22/04/2026
April 22, 2026
Ebanghelyo: Juan 6:35–40
Ang Kabubut-on sa Amahan
Ebanghelyo (Juan 6:35–40)
Niadtong panahona, miingon si Jesus sa katawhan:
“Ako mao ang tinapay sa kinabuhi. Ang moduol Kanako dili na gyud gutomon, ug ang motuo Kanako dili na gyud uhawon.”
Apan miingon Siya, “Bisan nakita na ninyo Ako, dili gihapon kamo motuo.”
“Ang tanan nga gihatag sa Amahan Kanako moduol Kanako, ug ang moduol Kanako dili Ko gyud palayason. Kay mianhi Ako gikan sa langit dili aron buhaton ang akong kaugalingong kabubut-on, kundi ang kabubut-on sa nagpadala Kanako.”
“Ug mao kini ang kabubut-on sa nagpadala Kanako: nga walay mawala sa tanan nga Iyang gihatag Kanako, kundi akong banhawon sila sa katapusan nga adlaw.”
“Kay mao kini ang kabubut-on sa akong Amahan: nga ang tanan nga makakita sa Anak ug motuo Kaniya makabaton og kinabuhing walay katapusan, ug akong banhawon siya sa katapusan nga adlaw.”
Pasabot / Reflection
Sa Ebanghelyo karon, gipahinumdoman ta ni Jesus nga Siya mao ang tinapay sa kinabuhi — ang makapuno sa atong kalag.
Apan mas dako pa ani, giingon Niya nga dili Niya palayason ang moduol Kaniya.
Usahay mahadlok ta moduol sa Ginoo tungod sa atong sala, kahuyang, o kapakyasan.
Pero klaro ang mensahe: ang Ginoo mudawat nato kung moduol ta Kaniya.
Ug dili lang kutob ana — gusto sa Dios nga walay mawala, nga tanan maluwas ug makabaton og kinabuhing walay katapusan.
Mga Pangutana sa Pagpamalandong
1. Aduna bay kahadlok nga nagapugong nako sa pagduol kang Jesus?
2. Nituo ba ko nga dawaton ko sa Ginoo bisan sa akong kahuyang?
3. Giunsa nako pagpakita ang akong pagtuo matag adlaw?
Pag-ampo
Ginoong Jesus, salamat kay dili Mo ako palayason bisan unsa pa ako. Tabangi ko nga moduol Kanimo ug mosalig sa Imong gugma ug kalooy. Amen.
Panghinaut
Hinaut nga karong adlawa moduol ka sa Ginoo nga walay kahadlok. Kay Siya andam kanunay modawat ug mohigugma kanimo. 🙏✨
CCTO
Copypasta
AESG
