What are the opening hours?

Saturday 8am - 5pm Sunday 8am - 5pm

https://www.facebook.com/566964533173955/

Soccom Kami, Our Lady of the Sacred Heart Parish, Marigondon, Lapu-Lapu City (2026)

Q: What is the address?

Our Lady Of The Sacred Heart Parish, Marigondon

27/05/2026

MIYERKULES SA IKAWALO NGA SEMANA SULOD SA TUIG | SAN AGUSTIN SA CANTERBURY, Obispo

GOSPEL: Mk. 10:32-45
Sa paglakaw sa mga tinun-an ug ni Hesus paingon sa Jerusalem, nahingawa ang mga tinun-an ug nangahadlok ang mga tawo nga nagsunod kanila. Miingon si Hesus kanila nga naabot na ang panahon nga itugyan Siya ngadto sa kadagkoan sa mga pari ug sa mga magtutudlo sa Balaod, diin hukman Siya sa kamatayon, bugal-bugalan, lud-an, latuson, ug patyon. Apan mabanhaw Siya sa ikatulo ka adlaw. Ang magsuon nga sila si Santiago ug si Juan, nga mga anak ni Sebedeo, miduol kang Hesus ug adunay hangyo. Miingon sila nga kon molingkod na si Hesus sa Iyang trono, palingkuron ang usa kanila sa tuo ug ang usa sa wala. Nangutana si Hesus kung makainom ba sila sa kopa nga Iyang imnon ug kung makapabunyag ba sila sa paagi nga Siya bunyagan. Mitando sila Kaniya ug mi-oo si Hesus. Apan miingon Siya nga wala Siya'y katungod sa pagpili kung si kinsa ang makalingkod sa Iyang tuo ug sa Iyang wala. Ang Dios lamang ang mohatag niining mga dapita ngadto sa mga gitagan-an niini. Nangasuko ang napulo ka mga tinun-an sa duha ka magsuon. Ug gipaduol sila ni Hesus ug miingon kanilang tanan nga nasayod sila nga ang mga punoan sa mga tawo naghari kanila, ug ang mga pangulo nagmando kanila, apan dili kini mao ang paagi nga angayan sundon sa Iyang mga tinun-an. Kon usa kanila gustong mahimong dakong tawo, kinahanglan nga mag-alagad iya sa tanan. Ug ang buot mahimong labaw sa tanan, kinahanglan nga magpaulipon sa tanan. Kay bisan gani ang Anak sa Tawo mianhi sa kalibutan dili aron alagaran, kondili sa pag-alagad ug paghatag sa Iyang kinabuhi aron pagtubos sa daghang mga tawo.

Ang Ginoong Hesukristo dili buot nga magpakagarbo kita ug motan-aw sa atong kaugalingon nga mas dako ug mas labaw kaysa uban. Kasagaran sa atong mga lideres niining kalibutana (sa trabaho, sa eskwela, sa simbahan, sa ministry, ug uban pa) naanad na nga maghari ug magmando sa ilang nasakupan. Sila ang alagaran ug angay nga i-focus sa mga events. Apan dili kini ang gusto sa Ginoo nga sundon. Ingon pa Niya, "kon usa kaninyo buot madakong tawo, kinahanglan nga mag-alagad siya sa tanan; ug ang buot nga mahimong labaw sa tanan, kinahanglan nga siya magpaulipon sa tanan." (Mk. 10:43-44) Hmmm, so kung kita diay ang lider o kung ganahan ta nga labaw ta sa uban, kinahanglan nga kita ang labing mopaubos ug mag-alagad sa tanan. Dili diay buot sa Ginoo nga magpataas kita sa atong kaugalingon, matawag kini nga "pride." Oo, naay pride ang matag-usa pero mao sad kini ang modala nato sa kagub-anan. (Proverbs 16:18) Ang pag-alagad sa uban, sa mga mata sa Ginoo dili ubos nga buluhaton kondili mao ang taas na hinuon. Ang pagpaubos sa kaugalingon, dili weakness kondili meekness o kaaghop. Nganong kinahanglan man ta nga magpaubos ug moalagad sa uban? Kay ang Ginoo miari sa kalibutan aron sa pag-alagad ug sa pagluwas. (Mk. 10:45) Dili aron maoy alagaran. Mga igsuon, usa kini ka hagit alang kanato nga buot mosunod sa mga lakang sa Ginoo. Dili unta pareha sa magsuon nga mga tinun-an ang atong panghuna-huna: nga misunod sa Ginoo apan adunay tinago nga tinguha. Dili tan-awon ang atong kaugalingon nga angayan molingkod sa bisan asa nga dapit sa Ginoo: sa Iyang tuo o sa Iyang wala.

Nan, andam ba kitang moalagad sa uban? Aduna ba kitay gitaguan nga mga tinguha sa pagsunod sa Ginoo?

26/05/2026

MARTES SA IKAWALO NGA SEMANA SULOD SA TUIG | SAN FELIPE NERI, Pari

GOSPEL: Mk. 10:28-31
Si Pedro miingon kang Hesus nga gibiyaan nila ang tanan ug misunod sila Kaniya. Ug si Hesus nasayod niini. Miingon si Hesus nga kung si kinsa ang mibiya sa iyang panimalay, o igsuon, o ginikanan, o mga anak, o mga uma alang sa Maayong Balita, makadawat ug ginatos niining ilang gipamiya bisan pa man ug lutuson siya. Ug sa umaabot nga kalibutan, makadawat siya sa kinabuhing dayon. Apan daghan ang nahiuna nga maulahi, ug ang naulahi nga mahiuna.

Ang pagsunod sa Ginoo nanginahanglan nga atong biyaan ang atong karaang mga paagi sa pagkinabuhi. Ang usa ka pari o madre biyaan ang tanan aron sa pag-alagad sa Ginoo. Ang mga servers, mo-sakripisyo sa ilang panahon uban ang pamilya aron sa pag-serbisyo sa Simbahan. Ang mga tinun-an usab, mibiya sa tanan nilang kabtangan ug pamilya aron sa pagsunod kang Hesus ug pagsangyaw sa Maayong Balita. Sa pag-ingon ni Pedro niini, nahibalo nang daan si Hesus kung asa padulong ang iyang isulti: ang pagpangutana kung unsa ang ilang makuha o balos sa pagsunod Kaniya. Sa wala pa kini napangutana ni Pedro, nahatag na ni Hesus ang tubag: "Makadawat siyag ginatos ka mga balay, mga igsuon, mga inahan, mga anak, ug mga uma -- bisan tuod ug lutoson siya; ug sa umaabot nga kalibutan makadawat siya sa kinabuhing dayon." (Mk. 10:30) Bisan pa man ug biyaan ang pamilya, makabaton gihapon kita ug ginatos nga amahan, inahan, igsuon, ug bisan anak. Pero wala kini nagpasabot sa literal nga kahulugan. Ang mga tawo nga atong nakasalamuha, nakauban sa pag-serbisyo, ug nasilbihan mao ang atong mamahimong pamilya. Ang mga butang nga atong mabiyaan, mapulihan ug ginatos pa gyud. Kining tanan tungod sa atong pagsunod sa Ginoo. Mao kining tanan ang Iyang balos. Mamahimo na kitang usa ka dakong pamilya sa Ginoo nga nag-inambitay sa atong mga katigayunan. Sa ulahing bahin, miingon si Hesus nga "daghan karon ang nahiuna, maulahi; ug daghan karon nga naulahi, mahiuna." (Mk. 10:31) Unsa may buot ipasabot niini? Kung tan-awon nato ang usa ka triangle, naay talinis nga tumoy ug laing duha ka talinis sa ubos. Ang mga naa sa tumoy mao ang mga mapasigarbuhon. Kini sila naghuna-huna nga sa tanang mga butang sila ang mahiuna, Kay ngano man? Kay sila man ang anaay kwarta, bahandi, koneksiyon, ug uban pa. Apan makaya ba kaha niining mga tawhana nga nahiuna, ang mobiya sa tanan nga anaa nila ug mosunod sa Ginoo? Nakahinumdom ba kamo sa estorya sa usa ka datong batan-on nga gustong mosunod ni Hesus? Nasunod niya tanang mga kasuguan apan dili niya makaya ug hatag ang tanan niyang mga bahandi ngadto sa mga kabus, nga mao ang gisugo ni Hesus kaniya. (Mk. 10:17-22) Kung buot ta nga mosunod sa Ginoo, kinahanglan nga ato ipaubos ang atong kaugalingon ug ipatigbabaw ang Ginoo sa atong kinabuhi. Ang duha ka talinis sa ubos sa triangle, mao kini ang mga naulahi sa kalibutan apan mahiuna sa gingharian sa Langit. Kini mao ang mga kabus ug mga ubos sa mata sa kalibutan apan adunay naghatag-bili sa Maayong Balita. Mao kini ang logic sa giingon nga ang magpaubos, ipataas ug ang magpataas, ipaubos. (Mt. 23:12)

Nan, kita, mga igsuon, nakapangutana ba kita kung unsa ang ibalos sa Ginoo kanato sa atong pagsunod Kaniya? Nagpadayon ba kita sa pagpaubos sa atong kaugalingon aron makaambit kita sa kinabuhing dayon sa umaabot nga kalibutan?

25/05/2026

“Receive the Holy Spirit.”
— John 20:22 🔥🕊️

Pentecost Sunday reminds us, nga ang Espiritu Santo dili lamang regalo gikan sa Ginoo, kundili mao usab kini ang naghatag kanato ug kusog aron magpadayon bisan sa kahadlok ug kalisod sa kinabuhi. Sama sa mga Apostoles, kita gitawag usab nga mahimong maisog sa pagpakita sa gugma, pagtoo, ug paglaum ngadto sa uban.

May we allow the Holy Spirit to guide our hearts, give us peace, and strengthen our faith every single day. Sa matag problema ug kalisod nga atoang gina-atubang matag adlaw, hinaut nga atong hinumdoman nga ang presensya sa Ginoo mao ang tinubdan sa tinuod nga kalinaw ug paglaum.

25/05/2026

LUNES SA IKAWALO NGA SEMANA SULOD SA TUIG | MARY, MOTHER OF THE CHURCH

GOSPEL: Jn. 19:25-34
Duol sa krus ni Hesus nagbarog ang Iyang inahan, si Maria, ug si Maria Magdalena. Sa pagkakita ni hesus sa Iyang inahan ug sa tinun-an nga Iyang gimahal, miingon Siya, "Babaye, siya ang imong anak." Sa tinun-an usab miingon Siya,"Siya ang imong inahan." Ug nagpuyo na si Maria nga inahan ni Hesus sa balay sa tinun-an. Ug miingon si Hesus nga giuhaw Siya. Gihatagan Siya ug espongha nga gisawsaw sa s**a ug miingon Siya, "Natapos na!" Miduko Siya ug namatay. Tungod kay adlaw man kadto sa Pagpangandam, gihangyo ang mga kadagkoan sa mga Judio nga balion ang mga bitiis sa mga tawo nga gilansang sa krus. Pagkakita nila nga patay na si Hesus, wala nila bali-a ang Iyang bitiis apan ginamit ang bangkaw, giduslak sa usa ka sundalo ang Iyang kilid ug mibuhagay ang dugo ug tubig.

Isip usa ka inahan sa Ginoong Hesukristo, natuman sa Birhen Maria ang iyang katungdanan. Gikan sa pagsabak, pag-amuma, pagpadako, pagbantay, ug bisan pa gani pag-uban hangtud sa tiilan sa krus, bulahan gayud siya labaw sa tanan. Isip usa ka inahan, dili lalim ang makita ang imong anak nga nag-antos hilabi na knug nahibalo ka nga wala'y sayop ang imong anak. Sa katungdanan ni Birhen Maria sa kinabuhi ni Hesus, nasaksihan niya ang tanang kaagi ni Hesukristo. Sa tiilan sa krus, gitugyan ni Hesus ang Iyang inahan ngadto sa Iyang tinun-an ug ang Iyang tinun-an ngadto sa Iyang inahan. Kini nagpakita nga andam Siya nga itugyan ang Iyang tinun-an (ang Simbahan) ngadto sa Iyang inahan. Busa, nahimong inahan nato ang Birhen Maria. Ug isip inahan sa atong Manunubos ug inahan usab nato, siya usa ka modelo sa pagsunod sa atong Ginoo. Gikan sa pagpamati ug pagsunod sa plano sa Dios bisan pa man ug wala siya mahibalo niini hangtud sa pagpabilin sa tiilan sa krus. Giawhag kita nga mosunod sa inahan paingon sa iyang Anak.

Mga igsuon, isip mga Kristiyano, nasunod ba nato ang kamasinugtanon sa atong Inahan? Ato bang gihimo nga modelo ang Birhen Maria sa atong kinabuhing matuohon ug espirituhanon?

24/05/2026

"Delight yourself in the Lord, and He will give you the desires of your heart.”
– Psalm 37:4

Before this day ends, Happy Birthday, Flowie Eve! 🌸

May God continue to bless your life, guide your dreams, ug hinaut nga hatagan ka pirmi ni Lord ug baskog nga pang-lawas, kalipay ug kalinaw sa imong kasing-kasing.

Thank you for being such a kind and wonderful person sa mga tawo around you. Padayon lang sa pag-serbisyo kanunay, stay humble, ug ayaw kalimot nga daghan kaayong tao ang nag-appreciate ug naghigugma nimo. ✨

Enjoy your special day, Flowie! And continue trusting God in every step sa imong journey. Stay blessed always and keep smiling! 💛

24/05/2026

DOMINGO SA PENTECOSTES

GOSPEL: Jn. 20:19-23
Niadtong Dominggoha, nagtapok ang mga tiun-an sa usa ka lawak ug gitrangkahan nila kay nahadlok man sila. Mitungha si Hesus sa ilang taliwala ug miingon, "Mainyo ang kalinaw." Gipakita Niya ang Iyang mga kamot ug tiil ug miingon pag-usab, "Mainyo ang kalinaw." Ug gihuypan Niya sila sa Espiritu Santo. Gipadala Niya sila, sama nga Siya pinadala sa Amahan. Gibilinan sila nga kung si kinsa ang ilang pasayluon, pasayluon usab sa langit ug ang dili pasayluon, dili usab pasayluon sa langit.

Sa pagkamatay ni Hesus isip usa ka Manluluwas, nasubo ang mga tinun-an. Gawas pa niini, nangahadlok sila sa mga awtoridad sa mga Hudio kay basin dakpon sila ug lutuson. Nanago sila sa usa ka lawak, diin ilang gitrangkahan ang pultahan. Karong Dominggoha, gisangyaw sa Ebanghelyo ang pagtungha sa Ginoong Hesukristo ngadto sa Iyang mga tinun-an uban sa pag-ingon, "Mainyo unta ang kalinaw." (Jn. 20:19) Sa pagsulti Niya niini, nahanaw ang mga negatibo nga pamati sa mga tinun-an. Gipakita ni Hesus kanila ang Iyang mga samad sa kamo, sa tiil, ug sa Iyang kilid. Kini pagpamatuod nga Siya tinuod nga uban kanila, ug dili Siya usa ka multo o kalag o espirito. Uban sa pagtuo sa mga tinun-an sa ilang nakita, nahibalik ang ilang paglaum ug pagkatinun-an ni Hesus. Na-restore sila sa Ginoo. Ug gitagaan sila sa ilang misyon nga inubanan sa Espiritu Santo sa dihang gitayhupan sila. Ang Espiritu Santo mao ang ilang giya sa pagsangyaw sa Maayong Balita. Gawas pa niini, giingnan sila nga kung kinsang mga sala ang ilang pasayluon, pasayluon kini ug ang dili nila pasayluon, dili usab Niya pasayluon. (Jn. 20:23) Kini nga awtoridad gihatag ni Hesus ngadto sa Iyang mga tinun-an, usa ka timaan nga sila pinadala Niya. Sama nga Siya gipadala sa Amahan, sila usab gipadala ni Hesus. (Jn. 20:21)

Mga igsuon, karong Dominggoha, nasaksihan ta ang assignment sa Ginoong Hesukristo ngadto sa Iyang mga tinun-an pinaagi sa pagpadala sa Espiritu Santo ngadto kanila. Kita usab mga pinadala. Sa unsang paagi man kita magpabilin nga magmatinud-anon sa tahas nga gihatag sa Ginoo kanato?

23/05/2026

When your editing team is tired pero dasig gihapon mopasimba ug magpahibalo sa mga kalihukan sa Dominggo.

See you all tomorrow, mga ka-brothers and sisters! 🥰

MASS SCHEDULES: 6AM, 8AM, 10AM, 3PM, & 5PM

PYM UPDATES:
1PM-5PM - Kalakbai ni Maria -Masulog cluster
6PM - Jam2x after mass

Tomorrow is Pentecost Sunday! 🕊🔥

23/05/2026

SABADO SA IKAPITO NGA SEMANA SA PASKO SA PAGKABANHAW

GOSPEL: Jn. 21:20-25
Si Hesus gipangutana ni Pedro mahitungod sa tinun-an nga Iyang pinangga kung unsa ang dangatan niining tawhana. Siya kadtong tinun-an nga nagpa-uraray sa dughan ni Hesus sa ilang pagpanihapon ug nangutana kung si kinsa ang magbudhi Niya. Gitubag si Pedro ni Hesus nga unsay labot ni Pedro kung buot Niya nga magpabiling buhi ang kining tinun-an. Ug mikaylap ang balita nga dili mamatay ang kini nga tniun-an apan wala miingon si Hesus ug bisan unsa mahitungod niini. Kini nga tinun-an mao ang nagsulat niining mga butanga. Daghan pa kaayo ug butang nga nabuhat si Hesus apan dili kapaigo ang mga kasudlan sa sinulat ang tibuok kalibutan.

Sa atong pagka-sumusunod o estudyante o bisan anak, aduna'y mga panahon nga maka-kwestiyon ta sa atong magtutudlo, ginikanan, o lider sa usa sa atong kauban. Example, kung aduna kita'y kauban nga may nabuhat nga dili nato mauyunan, makapangutana kita sa atong magtutudlo kung unsay mahitabo niining tawhana. Ma-curious ta kung unsa'y padulngan sa tawo. Sa atong mga mata, nakalapas kining tawhana sa balaod isip sumusunod. Sama sa nahitabo kang Pedro nga gi-kwestiyon niya ang kahimtang ug ang padulngan ni Juan sa pagka-sumusunod ni Hesus. Oo, si Juan nga mao ang pinangga nga disipulo ni Hesus. Siya mao ang tinun-an nga misandig sa dughan ni Hesus sa Katapusang Panihapon ug nangutana kung si kinsa ang mobudhi o mo-betray ni Hesus. Gitubag si Pedro ni Hesus ug, "Kon buot Ko nga siya magpabiling buhi hangtod sa Akong pagbalik, unsa may labot nimo? Sunod lamang Kanako!" (Jn. 21:22) Nagpasabot kini nga ang gugma ug kaluoy sa Ginoo, dili limitado sa huna-huna sa tawo. Usahay, kita na mismo ang mo-judge kung unsay padulngan sa usa ka tawo. Ang tubag ni Hesus nagka-hulugan nga dili mag-agad sa emosyon ug huna-huna sa tawo ang kaluoy ug gugma sa Ginoo. Kay ang huna-huna sa tawo, dili sama sa huna-huna sa tawo. (Is. 55:8-9) Apan ang gisulti ni Hesus mao nga mosunod lamang si Pedro Kaniya. Buot pasabot, dili kita magpa-distract sa unsay panghitabo sa kalibutan ug sa atong mga kauban. Apan wala kini nagpasabot nga atoa silang pasagdan. Hinuon, kinahanglan nga dili nato kalimtan ang atong tahas nga gisangon sa Ginoo kanato. Ang mga sitwasyon nga kinahanglan ang kaalam sa Dios, ibilin kini sa Dios. Ug ang alang kanato, mao ang atong lihukon. Dili ta magpa-maymay. Hmmmm.

Mga igsuon, sa unsang paagi kita magpabilin nga nagtutok sa Ginoong Hesukristo ug sa pagsunod Kaniya? Sa unsang paagi nga dili kita ma-distract sa mga panghitabo sa atong palibot?

22/05/2026

BIYERNES SA IKAPITONG SEMANA SA PASKO SA PAGKABANHAW | SANTA RITA SA CASCIA, Relihiyosa

GOSPEL: Jn. 21:15-19
Pagkahuman sa pagpakita ni Hesus sa Iyang mga tinun-an ug sa ilang pagpangaon didto sa lanaw, gipangutana ni Hesus si Simon Pedro kung gihigugma ba siya ni Simon. Mitubag si Simon Pedro, "Oo, Ginoo, nasayod Ka nga gihigugma ko Ikaw." Ikatulo nga higayon nga gipangutana si Simon Pedro ni Hesus niini ug ikatulo usab nga higayon nga pareha ang iyang tubag ngadto sa Ginoo. Ug moingon si Hesus "Atimana ang akong mga karnero." Sa ikatulo nga higayon, naguol si Simon Pedro. Sa katapusan miingon si Hesus nga sa bata pa si Simon Pedro, siya lamang ang nagbakos sa iyang kaugalingon ug makaadto siya kung asa niya gusto apan sa dako na siya, idupa na niya ang iyang mga kamot ug lain na ang magbakos kaniya ug dili na siya makabuot kung asa siya makaadto. Gisulti kini ni Hesus aron pagpasabot sa paagi nga mamatay si Pedro aron sa paghimaya sa Dios. Ug miingon si Hesus, "Sunod kanako!"

Panahon sa Semana Santa, hilabi na sa Pasyon sa Ginoo, gipakita kanato ang kaagi sa Ginoong Hesukristo gikan sa tanaman sa Getsemane ngadto sa paglansang Kaniya sa krus ug Iyang pagkamatay. Sa tanaman, nagkatibulaag ang mga tinun-an sa dihang gidakop sa mga sundalo ug guwardiya sa mga Pariseo si Hesus. Kining tanang panghitabo-a nahibaw-an na daan ni Hesus. Sa pagdala Kaniya ngadto sa hukmanan, atoa si Simon Pedro. Ang Iyang tinun-an nga miingon nga mosunod Siya kang Hesus bisan asa. Apan gitagna ni Hesus ang Iyang paglimod. Sa Ebanghelyo karon, gipangutana ni Hesus ang gugma ni Simon ngadto Kaniya sa makatulo. Sa ikatulo nga higayon, naguol si Simon kay nahibalo siya nga sa makatulo usab niya gilimod ang Ginoo. Ang gibuhat sa Ginoong Hesukristo mao ang gitawag sa atong pagtuo nga "reinstatement" o ang pagpahibalik sa atong Ginoo kang Simon Pedro sa kung unsa ug kinsa siya: usa ka tinun-an, apostoles, nga nahigugma pag-ayo sa Ginoo, dili mobiya, ug matinud-anon. Sama kanato, bisan pa man sa atong mga kasal-anan ug pagkulang, ipahibalik kita sa Ginoo sa kung kinsa ug unsa kita. Tinuod nga maguol kita kay anaa ang guilt sa atong mga kasaypanan. Ug uban niining paghibalik kanato mao ang pagpadayon sa atong misyon. "Atimana ang akong mga karnero," ingon pa ni Hesus ngadto kang Simon. Nagpasabot kini nga ipapadayon ang misyon nga gihatag kaniya. Mao usab kita. Ipahiuli kita sa Ginoo ngadto Kaniya dili lamang aron malipay kita, kondili aron usab masangyaw o ma-share nato kini nga kalipay ngadto sa uban. Naluwas kita, ug luwason usab Niya sila nga maminaw, mamati, ug mosunod Kaniya pinaagi sa atong pagsangyaw.

Mga igsuon, sa unsang paagi man kita nagpakita sa atong gugma sa Dios? Sa unsang paagi nato gipakita ang atong paghigugma sa atong isigkatawo?Ato bang napakita kanila ang gugma sa Dios?

21/05/2026

HUWEBES SA IKAPITO NGA SEMANA SA PASKO SA PAGKABANHAW

GOSPEL: Jn. 17:20-26
Si Hesus mipadayon ug yahat sa langit ug nag-ampo ngadto sa Amahan. Nag-ampo Siya dili lamang sa kanila nga Iyang mga tinun-an kondili sa uban usab nga motuo Kaniya tungod sa ilang ipadayag nga mensahe. Mausa unta sila sama nga Siya nahiusa sa Amahan aron motuo ang kalibutan nga pinadala Siya sa Amahan. Gihatagan Niya sila sa samang dungog nga gihatag sa Amahan Kaniya. Anaa Siya anila ug nahigugma kanila. Buot Niya nga mahiuban sa mga tinun-an bisan asa Siyaaron makita nila ang himaya nga gihatag sa Amahan. Nakaila Siya sa Amahan ug nakaila usab ang mga tinun-an kay gipaila man Niya sila sa Amahan. Gipaila Niya kanila ang Amahan aron mapadayon nila kini pagbuhat, makabaton sila sa gugma sa Amahan, ug magpuyo si Hesus diha kanila.

Sa wala pa misaka sa langit ang Ginoong Hesukristo, nag-ampo Siya nga mahiusa unta ang mga tinun-an sama nga Siya nahiusa sa Amahan. Sa Ebangghelyo karong adlawa, giuban Niya sa Iyang pag-ampo ang mga tawo nga motuo Kaniya pinaagi sa pagpakaylap sa mga tinun-an. Kini buot Niya aron mahiusa usab sila Kaniya ug sa Amahan. Niining paagiha, makahibalo ug makasabot ang kalibutan nga pinadala sa Amahan si Hesus. Ug tungod niini, maluwas usab sila. Kita nga mga nagtuo Kaniya, gihatagan sa misyon sa pagpakaylap sa Iyang mensahe, gugma, ug mga sugo. Uban niini, ang mga makadungog, mamati, ug mosunod, mahiusa uban kanato ug maluwas. Unsa kadako ang gugma sa Ginoong Hesukristo nga gusto Siya nga mahiusa kitang tanan ngadto sa Amahan ug Kaniya. Miingon usab Siya, "...buot Ko nga bisan asa ako atua usab sila..." (Jn. 17:24) Kanindot sa pamati nga makadungog ta sa pag-ampo sa Ginoong Hesukristo. Nga moingon nga ganahan Siya pirmi ta nga kauban Niya bisan asa Siya moadto. Kanindot paminawon nga bisan dili pa ta magtutuo o huyang pa ang atong pagtuo, gi-ampoan na kita sa Ginoong Hesukristo nga malig-on ug mahiusa uban Niya ug sa Langitnong Amahan. Mga igsuon, brothers and sisters, gipaila sa atong Manunubos kanato kung kinsa ang Amahan aron mabatunan nato ang gugma sa Amahan ngadto sa Anak ug magpuyo ang Anak ngari kanato. Sa kani pa lang daan nga statement, nagpakita nga gusto ang Anak (nga si Hesus) nga mahimo tang Iyang mga igsuon ug magkinabuhi nga anaa Siya uban kanato.

Nan, mga igsuon, sa pagkahibalo nato sa kagustuhan sa atong Kuya Hesus nga mahiusa Kaniya ug sa Amahan, mao ba usab ang atong kagustuhan? Kagustuhan ba usab nato nga mabuhi ug moadto uban ni Hesus sa bisan asa?

20/05/2026

MIYERKULES SA IKAPITO NGA SEMANA SA PASKO SA PAGKABANHAW | SAN BERNARDINO SA SIENA, Pari

GOSPEL: Jn. 17:11-19
Si Hesus mipadayon sa pag-ampo ngadto sa Amahan sa pag-ingon bantayan sila sama nga Iya silang gibantayan samtang nakig-uban Siya kanila. Ang mga tinun-an dili iya niining kalibutan kay namati ug nisunod man sila Kaniya, ug wala sila kahimut-i sa kalibutan tungod niini. Nag-ampo Siya nga bantayan sa Amahan ang mga tinun-an sa Iyang ngalan ug kamatuoran. Gipadala ni Hesus ang mga tinun-an ngadto sa kalibutan sam anga Siya gipadala sa Amahan ngandi sa kalibutan. Gitugyan Niya ang Iyang kaugalingon sa Amahan aron ang mga tinun-an ma-iya usab sa Amahan.

Si Hesus nga pinadala sa Amahan, nagpadala sa Iyang mga tinun-an ngadto sa kalibutan. Sa Iyang pagpadala kanila, nag-ampo Siya nga bantayan sila sa Amahan kay ang kalibutan kasilagan sila. Kasilag buot pasabot, hate. Tungod kay gikasilagan man sa kalibutan si Hesus, amo sad ang buhaton niini ngadto sa Iyang mga tinun-an ug sa ubang Kristiyanos. Nag-ampo si Hesus niining paagiha kay hapit naman ang takna sa Iyang pagbalik. "Ug karon moanha Ako Kanimo: dili na ako magdugay dinhi sa kalibutan, apan magpabilin sila dinhi." (Jn. 17:11) Tungod niini, naguol si Hesus ug uban sa Iyang kaguol mao ang Iyang pag-ampo, "Balaang Amahan, bantayi sila diha sa gahom sa Imong ngalan--ang ngalan nga Imong gihatag kanako..." (Jn. 17:11) Sa kang kinsa nga ngalan mabantayan ang mga tinun-an? Sa ngalan nga gihatag sa Amahan ngadto sa Magtutudlo ug Manluluwas. "In Jesus' name!" kasagaran atong madunggan sa mga exorcist ug sa mga naay giatubang nga pagsuway sa kinabuhi. Sa ngalan ni Hesus kita ma-protektahan, sama nga sa Iyang lawas ug dugo kita giluwas. Sa pag-uban ni Hesus sa mga tinun-an, gibantayan Niya sila ug walay usa kanila nga nawala "gawas niadtong tawo nga mawala gayod -- aron matuman ang Kasulatan." (Jn. 17:12) Bisan sa pagkamatay ni Hesus, walay bisan usa sa mga apostoles ang nasaag gawas ni Judas Iscariote nga mao gayud ang nahisulat sa Kasulatan nga mobudhi Kaniya. Sa katapusan, miingon si Hesus, "Gipadala ko sila sa kalibutan ingon nga ako Imong gipadala nganhi sa kalibutan. Ug tungod kanila gitugyan Ko ang Akong kaugalingon nganhan Kanimo aron maimo usab sila." (Jn. 17:18-19) Si Hesus nga gipadala sa Amahan ug gisultihan sa angay Niyang ipanulti, nagtudlo sa mga tinun-an. Ang mga gipanudlo ni Hesus ngadto sa Iyang mga tinun-an, Iyang gipasa kanila ug sila na ang manudlo niini ngadto sa kalibutan. Mao nga Iyang giingon nga gipadala Niya ang mga tinun-an ngadto sa kalibutan. Sa Iyang pag-ingon nga gitugyan Niya ang Iyang kaugalingon sa Amahan, Siya nahimong pari nga angayan sa paghalad sa sakripisyo ug nahimo usab Siya nga halad o sakripisyo alang sa pagpapasaylo sa mga sala. Ug tungod niining sakripisyo, mahiusa kita uban sa Amahan.

Mga igsuon, unsa man atong mga paningkamut aron kita makaambit sa kahiusahan uban sa Amahan? Naghandum ba kita niining kahiusahan? Wala ba nakawang ang sakripisyo sa Ginoong Hesukristo aron kita mahiusa ngadto sa Amahan?

Soccom Kami

27/05/2026

26/05/2026

25/05/2026

25/05/2026

24/05/2026

24/05/2026

23/05/2026

23/05/2026

22/05/2026

21/05/2026

20/05/2026

Address

Opening Hours

Website

Alerts

Shortcuts

Share

Category