16/05/2026
ANG BEST 10 DAYS NG TAON, PARATING NA!
الحمد لله، وبعد:
Lumipas ang dalawang buwan mula nang lumisan ang buwan ng Ramadan, at marahil ay humina nanaman ang pananampalataya ng ilan, o ng karamihan.
At ALHAMDULILLAH, kabilang sa biyaya ni Allah (Subhanahu wa taala) sa Kanyang mga alipin, ay ang pagtangi Niya ng mga panahon na dito ay pinapalakas at hinuhubog ang pananampalataya ng mga muslim. At ito nga, na paparating na ang isa sa mga panahon na ito, na ito ang UNANG SAMPUNG-ARAW NG BUWAN NG DHUL HIJJAH.
Ang Dhul Hijjah ay ang siyang huling buwan ng taon. Ibig sabihin, pagkatapos ng Dhul Hijjah ay papasok ang Muharram, na siya namang unang buwan ng taon.
At ang unang sampung-araw ng Dhul Hijjah ang siyang pinaka-maiinam na mga araw sa loob ng taon. Sinabi ni Allah (Subhanahu wa taala):
﴿وَالفَجْرِ * وَلَيَالٍ عَشْرٍ﴾ [الفجر: 1 - 2]
“Sumpa man sa (pamamagitan ng) Fajr, at sa (pamamagitan ng) sampung gabi (ng unang sampung-araw ng Dhul Hijjah).”
At ang pagsumpa na iyan, ay nangangahulugan ng kadakilaan at kainaman ng mga araw na ito.
At sinabi naman ng Rasulullah (SallAllahu alayhi wa sallam):
«أَفْضَلُ أَيَّامِ الدُنْيَا العَشْرُ.» [صحيح الترغيب والترهيب: 1150]
Ang pinakamainam na mga araw ng mundo ay ang sampo (na unang araw ng Dhul Hijjah).”
At ang kainaman na iyan ay saklaw niya ang umaga at gabi ng mga araw na ito. Maliban sa mga gabi ng huling sampung-araw ng Ramadan, sapagkat ang mga ito ay mas mainam kaysa sa mga gabi ng unang sampung-araw ng buwan ng Dhul Hijjah.
[Yundhar: Majmu’ Al-fatawa: 25/287, Sharho Azzad lish Shenqeetiy: 108/5]
Sinabi ni Ibn Hajar (Rahimahullah):
«وَالَّذِي يَظْهَرُ، أَنَّ السَّبَبَ فِي اِمْتِيَازِ عَشْرِ ذِي الْحِجَّةِ، لِمَكَانِ اِجْتِمَاعِ أُمَّهَاتِ الْعِبَادَةِ فِيهِ، وَهِيَ الصَّلَاةُ، وَالصِّيَامُ، وَالصَّدَقَةُ، وَالْحَجُّ، وَلَا يَتَأَتَّى ذَلِكَ فِي غَيْرِهِ.» [فتح الباري: 2/460]
“At ang siyang malinaw, na ang dahilan ng kainaman ng unang sampung-araw ng Dhul Hijjah, ay dahil sa pagkaipon ng mga pangunahing pagsamba dito, na ito ang Salah, ang Ayuno, ang Sadaqah, at ang Hajj, na ito ay hindi nagaganap sa iba sa kanya.”
Isinalaysay ni Ibn Abbas (RadiyAllahu anhu) na sinabi ng Rasulullah (SallAllahu alayhi wa sallam):
«مَا مِنْ أيَّامٍ العَمَلُ الصَّالِحُ فَيْهَا أَحَبُّ إِلَى اللهِ مِنْ هَذِهِ الأَيَّامِ.» -يَعْنِي أَيَّامَ العَشْرِ-، قَالُوا: يَا رَسُولَ اللهِ، وَلَا الجِهَادُ فِي سَبِيلِ اللهِ؟ قَالَ: «وَلَا الجِهَادُ فِي سَبِيلِ اللهِ، إِلَّا رَجُلٌ خَرَجَ بِنَفْسِهِ وَمَالِهِ فَلَمْ يَرْجِعْ مِنْ ذَلِكَ بِشَيْءٍ.» [صحيح أبي داود: 2107]
“Walang mga araw, na ang mabuting gawain sa mga ito ay lubos na kaibig-ibig kay Allah, maliban sa mga araw na ito (ang unang sampung-araw ng Dhul Hijjah).” Sinabi nila: O Rasulullah, maging ang Jihad para sa landas ni Allah (ay mas mainam ang mabuting gawain sa mga araw na ito)? Sinabi Niya: “Maging ang Jihad para sa landas ni Allah, maliban sa lalaking inilabas ang sarili niya at yaman niya, at hindi na nakabalik mula doon kasama ang mga ito.”
Ibig sabihin, magiging mainam at magkakaroon ng saysay para sa atin ang mga araw na ito, sa pamamagitan ng pagpuno nito ng mga pagsamba para kay Allah.
AT NARITO MGA PAGSAMBANG DAPAT ISAALANG-ALANG O BIGYAN NG HALAGA SA UNANG SAMPUNG-ARAW NG DHUL HIJJAH:
◾1. PAGSASAGAWA AT PAGPAPAHALAGA SA MGA INUBLIGA NI ALLAH. Tulad ng mga obligadong SALAH. Isagawa sa mga takdang oras, at isagawa nang mahusay. Sa mga kalalakihan ay isagawa ang mga ito sa masjid. Tulad rin ng pagsasagawa ng obligadong HAJJ para sa mga taong may kakayahang pisikal at pinansyal.
At bago natin banggitin ang ilan pang pagsamba, ay dapat nating malaman, na ang una nating bibigyan ng halaga sa mga pagsamba, ay kung ano ang inubliga saatin ni Allah (Subhanahu wa taala).
Nabanggit sa Hadeeth Kudsiy, na sinabi ni Allah:
«وَمَا تَقَرَّبَ إِلَيَّ عَبْدِي بِشَيْءٍ أَحَبَّ إِلَيَّ مِمَّا اِفْتَرَضْتُ عَلَيْهِ.» [البخاري: 6502]
“Hindi sa Akin nagpalapit ang Aking alipin ng pagsamba na mas kaibig-ibig sa Akin (ang paggawa nito), maliban sa inubliga Ko sa kanya.”
Sinabi ni Shaykh Ibn Baz (Rahimahullah):
«وَبَعْضُ النَّاسِ لِجَهْلِهِ يَجْتَهِدُ فِي النَّوَافِلِ وَيُضَيِّعُ الفَرَائِضَ، هَذَا جَهْلٌ كَبِيرٌ.» [شرح رياض الصالحين، باب المجاهدة]
“Ang ilan sa mga tao, dahil sa kamangmangan niya, ay nagsusumikap sa mga hindi obligado, at pinapabayaan ang obligado, iyan ay kamangmangan na malaki.”
At may nasabing panuntunan (Qaidah) na:
«الفَرْضُ أَفْضَلُ مِنَ النَّفْلِ.»
“Ang Obligado ay mas mainam kaysa sa Hindi obligado.”
Ang ibig sabihin, ay kung ano ang inubliga satin ni Allah ay mas mainam, at may mas malaking gantimpala kaysa sa mga bagay na hindi obligado, ito man ay Salah, o Ayuno, o Hajj, at iyan ay napagsang-ayunan.
[Yundhar: Mawsu-atol Qawaid Al-fiqhiyyah: 8/25]
◾2. PAGSASAGAWA NG MGA SUNNAH NA SALAH. Tulad ng Salato Ad-duha, Rawatib, Tahajjud, at Witr.
(Marahil ay mula nang lumisan ang Ramadan, ay marami saatin ang hindi na nakapag-tahajjud, SubhanAllah!)
◾3. PAG-AAYUNO SA MGA ARAW NA ITO. Mula sa pagpasok ng Dhul Hijjah hanggang sa ARAW NG ARAFAH (يوم عرفة), ika-9 ng buwan.
At ang pinakamahalagang mapag-ayunuhan sa mga araw na ito ay ang ARAW NG ARAFAH. Sinabi ng Rasulullah (SallAllahu alayhi wa sallam) na gantimpala nito ay:
«يُكَفِّرُ السَّنَةَ الْمَاضِيَةَ وَالْبَاقِيَةَ.» [مسلم: 1162]
“Kapatawaran sa taon na lumipas at sa taon na darating.”
At hindi maaaring mag-ayuno sa Araw ng Arafah ang mga nagsasagawa ng Hajj, at gayundin na hindi maaaring mag-ayuno sa ARAW NG EID, ika-10 ng Dhul Hijjah.
📌 USAPIN:
May nabanggit na Hadeeth ni A’esha (RadiyAllahu anha) na Kanyang sinabi:
«مَا رَأَيْتُ رَسُولَ اللهِ صَلَّى اللَّهُ عَلَيْهِ وَسَلَّمَ صَائمًا العَشْرَ قَطُّ.» [صحيح أبي داود: 2108]
“Hindi ko nakita ang Rasulullah (SallAllahu alayhi wa sallam) na nag-aayuno sa Ash’r (Sampung-araw ng Dhul Hijjah) kailanman.”
Iyan ay sinagot ng mga Ulama nang tulad ng mga sumusunod:
UNA: Ang Hadeeth ni Ibn Abbas na naturan sa itaas na tumutukoy sa pagpaparami ng mabuting gawain sa unang sampung-araw ng Dhul Hijjah, ay hadeeth na nag-uulat sa SALITA ng Rasulullah (SallAllahu alayhi wa sallam), at ang Hadeeth ni A’esha ay hadeeth na nag-uulat sa KILOS ng Rasulullah (SallAllahu alayhi wa sallam), at kapag nagkasalungat ang salita at kilos, ay uunahin ang salita. Sapagkat ang kilos ay maaaring natatangi lamang sa Rasulullah (SallAllahu alayhi wa sallam).
[Yundhar: Tafreeg Ashreetah Mutafarriqah lish Shaykh Al-albaniy (Bish Shamelah): 57/9]
PANGALAWA: Maaaring kung bakit hindi ito isinasagawa ng Rasulullah (SallAllahu alayhi wa sallam) ay dahil sa pangamba Niya na baka maging obligado ito.
[Yundhar: Fat-hol Bariy: 2/460]
PANGATLO: Hindi dahil hindi nakita ni A’esha, ay patunay na ito na hindi nag-aayuno ang Rasulullah (SallAllahu alayhi wa sallam) sa mga araw na ito, dahil ang pamamalagi ng Rasulullah (SallAllahu alayhi wa sallam) kay A’esha ay isang araw lamang sa loob ng siyam na araw, at ang ibang araw ng Rasulullah (SallAllahu alayhi wa sallam) ay sa Kanyang ibang asawa. O kaya naman ay maaaring pinag-aayunuhan ng Rasulullah (SallAllahu alayhi wa sallam) ang ilan lamang dito sa ibang panahon, at pinag-aayunuhan ang lahat ng ito sa ibang panahon.
[Yundhar: Al-majmo’ lin Nawawiy: 6/387 - 388]
PANG-APAT: Ayon sa naturang Hadeeth ni Ibn Abbas, ay kaibig-ibig kay Allah ang mga mabuting gawain sa mga araw na ito, at ang pag-aayuno ay walang duda na kabilang ito sa mga mabubuting gawain.
[Yundhar: Naylol Awtar: 4/283]
◾4. PAGBABASA NG QUR’AN. At sa may buwanang-bisita ay maaari parin namang magbasa ng Qur’an, subalit hindi niya maaaring hawakan ang Mus-haf ng direktahan. Ibig sabihin ay kailangang may mamagitan sa kanyang kamay at ng Mus-haf na anumang bagay, tulad ng guwantes, o tela. O kaya naman ay magbasa na lamang sa cellphone.
◾5. PAG-TAKBEER (Pagsabi ng: Allahu Akbar Allahu Akbar, La ilaha illAllahu Allahu Akbar, Allahu Akbar wa lillahil hamd). At iyan ay may dalawang klase:
UNANG KLASE: MUTLAQ: Ito ang pag-takbeer ng walang natatanging oras. Mula sa pagpasok ng Dhul Hijjah, hanggang sa bago ang Magrib ng huling araw ng MGA ARAW NG TASHREEQ (أيام التشريق). Mag-takbeer habang naglalakad, o nasa sasakyan, o nasa opisina, o nasa palengke, atbp. Siyempre, maliban sa lugar na hindi maaaring isambit ang mga Adhkar, tulad sa mga palikuran.
(Ang Mga araw ng Tashreeq ay sa ika-11, ika-12, at ika-13 ng Dhul Hijjah.)
IKALAWANG KLASE: MUQAYYAD: Ito ang pag-takbeer sa mga natatanging oras. Na ito ay tuwing matatapos ang obligadong Salah, mula sa FAJR ng Araw ng Arafah hanggang sa ASR ng huling araw ng Mga araw ng Tashreeq. At sasabihin ito matapos ang pagsabi ng “Allahumma antassalam, wa minkassalam, tabarakta ya dhal jalal wal ikram”. O kaya naman ay matapos nang ganap ang mga Adhkar. At sa mga araw na ito ay tuloy parin ang MUTLAQ.
◾6. PAGSASAGAWA NG UD’HIYAH. At iyan ay maaaring isagawa mula sa Araw ng Eid, matapos ang Salatol Eid, hanggang bago ang Magrib ng huling araw ng Mga araw ng Tashreeq. At in sha Allah ay atin itong talakayin ng tangi sa ibang Post.
◾7. PAGPAPARAMI NG ADHKAR. Tulad ng pagsabi ng “La ilaha illAllah”, Astagfirullah”, “Alhamdulillah”, “Allahu Akbar”, atbp.
◾8. PAGSASADAQAH. At ang pinaka-mainam na patutunguan nito ay ang pamilya, matapos ay ang mga kamag-anak, mas malapit sa iyo ay mas mainam, kung ang mga ito ay nangangailangan.
◾9. DUAH. Lalo na sa nabanggit na mga oras na ito ay katanggap-tanggap, tulad sa gabi, kahit anong oras sa gabi. Bago pumasok ang Fajr, o huling bahagi ng gabi. Sa mga sujud, at hindi lamang sa huling sujud, kahit saang banda. Bago mag-salam sa Salah. Sa pagitan ng Adhan at Iqamah. At matapos ang Asr sa araw ng Jumuah hanggang sa paglubog ng araw.
◾10. At anumang gawaing mabuti, tulad ng mas pagpapabuti sa pakikitungo sa mga magulang at sa mga kamag-anak, o tulad ng pagsasalik ng kaalaman, o tulad ng pagiging mas mabuting kapit-bahay, atbp.
◾11. Ituro at isama ang pamilya sa mga ganitong gawain. Sinabi ng Rasulullah (SallAllahu alayhi wa sallam):
«مَنْ دَلَّ عَلَى خَيْرٍ فَلَهُ مِثْلُ أَجْرِ فَاعِلِهِ.» [مسلم: 1893]
“Sinuman ang magturo ng kabutihan, ay mayroon siyang tulad ng gantimpala ng nagsagawa nito.”
والله أعلم.
✍️:Shaykh. Amer M. Pundogar (Hafidhahullah)
