25/03/2020
Revised ORATIO IMPERATA
O Dios a Ibpa mi,
lalapit kami keka kaniting masipit pamangailangan mi.
Aduan mi keka ing kambilan at ingatan mu kami laban king COVID-19,
a pepasakit na at mekamate na karing dakal a tau.
Ipanalangin mi antabayanan mu la ring taung mitutukan
manintun panulu para kaniting sakit
at mampat king pangakalat na.
Kambilan at ingatan mu la ring doktor, narsis,
at ding sablang lilingap karing misalunan,
ban makasuyu karing masakit kambe ning beluan at masabal.
Ipanalangin mi la retang miyaua na.
Kumayap na la sanang malalagua.
Ingatan mu la retang lilingap karela.
Pagkalaman mu lang alang anggang kapainauan detang meangu na bie.
Pagkalam mu kekami ing grasyang mu kaniting masakit a panaun
ban magobra kami para king ikakayap ding sabla
at ban makasaup kami karetang atiu king pamangailangan.
Ipanigapu mi keka ing patuknangan mu na ing pangakalat niting virus
at ing pangakabus mi karing takut mi.
Pagkalam mu iti
king kapamilatan ning Guinu ming JesuCristong Anak mu,
a mabibie ampon magari kambe mu,
king kametungan ning Banal a Espirtu,
Dios, mangga man king alang angga.
Amen.
Lalam na pu ning kayampunan mu
magsakdal kaming magkanlung
O Kabanalbanalan a Indu ning Dios;
e mu sana pisauili ing aklis mi keka
king kagulangan mi,
nune bagkus mu kaming ikabus
king sablang panganib
O Maligaya at kanuanan a Virgen.
Virgen de los Remedios, Indu ning Kapaldanan, ipanalangin mu kami.
San Rafael Arkangel, ipanalangin mu kami.
San Roque, ipanalangin mu kami.
San Lorenzo Ruiz, ipanalangin mu kami.
San Pedro Calungsod, ipanalangin mu kami.
Source:
https://www.facebook.com/379861379736/posts/10157370592994737/
