26/08/2026
Kaligtasan sa paaralan, pinaiigting; DepEd 12 nagbigay paalala hinggil sa bomb jokes at online threats
Pinaiigting ng Department of Education o DepEd 12 ang mga hakbang para matiyak na ligtas ang mga paaralan sa buong rehiyon, kasabay ng babala laban sa mga bomb jokes at online threats na maaaring magdulot ng panganib sa komunidad.
Ayon kay DepEd 12 Region DRRM Focal sa Education Support Services Division PDO-II Jann Earl Wendell J. Lope, hindi dapat ituring na biro ang anumang uri ng banta lalo na sa mga post sa social media.
Aniya, ang ganitong mga insidente ay seryosong usapin na maaaring magdulot ng pangamba, pagkaantala ng klase, at panganib sa seguridad ng mga mag-aaral, g**o, at kawani.
Bilang bahagi ng pagpapalakas ng school safety, patuloy ang koordinasyon ng DepEd 12 at Police Regional Office 12 sa ilalim ng kanilang partnership upang magsagawa ng mga information drive at lecture sa mga paaralan hinggil sa seguridad at tamang pagtugon sa mga insidente.
Kabilang din sa mga hakbang ang pagpapatupad ng school security audit upang matukoy ang mga posibleng kahinaan at panganib sa bawat paaralan, gayundin ang pagbuo ng mga gabay kung paano reresponde sa oras ng emerhensiya.
Patuloy namang hinikayat ng ahensya ang mga mag-aaral, magulang, g**o, at bawat isa na maging responsable sa paggamit ng social media, agad i-report ang anumang kahina-hinalang mensahe, at makipagtulungan sa mga awtoridad upang mapanatili ang isang ligtas, malaya, at protektadong komunidad.
