01/06/2026
~KRUS NG DONGAN~
Makikita sa larawan ang dalawang imahen ng Banal na Krus, ang Una at ang Kasalukuyang Krus ng Dongan. Kuhang larawan sa isinagawang Maringal na Prusisyon bilang pagtatapos ng Pistang Mayo sa karangalan ng Banal na Krus at Impong Maria bilang Reyna ng Flores.
Ang imahen ng Krus (nasa kaliwa) ay unang pinipintuho at dating nasa pangangalaga ng komunidad ng Dongan, na noo'y ipinagpipista at ginagamit sa sagalahan ng ating purok na sinisimulan sa malaking simbahan na siya na ring nagiging sagalahan sa Aglipay. Dumating ang ilang taon upang magkaroon ng Krus sa Simbahan, ito ay inihandog sa Mahal na Patrona Impong Maria. Sa paglipas ng ilang dekada ang Unang Krus ng Dongan na ngayon ay nasa pag-iingat ng Parish of La Purisima Concepcion de Malabon ay ipinagpipista tuwing ikatlong Linggo sa Buwan ng Mayo.
Ang imahen ng Krus (nasa kanan) ay ang kasalukuyang Krus na binibigyang parangal ng ating komunidad, sa pagbubukas at pagtatapos ng panahon ng Pistang Dongan tayo ay natitipon sa malaking simbahan bilang pagbibigay galang sa ating Mahal na Patrona Impong Maria. Ang kapistahan ng kasalukuyang Krus ay sa tuwing ikaapat na Linggo sa Buwan ng Mayo. Ito ay upang bigyang daan ang pagdiriwang ng kapistahan ng Unang Krus na nasa Simbahang Aglipay ngayon.
Patuloy nawa tayong bigkisin ng ating pananampalataya sa kapangyarihan ng Panginoong Hesukristo sa ilalim ng bandila ng Banal na Krus na siyang simbolo ng Pag-ibig at Tagumpay laban sa kasamaan at kasalanan.
