17/07/2022
Diyutay nga Pagpatin-aw sa Pagkahimugso sa Simbahan
1. Unsay pasabot nga matod pa, sa Pentecostes gipanganak ang Simbahan?
Tubag: Kay sa Pentecostes nakompleto ang kinaiya sa Simbahan isip lawas nga dunay kalag nga mao ang Espiritu Santo nga mao usab ang naghatag gahom aron matuman niya ang iyang misyon sa pagtudlo, pagdumala ug pagbalaan, partikular na ang pagbunyag nga maoy nagtukod sa Simbahan. Ang Simbahan isip katilingbang nagmisyon (missionary society) nahimong kompleto (perfect) sa adlaw sa Pentecostes, ug busa gipasidan-an siya sa iyang esposo, sa dili paghawa una sa Jerusalem kon dili pa mokunsad ang gahom sa kahitas-an nga mao ang Espiritu Santo.
2. Unsay pasabot nga ang Simbahan gipanganak sa Kalbaryo, didto sa samad sa kilid ni Kristo?
Tubag: Ang dugo ug tubig nga mibuhagay sa kilid ni Kristo nagsimbolo sa Eukaristiya ug Bunyag nga maoy magtukod sa Simbahan. Sa mga pulong pa sa Konsilyo sa Trento, si Kristo diha sa Iyang kamatayon mao ang meritoryosong causa sa atong pagkamatarong, sa ato pa, usab sa atong pagkahimong sakop sa Simbahan kay ang kalbaryo mao mn ang tuboran sa grasya nga gipalatay diha sa sakramento. Apan dili mahitabo nga moepekto ang sakramento diha sa kalag sa mga tawo kon wala ang Espiritu Santo nga maoy tig-apply sa merito sa kamatayon ni Kristo dinhi kanato. Ug kining Espiritu Santo gipakunsad sa Pentecostes.
3. Unsay pasabot sa pag-ingon ni Santo Tomas de Aquino nga ang Simbahan diha na bisan sa panahon sa Daang Testamento?
Tubag: Ang mga matarong sa Daang Testamento, namatarong tungod sa pagtuo sa Mesiyas nga umaabot uban sa pagtuman sa kasugoan diin sila nahisakop, ug niining paagiha, diha sa estado sa grasya, konektado sila sa espirituhanong paagi sa Simbahan nga tukoron ni Kristo kay ang Simbahan, partikular isip panag-ambitan sa mga santos, mao mn ang pundok sa mga tawo nga anaa sa estado sa grasya ug gipuy-an sa Espiritu Santo. Niining puntoha, ang unibersalidad sa Simbahan gipakita sa iyang pagkamalukpanon diha sa panahon (catholicity in time).
4. Unsay pasabot nga ang Simbahan nahimugso diha sa kasingkasing sa Dios?
Tubag: Planado na siyang daan sa Dios sa wala pa ang kalibotan (CCC, 759).
