Ilonggong Kristiano

27/08/2026

Santa Monica, Ig-ampo mo kami!

𝗛𝗔𝗡𝗗𝗨𝗠𝗔𝗡𝗔𝗡 𝗡𝗜 𝗦𝗔𝗡𝗧𝗔 𝗠𝗢𝗡𝗜𝗖𝗔

𝗔𝗚𝗨𝗦𝗧𝗢 𝟮𝟳 | Subong nga adlaw ginasaulog sang Santa Iglesia Katolika ang Handumanan ni Santa Monica ukon "Memorial of Saint Monica."

Si Santa Monica amo ang iloy ni San Agustin sang Hippo. Ginadumdom kag ginakilala ini sia sa iya talulopangdon nga kristohananon nga pagkamaayo, partikular sa iya pag-antos nga gintuga sang pagpangbabaye sang iya asawa, kag ang iya mapinangamuyuon nga kabuhi nga nahalad sa pagbag-o sang iya anak, nga nagsulat sing maid-id sang iya relihiyoso nga mga binuhatan kag kabuhi upod sia sa iya Confessions. Isa ka pupolar nga maragtas nagahilibion kon gab-i si Santa Monica sa iya Anak nga si San Agustin.

𝗞𝗔𝗕𝗨𝗛𝗜

Si Santa Monica natawo sa Thagaste (sa subong Souk Ahras, Algeria). Ginapatihan nga isa sia ka Berber kon basehan ang iya ngalan. Nagpakasal sia sang maaga kay Patricius, isa ka pagano nga Romanhon, nga may opisyal nga posisiyon sa Thagaste. Si Patricius may bayolente nga batasan kag immoral nga pagginawi; pareho sa iya iloy. Ang pagpanghatag sang limos, mga buhat kag pagpangamuyo nga pagginawi ni Santa Monica ginakata-an gid ni Patricius, pero ginasiling ginarespeto sia ni Patricius.

May tatlo ka mga bata si Santa Monica nga nakaluwas sa pagkalapsag, duha ka lalaki, si Agustin kag Navigius, kag babayi nga si 'Perpetua' sang Hippo. Indi masekyar ang pagpabunyag sa ila, tuman gid sia nga naghinibi sang nagmasakit si San Agustin. Sa iya pagkalisod ginsingganan niya si Patricius nga pasugtan nga mapabunyagan si Agustin, ginpasugtan sia, pagkatapos ginbawi niya ang iya pagpasugot sang nag-ayo ang bata.

Apang ang kasulhay nga nabatyagan ni Santa Monica sang nag-ayo si San Agustin nahimo nga kabalaka kay ginakabuhi niya ang iya kabuhi sa pagkabalingag, nga siling man niya matamad sia. Sang katapusan ginpa-eskwela sia Madauros. 17 anyos sia kag nagaeskwela retoriko sa Carthage sang napatay si Patricius.

Si Agustin nangin-Manchean sa Carthage. Sang nagpuli sia, ginpaambit niya ang iya pagtamod naangot sa Manchaeismo. Ginpahalin sia ni Monica sa iya lamesa. Apang, ginasiling nga nakaexperyensiya sia sang isa ka talan-awon nga nakakumbinsi sa iya nga magpakig-uli sa iya anak.

Sa tiempo nga ini nagbisita sia sa isa ka wala makilala nga Obispo nga nag-ulo-ulo sa mga pulong, "Ang anak sang amo nga mga luha indi mawala." Ginsundan ni Monica ang iya balingag nga anak sa Roma, nga sekreto nagkadto sia. Sang nakaabot na sia, si Agustin nakalakat na sa Milan, apang ginsunod niya ini. Dire nakilala niya si Ambrosio kag paagi sa iya nakita na ni Santa Monica nga makonbertir na si Agustin sa Kristianismo matapos sang 17 ka tuig nga pagpamatok.

Si Santa Monica kag ang iya anak nag-istar nga malinong sa Rus Cassiciacum (sa subong Cassago Brianza). Sa tapos mabunyagan si San Agustin ni Ambrosio sa Simbahan sang St. john the Baptist sa Milan. Si Santa Monica kag San Agustin nagbiya sa Africa kag nagpanaglakaton, nagpundo sila sa Civitavecchia kag sa Ostia.
Diri napatay si Santa Monica, kag ang pagpangasubo ni San Agustin naghatag sang inspirasyon sa iya nga "Confessions".

Santa Monica, Ig-ampo mo kami!

25/08/2026

San David Lewis, Ig-ampo mo kami!

𝗛𝗔𝗡𝗗𝗨𝗠𝗔𝗡𝗔𝗡 𝗡𝗜 𝗦𝗔𝗡 𝗗𝗔𝗩𝗜𝗗 𝗟𝗘𝗪𝗜𝗦

𝗔𝗚𝗨𝗦𝗧𝗢 𝟮𝟲 | Subong nga adlaw, ginasaulog sang Santa Iglesia Katolika ang Handumanan ni San David Lewis ukon Memorial of Saint David Lewish

Isa sia ka katoliko nga Hewsita nga Pari kag martir, kilala man sia nga si Charles Baker.

𝗞𝗔𝗕𝗨𝗛𝗜

Si San David Lewis, kilala man bilang San David sang Wales, natawo sa Abergavenny, Wales, sang 1616. Siya ang manghod sa siyam ka mga mag-ulutod sa isa ka Protestante nga pamilya. Apang sang nag-edad siya sang 16 anyos, nagbag-o siya sang relihiyon kag nangin Katoliko, isa ka delikado kag maisog nga desisyon sa panahon nga may mabaskog nga pagkontra sa mga Katoliko sa Inglatera kag Wales.

Pagkatapos sang iya konbersiyon, nagbiyahe si David Lewis sa Roma kag nagtuon sa English College, diin siya ginordinahan bilang pari sang Katoliko sang tuig 1642. Pagkatapos sang iya ordinasyon, nangin heswita siya kag nagserbisyo sang pila ka tuig sa komunidad sang mga Katoliko sa Inglatera. Sang 1647, nagbalik siya sa Wales kag ginlubos ang masunod nga 30 ka tuig sa pagministeryo sa mga Katoliko sa lugar, masami sa sekreto tungod sa mga layi batok sa pagpraktisar sang Katoliko.

Nangin pinalangga nga pigura si Padre Lewis sa komunidad tungod sa iya wala untat nga dedikasyon sa pagserbisyo sa espirituhanon nga kinahanglanon sang iya mga katawhan. Nagaselebrar siya sang Misa, nagahatag sang mga sakramento, kag nagahatag sang kalipay sa mga masakiton kag nagakinahanglan, bisan pa man sa kabudlay kag peligro. Kilala siya sa iya pagkamalumo, pagkamapainubuson, kag madalom nga pagtuo.

Apang, sa panahon sang anti-Katolika nga kasubo nga ginatawag nga Popish Plot sang 1678, isa ka peke nga konspirasiya nga nagaangkon nga ginaplano ang pagpatay kay Haring Carlos II kag pagbulos sa iya sang isa ka Katoliko nga monarko, nadakpan si Padre Lewis. Gin-aresto siya bilang isa ka Katoliko nga pari kag tungod sa ginasiling nga krimen nga paghiwat sang Misa, nga illegal sa amo nga panahon.

Bisan pa man sa kakulang sang ebidensya kag kwestiyonable nga kabangdanan sang mga kaso, ginhukman si David Lewis nga patyon. Ginsentensiyahan sia nga bitayon, ginpaguyod sa kabayo kag gin-utod ang iya lawas sa apat ka tunga kag ginalapta sang Agosto 27, 1679, sa Usk, Monmouthshire. Ang iya eksekusiyon kabahin sang masmalapad nga persikusiyon batok sa mga Katoliko sa amo nga panahon.

Si San David Lewis gindeklarar nga santo ni Pope Paul VI sa Oktubre 25, 1970, bilang isa sa mga Apat ka Pulo ka Martir sang Inglatera kag Wales.

SAN DAVID LEWIS, IG-AMPO MO KAMI!

25/08/2026

Ngaa ginatawag naton si Maria Reyna?

25/08/2026

San Jose Calasanz, Ig-ampo mo kami!

𝗛𝗔𝗡𝗗𝗨𝗠𝗔𝗡𝗔𝗡 𝗡𝗜 𝗦𝗔𝗡 𝗝𝗢𝗦𝗘 𝗖𝗔𝗟𝗔𝗦𝗔𝗡𝗭

𝗔𝗚𝗢𝗦𝗧𝗢 𝟮𝟱 | Subong nga adlaw, ginasaulog sang Santa Iglesia Katolika ang Handumanan ni San Jose de Calasanz (Saint Joseph Calasanz).

Isa siya ka pari nga Kastila nga kilala bilang tagtukod sang una nga libre nga eskwelahan para sa mga kabataan kag sang Orden nga ginatawag nga Piarists (Order of Poor Clerics Regular of the Mother of God of the Pious Schools). Kilala siya nga “Amay sang Kristiyanong Edukasyon” bangud sa iya handum nga ang tanan nga kabataan, bisan mga imol, makabaton sang pagtudlo kag pagtuon nga may kabug-os sang pamaagi.

𝗞𝗔𝗕𝗨𝗛𝗜

Si Jose natawo sa Peralta de la Sal, Aragon, España, sang Septiyembre 11, 1557. Bata pa siya, nakita na ang iya kaluyag nga mag-alagad sa Dios. Pagkatapos sang iya pagtuon sa teolohiya kag balaud kanon ukon canon law, gin-ordinahan siya nga pari sang 1583.

Nagserbisyo siya sa España sa nagkalainlain nga buluhaton, apang sang 1592, nagsaylo siya sa Roma. Didto, nakit-an niya ang kabudlayan sang kabataan nga imol kag wala sing maayo nga edukasyon. Ginbuksan niya ang isa ka gamay nga eskwelahan sa simbahan sang Santa Dorotea sang 1597—ini amo ang sinugdanan sang Pious Schools.

Ang iya motto amo ang: “Pagkadiosnon kag Pagtuon” (Pietas et Litterae).
Damo siya nga gin-atubang nga pagsupak, kapigadohon, kag kalisod, apang nagpadayon siya sa pagtuo kag paglaum. Napatay siya sa Roma sang Agosto 25, 1648, sa edad nga 90 anyos.

Ginproklamar siya nga Santo ni Papa Clement XIII sang 1767.

𝗣𝗔𝗧𝗥𝗢𝗡𝗔𝗧𝗢

Si San Jose Calasanz ginapangayuan bulig sang mga:

• Mga maestro kag eskwelahan
• Mga kabataan nga nagatoon
• Mga kubos nga ginahandom nga makabaton edukasyon
• Mga institusyon sang Kristiyanong pagtudlo

𝗦𝗔𝗡 𝗝𝗢𝗦𝗘 𝗖𝗔𝗟𝗔𝗦𝗔𝗡𝗭, 𝗜𝗚-𝗔𝗠𝗣𝗢 𝗠𝗢 𝗞𝗔𝗠𝗜!

23/08/2026

San Bartolome, Ig-ampo mo kami!

𝗞𝗔𝗣𝗜𝗘𝗦𝗧𝗔𝗛𝗔𝗡 𝗡𝗜 𝗔𝗣𝗢𝗦𝗧𝗢𝗟 𝗦𝗔𝗡 𝗕𝗔𝗥𝗧𝗢𝗟𝗢𝗠𝗘

𝗔𝗚𝗨𝗦𝗧𝗢 𝟮𝟰 | Subong nga adlaw, ginasaulog sang Santa Iglesia Katolika ang Kapiestahan ni San Bartolome Apostol ukon "Feast of Saint Bartholomew, Apostle"

Si San Bartolome isa sa dose ka mga apostoles ni Jesu-Cristo, suno sa Bag-o nga Kasugtanan. Ginpatay sia bangod sa pagkonberter niya kay Polymius, Hari sang Armenia, sa Kristianismo. Ginakilala man sia nga si Nataniel, nga nakita sa Ebanghelyo ni Juan nga ginpakilala kay Jesus ni San Felipe (nga isa man ka apostol, Juan 1:43-51).

𝗞𝗔𝗕𝗨𝗛𝗜

Si San Bartolome natawo sang 1 nga siglo A.D. sa Cana, Galilea, Emperyo Romano. Ang ngalan nga Bartolome nagakahulogan "Anak ni Talmai" ukon "Mangungoma'" "Anak sang Inarado."

Ginmitlang sia nga ikaanom nga apostol sa tatlo ka mga Ebanghelyo (Mateo 10:3; Marcos 3:18; Lucas 6:14), kag ikapito sa libro sang Binuhatan (1:3). Nakasulat man nga isa sia sa mga saksi sang pagkayab ni Jesus sa langit (Binuhatan 1:4, 12, 13)

Matapos sang pagkabanhaw ni Jesus, tradisyonal nga ginapatihan nga nagkadto kag nagwali sia sa India kag Armenia.

Suno sa tradisyon, ginpatay si San Bartolome paagi sa pagpanit sa iya nga buhi, amo nga sa iya mga imahe makita naton nga naga-uyat sia sang sundang, sa iban nga depiksiyon ginapakita man nga gina-uyatan niya ang iya panit.

Ang relikya ni San Bartolome yara napahamtang sa Basilika ni San Bartolome sa Benevento, Italya.

San Bartolome, Ig-ampo mo kami!

23/08/2026

Santa Rosa de Lima, Ig-ampo mo kami!

𝗛𝗔𝗡𝗗𝗨𝗠𝗔𝗡𝗔𝗡 𝗡𝗜 𝗦𝗔𝗡𝗧𝗔 𝗥𝗢𝗦𝗔 𝗗𝗘 𝗟𝗜𝗠𝗔

𝗔𝗚𝗨𝗦𝗧𝗢 𝟮𝟯 | Subong nga adlaw, ginasaulog sang Santa Iglesia Katolika ang Handumanan ni Santa Rosa de Lima ukon "Memorial of Saint Rose of Lima"

Si Santa Rosa miyembro sang "Third Order of Saint Dominic" sa Lima, Peru, nga nakilala sa iya kabuhi sa pagpalambo sang katahom kag iya pagtatap sa mga pigado sang siyudad paagi sa iya kaugalingon nga pribado nga pagpanikasog. Sia ang pinakauna nga ginkanonisar nga Santo nga natawo sa mga Amerika.

Santo patron sang pagpangburda, pagpanghardin kag pagpalambo sang mga nakapamukadkad nga mga bulak.

𝗞𝗔𝗕𝗨𝗛𝗜

Si Santa Rosa natawo bilang si Isabel Flores de Oliva sa siyudad sang Lima, Peru sang Abril 20, 1586. Anak sang aristocrata nga pamilya, ang iya ginikanan amo sanday Gaspar Flores isa ka suldado sang Emperyo sang Espanya, natawo sa Puerto Rico kag María de Oliva y Herrera isa ka criollia, tumandok sang Lima.
Ang iya hayo nga "Rosa" ukon "Rose" naghalin sa insidente sang lapsag sia: nagsiling ang isa ka alagad nga nakita niya ang nawong ni Isabel nga nahimo "rosas." Sang 1597 si Isabel ginkonpirmahan sang Arsobispo sang Lima, nga amo man ang nagdeklarar sa iya Santa. Pormal na niya ginkuha ang ngalan nga Rosa sang amo nga tiempo.

Bilang lamharon nga bata, sa pag-ilog sa Dominican Tertiary nga si Santa Catalina de Siena, nag-umpisa sia nga magpuasa tatlo ka beses sa isa ka semana kag nagbuhat sang grabi nga mga penetensiya sa tago. Sang ginadayaw sia sang iya katahom, gingunting ni Santa Rosa ang iya buhok kag ginpahidan sang paminta ang iya itsura, naugot kay nagakanotisyaran sia sang mga lalaki. Ginpangindian niya ang mga nagapaangaluyag sa iya batok sa pagpamatok sang iya mga abyan kag pamilya. Bisan pa ginasabdong sang iya ginikanan, gina-ubos niya ang iya madamo nga oras sa pagpamalandong sa Santisimo Sacramento, nga ginabaton niya adlaw-adlaw, nga isa ka tumalagsahon nga bulohaton sang amo nga tiempo.

Determinado sia nga magkuha sang "Vow of Virginity," nga ginbalabagan sang iya ginikanan nga luyag makapakasal sia. Sang ulihi, bangod sa kasubo, gintagaan sia sang kaugalingon nga kwarto sa ila balay.

Matapos sang adlaw-adlaw nga pagpuasa, permanente sia nga naglikaw sa pagkaon sang karne. Ginbuligan niya ang mga masakiton kag mga ginagutom sa palibot sang ila kumonidad, ginadala niya sila sa iya kwarto kag ginatatap.

Nakuha niya ang atensiyon sang mga prayle sang Dominican Order. Gusto niya magmadre, apang ginbawalan sia sang iya amay, gani nagsulod sia sa Third Order of Saint Dominic samtang naga-istar sa balay sang iya ginikanan. Sang 20 anyos sia ginsuksok niya ang abito sang tertiary kag nagpanaad sang "perpetual virginity". Nagatulog lang sia duha ka oras para damo ang iya oras sa pagpangamuyo. Nagsuksok man sia sang mabug-at nga korona himo sa pilak, nga may magagmay nga tunok sa sulod, sa pag-ilog sa korona nga tunok nga ginsuksok ni Cristo.

Sa onse ka tuig nagkabuhi sia sa amo nga paagi. Nga may pahuway sang kalipay, kag sang ulihi napatay sia sang Agusto 24, 1617, sa bata nga edad nga 31 anyos. Ginasiling nga ginpropesiya niya ang iya kamatayon. Ang iya lubong ginhiwat sa katedral, nga gintambongan sang tanan nga publiko nga mga awtoridad sang lima.

Santa Rosa de Lima, Ig-ampo mo kami!

23/08/2026

𝗠𝗚𝗔 𝗕𝗔𝗟𝗔𝗦𝗔𝗛𝗢𝗡 𝗦𝗔 𝗦𝗔𝗡𝗧𝗢𝗦 𝗡𝗚𝗔 𝗠𝗜𝗦𝗔
Ika-21 nga Dominggo sang Ordinaryo nga Panahon 🟢
Agusto 23, 2026

𝗡𝗔𝗛𝗔𝗨𝗡𝗔 𝗡𝗚𝗔 𝗕𝗔𝗟𝗔𝗦𝗔𝗛𝗢𝗡: (Isaias 22:13-24)

Pagbasa gikan sa Libro ni Isaias
nga Propeta

ANG GINOO nagsiling kay
Sibna nga pangulo sang templo:
"Pahalinon ko ikaw sa imo
obra, kag kuhaon ka sa imo
mataas nga palangakuan! Kon
mahanabo ini, ipadala ko ang
akon alagad nga si Eliakim
nga anak ni Hilkias. Ipasuksok
ko sa iya ang imo kapa kag
ihatag ko sa iya ang tanan nga
kagamhanan nga imo anay sang
una. Mangin kaangay sia sang
amay sa mga tawo sa Jerusalem
kag sa Juda. Hatagan ko sia
sing bug-os nga kagamhanan
sa idalom sang hari, ang kaliwat
ni David. Sia ang magauyat
sang mga yabi sang opisina;
ang iya abrihan wala sing may
magasira, kag ang iya masirhan
wala sing magaabri. Akon
sia palig-unon kaangay sang
palpal, kag magahatag sia sing
kadungganan sa bug-os niya
nga panimalay."

𝗦𝗔𝗟𝗠𝗢 𝗦𝗔 𝗣𝗔𝗚𝗦𝗔𝗕𝗔𝗧: (Salmo 138)

𝗦𝗮𝗯𝗮𝘁: O GINOO, ang imo
gugma nagapadayon sa
walay katapusan. Tapusa ang
hilikuton nga imo ginsugoran.

1. Nagapasalamat ako sa
imo, O GINOO, sa bug-os ko
nga tagipusoon; nagakanta
ako sing pagdayaw sa imo sa
atubangan sang mga anghel.
Nagasimba ako sa atubangan
sang imo balaan nga Templo kag
nagadayaw sa imo ngalan. (S)

2 Tungod sang imo mapinadayunon nga gugma
kag katutom, kay nagpahayag
ka nga ikaw kag ang imo sugo
labaw sa tanan. Ginsabat mo
ako sang nagpanawag ako sa
imo; ginpabakod mo ako sang
imo kusog. (S)

3. Bisan pa nga ang GINOO
yara sa kahitaasan, pero
nagakabalaka sia sa mga kubos,
kag ang mga bugalon indi
makapanago sa iya. O GINOO,
ang imo gugma nagapadayon
sa walay katapusan. Tapusa ang
hilikuton nga imo ginsugoran. (S)

𝗜𝗞𝗔𝗗𝗨𝗛𝗔 𝗡𝗚𝗔 𝗕𝗔𝗟𝗔𝗦𝗔𝗛𝗢𝗡: (Roma 11:33-36)

Pagbasa gikan sa Sulat
San Pablo sa Mga taga-Roma

MGA UTOD:
Daw ano kadamo sang
mga manggad sang Dios!
Daw ano kadalom sang Iya
kaalam kag ihibalo! Sin-o bala
ang makasaysay sang iya mga
paghukom? Sin-o bala ang
makahangop sang iya paagi?
Ang kasulatan nagasiling:
Sin-o bala ang makahibalo
sang hunahona sang Ginoo?
Sin-o bala ang makalaygay sa
iya? Sin-o bala ang may ginhatag
sa Dios, nga ang Dios dapat
magbayad sa iya?
Kay ang tanan nga mga
butang naghalin sa Dios kag ini
tanan tungod sa iya kag para sa
iya sa iya ang himaya nga wala
sing katapusan!
Kabay pa.

𝗔𝗟𝗘𝗟𝗨𝗬𝗔: (Mateo 16:18)

Aleluya, Aleluya! Ikaw
si Pedro, "ang Bato," kag sa
sini nga bato pagatukoron
ko ang akon simbahan. Bisan
ang gahom sang kamatayon
indi makadaog sa iya. Aleluya,
Aleluya!

𝗘𝗕𝗔𝗡𝗚𝗛𝗘𝗟𝗬𝗢: (Mateo 16:13-20)

Pagbasa gikan sa santos nga
Ebanghelyo suno kay Mateo

NAGKADTO SI JESUS sa
kadutaan sang Cesaria Filipo
sa diin nagpamangkot sia sa iya
mga gintuton-an: "Sin-o bala ang
Anak sang Tawo suno sa mga
tawo?"
Nagsabat sila, "May
nagasiling nga si Juan Bautista.
May iban nga nagasiling nga si
Elias, kag may iban pa gid nga
nagasiling nga si Jeremias, ukon
iban nga mga propeta."
Si Jesus nagpamangkot sa ila,
"Pero suno sa inyo, sin-o bala
ako?" Si Simon Pedro nagsabat,
"lkaw ang Kristo, ang Anak sang
Dios nga buhi."
Si Jesus nagsabat, "Bulahan
ka, Simon, anak ni Juan! Kay ini
nga kamatuoran wala ginpaha-
yag sa imo sang tawo, kundi
sang akon Amay sa langit. Kag
ako nagasiling sa imo: ikaw si
Pedro, nga kon sayuron 'Bato,
kag sa sini nga bato pagatukoron
ko ang akon simbahan. Bisan
ang gahom sang kamatayon
indi makadaog sa iya. Ihatag
ko sa imo ang mga yabi sang
Ginharian sang langit, kag kon
ano ang imo ginadumilian sa
duta pagadumilian man didto
sa langit, kag kon ano ang imo
ginatugotan sa duta pagatugotan
man didto sa langit."
Dayon nagpaandam si Jesus
sa iya mga gintuton-an nga indi
nila pag-isugid sa kay sin-o nga
nga sia ang Kristo.

22/08/2026

Maghimaya ka Rayna

𝗠𝗔𝗚𝗛𝗜𝗠𝗔𝗬𝗔 𝗞𝗔 𝗥𝗔𝗬𝗡𝗔
(Hail Holy Queen — Hiligaynon)

Maghimaya ka Rayna, iloy sa kaluoy, kinabuhi, kinatam-is, kag ginalauman namon, maghimaya ka nga nagapangalaba kami sa imo, mga pinanubol nga anak ni Eba, Nagapanghakol kami sa imo, nga nagabakho kag nagatangis diri sining duta nga luhaan. Gani, mag-alampo namon, ilingig mo sa amon ang yanang mata mong maluloy-on. Kag kon sa ubos nga matapos ang pagsubol mo sa amon, ipakita mo sa amon si Jesus bunga santos sang tiyan mo. O maluloy-on, O mahinoklogon, O matam-is Ulay nga Maria.

L: Ig-ampo mo kami O santos nga iloy sang Dios,
S: Agod mangintakus kami sang mga pinanug-an ni Jesu-Cristo nga amon Ginoo. Amen.

𝗟𝗔𝗧𝗜𝗡

Salve, Regina, Mater misericordiae,
vita, dulcedo, et spes nostra, salve.
ad te clamamus exsules filii Hevae,
ad te suspiramus, gementes et flentes
in hac lacrimarum valle.
Eia, ergo, advocata nostra, illos tuos
misericordes oculos ad nos converte;
et Iesum, benedictum fructum ventris tui,
nobis post hoc exsilium ostende.
O clemens, O pia, O dulcis Virgo Maria.

V. Ora pro nobis sancta Dei Genetrix.
R. Ut digni efficiamur promissionibus Christi.

𝗜𝗡𝗚𝗚𝗟𝗘𝗦

Hail, holy Queen, Mother of Mercy,
our life, our sweetness and our hope.
To thee do we cry, poor banished children of Eve;
to thee do we send up our sighs,
mourning and weeping in this valley of tears.
Turn then, most gracious advocate,
thine eyes of mercy toward us;
and after this our exile,
show unto us the blessed fruit of thy womb, Jesus.
O clement, O loving, O sweet Virgin Mary.

V. Pray for us O holy Mother of God,
R. that we may be made worthy of the promises of Christ.

22/08/2026

Santa Maria, Reina sang Langit, Ig-ampo mo kami!

𝗞𝗔𝗣𝗜𝗘𝗦𝗧𝗔𝗛𝗔𝗡 𝗦𝗔𝗡𝗚 𝗣𝗔𝗚𝗞𝗔𝗥𝗔𝗬𝗡𝗔 𝗡𝗜 𝗠𝗔𝗥𝗜𝗔

𝗔𝗚𝗢𝗦𝗧𝗢 𝟮𝟮| Subong nga adlaw, ginasaulog sang Santa Iglesia Katolika ang Kapiestahan sang Pagkarayna ni Maria ukon "Feast of the Queenship of Mary."

Ang kapiestahan nga ini ginasaulog walo ka adlaw pagkatapos sang Solemnidad sang Pagpasaka kay Maria sa Langit (Assumption of Mary) sang Agosto 15. Ang pagbutang sini sa Agosto 22 nagapakita sang malapit nga kaangtanan sang duha ka misteryo: ginpasaka si Maria sa langit sa iya lawas kag kalag, kag didto ginapakita ang iya mahimayaon nga pagkakrayna bilang Iloy sang Hari, si Jesu-Cristo.

𝗦𝗔 𝗔𝗡𝗢 𝗡𝗚𝗔 𝗣𝗔𝗔𝗚𝗜 𝗡𝗔𝗡𝗚𝗜𝗡 𝗥𝗔𝗬𝗡𝗔 𝗔𝗡𝗚 𝗕𝗜𝗥𝗛𝗘𝗡𝗚 𝗠𝗔𝗥𝗜𝗔?

Siling sang iban nga mga tawo nga nagapakamalaut sa Simbahan nga Katoliko, ginkopya lang kuno sang Simbahan sa mga pagano ang titulo nga "Rayna sang Langit" sa kabangdanan sa Daan nga Kasugtanan ang mga pagano may diosa nga ginatawag "rayna sang langit" (Jer. 7:18; 44:17-19,25; 2 Cro. 15:16) gani, nagasiling sila nga ginbaylo ukon ginbulos lang kuno sang Simbahan ang Birheng Maria sa diosa sang mga pagano bangod si Maria ginatawag man naton "rayna".

Sa pagkamatuod, sa Daan nga Kasugtanan ang diosa sang mga pagano nga ginatawag nga "rayna" sang langit ginatawag sa Hebreo nga pulong "meleketh," lain kag indi ini kaangay sa ginharian ni David nga "rayna" nga ginatawag sa Hebreo nga pulong "Gebiyra".

Sa dira, madiferenciar naton ang kinalain sa tunga sang diosa sang mga pagano bilang rayna, kag sang rayna sang ginharian ni David. Ang Simbahan nga Katoliko nagatudlo nga ang Birheng Maria indi isa ka dios ukon diosa, wala ina sia ginasimba, kag ginapatupong ukon ginapalabaw pa sa Dios nga Amay, Anak, kag Espiritu Santo.

𝗔𝗡𝗚 𝗣𝗔𝗚𝗞𝗔𝗥𝗔𝗬𝗡𝗔 𝗡𝗜 𝗕𝗜𝗥𝗛𝗘𝗡𝗚 𝗠𝗔𝗥𝗜𝗔 𝗡𝗔𝗦𝗔𝗡𝗗𝗜𝗚 𝗕𝗜𝗟𝗔𝗡𝗚 𝗦𝗜𝗔 𝗔𝗡𝗚 𝗜𝗟𝗢𝗬 𝗦𝗔𝗡𝗚 𝗔𝗧𝗢𝗡 𝗚𝗜𝗡𝗢𝗢𝗡𝗚 𝗝𝗘𝗦𝗨-𝗖𝗥𝗜𝗦𝗧𝗢

Agod mahangpan naton ang pagkarayna sang Birheng Maria, dapat lubos nga mahangpan naton ang ginharian ni David.

Sa Daan nga Kasugtanan ang rayna indi pirme amo ang asawa sang hari, kundi ang ila iloy, sa kabangdanan may madamo sila nga asawa. Ang rayna sang tanan nga mga hari sang Juda, sa tradisyon sang ginharian ni David amo ang ila iloy, amo ina ang harianon nga patakaran sa Daan nga Kasugtanan, nga ginpanobli kag matuman sa ginharian ni Cristo. Ang Biblia nagasiling:

Isaias 9:7 MBB
Ang iya harianon nga gahom magadugang; Ang iya ginharian malinong sa gihapon. 𝗦𝗶𝗮 [Jesu-Cristo] 𝗮𝗻𝗴 𝗺𝗮𝗴𝗮𝗽𝗮𝗻𝗼𝗯𝗹𝗶 𝘀𝗮𝗻𝗴 𝘁𝗿𝗼𝗻𝗼 𝗻𝗶 𝗗𝗮𝘃𝗶𝗱, magagahom sia sa katarungan kag sa pagkamatarong, halin karon tubtob sa katubtoban. Ang GINOO nga Makagagahom, nagpat-od nga magahimo sini tanan.

Ang Kasulatan nagasiling ang trono ukon ginharian ni David ginalakipan sang "Daku nga babayi" (Great lady) ukon "Iloy nga Rayna" (Queen Mother) sa Hebreo nga pulong "Gebiyrah" (1Hari 15:13; 2Hari 10:13, Jer. 29:2), amo ini ang titulo nga ginahatag sa mga iloy sang Hari. Si Jesu-Cristo amo ang nagpanobli sang ginharian ni David, kag ginpahayag ini sang anghel nga si Gabriel kay Maria:

Lucas 1:31-33 MBB
Yari karon, magabusong ka kag maga-anak sang isa ka bata nga lalaki, kag pagahingalanan mo sia kay Jesus. Mangindaku sia kag pagatawgon nga Anak sang Labing Makagagahom nga Dios. 𝗔𝗻𝗴 𝗚𝗶𝗻𝗼𝗼𝗻𝗴 𝗗𝗶𝗼𝘀 𝗺𝗮𝗴𝗮𝗵𝗶𝗺𝗼 𝘀𝗮 𝗶𝘆𝗮 𝗻𝗴𝗮 𝗛𝗮𝗿𝗶 𝘀𝘂𝗯𝗼𝗻𝗴 𝘀𝗮𝗻𝗴 𝗶𝘆𝗮 𝗮𝗺𝗮𝘆 𝗻𝗴𝗮 𝘀𝗶 𝗗𝗮𝘃𝗶𝗱, kag manginhari sia sing dayon sa mga kaliwat ni Jacob kag ang iya ginharian wala sing katapusan.

Amo ini ang buot silingon, kon ang rayna sa ginharian ni Haring David amo ang iloy sang Hari kag si Jesus amo ang nagpanobli kag matuman sa ginharian niya, busa, si Maria nga iya iloy amo ang iya Rayna—Ang Iloy nga Rayna sang ginharian ni Jesu-Cristo, iya anak nga hari sang tanan. Ang ginharian nga ginadumalahan ni Cristo indi kalibutanon nga ginharian, bisan yari ini sa kalibutan sa iya Simbahan, kundi langitnon nga ginharian, ang ginharian sang Dios. Kag ang rayna sang amo nga ginharian amo ang Birheng Maria, ang iloy sang Dios nga nagpakatawo nga si Jesu-Cristo, hari sang langit, hari sang Israel, kag ang langitnon nga hari sang universo.

Dugang pa, sa Daan nga kasugtanan, sang nagkadto si Batseba kay Haring Salomon nga iya anak sa pagpangabay, gintahod gid sia sang iya anak kag ginhatagan pa ini niya sang pulungkoan nga magpungko sa iya tuo, bangod sia ang iloy nga rayna (1Kings 2:19). Ang iloy nga rayna sang ginharian ni David may korona kag may trono man (Jer. 13:18), kag ginalista gid ang Iloy nga Rayna masunod ukon ikaduha sa Hari dayon iya mga opisyales (Jer. 29:2, 13:18), amo ina ang kaimportante sang iloy nga rayna sa ginharian ni David.

Kag ang tanan nga mga nasambit sa Daan nga Kasugtanan naangot sa iloy nga rayna, isa ka alusyon nga nagakabagay sa Iloy ni Jesu-Cristo nga si Maria, ang matuod nga Rayna sang langit kag naton.

O MARIA RAYNA SANG LANGIT, IG-AMPO KAMI!

21/08/2026

Pila ka Hulobaton ni Papa San Pio X

𝗣𝗨𝗟𝗢 𝗞𝗔 𝗠𝗚𝗔 𝗛𝗨𝗟𝗢𝗕𝗔𝗧𝗢𝗡 𝗡𝗜 𝗦𝗔𝗡 𝗣𝗜𝗢 𝗫

1) "Diin ang dalan nga nagadala sa aton kay Jesu-Cristo? Ara ini sa atubangan sang aton mga mata: ini amo ang simbahan. Katungdanan naton ipahanumdom sa tanan, daku kag gamay, ang daku nga kinahanglanon nga kita magdangop sa sini nga simbahan agod mapanikasugan ang aton walay katubtoban nga kaluwasan."

2) "Natawo ako nga pigado, nagkabuhi ako sa kapigaduhon, kag handom ko mapatay nga pigado."

3) "Ang tanan nga kusog sa paghari ni Satanas ina bangod sa kaluyahon nga pulopatawhay sang mga Katoliko."

4) "Ang Rosaryo ang pinakamatahom kag ang pinakamanggadan sa grasya sa tanan nga mga pangamuyo, ini ang pangamuyo nga nagatandog sing labi sa Kasingkasing sang Iloy sang Dios ... kag kon nagahandum ka sang kalinong nga maghari sa inyo panimalay, pangamuyoa ang Rosaryo upod ang pamilya."

5) "Ang Santos nga Kalawat amo ang pinakamalip-ot kag pinakasigurado nga paagi palangit."

6) "Wala sang bisan ano nga pagpangduhadoha may handom sa tanan nga mga tagipuson nga Kalinong. Apang daw ano nga kabuangan ang sia nga nagapangita sang kalinong nga wala ang Dios; tungod kon ang Dios pagakuhaon, ang Hustisya madula, kag kon ang Hustiya mapaslawan, ang tanan nga paglaom nga kalinong madula."

7) "Kinahanglan ang mga kabataan mabatiti ni Cristo bag-o sila madominadohan sang ila mga hilig, agod sarang sila sa daku nga kaisog nga pamatukan ang pag-atake sang diablo, sa unod, kag sang ila iban pa nga mga kaaway, sa sulod ukon panggwa man."

8) "Matuod nagaagi kita sa makahahalit nga mga panahon, kon kita maghimo sang aton kaugalingon ang panalabiton sang Propeta: 'Wala na sing tawo sa inyo duta nga matutom, nagahigugma, kag nagakilala sa akon' (Oseas 4:1).
"Apang sa tunga sang balod nga ini sang kalaut, ang Birheng Labing Maluloy-on nagatindog sa atubangan sang aton mga mata kasubong sang isa ka balangaw, bilang manuglubad sang Kalinong sa tunga sang Dios kag tawo."

9) "Ang pinakadaku nga balabag sa apostolado sang Simbahan amo ang pagkatamad, ukon ang pagkamatalaw, sang tumuluo.

10) "Pabay-i magwaswas ang bagyo kag ang panganod magdulom - indi dira kita dapat magluya. Kon nagasalig kita subong nga dapat kay Maria, makilala naton sia, ang Birhen nga Labing Gamhanan 'nga paagi sa pagbata gindugmok ang ulo sang man-og. '"