18/07/2026
𝗔𝗡 𝗠𝗚𝗔 𝗣𝗔𝗥𝗔𝗕𝗢𝗟𝗔 𝗞𝗔𝗡 𝗞𝗔𝗛𝗔𝗗𝗘𝗔𝗡
𝘎𝘪𝘺𝘢 𝘴𝘢 𝘗𝘳𝘢𝘺𝘦𝘳-𝘔𝘦𝘦𝘵𝘪𝘯𝘨 𝘯𝘪𝘯 𝘮𝘨𝘢 𝘚𝘢𝘳𝘢𝘥𝘪𝘵 𝘯𝘢 𝘒𝘰𝘮𝘶𝘯𝘪𝘥𝘢𝘥 𝘯𝘪𝘯 𝘗𝘢𝘨𝘵𝘶𝘣𝘰𝘥 (𝘚𝘈𝘒𝘖𝘗) 𝘱𝘢𝘳𝘢 𝘴𝘢 𝘴𝘦𝘮𝘢𝘯𝘢 𝘬𝘢𝘯 𝘑𝘶𝘭𝘪𝘰 19-25, 2026. 𝘉𝘢𝘴𝘢𝘩𝘰𝘯 𝘢𝘯 𝘌𝘷𝘢𝘯𝘨𝘦𝘭𝘪𝘰 𝘨𝘪𝘬𝘢𝘯 𝘴𝘢 𝘔𝘢𝘵𝘦𝘰 13,24-43 (𝘐𝘬𝘢-16 𝘋𝘰𝘮𝘪𝘯𝘨𝘰 𝘴𝘢 𝘖𝘳𝘥𝘪𝘯𝘢𝘳𝘪𝘰𝘯𝘨 𝘗𝘢𝘯𝘢𝘩𝘰𝘯 - 𝘈).
…
Sa Evangelio, nag-istorya si Jesús nin tolóng parábola sa katawohan: an mga paroy nin trigo asín mga awot (ináapód man na maróy-paróy o opí-opí), an pisóg nin mustasa, asín an levadura. Pinaliwanag Niyá an enot na parábola saná, alagad iníng toló parareho dapít sa Kahadean nin langit.
Anó an pinapahayag kan mga iní na “mga natatagò poón tugdasón an kinâban?”
𝗔𝗻 𝗞𝗮𝗵𝗮𝗱𝗲𝗮𝗻 𝗼𝗿𝗼𝗴 𝗸𝗮𝗱𝗮𝗸𝘂𝗹𝗮 𝗮𝗹𝗮𝗴𝗮𝗱 𝗺𝗮𝗸𝘂𝗸𝘂𝗮 𝘀𝗮 𝗸𝗮𝘀𝗮𝗿𝗮𝗱𝗮𝘆𝗮𝗻.
Ginamit ni Jesús an mga imahe nin mga banhî, pisóg, asín levadura – mga saradít na bagay na minatalubò asín minadakulà – bilang kabaíng kan Kahadean. Siring man an Akì kan Diós na oróg kadakulà pinilì na mamundag sa kadukhaán asín kapakumbabaan.
Iní saróng mensahe sa kinâban na nae-engaño sa kapangyarihan asín kayamanan, asín napapasipara an mga kasaradayán. Patanid man iní sa mga nag-aabuso nin saindang kapangyarihan asín nagdudulot nin pagsakit sa kasaradayán. An Kagurangnan danay na yaon sainda – sa mga dukhâ, nagtitíos, asín ináapí. Si Jesús nagtukdô sa Mateo 25,40: “An anoman na ginibo nindo sa sarô kan pinakasadít Kong mga tugang, ginibo nindo iyán Sakô!”
𝗔𝗻 𝗸𝗮𝗿𝗮𝘁𝗮𝗻 𝗻𝗮𝗻𝗴𝘆𝗮𝘆𝗮𝗿𝗶 𝘀𝗮 𝗸𝗶𝗻𝗮𝗯𝗮𝗻 𝗮𝗹𝗮𝗴𝗮𝗱 𝗮𝗻 𝗸𝗮𝗿𝗮𝗵𝗮𝘆𝗮𝗻 𝗮𝗻 𝗺𝗮𝗻𝗴𝗴𝗮𝗴𝗮𝗻𝗮 𝘀𝗮 𝗞𝗮𝗵𝗮𝗱𝗲𝗮𝗻.
An tradisyon na Cristiano daí nagtútubód sa concepto nin balanse nin marhay asín maraot, “yin-yang,” liwanag asín diklom sa kinâban man o sa enterong universo. Kundî nagtútubód kita sa karahayan na yaon na sa kapinônan asin manggagana sa katapusan. Sa istorya nin paglaláng, sinabi sa Genesis 1,31: “Náhiling nin Diós na an gabós Niyáng ginibo marahay.”
An kasâlan asin karâtan luminaóg sa kinâban nin huli sa demonio, asín hanggang ngonian pad***s pang nanlalansé asin nagrarayô sa mga tawo sa Diós. Patín an satóng mga marhay na intención asin pangarap sa buhay pwedeng laogán nin tentación. May kasabihán bagá: “The road to hell is paved with good intentions.”
Tanganing tataó kitáng magpilì kan totóo, tamà, asín marhay, kaipuhan an duwáng bagay: magsunód kitá sa satóng conciencia asin pataluboon ta iní nin tamà sa paagi nin maimbod na pagpamìbì asín pagsabuhay kan Saiyang kabôtan, sa giya kan Saiyang Tataramon asín mga katukdoán kan Simbahan.
𝗔𝗻 𝗞𝗮𝗵𝗮𝗱𝗲𝗮𝗻 𝘁𝗶𝗻𝗮𝘁𝗮𝗼 𝘀𝗮 𝗴𝗮𝗯𝗼𝘀 𝗮𝗹𝗮𝗴𝗮𝗱 𝗺𝗮𝘆 𝗸𝗮𝘁𝗮𝗽𝘂𝘀𝗮𝗻 𝗮𝗻 𝗽𝗮𝗴𝘁𝗮𝗻𝗴𝗿𝗼.
May paghukóm na nagháhalát sa mga daí kainí nag-akò. An oróg kamuwaray na gracia nin Diós, an buhay na daíng kasagkoran, an pagkámoot na daí maladóp kan isip nin tawo, igwa man nin limitasyon: an pagpipilì nin tawo. Nin huli ta an kaligtasan daí man makúkuá kan habô magpaligtas.
Sabi ni Jesús sa Mateo 13,41-42: “Susugoon kan Akì nin Tawo an Saiyang mga angeles, halè sa Saiyang Kahadean titiponon ninda an gabós na dahilán nin pagkakasalà saká an mga paragibo nin kasombikalan, asin isasàpog sinda sa nag-aagabaab na horno; dumán an pagtangis asín pagragot nin mga ngipon.” Pagkatapos kan buhay ta digdi sa dagâ asín sa Ikaduwáng Pagdatóng, igwang paghukóm, asín kun an makukua ta kaligtasan o padusa, depende sa kun pinilì ta o daí an dalan kan Kahadean sa satóng buhay.
“An igwang talinga, magdangóg.” An may tamang conciencia maglakáw sa Saiyang dalan.
…
𝗚𝗜𝗬𝗔 𝗦𝗔 𝗣𝗔𝗚𝗛𝗜𝗥𝗔𝗦 | Maghirás nin experiencia nin pag-agi sa tentación asín kun pàno ka nagiyahan kan saimong conciencia. | 𝗚𝗜𝗬𝗔 𝗦𝗔 𝗣𝗔𝗚𝗛𝗜𝗥𝗢 | Bilang saróng komunidad/pamilya anóng mga saradít na aktibidad o inisyatiba an pwede nindong poonán tanganing d***s na magtalubò sa buhay pagtubód.
𝗣𝗔𝗦𝗨𝗡𝗢𝗗-𝗦𝗨𝗡𝗢𝗗 𝗞𝗔𝗡 𝗪𝗘𝗘𝗞𝗟𝗬 𝗦𝗔𝗞𝗢𝗣/𝗙𝗔𝗠𝗜𝗟𝗬 𝗣𝗥𝗔𝗬𝗘𝗥-𝗠𝗘𝗘𝗧𝗜𝗡𝗚 | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song.
