06/08/2026
NOBENA PERPETUA SA SR. SANTO NINO JESUS SA SUGBO
(Matag Biyernes)
MAG-AMPO KITA
O Señor Santo Niño, * Ikaw ang akong hari ug ang akong Dios, * nagasimba ako Kanimo; * Ikaw ang akong malig-on nga Manlalaban. Nagapalaban ako Kanimo, * Ikaw ang Patron sa Sugbu, * nagadangop ako Kanimo; Ikaw nga nagbuhat * sa daghang mga katingalahan * pinaagi sa Imong Larawan nga milagroso * dinhi niining mga kapupud-an, * hinumduman Mo ako * ug sud-onga * kining kabus nga kalag * nga nagadangop Kanimo aron Imong tabangan.
Agaka ako sa Imong Kinaadman, * tudlo-i ako pinaagi sa Imong Kamatuoran, * lipaya ako sa Imong kalumo, * panalipdi ako sa Imong Gahum.
Nagahalad ako karong adlawa * sa akong mga hunahuna ngadto Kanimo, * diha lamang kanimo * ako silang itumung; * sa akong mga pulung, * mahitungud lamang Kanimo * sila maghisgut; * sa akong mga kasakit * aron ako makaantus nila * tungod lamang kanimo.
Nangamuyo ako Kanimo, * Señor Santo Niño, * hayagi ang akong salabutan, * inita ang akong kabubut-on, * linisa ang akong lawas, * santosa ang akong kalag. * Buut ako sa tanan nga pagbut-an Mo, * tungud kay maoy Imong pagbuut, * subay sa Imong Pagbuut, * kutub sa gidugayon nga Ikaw magbuut.
Itugut, Señor Santo Niño, * nga ako magbaton * sa gugma alang Kanimo, * nga dili ako magpatuyang sa akong kaugalingon, * nga magmadasigon ako * alang sa kaayohan sa akong isigkatawo, * nga magtamay ako ingon sa angay * sa mga butang sa kalibutan. * Tabangi ako pagbuntog * sa akong kailibgon * pinaagi sa mabinantayon nga kaligdong, * pagdaog sa kahakog * pinaagi sa kamanggihatagon, * pagwagtang sa kasuko * pinaagi sa kaaghop, * pagbiya sa kataspok * pinaagi sa madasigong kakugi. * Himoa ako nga makinaadmanon dinha sa pagpanghukum, * isug dinha sa katalagman, * mapailubon dinha sa pagsulay, * mapaubsanon dinha sa maayong kapalaran.
Tudlo-I ako, hinigugmang Santo Niño, * sa kawaybili sa kalibutan, * sa kahamili sa langit, * sa kamubo sa panahon, * sa katas gayud sa eternidad. * Ihatag kanako, sa katapusan, * nga ako dili unta mahikalimut Kanimo, * nga ako magsimba Kanimo, maghigugma Kanimo, * ug mag-alagad Kanimo * dinhi sa yuta * aron ako magmalipayon uban Kanimo * hangtud sa wala nay pagkatapus * didto sa langit.
Amen.
Amahan Namo, Maghimaya ka Maria, Himaya sa Amahan…
(Sa makatulo aron pagpasidungog sa Señor Santo Niño sa Sugbu.
Dinhi pangayoa sa Santo Niño ang grasya nga buut mo kab-uton pinaagi niining nobena.)
SANTO NIÑO, TABANGI AKO
Ginoo, malooy ka.
Kristo, malooy ka.
Ginoo, malooy ka.
Jesus, pamati-a kami.
Jesus, patalinghugi kami.
Sa tanang mga kinahanglan, nga moduul ako Kanimo uban sa mapaubsanong pagsalig.
O Santo Niño, tabangi ako.
Sa tanan kong duhaduha, mga kalibog ug mga panulay,
O Santo Niño, tabangi ako.
Sa takna sa kamingaw, kalaay ug mga pagsulay,
O Santo Niño, tabangi ako.
Sa kapakyas sa akong mga laraw ug mga gilauman,
O Santo Niño, tabangi ako.
Sa mga kaparot, mga kasamok ug mga kasubo,
O Santo Niño, tabangi ako.
Kon ang tanan mobiya kanako, u gang Imo lamang grasya maoy magatabang kanako,
O Santo Niño, tabangi ako.
Diha nga magtugyan ako sa akong kaugalingon ngadto sa Imong Malumo nga gugma ingon ug akong bugtong Dalangpanan,
O Santo Niño, tabangi ako.
Diha nga ang akong kasingkasing malumsan sa mga kapakyas,
O Santo Niño, tabangi ako.
Kon ako masakit, u gang akong ulo ug mga mga kamut dili na makabuhat, ug ako mag-inusara,
O Santo Niño, tabangi ako.
Kon bati-on ako sa kasuko, u gang akong krus makapapungot nako,
O Santo Niño, tabangi ako.
Sa kanunay, ug sa walay hunung, bisan pa sa akong mga kahuyang, mga paghisukamud ug sa tanankong kaalaut,
O Santo Niño, tabangi ako.
Kordero sa Dios nga nagwagtang sa mga sala sa kalibutan,
Pasaylo-a kami, Jesus.
Kordero sa Dios nga nagwagtang sa mga sala sa kalibutan,
Patalinghugi kami, Jesus.
Kordero sa Dios nga nagwagtang sa mga sala sa kalibutan,
Kaloy-an mo kami, Jesus.
Jesus, pamati-a kami.
Jesus, patalinghugi kami.
MAG-AMPO KITA
O Señor Santo Niño, nga nag-ingon Ka: "Pangayo, ug makadawat kamo, pagtuktuk ug ablihan kamo," nangamuyo kami Kanimo, itugot kanamo nga nangayo, ang hatag sa Imong dyosnong gugma, aron kami maghigugma kanimo sa bug-os namong kasingkasing, dinha sa pulong ug sa buhat, ug nga dili gayud kami mohunong sa pagdayeg Kanimo. Himoa, O Ginoo, nga kami magbaton kanunay sa kahadlok ug sa gugma sa Imong Santos nga Ngalan, kay dili man gayud Ikaw mobiya sa pag-amuma kanila nga Imong gilig-on pagpabarug dinha sa Imong gugma; pinaagi ni Jesucristo nga among Ginoo. AMEN. (Indulgensya nga 7 ka tuig. No. 114)
KATAPUSANG PAG-AMPO
O milagroso nga Santo Niño! Nagaluhod kami atubangan sa Imong Santos nga Larawan, ug nangamuyo kami Kanimo nga tan-awon Mo nga maloloy-on ang among masulob-ong mga kasingkasing. Himoa nga ang among mga pag-ampo makatandog unta sa Imong malumo nga gugma, sanglit madali siya sa pagkalooy, ug ihatag kanamo kanang grasya nga among gipakiluoy Kanimo sa tumang kadasig Kuhaa diri kanamo ang tanang kagul-anan ug kakulang sa paglaum. Tungod sa Santos Mo nga Pagkabata pamati-a ang among mga pag-ampo ug ipadala kanamo ang kalipay ug hinabang aron kami magdayeg Kanimo," uban sa Amahan ug sa Espiritu Santo, sa walay pagkatapus. Amen.
