Our Lady of the Sacred Heart Parish Marigondon

28/05/2026

ANNOUNCEMENT | FLORES DE MAYO CULMINATION 2026

Mga kaigsuonan ko diha ni kristo, gi-imbetahan namo kamong tanan sa pagsalmot sa Culmination of Flores De Mayo karong Sabado. Inubanan sa mga representante gikan sa matag clusters, chapels, ug ministries, maghiusa kitang tanan sa pagpasidungog ug paghatag ug debosyon sa atoang Birhen Maria.

📅 May 30, 2026
🕞 Assembly Time: 3:30PM
📿 Living Rosary: 4:00PM

Magkita-kita ta ug magdala sa atong gugma ug pagtuo alang kang Maria.

28/05/2026

HUWEBES SA IKAWALO NGA SEMANA SULOD SA TUIG | FEAST OF OUR LORD JESUS CHRIST, The Eternal High Priest

GOSPEL: Mt. 26:36-42
Si Hesus miadto sa Getsemane uban ang tulo Niya ka mga tinun-an nga sila si Pedro ug ang duha ka mga anak ni Sebedeo (Juan ug Santiago). Giingnan Niya sila nga magtukaw ug mag-ampo uban Kaniya. Milakaw Siya sa unahan ug nag-ampo ngadto sa Amahan tungod sa kopa nga Iyang paga-imnon. Pagbalik Niya sa Iyang mga tinun-an, nangatulog sila ug gipukaw Niya sila. Gipatukaw Niya sila aron dili sila madaog sa panulay. Pag-usab, nag-ampo Siya sa unahan ug miingon nga matuman ang pagbuot sa Amahan.

Karong adlawa gisaulog ta ang kapistahan sa atong Ginoong Hesukristo isip ETERNAL HIGH PRIEST o PANGULONG PARI SA KAHANGTURAN (o WALAY KATAPUSAN). Sa Ebanghelyo karon, gipakita ang grabeng kasubo sa atong Ginoo tungod sa kasakit nga Iyang atubangon. Apan bisan pa man niini, miingon gihapon Siya, "Apan dili ang akong pagbuot maoy matuman kondili ang imo." (Mt. 26:39,42) Usa Siya ka Pangulong Pari tungod sa Iyang misyon sa pagbalaan sa Iyang kaugalingon isip usa ka sakripisyo alang kanato.

Karong adlawa usab, gihagit kita sa Ginoo sa pagbalaan sa atong kaugalingon. Miingon Siya sa Iyang tulo ka tinun-an nga Iyang giuban sa Getsemane, "Pagtukaw kamo ug pag-ampo aron dili kamo madaog sa panulay. Andam ang espiritu apan luya ang lawas." (Mt. 16:41) Ang pagtukaw o pagpabilin nga magmata usa ka simbolo sa pagbantay sa atong palibot. Kay ingon pa ni Hesus nga dili magpadaog sa panulay o tentasyon. Kay wala kita nakig-away niining kalibutana batok sa mga tawo kondili sa mga dautang espiritu ug mga dautang gahom sa kangitngit (Eph. 6:12) Ingon pa usab ni Hesus nga ang atong espiritu willing o andam pero ang lawas mao ang nagluya. Maong kinahanglan nga atong usahon ang atong lawas ug kalag sa pagpakaon sa mga Pulong sa Ginoo, mga igsuon. Dili nato pasagdan ang atong lawas nga madala sa mga butang niining kalibutana. Kay ang atong kaaway nagpaabot lamang nga kita magluya-luya aron masakmit ta ug madala sa gingharian sa kontra.

Mga igsuon, sa hagit sa atong Ginoong Hesukristo, nagpakabana ba kita aron dili kita maluya? Nagpablin ba kitang nagtukaw aron dili madala sa mga panuway niining kalibutana?

23/05/2026

Andam na ba ang mga batan-on sa Marigondon 2? Mag-Kalakbai na kamo karong hapuna!

🌏 𝐌𝐚𝐫𝐢𝐠𝐨𝐧𝐝𝐨𝐧 𝟐 𝐂𝐥𝐮𝐬𝐭𝐞𝐫 — 𝐏𝐚𝐝𝐮𝐥𝐨𝐧𝐠 𝐍𝐚𝐦𝐢!🇰🇭✨

Kalakbai, nakadungog na ba mo? 👀
Usa sa mga destinasyon sa atong pinaka-exciting nga journey karong weekends kay ang majestic nga Cambodia-inspired experience(charot)! 🛕🐘 Murag tinuod gyud nga biyahe paingon sa laing nasud! Pero sa Mar2✈️☁️

Pero dili lang kutob sa Cambodia ang adventure… 🌍Manglakaw usab ta sa nagkadaiyang chapels sa Marigondon 2 Cluster, maghiusa isip usa ka pamilya sa pagtuo, panag-uban, ug kalipay. ❤️⛪

Andam na ba mo mo-travel, mo-explore, ug mo-uban sa pinaka-lingaw nga journey this Weekend? 🌸
Sugdan na nato ang panaw nga puno sa pagtoo,lingaw, ug kaalam! 🎒✨

📍 𝑴𝒂𝒓𝒊𝒈𝒐𝒏𝒅𝒐𝒏 2 𝑪𝒍𝒖𝒔𝒕𝒆𝒓
🗓️ 𝑴𝒂𝒚 23, 2026 | 1:00 𝑷𝑴 – 5:00 𝑷𝑴

✈️ “Dili lang kay biyahe… kundi panaw uban ni Maria.” 💙

03/05/2026

5TH SUNDAY OF EASTER

GOSPEL: Jn. 14:1-12

Jesus is the WAY, the TRUTH, and the LIFE. (Jn. 14:6)

Walay makaadto sa Amahan gawas sa Anak, ug pinaagi sa Anak makaadto kita sa Amahan. Si Hesus nga Anak sa Dios Amahan, usa sa Amahan kay anaa man Kaniya ang Amahan. (Jn. 14:11)

Andaman kita Niya ug lawak sa gingharian sa langit aron dili na kita mabulag Kaniya. (Jn. 14:2-3)

Ang nagtuo Kaniya, makabuhat sa mga butang nga Iyang mga nabuhat, ug mamahimong labaw pa niini kay moadto naman Siya sa Amahan. (Jn. 14:12)

02/05/2026

SABADO SA IKAUPAT NGA SEMANA SA PASKO SA PAGKABANHAW | SAN ATANASIO, Obispo ug Doktor sa Simbahan

GOSPEL: Jn. 14:7-14
Si Hesus miingon sa Iyang mga tinun-an nga nakaila ug nakakita na sila sa Amahan kay nakaila ug nakakita man usab sila Kaniya. Apan si Felipe miingon nga ipakita sa ilaha ang Amahan ug paigo na kana alang kanila. Gipangutana siya ni Hesus kung wala ba gayud siya nasayod nga Siya ug ang Amahan usa ra bisan sa kadugayon na nila nga nag-uban. Ang Amahan anaa kang Hesus ug si Hesus anaa sa Amahan. Ang Amahan nagbuhat sa Iyang kabubut-on diha kang hesus ug ang mga pulong naggikan sa Amahan mismo. Miingon si Hesus nga ang motuo Kaniya, magbuhat sa Iyang mga buhat ug mas molabaw pa ang iyang mga buhat kaysa niini kay moadto man Siya sa Amahan. Buhaton ni Hesus ang bisan unsa nga pangayuon nila sa Iyang ngalan.

Sa atong mga pag-ampo, dili mawala ang pulong sa ulahi, "...pinaagi kang Hesukristo, among Ginoo..." Kini dili lamang tungod kay si Hesus Anak sa Dios, dili usab tungod kay Siya atong Manluluwas lamang. Kini tungod sa Iyang mga pulong gibuhian sa Ebanghelyo karon, "Kon mangayo kamo bisag unsa sa Akong ngalan, buhaton ko kini." (Jn. 14:14) Nganong nakaingon man si Hesus niini? Kini tungod sa Iyang dakong gugma kanato ug tungod kay Siya Anak man sa Dios. Siya ang mo-intervene sa atong mga pag-ampo. Siya Anak man sa Dios mao nga ang Amahan anaa usab Kaniya. Ingon pa niya sa Ebanghelyo ngadto sa Iyang mga tinun-an nga nakaila ug nakakita na sila sa Amahan kay nakita ug nailhan naman nila ang Anak. Mao usab ang Iyang mensahe kanatong tanan. Bisan pa man ug wala nato makita si Hesus sa unod in person, aduna kitay gitawag nga "encounter". Kini nga encounter mao ang mga sitwasyon sa atong kinabuhi nga ma-feel nato ang presensiya sa Ginoo: sa kalipay man o kasakit, sa katawa man o pagbakho. Usa sa best examples mao ang achievements nato sa kinabuhi. Inig kab-ot na nato sa atong mga pangandoy, makapanglingi ta sa atong mga lisod nga kaagi nga kabahin gihapon sa proseso sa atong gitinguha nga pangandoy. Makahinumdom ta sa mga kasakit ug mga luha nga atong naagian. Sa mga kalisdanan sa sitwasyon nga suwayan ang atong abilidad, pasensiya, ug kakugi. Makapadan ba kita? Dili ba ta mo-give up sa atong gitinguha? Kung nihunong ta, dili unta nato makuha ang atong achievements nga nakab-ot karon. Niining mga sitwasyuna, anaa ang Ginoo sa atong kinabuhi. Ug ato lamang mahuna-hunaan nga encounter na kadto sa atong Ginoong Hesukristo sa atong pagbalik tan-aw. Sa pagkatinuod, mga igsuon, kanunay nga anaa ang Ginoo nag-uban kanato apan wala nato kini gihuna-huna. Sama kang Felipe nga kanunay kauban ang Ginoo apan naglibog sa Iyang presensiya. Mihangyo pa siya sa Ginoong Hesukristo nga ipakita kanila ang Amahan bisan pa man ug niingon na ang Ginoo nga nakaila ug nakakita na sila sa Amahan kay nakita ug nakaila man nila Siya nga mao ang Anak. Hmmmm. "Physically present but mentally absent" ang atong igsuong Felipe. Ug mao sad kita usahay sa atong kinabuhi. Mao nga miingon ang Ginoong Hesukristo nga mangayo ta sa pinaagi sa Iyang ngalan kay pinaagi niini, himayaon man ang atong Langitnong Amahan.

Mga igsuon, kanunay ba nato nga na-encounter ang Aginoo sa atong kinabuhi? Kanunay ba kita nga nangayo ug nag-ampo sa Langitnong Amahan pinaagi sa Iyang ngalan?

01/05/2026

BIYERNES SA IKAUPAT NGA SEMANA SA PASKO SA PAGKABANHAW | SAN JOSE ANG MAMUMUO

GOSPEL: Jn. 14:1-6
Si Hesus miingon sa Iyang mga tinun-an nga dili sila angay maguol. Mosalig sila sa Ginoo ug kang Hesus kay adunay daghang lawak nga giandam alang kanila ug andamon kini ni Hesus. Human Niyang mangandam, mobalik Siya aron pagkuha kanila aron bisan asa Siya, atua usab sila. Ug nahibalo sila unsaon pag-adto sa Iyang adtuan. Si Tomas nangutana kang Hesus kon hain Siya paingon ug unsaon pagtultol sa dalan. Si Hesus mitubag, "Ako ang dalan, ang kamatuoran, ug ang kinabuhi; walay makaadto sa Amahan kon dili moagi kanako."

Kung biyaan ta ug usa ka higala o amigo o amiga o paryente o ni bisan kinsa nga duol sa atong kasingkasing kay molakaw siya sa layo nga lugar, diba maguol man ta? Bisan pa man ug moingon nga magkita ra tag balik or mag-communicate ra gihapon ta. Mag-chat or mag-text. Dili mawala ang kaguol, kamingaw, ug kabalaka sa atong kasingkasing. Samot na kung ang lugar kung asa siya padulong, dili pamilyar sa atoa or wala pa ta nakaadto. Mao sad ni ang gibati sa mga tinun-an sa Ebanghelyo karon. Sa wala pa ang Semana Santa, miingon na si Hesus sa Iyang mga tinun-an nga molakaw Siya ug dili sila mamahimong mosunod Kaniya. Asa gani to siya paingon? Oo, sa langit ug sa gingharian sa Dios Amahan. Wala makasabot ang mga tinun-an ani Iyang gipangsulti pero naguol sila bisan sa kalibog. Aron paghatag kasiguruhan kanila, miingon si Hesus sa mga pulong nga andaman Niya sila ug lawak sa gingharian sa Amahan. "Sa balay sa Akong Amahan adunay daghang lawak, ug moadto Ako aron pag-andam og dapit alang kaninyo." (Jn. 13:2-3) Ang larawan sa usa ka balay diin atoa ang Langitnong Amahan ug ang atong Manunubos makahatag gayud ug dakong kalipay. Nagpakita usab kini nga ang Amahan ug ang Kuya Hesus adunay dakong gugma alang kanatong tanan. Dili na Sila ganahan nga mahilayo pa kita kanila kay ingon man si Hesus, "...mobalik Ako ug kuhaon Ko kamo aron bisag asa Ako, atua usab kamo." (Jn. 14:3) Nagpakita kini sa dakong damgo sa usa ka maguwang-igsuon nga dili na ganahan mahilayo sa Iyang mga manghud aron mabantayan Niya sila ug dili na sila mahisalaag pa. Usa ka balay sa langit diin wala nay kasakit. (Rev. 21:4) Ug ang mga kasakit nga atong ginaatubang niining kalibutana, dili ikakumpara sa himaya sa umaabot nga mga adlaw. (Rom. 8:18) Kining tanan, pangandoy ug paglaum sa atong igsuong Hesukristo alang kanatong tanan. Busa, mga igsuon, kinahanglan nga magpadayon kita sa tahas nga gisangon kanato aron mahuptan ug maangkon ta ang promise sa atong Kuya Hesus.

Nan, mga igsuon, sa unsang paagiha kaha nato mas hingpit nga masunod ang mga lakang sa atong kuya Hesukristo aron makab-ot ug mahuptan ta ang pag-adto sa balay sa Langitnong Amahan?

30/04/2026

30/04/2026

HUWEBES SA IKAUPAT NGA SEMANA SA PASKO SA PAGKABANHAW | SAN PIO V, Papa

GOSPEL: Jn. 13:16-20
Samtang si Hesus naghugas sa tiil sa Iyang mga tinun-an, miingon Siya nga walay ulipon nga labaw sa Iyang agalon ni sinugo nga labaw sa nagsugo kaniya. Nakaila si Hesus sa Iyang mga gipili bisan pa man ug kining mga pulonga wala Niya gisulti alang kanilang tanan. Apan, kinahanglan nga matuman ang Kasulatan nga nag-ingon, "Ang tawo nga misalo kanako sa pagkaon nahimo nga akong kaaway." Gisultihan ni Hesus ang Iyang mga tinun-an niini bisan ug wala pa kini mahitabo aron inigkahitabo na niini, motuo sila nga si Hesus nagmatuod sa Iyang giingon, "Ako mao Ako." Ingon pa ni Hesus nga kung si kinsa ang modawat sa Iyang ipadala, nagdawat Kaniya; ug ang modawat Kaniya, modawat sa Iyang ipadala.

Adunay mga sitwasyon sa atong kinabuhi nga budhian kita sa atong higala, minahal, o sa atong kauban. Unsa man ang pagbudhi? Betrayal, pag-traydor, backstabbing. Unsa man ang atong mabati? Kasakit, kalagot, kahiubos, pagmahay, ug uban pa. Kung nakasuway na kita nga gibudhian, mas makasabot ta sa gibati ni Hesus sa dihang gibudhian Siya ni Hudas Escariote. Dili lamang si Hudas ang nagbuhat niini, apil na si Pedro. Ug dili lamang si Pedro ang mibiya sa Ginoong Hesukristo sa dihang gidakop Siya, ang tanang mga tinun-an midagan palayo ug nagtago. Unsa kaha kasakit ang gibati ni Hesus? Ang mga tinun-an nga Iyang gimahal ug gitawag, gisaligan, gitugyanan sa Iyang mga pulong ug sugo, mitalikod ug mibiya Kaniya. Miingon pa si Hesus sa Ebanghelyo nga matuman ang naa sa Kasulatan: "Ang tawo nga misalo kanako sa pagkaon nahimo nga akong kaaway." (Jn. 13:18) Apan, mga igsuon, miingon usab si Hesus nga kining tanan kinahanglan nga mahitabo. Aron pagpakita ug motuo ang mga tinun-an nga si Hesus mao ang pinadala, "Ako mao Ako." Walay lain nga paagi aron mahitabo ang Iyang misyon nga gipabuhat sa Amahan. Kinahanglan nga mahitabo ang tanan. Aron kitang tanan maluwas, kay wala man Niya kini buhata alang lamang sa Iyang kaugalingon kondili tungod ug alang sa Iyang paghigugma sa katawhan. Mao usab ang sa atong kinabuhi. Ang mga pagbudhi sa uban kanato, mao usab ang makaluwas kanato. Niining paagiha, giluwas kita sa Ginoo gikan sa mas makadaot pa nga kaugmaon. Nahitabo kini alang sa atong kaayuhan lamang kay kita gihigugma man Niya.

Sa katapusang bahin, miingon si Hesus nga ang modawat sa Iyang pinadala, modawat Kaniya ug ang modawat Kaniya, modawat gayud sa Iyang ipadala. Mga igsuon, isip mga saksi sa kinabuhi ni Hesus ug sa mga maayong butang nga gibuhat Niya sa atong kinabuhi, dili kini angay nga atuon lamang. Kinahanglan nga atoa kining ipaambit sa uban aron makaila usab sila Kaniya. Nga ang Ginoo nahigugma kanatong tanan ug wala Siyay pinalabi. Nga ang tanan alang lamang sa atong kaayuhan kay pinangga man kita sa Ginoo. Aduna kitay tahas sa pagka-mensahero, pagka-propeta. Ang Ginoo, nabanhaw na!

Nan, mga igsuon, isip mga saksi ug binunyagan sa atong buhing pagtuo, nagtuman ba kita sa tahas nga gisangon sa Ginoo nganhi kanato? Andam na ba kita isip mga mensahero o propeta?

29/04/2026

MIYERKULES SA IKAUPAT NGA SEMANA SA PASKO SA PAGKABANHAW | SANTA CATALINA SA SIENA, Birhen ug Doktor sa Simbahan

GOSPEL: Jn. 12:44-50
Si Hesus miingon sa katawhan nga ang motuo Kaniya wala lamang mituo Kaniya kondili sa Amahan nga nagpadala Kaniya. Ang nakakita kang Hesus, nakakita usab sa Amahan. Mianhi Siya isip kahayag aron dili na magpuyo sa kangitngit ang katawhan. Ang mamati sa Iyang tingog ug dili motuman niini, hukman sa katapusang adlaw pinaagi sa mga pulong nga Iyang gisulti. Ang gipasulti sa Amahan mao ang mga gisulti ni Hesus kay pinadala man Siya sa Amahan. Ug ang mga pulong nga gikan sa Amahan, naghatag ug kinabuhing dayon.

Nakasuway na ta ug blackout sa atong lugar. Ngitngit ang palibot, ngitngit ang balay, ngitngit ang lawak o kwarto. Sa atong kaugalingon, ingon ani usab ang kangitngit sa atong espirituhanong pagkinabuhi kung walay kahayag o suga. Puno sa kalagot, kahiubos, kahadlok, kasina, kapungot, dumot, stress, kakapoy, depression. Si Hesus mao ang kahayag nga mianhi sa kalibutan. Dala Niya ang gugma, kalinaw, paglaum, pagtuo. Kung mamati kita sa pulong sa Dios, malipay ta ug mogaan ang atong pamati. Apan kung taman ra ta sa pagpamati ug wala kita sa buhat, aduna gihapon ang kangitngit. Sama ra na sa gikan ta nanimba. Naminaw ta sa mga pagbasa, nag-awit sa mga kanta ug sa salmo, namati sa Ebanghelyo ug sa sermon sa pari pero inig gawas nato sa simbahan, manglibak gihapon. Mangaway ug silingan o igsuon o higala o bisan gani ginikanan o anak. Mura ra tag kandila nga daling mapalong. Miingon si Hesus, "Ang mamati sa akong mensahe ug dili magtuman niini dili ko hukman." (Jn. 12:47) Kay mianhi man Siya aron sa pagluwas kanato maong dili Siya mao ang mohukom kanato. Nan, kinsa man diay ang mohukom o mo-judge nato? "Adunay mosilot niadtong magsalikway kanako ug dili modawat sa akong mensahe. Ang pulong nga akong gisulti mao unya ang maghukom kaniya sa kataposang adlaw!" (Jn. 12:48) Ang Amahan nga atua sa langit mao ang mohatag sa hukom sa katapusang adlaw. Unsa may ipasabot ni Hesus nga ang pulong nga Iyang gisulti mao ang mohukom kanato sa kataposang adlaw? Hmmmm, kahibalo ta sa mga sugo ug sa mensahe nga Iyang gipangsulti nga gikan usab sa Amahan. Kung kini atong tumanon, then, welcome ta sa langit, mga igsuon! Pero kung dili, kahibalo na ta asa ta padulong. Ang buot pasabot niini, kung unsa ang mensahe nga Iyang gihatag nga gikan sa Amahan, maoy basehan kung asa ta padulong sa katapusang adlaw. Tinuod nga nag-promise ang Ginoong Hesukristo nga hatagan ta sa kinabuhing dayon ug sa kahayag. Ang pangutana, nagbuhat ba sad kita sa angay aron magpabilin sa kahayag ug makabaton sa kinabuhing dayon?

Mga igsuon, brothers and sisters, nagkinabuhi ba kita sa kahayag ni Hesukristo? Nagtuman ba kita sa Iyang mga pulong aron makabaton sa kinabuhing dayon?

28/04/2026

MARTES SA IKAUPAT NGA SEMANA SA PASKO SA PAGKABANHAW | SAN PEDRO CHANEL, Pari ug Martir

GOSPEL: Jn. 10:22-30
Si Hesus gipangutana sa katawhan kung Siya ba gayud ang Mesiyas ug gusto nila nga tug-anan Niya sila. Si Hesus miingon kanila nga gisultihan na Niya sila apan wala sila mituo kay sila dili man sila Iyang mga karnero. Ang Iyang mga karnero Iyang nailhan ug sila mamati ug mosunod Kaniya, aduna silay kinabuhing dayon ug dili na sila mangamatay. Dili usab sila makuha gikan kang Hesus kay gikan man sila sa Amahan nga maoy naghatag kanila ngadto kang Hesus. Kay ang Amahan ug si Hesus usa ra.

Sa atong pagpuyo isip mga Kristohanon, adunay mga pagsuway nga i-test ang atong pagka-sumusunod ni Hesukristo. Tawo lamang kita ug huyang sa atong espirituhanon. Usahay, mas sayon ang manimalos ug ang mosulti ug bakak aron pag-depensa sa atong kaugalingon. Apan dili kini mao ug dili kini sakto. Si Hesus nga atong Maayong Magbalantay nagtudlo kanato sa mga maayong butang ug birtud (virtues). Iya usab kita giingnan nga higugmaon ang atong isigktawo sama sa atong paghigugma sa atong kaugalingon. Ug labaw na nga higugmaon nato ang Dios sa tibuok natong kasingkasing, huna-huna ug kusog. Ingon ni Hesus sa Ebanghelyo, "Ang akong mga karnero mamati sa akong tingog..." (Jn. 10:28). Isip mga sumusunod ni Hesus, giawhag kita sa pagsunod sa Iyang mga binuhatan ug mga gipangtudlo. Sa unsang paagi man nato kini ma-apply sa atong kaugalingon? Daghan. Daghan na ang gitudlo ni Hesus. Apan, sundon nato ang labaw nga mga sugo: paghigugma. PAGTUO, PAGLAUM ug PAGHIGUGMA, apan labaw niining tulo mao ang GUGMA (1 Cor. 13:12-13). Sama nga si Hesus nahigugma kanato ug gihalad ang Iyang kaugalingn, higugmaon usab nato ang atong isigkatawo. Ipakaylap ta ang Iyang gugma pinaagi sa pagbuhat sa ingon ngadto sa uban. Ug ato usab Siya nga ilhon ug maayo.

Sa atong pagkinabuhi isip usa ka Kristiyano, nagsalamin ba kita sa Ginoong Hesukristo? Nagtuo ug nagsalig ba kita Kaniya?

27/04/2026

LUNES SA IKAUPAT NGA SEMANA SA PASKO SA PAGKABANHAW

GOSPEL: Jn. 10:11-18
Miingon si Hesus nga Siya mao ang Maayong Magbalantay. Ang usa ka sinuhulan nga magbalantay mamahimong mobiya sa mga karnero kay dili man siya ang tag-iya niining mga karnero ug milihok lamang siya tungod sa suhol nga gihatag kaniya. Apan kung moabot na ang mabangis nga lobo, biyaan niya ang mga karnero ug madakop ang mga karnero sa lobo. Apan si Hesus, ang Maayong Magbalantay, mamahimong ihatag ang Iyang kaugalingong kinabuhi alang sa Iyang mga karnero. Nakaila Siya sa mga karnero ug ang Iyang mga karnero nakaila Kaniya. Gihigugma Siya sa Amahan tungod sa Iyang paghalad sa Iyang kaugalingong kinabuhi bisan pa man ug mamahimo Niya kining dili buhaton. Gibuhat Niya kini sa Iyang kaugalingong pagbuot lamang.

Nakasuway na ba kita nga nagpabantay ug usa ka butang? Kung nakasuway na kita, naguba ba kini pagkahuman ug pagpabantay? Kung oo, unsa ang atong nabati? Kasakit, kalagot, kahiubos, pagbasol, ug uban pang bati nga mga pagbati ngadto sa nagbantay ug sa atong kaugalingon. Matandi nato ang nabati sa Langitnong Amahan ngari kanato sa dihang nagkatibulaag kita kay wala man kita'y magbalantay. Mao nga Iyang gipadala ang Iyang pinanggang Anak aron mamahimong atong Magbalantay. Ug dili lamang Siya ordinaryo nga Magbalantay, kondili usa ka Maayong Magbalantay. Kini tungod kay Iyahang gi-sakripisyo ang Iyang kinabuhi alang sa atong kaluwasan. Dili Siya sama sa usa ka ordinaryong magbalantay o sinuhulang magbalantay nga biyaan ang mga karnero kung adunay moabot nga mabangis nga lobo. Aduna Siyay tungkod ug igbubugaw nga Iyang gamiton aron sa pag-depensa sa Iyang mga karnero. Miingon pa si Hesus nga adunay mga karnero nga wala mahisakop sa Iyang toril apan miingon si Hesus nga "Kinahanglan dad-on ko usab sila nganhi ug mamati sila sa Akong tingog ug mahimo silang usa na lamang ka panon ubos sa usa ka Magbalantay." Ingon ani kadako ang gugma sa Dios alang kanato! Bisan pa man ug dili kita takos, ang Iyang bugtong Anak mao ang nagpakatakos alang sa atong kaluwasan.