02/02/2026
PEBRERO 3, 2026 – MARTES
Ikaupat nga Semana Sulod sa Tuig
San Blas, Obispo ug Martir ug San Oscar, Obispo
(Green, Red or White)
PUDYOT SA EBANGHELYO
Giayo ni Jesus ang matag usa kanila, una ang babaye nga kinsa, sulod sa napulog-duha ka tuig nanginahanglan ug tabang. Tungod sa iyang pagtoo, iyang gikab-ot ug gihikap ang kupo ni Jesus, ug diha-diha gayud naayu siya pinaagi sa gahum nga migula gikan kang Jesus – bisan lamang sa paghikap sa iyang kupo. Iyang gimantala ang iyang kasinatian ug nagpuyo uban sa pagtoo. Gibalik ni Jesus ang kinabuhi sa anak ni Jairo. Sa edad nga napulog-duha, (sa katilingban sa mga Judio, mao kining edara nga padulong na sa pagkahamtong), apan nabuhi pag-usab pinaagi sa gahum sa Pulong ni Jesus. Ang pulong ni Jesus alang kanato karon : “Walay pulos ang kahadlok. Unsay gikinahanglan mao ang pagsalig.”
ANG PAGBASA GIKAN SA IKADUHANG BASAHON NI SAMUEL (2 Sm. 18:9-10, 14, 24-25, 30 - 19:3)
Ug gikasugat ni Absalom ang mga sundalo ni David. Nagkabayo si Absalom sa iyang mula, ug nahiagi ang mula ubos sa mga dagkong sanga sa dakong tugas, ug nasangit ang iyang ulo sa tugas, samtang mipadayon pagdagan ang mula, ug nagbitay siya. May nakakita kaniya ug misulti kang Joab, “Nakita ko si Absalom nga nagbitay sa usa ka tugas.”
Miingon si Joab, “Dili kana tinuod. Pakit-on ko ikaw sa akong buhaton.” Ug unya mikuha siyag tulo ka udyong ug gitudyok niya kini sa kasingkasing ni Absalom, samtang siya buhi pa ug nagbitay sa tugas.
Ning higayona naglingkod si David tungatunga sa duha ka pultahan; ug misaka ang guwardiya sa atop sa pultahan agi sa kuta. Unya nakita niya ang usa ka tawo nga nagdagan. Ug misinggit ang guwardiya ug gibalitaan niya ang hari. Miingon ang hari, “Kon siya rang usa, may ibalita siya kanato.” Ug mihinayhinay siya pagduol.
Ug miiingon kaniya ang hari, “Talikod ug barog dinhi.” Busa mitalikod siya ug mibarog nga walay lihok. Ug unya miabot ang Sudanihanon ug miingon, “Maayong balita alang sa akong agalon nga hari! Kay giluwas ka sa GINOO niining adlawa sa tanan nga nakigbatok kanimo.” Nangutana ang hari sa Sudanihanon, “Kumusta si Absalom?” Ug ang Sudanihanon mitubag, “Mahisama unta kang Absalom ang tanang kaaway mo, Kamahalan.” Ug natandog pag-ayo ang hari. Misaka siya sa lawak ibabaw sa ganghaan, ug mihilak; ug sa iyang paghilak, miingon siya, “O Absalom, anak ko, Absalom, anak ko! Maayo pa unta nga akoy namatay. O Absalom, anak ko! Anak ko!”
Gibalitaan si Joab, “Naghilak ug nagbangotan ang hari tungod kang Absalom.” Busa nahimong kasub-anan alang sa tanang mga tawo ang kadaugan niadtong adlawa; kay nakabalita man ang mga tawo nga nagbangotan ang hari tungod sa kamatayon sa iyang anak. Ug ang mga tawo misekreto sa pagsulod sa siyudad sama sa mga tawo nga maulaw mosulod sa siyudad kon mabuntog sila sa gubat.
ANG PULONG SA GINOO.
SALAMAT SA DIOS.
SALMO RESPONSORYO
Ps. 86: 1-2, 3-4, 5-6
T. Pamati, O Ginoo, ug tubaga ako.
Ipaabong ang imong dalunggan, O Ginoo; tubaga ako kay gisakit ako ug ako kabus. Bantaye ang akong kinabuhi, kay nahigugma ako kanimo; luwasa ang imong sulugoon nga nagasalig kanimo.
T. Pamati, O Ginoo, ug tubaga ako.
Ikaw ang akong Dios; kaloy-i ako, O Ginoo, kay nagasangpit ako kanimo sa tibuok adlaw Iipaya ang kalag sa imong sulugoon, kay kanimo, O Ginoo, gibayaw ko ang akong kalag.
T. Pamati, O Ginoo, ug tubaga ako.
Kay ikaw, O Ginoo, maayo ug mapasayluon, tugob sa gugma kanilang tanan nga nagasangpit kanimo. Pamati, O Ginoo, sa akong pangamuyo, ug patalinghogi ang akong pangilaba.
T. Pamati, O Ginoo, ug tubaga ako.
ALELUYA (Mt. 8:17)
T. Aleluya.
Gihimo niya kini aron matuman ang giingon ni propeta Isaias, "Siya gayod maoy nag-ayo sa atong mga balati-an ug mga sakit."
T. Aleluya.
ANG PAGBASA GIKAN SA EBANGHELYO SUMALA NI SAN MARCOS (Marcos 5:21- 43)
Unya mibalik si Jesus pagtabok sa Lanaw ug didto may dakong panon sa katawhan nga mialirong Kaniya. Ug miabot ang usa ka pangulo sa sinagoga niadtong dapita nga ginganla’g Jairo. Sa pagkakita niya kang Jesus, mihapa siya sa iyang tiilan, ug nagpakiluoy pag-ayo nga nag-ingon, “Ang akong gamay’ng anak nga babaye nasakit ug naglisod na. Adtoa intawon siya ug hikapa aron mamaayo.”
Ug mikuyog si Jesus kaniya. Daghan kaayong mga tawo mi-uban kaniya ug tungod niini nagdasok sila libot kaniya. Dihay usa ka babaye nga gitalinug-an ug nag-antus niini sulod na sa napulog-duha ka tuig bisan pa’g gitambalan na siya sa daghang mga doktor. Nahurot na lang ang iyang salapi, apan wala gayud moarang-arang ang iyang kahimtang; migrabe na hinuon. Nakadungog siya mahitungod kang Jesus, busa misuotsuot siya sa katawhan ngadto sa luyo ni Jesus. Unya nakaingon siya sa iyang kaugalingon, “Kon mahikap ko bisan lamang ang iyang bisti, mamaayo gayod ako.”
Busa iyang gihikap ang bisti ni Jesus ug mitang-on dayon ang iyang talinugo, ug gibati niya nga naayo siya. Dihadiha gibati ni Jesus nga may gahum nga migula kaniya, busa milingi siya sa mga tawo ug nangutana, “Kinsay mihikap sa akong bisti?” Ang iyang mga tinun-an mitubag, “Nasayod ka bitaw nga ang mga tawo nagpunsisok kanimo, busa nganong nangutana kaman kon kinsay mihikap sa imong bisti? Apan nagpadayon si Jesus paglingilingi aron pagsusi kon kinsa gayod ang mihikap niya. Ang babaye nga nasayod sa nahitabo kaniya, miduol nga nagkurog sa kahadlok, ug mihapa sa tiilan ni Jesus, ug misugilon sa nahitabo. Unya miingon si Jesus kaniya, “Anak, naayo ka gumikan sa imong pagtuo. Pauli nga malinawon ug ayaw na kabalaka.”
Samtang nagsulti si Jesus niini, may mga sinugo nga miabot gikan sa balay ni Jairo ug miingon kaniya, “Patay na ang imong anak, busa nganong imo pa mang samokon ang Magtutudlo?” Wala tagda ni Jesus ang ilang gisulti kaniya; giingnan hinuon niya si Jairo, “Ayaw kahadlok; salig lang.” Unya wala siyay laing gitugotan sa pagkuyog kaniya gawas lang kang Pedro ug sa magsuon nga si Santiago ug si Juan. Pag-abot nila sa balay ni Jairo, nakita ni Jesus ang kaguliyang ug nabati niya ang kusog nga hinilakay ug pagminatay. Mipadayon siya sa balay ug miingon kanila, “Ngano bang nagkaguliyang ug naghilak man kamo? Wala mamatay ang bata; natulog lamang siya!”
Unya gipagula ni Jesus ang mga tawo, tungod kay nagbugalbugal man sila kaniya. Ug gidala niya ang amahan ug inahan sa kuwarto sa bata ug ang tulo niya ka tinun-an ngadto sa kuwarto nga gihigdaan sa bata. Ug iyang gikuptan ang kamut sa bata ug giingnan, “Talita kumi!” nga ato pa, “Inday, bangon!” Dihadiha ang bata nga nagpanuigon og napulog-duha ka tuig mibangon ug milakaw. Ug hilabihan gayud nila kahibulong sa nahitabo, apan gipinahan sila ni Jesus sa dili pagsugilon kang bisan kinsa mahitungod niini, ug siya miingon, “Pakan-a ninyo ang bata.”
ANG EBANGHELYO SA GINOO.
DAYGON IKAW, O CRISTO.
KATILINGBANONG PAG-AMPO
P: Mituo kita sa usa ka Dios nga nagbuhat ug naghatag kanato og kinabuhi. Sa tumang pagsalig atong ipadangat ngadto Kaniya ang atong mga pag-antus ug kasakitan diha sa atong pag-ingon: GINOO SA KINABUHI, DUNGGA ANG AMONG PAG-AMPO.
a. Nga ang Simbahan ilabina sa Santo Papa, Francisco, mga kaobispohan ug kaparian sa tibuok kapupud-an dinhi sa Mindanao unta sa tumang kaaghop magpadayon sa ilang ministriya sa pag-alagad sa tanang katawhan sama sa panig-ingnan ni Cristo. Mag-ampo kita sa Ginoo.
b. Nga ang mga pangulo sa atong nasud makabaton og kasingkasing sa pagkamanggihatagon ilabina sa mga nagkinahanglan natong mga kaigsuonan. Mag-ampo kita sa Ginoo.
c. Nga ang atong mga kaigsuonan nga gitahasan sa pag-atiman sa mga masakiton unta makabaton og hataas nga pagtahud alang sa kinabuhi ug sa kanunay magmadasigon sa ilang gimbuhaton pinaagi sa gugma ni Cristo. Mag-ampo kita sa Ginoo.
d. Nga ang pagtuo ug paglaum sa mga masakiton natong mga kaigsuonan unta magmalig-on diha kang Cristo nga mao ang atong Pagkabanhaw ug Kinabuhi. Mag-ampo kita sa Ginoo.
e. Nga ang matag kristohanong pamilya magpakabana sa panginahanglan sa ilang mga anak; pag-atiman ug pagmatutò kanila pinasubay sa kristohanong diwa sa paghigugma. Mag-ampo kita sa Ginoo.
P: Ginoo sa gugma ug kaluoy, patalinghugi ug dungga kami kay nasayod Ka nga utang namo Kanimo ang among kinabuhi. Diha Kanimo nagagikan ang tanang kaayohan sa among kinabuhi. Tabangi kami nga among mabuntog ang kamatayon pinaagi ni JesuCristo nga among Ginoo. Amen.
