12/04/2023
Kaibat ning Maleldo Ginu, nanung asabi mu kekami?
Surian mu kami, O Ginu.
Ketang Maleldo, kabang gaganakan mi ing pamailasa at kamatayan mu, komusta kami?
Ketang Maleldo, karakal tau keng dalan. Anak at matua, tukian tukian do reng magdarame. Letratu keni, letratu karin.
Kareng lugal nung nu ya mabasa ing pasyun mu, mainge mu rin. Masikan mararamdam ing balang gege uli ding masikan sound system, dakal ing pamangan. Mikit-ikit la ding mikakaluguran.
Karakal dang karakal deng mekipag-estacion at mekipagprusisyun ketang Banal a Viernes.
Ngeni, komusta na kami. Pilan la kaya karing migdarame nung atin man, a sinimba king Domingo ning Pangasubling mebie.
Karakal mangailangan daya karing masakit keng hospital ninu kaya kareng migdarame ing magkusang mamie daya.
Kekaming ginege pasyun, melalam kaya ing pamangilala mi keka uling binasa at kinta mi pa ing kuentu mu. Makanian mu naman karing makiramdam at manalbe.
Ginu, e kami baligtad kanian, ngening pagmamasusian mi ing pangasubli mu mie tahimik ke ngan.
Pangasanting da ring kuentu tungkul king pangasubli mung mie, pero pilan lang sisimba at makiramdam kareti.
Ginu, itulid mu ing kasalpantayanan mi. Gawan mung makatutuanan ing pamanuki mi keka.
Kamuanan mu kami nung kailangan.
Patawaran mu kami, uling angga ngeni maralas, e mi pa balu ing gagawan mi.
Yanasa.
(From Among Cris Cadiang...)
