12/04/2026
𝗔𝗡 𝗗𝗜𝗢𝗦𝗡𝗢𝗡 𝗡𝗔 𝗣𝗔𝗚𝗞𝗔𝗛𝗘𝗥𝗔𝗞
𝘎𝘪𝘺𝘢 𝘴𝘢 𝘗𝘳𝘢𝘺𝘦𝘳-𝘔𝘦𝘦𝘵𝘪𝘯𝘨 𝘯𝘪𝘯 𝘮𝘨𝘢 𝘚𝘢𝘳𝘢𝘥𝘪𝘵 𝘯𝘢 𝘒𝘰𝘮𝘶𝘯𝘪𝘥𝘢𝘥 𝘯𝘪𝘯 𝘗𝘢𝘨𝘵𝘶𝘣𝘰𝘥 (𝘚𝘈𝘒𝘖𝘗) 𝘱𝘢𝘳𝘢 𝘴𝘢 𝘚𝘦𝘮𝘢𝘯𝘢 𝘬𝘢𝘯 𝘈𝘣𝘳𝘪𝘭 12-18, 2026. 𝘉𝘢𝘴𝘢𝘩𝘰𝘯 𝘢𝘯 𝘌𝘷𝘢𝘯𝘨𝘦𝘭𝘪𝘰 𝘨𝘪𝘬𝘢𝘯 𝘴𝘢 𝘑𝘶𝘢𝘯 20,19-31 (𝘐𝘬𝘢𝘥𝘶𝘸𝘢𝘯𝘨 𝘋𝘰𝘮𝘪𝘯𝘨𝘰 𝘴𝘢 𝘖𝘤𝘵𝘢𝘷𝘢 𝘬𝘢𝘯 𝘗𝘢𝘴𝘬𝘰 𝘬𝘢𝘯 𝘗𝘢𝘨𝘬𝘢𝘣𝘶𝘩𝘢𝘺-𝘓𝘪𝘸𝘢𝘵).
…
Kan taon 2000, binoót ni Papa San Juán Paolo II, na an Ikaduwáng Domingo sa Octava kan Pasko kan Pagkabuhay-Liwát icelebrar man bilang Domingo kan Diósnon na Pagkaherak. Duwá an pangapodan kainíng celebracion. Enot na danay kitáng maghagad nin asín magsarig sa pagkaherak nin Diós. Ikaduwá, na kitáng naherakan, magín maheherakón man sa satóng kapwa.
Ngonian na taón, kaipohan na iparomdom nanggad an mensahe nin pagkaherak. An gyera sa Irán asín an krisis sa bilog na kinâban nangyayari huli ta an mga makapangyarihan na pamayó asin mga tagasuporta ninda lulóng sa poder asín daíng herak sa kapwa.
Sa istorya sa Evangelio nagtatagò an mga disipulos huli sa takot sa mga autoridad asín sa mga kapwa ninda Judío. Nangyari iní sa banggi kan enot na aldaw kan semana asín sa banggi giraray kan suminunód na semana. Sa parehong okasyon, nagpahilíng sainda an satóng Kagurangnan Jesu Cristo na nabuhay-liwát.
An enot na aldaw kan semana iyó an nagin bâgong Aldaw kan Kagurangnán (Dies Domini sa Latín, Domingo sa Español) para sa mga disipulos, nin huli ta sa enot na aldaw nabuhay-liwát si Jesús. Kayâ embes na Sabado, Domingo na an Banál na Aldaw para sa mga Cristiano.
Alagad sa enot na aldaw na idto, takot asín pagkapurisaw an namatean kan mga disipulos. Pinarà ni Jesús an mga iní kan nagpahilíng Siyá sainda asín tinaó an Saiyang katoninongan.
An saradong haróng nagin taguán asín ligtas na lugar para sa mga disipulos, alagad nagi man ninda iníng kulungan kun saén an takot asín kapurisawan mas lalò pang nagdakulà asín nagkusóg.
Kitá man may mga siring na saradong haróng sa satóng buhay. Iní an mga ináapód tang “comfort zones” kun saén kitá ligtas asín harayô sa peligro, alagad nagpupugol satô na magin matalingkas, magtalubò, asín magbunga. Kun palaogón ta si Jesús sa satóng buhay, malagbas man Siyá sa satóng mga saradong pusò asín mapatalingkas sa satóng nalilibongan na isip asín nanluluyang boót.
Kan enot na magpahilíng sa Jesús sa saiyang mga disipulos, igwang daí nakasabáy: si Sto. Tomás. Kayâ daí siyá tulos nagtubód sa ibinaretà kan mga pag-iriba niyá. Sa ikaduwáng pagpahilíng, dinolok siyá ni Jesús asín kinahuron, dangan nasambit niyá an magayonon na kapahayagan nin pagtubód: “Kagurangnan ko asín Diós ko!” (Juán 20,28).
Kitá man pinapagiromdóm kan satóng pagmangno sa mga daí ta kaiba, sa mga nasa laylayan kan sociedád, asín sa mga nawawarà sa tamang dalan.
Sa halîpot na pagsabi, pinapahayag kainíng istorya an marhay na baretà kan Diósnon na Pagkaherak. Anó an pagkaherak? Iní an virtúd nin pangataman sa lambang sarô: an pagmakulóg sa kapwa, pagpatawad sa nagkasalà, asín pagtabang sa nangangaipo.
Sa Hebreo sa Lumang Tipan, hesed an pinakagamitón na tataramon dapít sa pagkaherak, asín iní minatukoy sa pagkamaimbód asín pagkamapatinawad nin Diós maski pirming nagkakasalà an Saiyang Piniling Banwaan.
Sa Griego sa Bâgong Tipan, eleos an pinakagamitón na tataramon kainí, asín oróg na nahihilíng iní sa kaligtasan na dará ni Cristo. Sabi sa Efeso 2, 4-5: “Nagsusùpay an pagkaherak nin Diós, asín dakulà an Saiyang pagkamoot satô, kayâ maski kan gadán pa kitá huli sa kasombikalan, binuhay Niyá liwát kitá kaiba ni Cristo.”
Mamîbî kitá na maghadè na an Diósnon na Pagkaherak sa pusò nin lambang sarô sa kinâban asín kitá man magin agihan nin pagkaherak para sa kapwang nangangaipo.
…
𝗚𝗜𝗬𝗔 𝗦𝗔 𝗣𝗔𝗚𝗛𝗜𝗥𝗔𝗦 | Maghirás kun pâno nagin maheherakón saimo an Kagurangnan, o kan iká natâwan nin oportunidad na magín maheherakón man sa kapwa. | 𝗚𝗜𝗬𝗔 𝗦𝗔 𝗣𝗔𝗚𝗛𝗜𝗥𝗢 | Anó an pwede nindong magibo bilang komunidad/pamilya sa pagpamatè kan Diósnon na Pagkaherak sa kapwang nangangaipo huli kainíng krisis?
𝗣𝗔𝗦𝗨𝗡𝗢𝗗-𝗦𝗨𝗡𝗢𝗗 𝗞𝗔𝗡 𝗪𝗘𝗘𝗞𝗟𝗬 𝗦𝗔𝗞𝗢𝗣/𝗙𝗔𝗠𝗜𝗟𝗬 𝗣𝗥𝗔𝗬𝗘𝗥-𝗠𝗘𝗘𝗧𝗜𝗡𝗚 | Kumustahan / Pamiridbidan • Disposition to Prayer / Silence • Gathering Song • Opening Prayer • Bible Reading • Reflection Preaching • Small Group Sharing • Prayers of the People • Call to Action • Closing Prayer (Spontaneous and Our Father) • Closing Song
