi mosulti si Jesus kanimo. Pangayoa ang giya sa Balaang Espiritu aron makasabot ka. I-aplikar ang imong nadungog ug natun-an gikan sa Dios.

IKINABUHI ANG PAG-AMPO
Pagpasalamat nga gidapit kita ni Cristo sa usa ka talagsaong relasyon--dili lang sa pag-alagad Kaniya apan sa pag-ila Kaniya isip higala. Iampo nato nga magmatinumanon kita sa pagtuman sa kabubut-on sa Dios, nga mas mosuod ang atong pag-ila Kaniya ug mokinabuhi kita sumala sa Iyang gipadayag diha sa Iyang Pulong. #

04/04/2026

ANG PULONG SA DIOS KASALIGAN

1 CORINTO 15:14 “Ug kon wala mabanhaw si Cristo, walay kapuslanan ang among pagwali, ug wala usay kapuslanan ang inyong pagtuo.”

KUNG SI CRISTO WALA MABANHAW. . .

IKINABUHI ANG PULONG SA DIOS
Ang pagkabanhaw ni Cristo Jesus dili lang usa ka importante nga doctrina--kini mao ang pundasyon sa Cristianismo. Si apostol Pablo klarong nag-ingon nga kung si Cristo wala mabanhaw, ang tanan natong gituohan mahugno. Kini nga bersikulo nag-awhag kanato sa pagpangutana: Unsa kaha ang Cristianisyo kung walay pagkabanhaw?
Ang tubag ni Pablo klaroL walay pulos, walay gahom ug walay kahulogan.

1. KUNG WALAY PAGKABANHAW, WALAY PULOS ANG MENSAHE
“Walay kapuslanan ang among pagwali...” Kung si Jesus wala mabanhaw gikan sa mga patay, ang mensahe se ebanghelyo walay sulod. Ang pagwali bahin sa kaluwasan, kapasayloan ug kinabuhing walay kataposan mahimong bakak lamang nga paglaum. 1 Corinto 15:3-4, Si Cristo namatay, gilubong ug nabanhaw. Mga Binuhatan 2:24 “Apan gibanhaw siya sa Dios ug giluwas gikan sa gahom sa kamatayon, kay ang tinuod, bisan ang kamatayon walay gahom sa pagpugong kaniya.” Roma 10:9 “kon isugilon mo nga si Jesus mao ang Ginoo ug nagatuo ka sa kinasingkasing nga gibanhaw siya sa Dios gikan sa kamatayon, maluwas ka.”

2. KUNG WALAY PAGKABANHAW, WALAY PULOS ANG ATONG PAGTUO
“...ug wala usay kapuslanan ang inyong pagtuo.” Ang pagtuo sa usa ka patay nga Manluluwas dili makaluwas. Kung si Jesus nagpabilin sa lubnganan, ang sala ug kamatayon magpadayon gihapon sa pagdaog. 1 Corinto 15:17 “Ug kon wala mabanhaw si Cristo, ang inyong pagtuo walay kapuslanan ug wala pa kamo mapasaylo sa inyong mga sala.” Roma 4:25 “Gipatay si Ginoong Jesus tungod sa atong mga sala, ug gibanhaw siya aron pakamatarungon kita.” Hebreohanon 7:25 “Busa makahimo gayod siya pagluwas kang bisan kinsa nga moduol sa Dios pinaagi kaniya ug mahimo niya kini bisan unsang orasa. Kay buhi man siya sa walay kataposan aron sa pagpakilooy sa Dios alang kanila.“

3. TUNGOD KAY SI CRISTO NABANHAW, SEGURADO ANG ATONG PAGLAUM
(Ang kamatuoran nga gikan sa bersikulo gigamit ni San Pablo sa negatibo aron ipakita ang positibo.) Tungod kay si Cristo nabanhaw gayod, nabag-o ang tanan--ang atong mensahe tinuod, ang atong pagtuo lig-on, ug ang atong kaugmaon segurado. 1 Corinto 15:20 “Apan ang tinuod, nabanhaw si Cristo gikan sa kamatayon ug mao kini ang nagapamatuod nga banhawon gayod ang mga patay.” Juan 11:25 “Miingon si Jesus kaniya, “Ako ang nagabanhaw sa mga patay, ug ako usab ang nagahatag ug kinabuhi. Ang nagatuo kanako, bisan mamatay pa siya, mabuhi pag-usab.” 1 Pedro 1:3 “'Magpasalamat kita sa Dios ug Amahan sa atong Ginoong Jesu-Cristo kay tungod sa iyang dakong kaluoy gihatagan kita niya ug bag-ong kinabuhi pinaagi sa pagbanhaw kang Jesu-Cristo. Naghatag kini kanato ug paglaom nga dili matarog.”

IKINABUHI ANG PAGTULON-AN
Magmalig-on kita sa ebanghelyo nga atong nadawat tungod kay tinuod kini ug gamhanan. Magmaisugon kita sa pagpamatuod tungod kay kita adunay buhi nga Manluluwas, dili patay nga magtutudlo. Susiha ang imong pagtuo kon naka-angkla ba kini sa buhi nga Cristo. Ug padayonon nato ang pagsalig matag adlaw sa Manluluwas nga buhi ug nagatabang kanato sa pagkinabuhi nga matarong. Filipos 4:13 “Mahimo ko ang pag-atubang sa bisan unsa nga kahimtang pinaagi sa tabang ni Cristo nga nagpalig-on kanako.”

IKINABUHI ANG PAG-AMPO
Atong pag-ampo nga mokinabuhi kita diha sa paglaum bisan taliwala sa kalisdanan. Atubangon nato, bisan pa ang kamatayon ug unsang matang sa pagsulay, nga walay kahadlok kay adunay pagkabanhaw ang mga tumutuo. Pasalamatan, simbahon ug alagaron nato si Cristo uban sa kalipay tungod kay Siya buhi! #

26/03/2026

ANG PULONG SA DIOS KASALIGAN

JUAN 12:13 “Busa nagkuha silag mga dahon sa palmera ug gitagbo nila si Jesus, ug naninggit, “Dayegon ta ang Dios! Gipanalanginan sa Ginoo ang iyang pinadala! Dayegon ta ang Hari sa Israel!”

ANG HARI NGA MIABOT

IKINABUHI ANG PULONG SA DIOS
Ang Triumphal Entry nga atong gisaulog isip Palm Sunday nagmarka sa pagsugod sa katapusang semana sa ministeryo ni Jesus dinhi sa yuta sa wala pa Siya ilansang sa krus. Kini nga hitabo importante kaayo tungod kay gisulat kini sa upat ka Ebanghelyo. Sa unang tan-aw, mura kini ug usa ka selebrasyon. Nag-awit ang mga tawo, nagwarawara ug mga sanga sa palma ug gidawat si Jesus sama sa usa ka hari. Apan ilawon niini adunay mas lawom nga kahulogan--usa ka istorya sa natuman nga propesiya, sayop nga pagsabot ug usa ka mapainubsanon nga Hari. Niining leksyon atong tan-awon unsay nahitabo ug unsay kahulogan sa atong kinabuhi karon.

1. SI JESUS ANG GISAAD NGA HARI (Katumanan sa Saad)
Tinuyo nga misulod si Jesus sa Jerusalem nga nagsakay sa usa ka a**o aron matuman ang propesiya. Dili aksidente--klaro kini nga pagpahayag nga Siya mao ang Mesias, ang Hari sa Israel. Zacarias 9:9 “Miingon ang Ginoo, “Panghugyaw gayod kamo sa kalipay, kamong mga lumulupyo sa Jerusalem, kay ang inyong hari moabot. Matarong siya ug madaogon. Mapainubsanon siya ug moabot nga nagasakay sa nating a**o.” Mateo 21:4-5 “Mahitabo kini aron matuman ang gisulti sa propeta: “Sultihi ninyo ang mga taga-Zion nga ania na ang ilang hari. Mapainubsanon siya, ug moabot na siya nga nagasakay sa nating a**o!” Ilang giila Siya nga Hari apan wala pa gyud nila hingpit nga nasabtan kung kinsa Siya.

2. GIPAKITA NI JESUS ANG LAHI NGA GINGHARIAN (Pagpakamainubsanon kaysa Gahom)
Si Jesus misulod sa Jerusalem dili ingon usa ka politikal nga mananakop kondili ingon usa ka mapainubsanong Hari nga alagad. Wala Siyay kasundalohan, trono o korona (sa maong higayon). Hinoon dala Niya ang usa ka hinulman nga a**o, mga sapot sa ordinaryong tawo ug usa ka misyon sa paghalad sa Iyang kaugalingon. Marcos 11:7-8 “Pagkahuman niadto gidala nila ang a**o kang Jesus. Pag-abot didto gihapinan nila kini sa ilang mga kupo ug gisakyan dayon ni Jesus paingon sa Jerusalem. Daghang mga tawo ang mibuklad sa ilang mga kupo sa dalan, ug ang uban mibutang ug mga sangang dahonon nga ilang gipamutol gikan sa uma.” Juan 18:36 “Gitubag siya ni Jesus, “Ang akong gingharian wala dinhi niining kalibotan. Kon ang akong gingharian dinhi pa niining kalibotan, nakiggira unta ang akong mga tinun-an aron dili ako madakop sa mga Judio. Apan sa pagkatinuod, ang akong gingharian wala dinhi niining kalibotan.”

3. ANG PELIGRO SA BABAW NGA PAGTUO (Gikan sa “Hosanna” ngadto sa “Ilansang Siya.”
Ang mao ra nga panon sa katawhan nga misinggit og “Hosanna!” mao usab ang misinggit og “Ilansang Siya!” Ngano man? Tungod kay wala matuman ni Jesus ang ilang gipaabot. Gusto nila ug politikal nga manluluwas--dili Manluluwas gikan sa sala. ang ilang pagtuo gibase sa personal nga kaayohan, sayop nga paglaom ug temporaryong kadasig. Dili sa tinuod nga pagpasakop. Lucas 23:20-21 “Gusto unta ni Pilato nga buhian si Jesus, busa gisultihan niya pag-usab ang mga tawo. Apan nagpadayon sa pagsinggit ang mga tawo, “Ilansang siya sa krus! Ilansang siya sa krus!” Juan 1:11 “Mianhi siya sa iyang kaugalingong katawhan, apan ang kadaghanan kanila wala modawat kaniya.”

IKINABUHI ANG PAGTULON-AN
Ang Triumphal Entry istorya sa kalainan sa Gipaabot sa Katawhan ug (sa Tinuod ng Pag-abot ni Jesus.) Ang mga tawo nagpaabot sa Makusog nga hari (si Jesus miabot nga Mapainubsanong Alagad); Politikal nga Kagawasan (Espirituhanong Kaluwasan); Dayon nga Kadaogan (Sakripisyong Gugma). Ang pangutana kini: Nakapasulod na ba si Jesus sa imong kasingkasing isip Hari?

IKINABUHI ANG PAG-AMPO
Atong iampo nga si Cristo mohari sulod sa atong kasingkasing nga moresulta sa Kalinaw, Kausaban ug nga Makita ang Iyang gugma sa atong kinabuhi. Juan 10:10 “Ang katuyoan sa kawatan mao ang pagpangawat, ang pagpatay, ug ang pagpangguba. Apan mianhi Ako dinhi sa kalibotan aron mahatagan Ko ang mga tawo sa kinabuhi nga madagayaon.” #

19/03/2026

ANG PULONG SA DIOS KASALIGAN

JUAN 15:13 “Walay gugma nga labaw pa niini, nga ang usa ka tawo motugyan sa iyang kinabuhi alang sa iyang mga higala.”

ANG LABING DAKO NGA GUGMA

IKINABUHI ANG PULONG SA DIOS
Ang gugma usa ka pulong nga kanunay gamiton apan dili kanunay masabtan sa iyang kinahiladman. Daghan ang naghunahuna nga ang gugma kay pagbati lamang, kahinam o kaayo--apan gipakita ni Cristo nga ang pinakataas nga porma sa gugma mao ang paghalad. Niining bersikuloha, giandam ni Jesus ang Iyang mga sumusunod alang sa krus. Wala lang Siya nagtudlo bahin sa gugma apan gipakita gayod Niya kini pinaagi sa Iyang kinabuhi. Kini nga gugma dili ordinaryo, kondili mahalon, tinuyoan ug andam mohatag sa kaugalingon.

1. ANG SUKOD SA TINUOD NGA GUGMA MAO ANG PAGHALAD
“Walay gugma nga labaw pa niini...” Gipahimutang ni Jesus ang sukdanan--ang labing dako nga gugma makita sa kung unsa ang andam ihatag o isakripisyo sa usa ka tawo. Roma 5:8 “Apan gipakita sa Dios ang Iyang gugma kanato, nga samtang makasasala pa kita, si Cristo namatay alang kanato.” 1 Juan 3:16 “Niini nato nailhan ang gugma, kay Iyang gitugyan ang Iyang kinabuhi alang kanato…” Ang tinuod nga Crisohanong gugma molabaw pa sa pagpakasayon.

2. ANG MODELO SA TINUOD NGA GUGMA MAO SI CRISTO
“...nga motugyan sa iyang kinabuhi...” Si Jesus mao ang magtutudlo ug ehemplo. Dili lang Siya misulti bahin sa gugma --apan gipakita gyud Niya kini pinaagi sa Iyang kamatayon sa krus. Filipos 2:5-8 - Gipakaubos ni Cristo ang Iyang kaugalingon ug mituman hangtod sa kamatayon. Efeso 5:2 “Si Cristo nahigugma kanato ug mitugyan sa Iyang kaugalingon alang kanato…” Si Cristo Jesus mao ang hingpit nga ehemplo sa sakripisyong gugma. Ang gugma usahay nagpasabot sa pagpasaylo, pag-alagad ug pag-antos alang sa uban.

3. ANG ILHANAN SA TINUOD NGA GUGMA MAO ANG RELASYON
“...alang sa iyang mga higala.” Gitawag ni Jesus ang Iyang mga sumusunod nga mga higala. Dili lang mga ulipon (tan-awa sa Juan 15:15). Ang Iyang gugma personal ug may relasyon. Juan 15:15 “Gitawag ko kamo nga mga higala...” Lucas 6:35 -- Higugmaa ninyo ang inyong mga kaaway... nga walay pagpaabot og balos. Ang tinuod nga gugma nagtinguha sa kaayohan sa uban bisan pa ug adunay dakong sakripisyo. Ang gugma nga sama kang Cristo moabot bisan sa lisud higugmaon.

IKINABUHI ANG PAGTULON-AN
Kon ang gugma mapamatud-an dili lang sa pulong apan sa paghalad, andam ka ba mosakripisyo sa imong oras, kaharuhay o mga butang alang sa uban? Gitawag kita sa pagsunod sa ehemplo ni Cristo sa atong adlaw-adlaw nga pagkigrelasyon sa uban. Higugmaon usab nato ang mga tawo nga dili nato gusto. Salamat sa kamatuoran nga gitugyan ni Jesus ang Iyang kinabuhi alang kanato. Karon, gitawag Niya kita nga magkinabuhi nga puno sa maong gugma. Filipos 4:13 “Mahimo ko ang pag-atubang sa bisan unsa nga kahimtang pinaagi sa tabang ni Cristo nga nagpalig-on kanako.”

IKINABUHI ANG PAG-AMPO
Atong iampo nga masabtan nato ang gugma ni Cristo dili lang sa atong hunahuna apan sa atong pagkinabuhi gyud sa matag adlaw. Nga mohigugma kita sama sa Iyang paghigugma, ug andam mosakripisyo, dili makasarili lang ug nga tinuod bisan pa ug lisud. Colosas 3:3-4 “Kay namatay na kamo diha sa inyong daan nga kinabuhi, ug ang inyong bag-o nga kinabuhi ginatago na diha sa Dios uban ni Cristo. Si Cristo mao ang inyong kinabuhi.” #

13/03/2026

ANG PULONG SA DIOS KASALIGAN

JUAN 15:12 “Mao kini ang akong sugo kaninyo: paghigugmaay kamo sama sa akong paghigugma kaninyo.”

PAGHIGUGMAAY SUMALA SA GUGMA NI CRISTO

IKINABUHI ANG PULONG SA DIOS
Kini nga pulong gisulti ni Jesus human Siya nagtudlo mahitungod sa pagpabilin diha Kaniya (Juan 15:1-11). Human Niya ipasabot ang relasyon sa punoan sa ubas ug sa mga sanga, gipakita Niya unsay hitsura sa kinabuhi sa usa ka tinuod nga sumusunod Niya--usa ka kinabuhi nga puno sa paghigugmaay.

1. ANG GUGMA NI CRISTO SUKDANAN SA ATONG GUGMA
Wala lang moingon si Jesus nga “maghigugmaay kamo.” Iyang giingon “sama sa akong paghigugma kaninyo.” Mao kini ang labing taas nga ehemplo sa gugma. Juan 13:34 “Busa karon ihatag ko kaninyo ang usa ka bag-o nga sugo: paghigugmaay kamo. Kon unsa ang akong paghigugma kaninyo kinahanglan sama usab niana ang inyong paghigugma sa usag usa.” Roma 5:8 “apan si Cristo namatay alang kanato bisan pa ug makasasala kita. Sa ingon niini nga pamaagi gipakita sa Dios ang iyang paghigugma kanato.” Ang gugma ni Jesus mapinasakripisyo (gihatag Niya ang Iyang kinabuhi) ug walay pinili (gihigugma Niya bisan ang mga makasasala.)

2. ANG PAGHIGUGMAAY USA KA SUGO NI CRISTO
Gitawag kini ni Jesus ang “akong sugo.” Busa ang paghigugmaay dili opsyonal apan kinahanglan buhaton sa matag tumutuo. 1 Juan 3:23 “Mao kini ang iyang sugo: motuo kita sa iyang Anak nga si Jesu-Cristo, ug maghigugmaay kita sumala sa iyang sugo kanato.” Galacia 5:13 “Apan dili kamo maghunahuna nga gawa**on na kamo karon sa pagtuman sa inyong lawa**ong kinaiya. Ang angay ninyong buhaton, maghigugmaay kamo ug magtinabangay.”

3. ANG PAGHIGUGMAAY NAGPAKITA NGA KITA IYA NI CRISTO
Nagtudlo si Jesus nga ang gugma sa mga tumutuo sa usag usa, kusgan nga pagpamatuod sa kalibotan. Juan 13:35 “Kon maghigugmaay kamo, masayran sa tanan nga kamo akong mga sumusunod.“ 1 Juan 4:7 “Mga hinigugma, maghigugmaay kita kay ang gugma naggikan sa Dios. Ang nahigugma, anak sa Dios ug nakaila sa Dios.” Colosas 3:14 “Ug labaw sa tanan maghinigugmaay kamo, kay ang gugma mao ang mobugkos niining tanan, aron mahimong matahom ug hingpit ang inyong kinabuhi.”

IKINABUHI ANG PAGTULON-AN
Aniay mga pangutana sa imong kaugalingon: >Nahigugma ba ko sa uban kon maayo lang sila kanako? >Nagapasaylo ba ko sama sa pagpasaylo ni Cristo kanako? >Gipakita ba nako ang gugma pinaagi sa mga buhat o sa mga pulong lang. Kitang mga sumusunod ni Cristo kinahanglan kanunay motan-aw kang Jesus isip modelo sa paghigugma. Magpasayloay sa isig ka tumutuo, magpalig-on sa mga nangaluya, motabang sa nanginahanglan ug likayan ang libak ug kapaitan. Ang panaghiusa sa iglesia molig-on kung ang gugma ni Cristo mahimong tinuod sa atong inadlaw-adlaw nga pagkinabuhi.

IKINABUHI ANG PAG-AMPO
Kung magpabilin kita kang Cristo, ang Iyang gugma mopuno sa atong kasingkasing ug moapaw ngadto sa uban. Pasalamatan nato ang dakong gugma ni Jesus nga gihatag Niya kanato nga bisan mga makasasala pa kita, namatay si Cristo alang kanato. Pasalamatan nato ang dakong grasya sa Dios pinaagi ni Cristo. Efeso 2:8-9 “Kay tungod sa grasya sa Dios naluwas kamo pinaagi sa inyong pagtuo kang Jesu-Cristo. Kini gasa gikan sa Dios ug dili pinasikad sa inyong mga binuhatan, busa wala gayoy makapasigarbo.”

05/03/2026

ANG PULONG SA DIOS KASALIGAN

JUAN 15:11 “Kining mga butanga gisulti Ko kaninyo, aron ang Akong kalipay magpabilin diha kaninyo, ug aron ang inyong kalipay mahimong hingpit.”

SECRETO SA TINUOD UG HINGPIT NGA KALIPAY

IKINABUHI ANG PULONG SA DIOS
Sa Juan 15 si Jesus naghisgot mahitungod sa tinuod nga punoan sa ubas ug sa mga sanga. Gitawag Niya ang Iyang mga tinun-an nga magpabilin diha Kaniya, magtuman sa Iyang mga sugo, ug magpabilin sa Iyang gugma. Unya sa bersikulo 11, Iyang gipadayag ang katuyoan sa tanan Niyang gitudlo — kalipay.

1. ANG KALIPAY NAKAGAMOT SA PAGPABILIN (v.11a)
“Kining mga butanga gisulti Ko kaninyo...” Si Jesus naghis-got sa tanan Niyang gitudlo -- ang pagpabilin sa Tinuod nga punuoan (vv.1-5), ang pagtuman sa Iyang mga sugo (v.10), ug ang pagpabilin sa Iyang gugma. Ang kalipay dili bulag sa pagtuman. Kini motubo gikan sa relasyon uban kang Cristo. Salmo 16:11 “Sa Imong presensya anaa ang kahingpitan sa kalipay.” Galacia 5:22 “ Ang kalipay bunga sa Espiritu. 1 Juan 1:4 “Aron ang inyong kalipay mahimong hingpit.”

2. ANG KALIPAY GIKAN KANG CRISTO (v.11b)
“...aron ang Akong kalipay magpabilin diha kaninyo...” Paminaw sa giingon ni Cristo: “Akong kalipay.” Dili kini kalipay sa kalibotan. Kini mao ang kalipay ni Cristo mismo, ang kalipay sa pagtuman sa Amahan ug pagtuman sa Iyang mission. Bisan pa sa pag-atubang sa krus, si Jesus adunay kalipay. Hebreo-hanon 12:2 “Tungod sa kalipay nga gibutang sa atubangan Niya, giantos Niya ang krus.” Ang Cristohanong kalipay dili hinimo sa tawo. Hinoon, kini hinatag ni Cristo ug ginapamunga sa Espiritu Santo.

3. ANG KALIPAY NAHIMONG HINGPIT DIHA KANG CRISTO (v.11a)
“...ug aron ang inyong kalipay mahimong hingpit.” Si Jesus wala naghatag ug kulang nga kalipay. Iyang gihatag ang hingpit nga kalipay. Kini nagpasabot nga kini completo, naga-apaw, lig-on ug hamtong nga kalipay. Wala usab kini magpasabot nga wala nay pagsulay. Sa sunod nga kapitulo si Cristo nagsulti mahitungod sa paglutos (Juan 16:2) --apan ang kalipay nagpabilin. Roma 15:13 “Hinaut unta nga ang Dios sa paglaom magpuno kaninyo sa tanang kalipay.” Filipos 4:4 “Paglipay kamo kanunay diha sa Ginoo. Sublion ko, paglipay kamo!”

IKINABUHI ANG PAGTULON-AN
Ang kahingpitan sa kalipay moabot kon ang atong kinabuhi nahiuyon sa kabubut-on ug gugma ni Cristo. Si Jesus wala nagtawag kanato sa usa ka kinabuhi nga puro lang obligasyon nga walay kalipay. Ang Iyang tinguha mao nga ang Iyang kalipay magpuyo sa atong kasingkasing ug mag-umapaw sa atong kinabuhi. Ang Juan 15:11 nagtudlo nga ang tinuod nga kalipay nakagamot diha kang Cristo, nadawat gikang kang Cristo ug nahimong hingpit diha kang Cristo. Kining tanan mahimong tinuod lang sa kinabuhi sa tanan nga mosalig ug modawat kang Cristo Jesus nga iyang personal nga Manluluwas ug Ginoo. Binuhatan 16:31 “Tumuo ka kang Ginoong Jesus ug maluwas ka ug ang imong panimalay.”

IKINABUHI ANG PAG-AMPO
Amahan namong Dios,“Salamat sa pagpadala sa Imong Anak ug sa gasa sa tinuod nga kalipay. Pasayloa kami kon mangita kami og kalipay gawas sa pagpabilin kang Cristo. Tudloi kami nga magpabilin sa Imong gugma, magtuman uban sa malipayong kasingkasing, ug mosalig Kanimo sa tanang panahon. Hinaut nga ang kalipay ni Jesus magpuyo pag-ayo sa among sulod ug mag-umapaw sa among kinabuhi aron makita kini sa uban. Pun-a kami sa Imong Espiritu aron ang among kalipay mahimong hingpit.““Sa ngalan ni Jesus,“Amen. #

Natidasan Christian Community Church

01/05/2026

24/04/2026

17/04/2026

10/04/2026

04/04/2026

26/03/2026

19/03/2026

13/03/2026

05/03/2026

Address

Opening Hours

Website

Alerts

Shortcuts

Share

Category