14/08/2026
ULAT PAROKYA ||
"Pagbibigay ng Mukha at Kulay sa Facade ng Nuestra Señora del Pilar de Suba, Hindi Napigilan ng Bagyo at Malakas na Ulan"
Sa kabila ng ilang araw ng malalakas na pag-ulan dulot ng bagyo, at ng paulit-ulit na pagsususpinde ng pasok ng mga mag-aaral at ng mga manggagawa sa gobyerno at pribadong institusyon, hindi nasuspinde ang hangarin ng ating mga kamanggagawa na matapos ang pinapangarap na bagong mukha ng parokya, gayundin ang kasalukuyang ginagawang kampanaryo.
Makikita sa mga larawang kuha ni Rev. Fr. Atty. Manuel Manggao na patuloy pa rin ang paggawa sa parokya. Sa kasalukuyan ay unti-unti nang inilalagay ang mga natural stones na magbibigay ng bagong mukha at kulay sa ating simbahan.
Inaasahan na bago matapos ang taong ito, masisilayan na ng mga parokyano — lalo na ng mga kamanggagawa ng parokya — ang bunga ng kanilang sakripisyo at pagsisikap.
Patuloy din ang panawagan ng parokya sa lahat ng may mabubuting kalooban at mga deboto ng Mahal na Birheng del Pilar na makiisa sa layunin ng parokya na higit na mapaganda at makilala ang Nuestra Señora del Pilar de Suba.
Para sa mga nagnanais tumulong, bukas palagi ang tanggapan ng parokya. Maaari rin po kayong makipag-ugnayan sa pamamagitan ng pag-iwan ng mensahe sa aming official FB page.
====
Herald’s Pillar Media Ministry
Nuestra Señora del Pilar de Suba
Brgy. Suba, Majayjay, Laguna
