10/05/2026
IN PHOTOS: PATRONAL FIESTA IN HONOR OF ST.JOSEPH
PATRONAGE OF ST.JOSEPH PARISH POTOTAN, ILOILO
“O Senyor San Jose,
matarong ka gid,
ang imong kinabuhi
santos nga matuod…”
Subong nga Mayo 8, 2026 nagsaulog ang Parokya sang Panabang ni Senyor San Jose, banwa sang Pototan, sang tuigan nga kapiestahan nga may tema: “Senyor San Jose, Manabang sang Santa Iglesia, updi kami sa pagpanglakaton".
Ginhiwat ang solemne nga konselebrasyon sang Santos nga Misa sa alas 9 sang aga. Ini ginpangunahan ni Most Rev. Romeo O. Lazo, D.D. Arsobispo Emeritus sang Arkidiosesi sang Jaro. Kag ginupdan sang mga kaparian halin sa iban na parokya sang Arkidiosesi. Masinaulugon nga gintambungan sang mga tumuluo sang banwa sang Pototan kag mga deboto ni Senyor San Jose.
Sa homilya ni Arsobispo Lazo iya ginpahanumdom sa tanan nga si San Jose isa ka simple, panday, matarong nga tawo kag bana ni Maria. Si San Jose ginbaton si Maria nga Iloy ni Hesus - ang aton Manluluwas.
Isa ka huwaran nga tawo si San Jose nga nagatubo ang pagtuo kay iya ginpamatian kag gintuman ang luyag sang Diyos kag nagpatigayon sa pagpatubo kay Hesus.
Kita man mga anak sang Dios nga binunyagan sa pagtuo. May yara kita sang kapasidad sa pagbaton sang grasya sang Dios parehos ni San Jose. Nagatubo man ang aton pagtuo kag ini naga angot sa aton mga binuhatan, ginahambal, ginahikot sa ubra, kag ginapahayag sa katilingban.
Ang pagtuo ni San Jose, huwaran gid sa pagtuman sa direksyon sang pagpanglakaton sa kagustohon sang Diyos. Matuod gid nga mananabang sang Santa Iglesia ang aton Patron nga si Senyor San Jose.
