23/05/2026
Dalaygon ang Diyos sa malampuson ug madasigong pagtapos sa Cottage Meeting sa Pindasan SDA Church nga gipahigayon didto sa GK, San Antonio, Davao de Oro niadtong Mayo 17–22, 2026. Kini gigiyahan sa usa sa atong mga maabtikon ug madasigong caregroup members gikan sa Mt. Sinai, uban sa ilang mga lider nga sila si Bro. Mervin Talidro ug Sis. Jeanilyn Mibato.
Gisugdan ang maong kalihokan pinaagi sa pagpaambit sa nagkalain-laing mga topiko mahitungod sa pagpalambo sa kahimsog sa panglawas ug pagsangyaw sa Pulong sa Diyos. Pinaagi sa mga praktikal nga diskurso bahin sa panglawas, panag-uban, ug espirituhanong mga mensahe—uban pa ang gipahigayon nga medical mission—nadasig gayod ang mga partisipante nga makasinati og tiunay ug tibuok nga kausaban sa kinabuhi. Nalipay usab og dako ang atong mga kabataan nga nakat-on og bag-ong mga kanta ug naminaw sa nagkalain-laing mga istorya sa Bibliya.
Magpadayon kita sa pagkahimong kahayag sa uban, andam kanunay sa pagserbisyo, ug sa pagpaila sa gugma ni Kristo ngadto sa uban.
"Tungod niini, sa inyong pagpanglakaw himoa nga akong mga tinun-an ang tanang katawhan sa tibuok kalibotan. Bunyagi sila sa ngalan sa Amahan, sa Anak ug sa Espiritu Santo ug tudloi sila pagtuman sa tanan nga akong gisugo kaninyo. Ug hinumdomi! Ako mag-uban kaninyo sa kanunay hangtod sa kataposan sa kalibotan." - Mateo 28:19-20
