Ministry on the Cultural Heritage of the Church - Diocese of Imus

01/05/2026

𝐇𝐮𝐰𝐚𝐫𝐚𝐧 𝐧𝐠 𝐊𝐚𝐬𝐢𝐩𝐚𝐠𝐚𝐧 𝐚𝐭 𝐓𝐚𝐩𝐚𝐭 𝐧𝐚 𝐏𝐚𝐠𝐥𝐢𝐥𝐢𝐧𝐠𝐤𝐨𝐝

Ngayong Kapistahan ni San Jose Manggagawa, ibinabahagi natin ang panalangin sa huwaran ng kasipagan at tapat na paglilingkod. Nawa’y gabayan niya ang lahat ng manggagawa, palakasin sa gitna ng pagod, at ipaalala na ang bawat gawaing iniaalay sa Diyos ay nagiging banal.

30/04/2026

𝐀𝐍𝐆 𝐁𝐔𝐖𝐀𝐍 𝐍𝐆 𝐌𝐀𝐘𝐎 𝐀𝐘 𝐏𝐀𝐑𝐀 𝐒𝐀 𝐌𝐀𝐇𝐀𝐋 𝐍𝐀 𝐈𝐍𝐀!

Ang buwan ng Mayo ay para sa Mahal na Birheng Maria—panahong inilaan ng Simbahan upang ialay ang mas taimtim na panalangin, pag-ibig, at pagpupuri sa Ina ng Diyos.

Sa buwang ito, inaalala ang kanyang lubos na pagsunod sa kalooban ng Diyos, ang kanyang pagiging huwaran ng kababaang-loob at pananampalataya, at ang kanyang patuloy na pag-aaruga bilang Ina ng lahat. Sa pamamagitan ng mga bulaklak, nobena, at debosyon, sama-sama nating pinararangalan ang Mahal na Ina na patuloy na gumagabay sa atin tungo kay Kristo.

26/04/2026

¡VIVA TATA KIKO! 🕊️

Nakiisa ang Ministry para sa mga Pamanang Pangkalinangan ng Simbahan sa pagdiriwang ng Lumang Pistang Bayan ng Lungsod ng General Trias, kilala noon bilang San Francisco de Malabon.

Bagaman ang liturhikong kapistahan ni San Francisco de Asis ay tuwing ika-4 ng Oktubre, ang mga taga-General Trias ay tradisyunal na nagdiriwang ng kanyang pistang tag-araw. Gaya sa maraming lugar sa Pilipinas, ipinapalagay na ang pagdaraos ng isa pang pista sa panahon ng tag-init ay dahil kaalinsabay nito ang panahon ng anihan na siya ring pagkakataon ng mga mananampalataya upang magpasalamat sa Panginoon. Praktikal ang pagdaraos ng pista sa tag-araw dahil sa mga ganitong panahon higit na madali ang pagdaraos ng mga prusisyon at paghahanda ng mga piging para sa pista.

Natatangi ang kapistahan sa taong ito dahil kaugnay ito sa isang taong paggunita ng Inang Simbahan sa transitus o pagsilang sa buhay na walang hanggan ni San Francisco, kilalang patron ng mga dukha at ng pangangalaga sa sangnilikha.

Sa araw na ito rin ay pormal na itinalaga ang kanilang bagong kura paroko na si Reb. Padre Ryan Serafin Sasis. Siya ang pinakahuling karagdagan sa mahabang listahan ng mga paring sekular na naglingkod bilang pastol ng parokya mula pa nang itatag ito noong 1753, isa sa mga pinakamatandang parokya sa mga los pueblos bajos (lowland) ng Cavite.

Ama naming San Francisco, kami’y turuan mo, pagmamahal, pagpupuri, pag-aalay sa Diyos!

26/04/2026

𝐓𝐡𝐞 𝐁𝐢𝐬𝐡𝐨𝐩𝐬 𝐨𝐟 𝐈𝐦𝐮𝐬 𝐓𝐡𝐫𝐨𝐮𝐠𝐡 𝐭𝐡𝐞 𝐘𝐞𝐚𝐫𝐬

Over its sixty‑four‑year history, the Diocese of Imus has been shepherded by five bishops whose leadership has profoundly shaped its character and identity.

The Diocese began under the guidance of Most Rev. Artemio G. Casas, DD, its first Bishop and founding shepherd, who also served as Vicar Capitular of the Archdiocese of Manila before his later appointment as Archbishop of Jaro. He was succeeded by Most Rev. Felix P. Perez, DD, the second Bishop of Imus, who governed the Diocese for twenty‑three years and was the great‑grandnephew of nationalist painter Félix Resurrección Hidalgo, as well as a relative of Fernando Canon, a revolutionary officer and classical guitarist; both were close friends of Dr. José Protacio Rizal. The third Bishop, Most Rev. Manuel C. Sobreviñas, DD, continued the Diocese’s pastoral and institutional development during a period marked by transition and growth. He was followed by His Eminence Luis Antonio G. Cardinal Tagle, DD, the fourth Bishop of Imus, who became the first Caviteño Bishop of Imus, the first Caviteño Archbishop of Manila, and the first Caviteño Cardinal to hold a cabinet‑level position in the Vatican. At present, the Diocese is shepherded by Most Rev. Reynaldo G. Evangelista, DD, the fifth Bishop of Imus, who continues to lead the faithful in service, evangelization, and pastoral care.

26/04/2026

DIOCESIS DE IMUS @64
Recuerdo de 64 aniversario de la inaguracion del Diocesis de Imus y tomo posesion del primer Obispo de de Imus Su Excelencia Muy Reverendisimo e Ilustrismo Mons. Artemio Casas y Gabriel DD.

26/04/2026

𝐁𝐀𝐘𝐀𝐍 𝐍𝐆 𝐃𝐈𝐘𝐎𝐒, 𝐌𝐀𝐆𝐁𝐔𝐍𝐘𝐈 𝐊𝐀!

Ngayon ay ginugunita natin ang ika-64 na anibersaryo ng kanonikal na pagtatayo ng Diyosesis ng Imus.

Sa araw na ito noong 1962, pormal na itinalaga ang simbahang parokyal ng Mahal na Birhen Del Pilar sa Imus bilang luklukan ng bagong diyosesis, gayundin si Obispo Artemio G. Casas bilang unang obispo nito.

Una na rito, noong 25 Nobyembre 1961, ay inilabas ni Papa San Juan XXIII ang saligang batas apostolikong “Christi fidelium”. Itinadhana nito ang paghihiwalay ng buong lalawigan ng Cavite mula sa Arikidiyosesis ng Maynila at ang pagtatatag ng isang bagong diyosesis na sumasakop dito.

Mabunyi nating balikan ang ilan sa mga alaala ng mabiyayang tagpong ito sa kasaysayan ng ating Simbahan! Bisitahin ang opisyal na website ng ating Diyosesis: dioceseofimus.org/history

19/04/2026

In Memoriam
𝐑𝐄𝐁. 𝐌𝐎𝐍𝐒. 𝐑𝐎𝐌𝐀𝐍 𝐎. 𝐍𝐎𝐂𝐎𝐍, 𝐏.𝐂.
28 Pebrero 1930 - 18 Abril 2026

Taglay ang pag-asa sa Panginoong Muling Nabuhay, nakikiisa ang ating Ministri sa pagluluksa ng Diyosesis ng Malolos kay Reberendo Monseñor Roman Oracion Nocon.

Tubong General Trias, Cavite, si Mons. Nocon ay inordenang pari noong ika-14 ng Marso 1959 para sa Arkidiyosesis ng Maynila. Nang ihiwalay ang Cavite at Bulacan mula sa Maynila para magkaroon ng sarili nitong mga diyosesis noong 1961, isa siya sa maraming paring Kabitenyong nakadestino noon sa Bulacan. Nagpasiya siyang magpaiwan doon at sa mahabang panahon ay naglingkod sa Diyosesis ng Malolos.

Hinangaan ang kanyang dedikasyon sa paglilingkod, lalo na sa kabila ng kanyang katandaan. Ilang dekada siyang nanatili sa Parokya ng San Ildefonso de Toledo sa Guiguinto pagkatapos ng kanyang termino bilang kura paroko. Doon ay patuloy siyang nagdiwang ng mga Misa at sakramento, dahilan upang maging haligi at halimbawa siya ng ilang henerasyon ng mga mananampalataya sa bayan ng Guiguinto.

Pagkalooban Mo, Panginoon, si Mons. Roman
ng kapayapaang walang hanggan.
Silayan nawa siya ng ilaw na walang katapusan.
Mapanatag nawa siya sa kapayapaan. Amen.

13/04/2026

‘PARA SA PAMANANG PANGKALINANGAN NG SIMBAHAN!’

Ngayong araw, ika-13 ng Abril, nagtungo ang Ministri sa mga Pamanang Pangkalinangan ng Simbahan ng Diyosesis ng Imus sa ating Obispo Reynaldo G. Evangelista, D.D. para sa isang courtesy call.

Tinalakay sa maikling pulong ang ilan sa mga gawain ng ministri sa nakalipas na taon, kabilang ang mga isinagawang fieldwork at documentation activities, gayundin ang pagpapaigting ng mga umiiral na programa. Inilahad din ang mga nakalatag na plano at mga susunod na hakbang ng ministri para sa kasalukuyang taon.

Nagpahayag ang Obispo ng kanyang pakikiisa sa ministri sa pagpapatupad ng mga atas at gawain nito, bilang kabahagi sa pagsasakatuparan ng mga prayoridad pastoral ng Diyosesis ng Imus para sa ebanghelisasyon.

12/04/2026

| IKA-334 NA ANIBERSARYO NG PAGKAKALUKLOK NG MAHAL NA BIRHEN SOLEDAD DE PORTA VAGA SA ERMITA DE PORTA VAGA

Ngayong araw, ginugunita ang makasaysayang pagluklok ng Mahal na Birheng La Virgen de la Soledad de Porta Vaga sa Ermita de Porta Vaga—isang mahalagang sandali noong Abril 12, 1692 na nagpatibay sa kanyang papel bilang “Reina de Cavite,” pinakamatandang larawan ng Birheng Maria sa bansa, at kinikilalang tagapagtanggol at gabay ng mga Caviteño sa loob ng mahigit tatlong siglo.

Ang Larawan ng Birhen ng Soledad ng Porta Vaga ay idineklara bilang isang National Cultural Treasure, patunay sa kanyang pambihirang halaga sa kasaysayan, sining, at pananampalataya ng sambayanang Pilipino.

12/04/2026

09/04/2026

| IKA-178 GUNING TAON NG KAPANGANAKAN NI SAN EZEKIEL MORENO y DIAZ, OAR

Ngayon ang ika-178 anibersaryo ng kapanganakan ni San Ezequiél Moreno, isang paring Recoleto na naglingkod sa Imus at Bacoor, gayundin sa iba pang karatig na lugar.

Isinilang sa lungsod ng Alfaro sa La Rioja, Espanya noong 1848. Sa maagang gulang ay ninais niyang maging pari, at noong 1864 ay umanib siya sa orden ng mga Agustino Recoletos. Kalaunan ay idinestino siya sa Pilipinas upang magmisyon at dumaong sa Puerto ng Cavite noong 1870. Mula noon ay naging bahagi siya ng mga misyong Recoleto sa iba’t ibang panig ng Luzon at Visayas.

Sa Cavite, nakilala si San Ezequiél sa kanyang pagkakawanggawa at sa pagtataguyod ng mga gawaing publiko sa mga nasasakupan ng hacienda ng mga Recoletos. Pangunahin sa kanyang mga nagawa ay ang pagbibigay-tulong sa mga biktima ng epidemya ng kolera at ang pamumuno sa pagsasaayos ng prinsa ng Molino (Molino Dam), isang tugon sa pangangailangan ng mga magsasaka para sa patubig ng mga palayan sa Bacoor at Las Piñas.

Noong 2017, kinilala ng Pambansang Komisyong Pangkasaysayan ng Pilipinas ang kahalagahan ng Molino Dam sa pamamagitan ng pagpapasinaya ng isang panandang pangkasaysayan.

San Ezekiel Moreno, ipanalangin mo kami.